يعنى ياجماعة الخير الواحد ماينوم الصباح فى البلد دى ولاشنو ؟ياخى انا مامشكله هنالك من هم مرضى وهناك من يعمل حتى الساعات الاولى من الصباح ويعود وهو فى غاية التعب يترنح ويحلم بان يعانق اقرب سرير عشان يروح فى سبات عميق ...لكن هيهات فعندنا مقسوم ليك ماتنوم
من الساعه 6 صباحا تصحى على صوت بورى متتابع ودون انقطاع وتحس بالبورى جوه قلبك عديل ويضرب اكثر من مرة وكالعاده دى عربية الترحيل بتاعت بت الجيران ماشه المدرسه ولا الجامعه يعنى يابت الحلال الزول ده بدل يضرب بورى ويصحى الناس ماكان تنتظريه بره ويابتاع الترحيل مالك ياخ ؟اديها صنه شويه بتجى طالعه ليك براها بدون الازعاج ده غايتو عالم عجيبه..تحاول جاهدا بعدها ان تنال قسطا من الراحه انشالله لحدى الساعه 7 او 7 ونص كده وتضع كل تركيزك فى النوم وتاتيك تلك الدقسه الجميله لكن وين ياحبه عربية الروضه جات وبرضو بتاعت الجيران ونفس البورى وبعد داك جيرانكم زاتو ممكن يكون عندهم زول ثقيل يركب العربيه قبلى اولادوا وبدل ما ينتظر لحدى مايطلعوا معاهو يمشى ينتظر فى العربيه عشان يضرب ليهم بورى ,ويستعجل فيهم عليكم الله فى غباء اكتر من كده ياخ ده ازعاج مع سبق الاصرار والترصد يعنى البورى البتضربو ده فيهو مغنطيس ولا مربطين فيهو بحبل غايتو جنس ازعاج.ماكان من جوه تخليهم يستعجلوا وخلاص..
الحمد لله الساعه شارفت على الثامنه يعنى تراحيل مافى والبورى انتهى ممكن بس الواحد ينوم ساعه هكذا تمنى نفسك لكن برضو هيهات كانما صار النوم فى البلد دى حلم بعيد المنال لانو بتاع اللبن البجى للجيران برضو وصل ونفس الازعاج والكواريك والمغالطه (وانبارح اللبن اتقطع) (والله اللبن ده ماممكن يتقطع انا متأكد منو بكون انتو اتأخرتو مافورتو) ويستمر الحوار بنفس الازعاج وتأتيك اصوات اوانى تطاقش واصوات ناس تكوريك (دقيقه عليك الله يابتاع اللبن ماتمشى) ....وتختتم صباحك المزعج ببتاع الخضار وهو يحمل ذلك الميكرفون الذى تتمنى ان تعرف من هو الذى اخترع هذه الفكرة كى تنتقم منه جراء ذلك الازعاج الصباحى والعجب كمان كان جاء بتاع سمك فى بوكس ياخى ده قمة الازعاج (السمك البلطى ..... وبعدها اشعار وغزل فى هذا البلطى عبر مكبرات الصوت تصل لدرجة تتصور معه ان ذلك البوكس يحمل حورعديل كده وليست اسماك ..غايتو جنس ازعاج
المهم انك ماحاتنوم فى البلد دى وحاتقوم رغما عن انفك قبل ان يغمض لك جفن لتترنح من جديد وانت تحاول ان تبدأ يومك اكثر نشاط لكن وين مع الازعاج ده ،الغريب فى الامر ان كل هذا الازعاج جاى لاشياء تخص الجيران وحاجات فى الشارع تكون انت الضحية الاولى ...غايتو جيران العدو ديل البزعجوك طوالى بدون مايراعو ليك ...
ياجماعة الخير يعنى هنالك سؤال محيرنى الا يمكن ان تتم كل هذه الاشياء بهدوء؟ الايمكننا ان نتعلم ثقافة احترام راحة الاخرين؟ لماذا لم نعد نراعى لمشاعر الاخرين ؟الاتوجد وسيلة اخرى لاترتبط بالازعاج ، اذا قلنا ناس مكبرات الصوت ديل بسترزقوا ناس البورى ديل يقولوا عليهم شنو ؟...يعنى الزول لو داير يفكر مع نفسو ساكت مايقدر خليك من ينوم..لماذا لا نشترى احتياجاتنا من الاماكن المخصصه لها؟ عليكم الله خلونا ننوم ماممكن ياخ كفايه الباعوض وهموم الناس والتفكير فى المجهول كمان جابة ليها ازعاج من تصبح الواطه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مدثر قرجاج
فيس بوك
تويتر
انستقرام
يوتيوب
بنتيريست