|
|
 بالبريد الإلكتروني "من ودريا@جي ميل دوت كوم إلى مونج@ياهو دوت كوم"
|
صديقي الأمسخ من موية الترمس مونج يادوب عمل ليهو إيميل على الياهو يقوم صاحبنا ودريا يشوت ليهو رسالة نظام فورورد أها أكلت مع مونج الحكاية وعمل برنت أوت من الرسالة وجاء لي ودريا في بيتو وقال ليهو دا شنو يا وهم.
أها ودريا قال ليهو زعلان مالك يا مونج دي أربعين طريقة لجعل حياتك أفضل
فضحك مونج وقال ليهو 40 عفريت يركبوك إن شاء الله كدي تعال خلينا نمسك كلامك دا حبه حبه ونفندو
أول حاجه قلت لي خصص من وقتك 10 إلى 30 دقيقه للمشي وأنت مبتسم .
أنا عمري كلو كداري يعني بمشي من سته لغاية ثمانية ساعات في اليوم الواحد زي ما إنت عارف يعني في أحسن الأحوال بركب ركشه وحرمتها مؤخراً بعد أن بصق سائق الركشة السفة وتووش ضربة جزاء في وشي ما كان شايت عكس الهوا إبن الأبالسه ، ولمن سخنت معاهو قال لي إنت مطلع رأسك ليه سايق إنت ولا سايق أنا ... تصور
أما حكاية أبتسم دي فما شغالة فنحن من تراث "الضحك بلا سبب قلة أدب" والسب في الزمن العلينا دا إلا تكون حاجة تكلكلك شديد ويكون قدامك كمية بتاعت كوميديا.
قلت لي "اجلس صامتاُ لمدة 10 دقائق يومياُ"
حظي النحس لمن فكرت أطبق نظريتك دي وعند الدقيقة الثالثة من السكوت جاتني المرا شايلة قائمة الطلبات وقالت لي دايرين ودايرين ودايرين ، أها لمن ما رديت عليها قالت لي "يا راجل متبوم مالك بكيت ما بتسمع الطرش الـ ..... الواحد فيكم لمن تغلبو العيشه بعمل فيها بتاع يوغا"
التالته وهي في تقديري ثالثة الأثافي قلت لي "خصص لنومك 7 ساعات يوميًا"
يا أخي حرام عليك أجيب سبعه ساعات من وين هو اليوم كم ساعه وين لي إنقطاع الكهرباء والراجل البيع السمك وسيد الخضار والإتنين ديل بي مايكرفون عديل كده أما بتاع العيش وبتاع اللبن فديل بي بوري هوا المهم كمية بتاعت إزعاج غير العوامل البيئية الأخري من باعوض وضبان وكدايس وكتاحه وأصوات ركشات ودخان لواري وقندرانات وربما صافرة القطارات وأزيز طائرات (هو يعني القطر دا لازم يصفر ، طيب لو ما صفر الحا يحصل شنو).
قلت لي عيش حياتك بثلاث أشياء "الطاقة + الحماس + العاطفة" الطاقة دايره مفتاح والمفتاح عند النجار والنجار عاوز يعني متوالية عدديه طاقة أجيبها من وين من موية الفول والبوش ولا من لبن الإغاثة ولا من أم رقيقه التي أصبحت أرق وأرق وأرق من النسمه بفعل الماجي وإدماننا لها. حماس دي منظمة تحت تحت بيقولو عليها إرهابية ، عاطفه وحنان يا ناس ، يا أخي السودانيين في سوادهم الأعظم بعد سنه ثالثة زواج بشوف في شخص مرتو عسكري يتربص به وتبقي الحياة بيناتهم ناشفه تحاكي اسئلة على شاكلة أجب بلا أو نعم ما فيها فضفضه أو تفاصيل أو إبداع أو حتى خيال كل ما فيها ، أيوه ، لا ، آآي ، لا
قلت لي ألعب ألعاب مسلية يومياً
يعني ألعب شليل ولا سكج بكج ولا الرمه والحراس ، يا أخي تلعب وين وتلعب شنو ديل حتى الميادين بقوا دكاكين وبسط أمن شامل وجامع ودلاله ، مشيت ألعب كوشتينه مع أولاد الحلة لقيت ليك الصف لغاية البوسته أها إنتظرت وأول حريق الحريق ولع والغلاط والله ما رميت الكرت دا لا ورقك زايد لا إنت سرقت لا فلان غمز ليك لقيت أخير منها هلال مريخ قمت إتنفضت وشتت وأنا ألعن في سري الكان السبب.
هذه بعض الردود ووقتها جاء الثلعب وقال للشله البوش جاهز يا شباب. فسكت مونج عن الكلام المباح وحتى ذلك الكلام المفترض نشره في ويكليكس وغيره من مواقع الشمارات
|
|
  
|
|
|
|
almulaomar
فيس بوك
تويتر
انستقرام
يوتيوب
بنتيريست