|
|
|
 Re: رحبو معى بالاخ محمد الفاتح ابو عاقلة شكرا ياريس (Re: خالد المحرب)
|
امحمد بجلالة قدرو هيييييييييييييييييييييع
امانه ما كبر البورد وامانه ماجاكم راجل
وتانى هيييييييييييييييييع
يازول فرحانين بيك فرح البطانه بالرشه وخديرة القشه
وتعل البورد يا داب اتفقع وعفرتا فيه مالى البكان
وبراريقن فوقو تتخابت شى قبلى وشى عبادى...
وساريتن ما بتنفش ...
حبابك ابقى لاداخل..
خالد خشمك فوقو اللبن،،،،
| |
  
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: سيف الدولة كامل)
|
شوف يا خالد، الزول ده أنا مبسوط منو من زمان ،والله ما كنت بفوِّت برنامجو لأنو كلاّم وحافظ دوبيت ومسادير تريانه،
والكلام السواهو والنضمي العملو في البطانه يخليهو مكان الحردلو وودالشلهمه زاتم ، بس مشكلتي إني هنا ما بشوفو وما بسمعو إلا يسجل
لينا وينزِّل في اليوتيوب ويجيب تسجيلو هنا،
والله زول مليان لامن ييقِّن.. مرحب بيهو بالسديري والعمه ..
يا زول مرحب بيهو طب، شكرا يا شيخ العرب
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: محمد المرتضى حامد)
|
Quote: شوف يا خالد، الزول ده أنا مبسوط منو من زمان ،والله ما كنت بفوِّت برنامجو لأنو كلاّم وحافظ دوبيت ومسادير تريانه،
والكلام السواهو والنضمي العملو في البطانه يخليهو مكان الحردلو وودالشلهمه زاتم ، بس مشكلتي إني هنا ما بشوفو وما بسمعو إلا يسجل
لينا وينزِّل في اليوتيوب ويجيب تسجيلو هنا،
والله زول مليان لامن ييقِّن.. مرحب بيهو بالسديري والعمه ..
يا زول مرحب بيهو طب، شكرا يا شيخ العرب |
مولانا المرتضى وين القفشات الجميله مالك اخد ليك وقفه
اها الزول جاك فى المنبر انشاء الله نستمتع معاهو
تحياتى
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: خالد المحرب)
|
بسم الله الرحمن الرحيم
والصلاة والسلام على أشرف المرسلين سيدنا محمد صلى الله عليه وسلم
شكراً لا تحده حدود ولا يحيط به مًدى للأخوين الصديقين: خالد المحرب وعبدالقادر محمد عبدالقادر والشكر الوافر الرفيع للأخ بكري أبوبكر على كرم الاستضافة الطيبة على مدى رحابة Sudaneseonline ،متكأ أشواق أهل السودان الغر الميامين، أهل الندى والبشاشة والطلاقة والمروءة والنجدة وقرى الضيفان ومكارم الأخلاق الرفيعة!
ومن لا يشكر الناس لا يشكر الله!
وبعد
أخاطب بلدنا فأقول عنه:
فيه شمال نخيل فدع الجريد واتتنى
فيه شرق خلاوي قلبنا تديو سنة
فيهو غرب خيول ركبتها يوت تتمنى
فيهو جنوبنا بى خيرو الكتير طمنَّا
***
من بلدي سلام لى كافة المخلوق
للأرض المرتعة للخلا الواقوق
للنيل التسابو مكفي ما ممحوق
ؤللقمري الحياتو تملي قوق في قوق
***
من بلدي سلام للدنقر البتقنت
للصيد الشرف فوق الضهور يتسنط
للسارية التسوق ليلاوي تب ما ونّت
للقمر البقج للعنقريب البنت
***
من بلدي سلام لى الفي شقوق الغربة
للقايمين ربيطة واخدوا بالليل سربة
للشاقين دهم واراضي صي منكربة
لى ولداً ختر خلا الجبيلات غربة
***
من بلدي سلام للسافل الحقاني
لى أرض الشروق النورها بق فوقاني
لى شدر التبلدي المن حنانو سقاني
لى طبل الصعيد الرزّة واتلقاني
***
وقلنا فيه الكتير الذي سوف يأتي تباعا في سودانيزأون لاين
ومرة أخرى شكرا وشكرا وألف تحية لكم وأنتم في شقوق الغربة
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: Al-Shaygi)
|
الصيد بالكلاب السلوقية اليمنية الجذور، قديم قدم الحضارة الإنسانية. فالكلاب ترافق مسيرة الحضارة وشواهد ارتباطها بثقافة الشعوب كثيرة
وتكفينا من القرآن الكريم الآية 18 الكهف.
والصيد له أشكال وصور كثيرة يضيق المجال بحصرها، وهو في مجمله نوع من الكدح الذي يبذله الإنسان قديما للحصول على طعامه. وافتن الناس فيه وأعدوا له الوسائل والأدوات المساعدة للتمويه وجذب الفرائس.
والسودان غني بالمناطق الخلوية التي يمارس فيها الصيد بأشكاله المختلفة وهناك ضوابط وقوانين مهمة تضبط عملية الصيد حفاظا على ثرواتنا الطبيعية وحياتنا البرية الرائعة.
وفي السودان خبراء عرفوا بالقنيص وفنونه. أذكر منهم على سبيل المثال عبدالله الدكيم الرفاعي بالدندر وعمر محمد صقير السَّدراني بالرفاعيين الفوق. وعمر محمَّد صقير بالتحديد من أمهر الذين عرفتهم وشهدتهم يقنصون. فهو بارع في العديد من الفنون التراثية الشعبية كالدوباي بصوت قل أن تجد له مثيلاً. وهو مغن بارع وعراض من العراضين المشهود لهم بالإجادة وهو خبير بالقنيص وله "حرحافة" أو سفروق يشرع به الكلاب للقنيص يجدعه أمام الكلاب في الجهة التي يتوقع فيها الفريسة، فينطلق( السفروق) جهة الفريسة ويأخذ دورته مرة أخرى عائداً إليه ليتناوله بيده.
فالقنيص رياضة وتدريب على ضرب من أضرب الفروسية والصبر ، وهو للحصول على الطعام والحاجة. والأفضل أن يكون بالكلاب والصقور وليس بالسلاح الناري. فالكلاب وخاصة السلوقية تصطاد وتعود بالصيد لصاحبها الذي يحسن التعامل مع الفريسة حسب الموجهات المشروعة. لأن السلاح الناري له أضرار جسيمة وكبيرة على مخزوننا من الثروات القومية.
وعلى الناس مراعاة الموجهات القانونية المهمة في هذا الصدد. حفاظا على خيراتنا.
والنظرة المرهفة الأكثر حساسية لهذه الحرفة تجد لها سندًا من مرجعيات قديمة " في كل كبد رطبة أجر" في حديث رسولنا الكريم صلى الله عليه وسلم كذلك: لا تتحذوا شيئاً فيه الروح غرضاً " رواه مسلم (1957) أي هدفاً .فالصيد للتلهي والعبث مكروه. ونجد بعض الشعوب تنظر إلى الكثير من الحيوانات الأليفة هذه النظرة وتتحاشى صيدها، والحاردلو يخاطب الصيد تقديرا بقوله:
أقيقن لا تجفلن من خالكن
لا بياكل لحمكن لا بريد كتالكن
قلبي بيكره اليوم البياخد فالكن
عشان كون البنات بتمثلن بامثالكن
وأتمنى أن تسعفني الذاكرة لاسترجع بعض أبيات إدريس محمد جماع:
وإذا سقط الطير جريح
يضرب الأرض بريش ويصيح
حوله زغب من الطير تنوح فتلمست بجنبيك الجروح
أنت إنسان وروح
وهذه الإنسانية المرهفة جدا تتجلى عند تولستوي والمهاتما غاندي وهنري ديفيد ثورو وكثيرين ممن رقت مشاعرهم وذوقهم فهم أميل إلى السلم والمحبة،
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: محمد أبوعاقلة)
|
أستاذي محمد الفاتح يوسف أبو عاقلة..
أستاذي ومعلمي..
ليس من المنطق في شيء أن أطالب ذاكرتك الجميلة بالاحتفاظ بأسماء كل تلامذتك في مسيرتك التعليمية حين كنت معلماً
في (ابتدائيات) الجزيرة الخضراء في سبيعنيات القرن الماضي..
ويكفيني فخراً أني تلقيت على يديك العلم في ابتدائية حلة عباس ريفي المعيلق..
كان كل شيء في أستاذ محمد الفاتح يدهشنا دهشة السنين..
نظافته وأناقته ومواهبه المتعددة..
اهتمامه بمواهبنا الوليدة..
التلحين..العزف على العود في زمان كان مجرد النظر إلى العود يعتبر تكنولوجيا ما بعدها تكنولوجيا..
أتذكر حزنك في ذاك الصباح على رحيل كوكب الشرق .. أم كلثوم.. وكيف أنك نعيتها في طابور الصباح..
وكان معظمنا متخيل إنه أم كلثوم دي (بتبقى ليك)... شايف البراءة دي؟؟
متذكر يا استاذ لما لحنت لينا (هذه الدنيا الجميلة..بين قفر وخميلة..وسماوات صقيلة..كلها من صنع ربي)؟؟؟
وحفظتنا ليها..يا إلهي..أشعر بالخجل الآن في حضرتك وكأني بك تناديني وزميلي الشيخ/ تاج الدين أحمد إسماعيل
لننشد في حضرتك ونتسابق في سبيل الحصول على تشجيع منك وإطراء تغدقه علينا في حنان التربوي المتمرس..
أذكر تماماً مشاركاتك في جميع فعاليات مجتمعنا القروي في ذلك الزمان الجميل...
مسابقات .. جمعيات أدبية.. أغنية خوجلي عثمان (اسمعنا مرة)..وأغنية محمد وردي (يا نور العين) التي
رددتها في زواج (سالم ود البشير ود علي) وهو عامل بالمدرسة حينها..
أذكر تصالحك وإمكانياتك العجيبة في التعايش مع مجتمعنا البسيط وأنت ود المدينة الكبيرة..
تتحدث حديث المثقف مع المثقفين..وفي ذات الوقت تتحدث حديث البدوي الريفي بمتعة عجيبة مع
الفئة الغالبة من ذلك المجتمع القروي الجميل..
لكم جميعاً أن تتخيلوا.. أستاذ محمد الفاتح وهو منتظر على ضهر الترعة وسيلة مواصلات تقله
من قريتنا إلى أبو عشر .. حيث سيفتح الله عليه بوسيلة أخرى تقله إلى الحصاحيصا ثم إلى مدني..
ما أعظمك يا أستاذ.. وفرحان بيك فرح كتير جداً..
وربنا يقدرنا على جزاك..
تلميذك / محمود مصطفى محمود
| |
|
|
|
|
|
|
|
|
 Re: رحبو معى بالاخ محمد الفاتح ابو عاقلة شكرا ياريس (Re: Mahmoud Mustafa Mahmoud)
|
السلام عليكم ورحمة الله وبركاته
عدنا اليكم بعد طول غيبة تسبب فيها الهكر سامحه الله
اولا اشكر الاخ بكرى ابوبكر لاستعادة كلمة المرور الحاصة بى اكثر من مرة
ثانيا مشكور عمنا خالد المحرب على التشجيع وعلى تذكيته للدكتور محمد الفاتح ابوعاقلة
للمشاركة فى المنبر
ثالثا
ارحب بكل والود التقدير باستاذى الدكتور محمد الفاتح ابوعاقلة بيننا فهواضافة حقيقة للاعضاء والقراء اتمنى ان نستفيد منه فالرجل مكتبة متحركة وانا اعرف عنه الكثير دونا عن غيرى لما تربطنى به من صلات وثيقة منذ نعومة اضافرى فقد كان لى نعم الاخ والاستاذ والصديق الصدوق لما يتمتع به دكتور محمد الفاتح من تواضع وادب جم ممزوج بالتصوف الذى ورثه
وله فيه ميراث عظيم فهو مبدع من مبدعى بلادى ونخلة سامقة تطاول السماء ابداعا
وقد لعب دورا كبيرا فى نشر( الشعر القومى السودانى)_الدوبيت والمسادير او شعر المربعات _ بحثا وشرحا وحفظا فهو يملك تسجيلات نادرة جدا لااظن انها عند غيره وعلى سبيل المثال تسجيلاته الخاصة مع الشاعر عبدالله حمد شورانى واخرين فهى موجوده عنده بصوت ود شورانى وله عدة برامج فى هذا المجال
منها على سبيل المثال لا الحصر -دوبيت ومسادير باذاعةود مدنى _وخيمة الحردلو بذاعة امدرمان _وبوادينا بالتلفززيون القومى هذا بالاضافة الى العديد من
المحاضرات والندوات داخل وخارج السودان
وكان له برنامج باللهجات المحلية باذاعة مدنى وهو يتحدث لغة البرتا بطلاقة وتعلمها حين كان استاذا بمنطقة (الكبالوا )بالدمازين
واليكم رابط مدونته على الانترنت
http://www.aboaagla.blogspot.com/2010/10/1_18.html
فالرجل غنى عن التعريف
ولكم خالص شكرى وتقديرى
عبدالقادر محمد عبدالقادر
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: ABUHUSSEIN)
|
الأخ محمد أبوعاقلة غني عن التعريف وهو ممن يقدمون السهل الممتنع وينثرون بيننا جمال أشعار البطانة والهمباته والأدب الشعبي في سلاسه وسهولة هو باختصار رجل مسكون بالفن والابداع .
ذلك رجل يعرف ماذا يقدم وكيف يقدم ولمن يقدم
أهلا ومرحبا به
ازداد هذا البورد ألقا وجمالا وفائدة
لك التحية والتقدير عمنا خالد المحرب
احترامي
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: Mahmoud Mustafa Mahmoud)
|
تحياتي الخالصة لك ابني العزيز محمود ودعواتي لك ولأهلي الأماجد بحلة عباس بكل خير ومكرمة فهم من النادرين في حسن المعشر والذوق الرفيع والطيبة، فسمات أهل السودان العالية كلها فيهم!
لقد سعدت بكلماتك ودفق الشعور الصادق فيها!
وهذا من ثمار التحصيل الذي يصدر عن ذات مخلصة وحادبة على المعرفة. ويتحقق بمثل هذا النقاء من الذين يحسنون التلقي في أوان التلقي فالأواني تشف عن المعاني إن كانت مجلوة ناصعة وهكذا كانت دفعتكم بحلة عباس
حلة عباس بلدة راسخة في الذاكرة ولها في الخاطر محل مكين ومعتبر
في رفقة الزملاء كمال محمد آدم الزاكي، وعثمان إبراهيم عثمان، وعمر المجذوب، وعمر الطيب، والطيب عبدالله محمدين أبوقرجة،ومصطفى أبوقرجة وإكليل البدوي وحسن مصطفى وسالم العوض وغيرهم من الرهط الكريم الذين رافقتهم في رحلة العطاء التعليمي التربوي بحلة عباس الأصيلة، بلدة النجباء الأفذاذ
حفظ الله ورعاك
محمد الفاتح
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: محمد أبوعاقلة)
|
Quote: فيه شمال نخيل فدع الجريد واتتنى
فيه شرق خلاوي قلبنا تديو سنة
فيهو غرب خيول ركبتها يوت تتمنى
فيهو جنوبنا بى خيرو الكتير طمنَّا
|
يا سلااااام كلام يرد الروح ..
الف مرحب بي استاذنا ود ابوعاقلة نتمنى ليك إقامة طيبة فى الحوش الحنين ..
مشكور يا ود المحرب انت البجي منك كله .... سمح وطيب ..
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: معتز الجيلي)
|
الف مرحب الدكتور محمد الفاتح ابوعاقلة
ومرحبا بعودة الاستاذ/عبدالقادر
وبقدومهما نتوقع ان يعود للمنبر ألقه المفقود
يا ريت تعود كمان هذه الاسماء الحبيبة للنفس:
سمية الحسن
وبله موسى
قيسان
وشنتير
ونزار حسين
محمدعبدالجليل
وغيرهم من الاحباب
لاستقبال هذا الضيف الفخيم
شكرا يا ابا احمد
وستظل دائما انت "المُجمع"
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: الطيب شيقوق)
|
Quote: ود المحرب
أمانة ما اتلومت بالحيل - اخوك يقع بالصدفة في الخبر السمح دا ما بتضرب ليهو ؟
حبيبنا محمد الفاتح ابو عاقلة ضو القبيلة وعشاء البايتات ومقنع الكاشفات
فيك طبع الأسد صالحت او حاربت
وفيك طبع البرامكة بعدت او قربت
فيك طبع الملوك شرقت او غربت
وفيك طبع الحكيم لقمان حلل او ربطة |
الظروف الخلتنى اطلع بدرى وتعديت الحد الائتمانى من امس
وكان فى مشكله فى رجوع الخط الى التلفون مع ان سددت الفاتوره
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: عمر قسم السيد)
|
Quote: القرعــة آوليد ...
اللبن آجنيّة ..
حباب ( مخلاية التراث والإرث السـوداني )
الاسـتاذ / محمد الفاتح ابو عاقلة
نتواضع خجلاً .. والمنبر تكسوه الافراح بقدومكم
ونتمنى ان ننزح جميعا الى البطانة حيث الطبيعة والشعر والدوبيت - والنّم - |
كلنا نتمنى ذلك اخى عمر شكرا على المرور الترحاب بى اخونا محمد الفاتح
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: الطيب شيقوق)
|
يا سلام يا سلام
احد اشراقات ود مدني الممتده
سلام من هنا الي شجرة المعرفة جوار حديقة وقيع الله تجد فيها ثمار الادباء
وضل المسرحيين \ات
محمد محي الدين وصوت الرحيل علي فاطمة
محمد عز الدين الساكن عشوائي واخرون يقولون عشواوي
علي مؤمن النقد والخبر الرصين
الاديب الاريب مجذزب عيدروس وهو من النقاد الذين تبقوا لنا بالوطن المحرقه
الفاتح خضر واحمد فضل واحمد الفضل
والشجرة ضلها وارف ويغطي قري الجزيرة المختلفة
من اصحاب الحداثة ايمان الشاعرة وصالح علي صالح وشقيقي السمؤال محمد الحسن
وحوارات المسرح اتي بها السني وفرقة ود حبوبه والنيل الازرق وعوض بشير
وفرقة المجد المسرحية ومحمد عزالدين ويغشاها كوجاك
اتاها بشري الفاضل ومحمد عبد الحي
وامفريب وعبد الباقي مختار ( بقه ) الان من ثوار الحركة الشعبية وياسر عرمان وياسر جعفر استظلا بضلها الوارف
والان اجمل ثمارها معنا هنا يا سلام يا محد الفاتح
اتذكر اول مرة قبل الطغمه تطل جلسنا في محل افتتحه جكنون وعمل الديكور والرسومات استاذي زمبا ومحم عبد النبي
تحاورنا وتفاكرنا وانت تتدفق معلومات
اخلي الناس تشرب من معين لا ينضب
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: اسامة الكاشف)
|
لك التحايا الطيبة أخي أسامة الكاشف
لقد طالت غيبتك عن الديار وغابت عني أخبارك
عساك بخير وعافية
الرابطة كما تركتها تحاور الصمت الجميل، وتستحيل غمامة وقت المقيل
عمرالسنوسي ومحمد محي الدين والسر خضر وأحمد الفضل ومبارك الصادق وكل المبدعين الصابرين على شفا جرف الكتابة والبوح يحيونك من على البعد وهم جلوس تحت شجرة الثقافة، شجرة محمد عزالدين
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: حليمة محمد عبد الرحمن)
|
صديق الموج
عبدالقادر محمد عبدالقادر
الأمين موسى البشاري
حليمة محمد عبدالرحمن
تحياتي وشكري وتقديري لكم على جميل ترحابكم وحفاوتكم النادرة الزينة
وعندما أذكر قول الشاعر علي ود الطيب رحمه الله رحمة واسعة:
الدرب الطويل دايرلو قربة وتيقة
ما بمشي أب سريويلا مسيلو بنيقة
لقيمتن من حلالا تندركلو حقيقة
إبريق ليل مقشّط ؤتبنتو مسيريقة
أتأكد من أن أخي الصديق العزيز خالد المحرب لم يشر لي لمطبات الدروب ثقة منه في شخصي الضعيف وعندها أقول:
قبال العمل النية دفة مركب
الختاها قادر للمقاسيات يركب
القام مندرش من غيرها لا شك بضهب
شركا قام هبر لا صاد مسك لا بقرب
شكرا لكم ودمتم خيرا وبركة وعافية ونورا يضيء عتمة الدروب لكل الناس
شكرا لكم
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: طارق ميرغني)
|
خالد المحرب
الطيب شيقوق
عبدالعزيز عيسى
الشامي الحبر عبدالوهاب
الحاج أحمد المصطفى
سيف الدولة كامل
عثمان نواي
محمد المرتضى حامد
الشايقي
أبو حسين
آدم جمال أحمد
معتز الجيلي
مرتضى عبدالجليل
صبري الشريف
أسامة الكاشف
البشير دفع الله
محمد عبدالماجد الصائم
عفاف ابوحريرة
أمير عوض الجمري
عبدالقادر شادول
طارق أحمد عثمان
يحيي ابن عوف
محاسن محمد أحمد
طارق ميرغني
عمر قسم السيد
ترحابكم شاهد على الأصالة والسمو
أنتم في محل التقدير والإعزازوطن يسعى على كل الدروب يمنح الخير شمالا وجنوب
فدعوني في حضرتكم أتداعى عفوا سهوا ورهوا:
صعيد سافل غروب ؤشروق
جميع الفيهو متعافي ؤهمو بروق
وكت تتعمر الفجة ؤفوقنا سمانا كلو بروق
تعال قرب تكوع ؤللسمــــح بتضوق
وأنتم قد يسعفني لسان مقال يليق بكم:
أولادك بشاير جبهتم مرفوعة
نيلا سيلو تسَّب شيمتو مي مقروعة
بالنفس السخية والهمم مرفوعة
شمس العزة نايرة اتخنتلت في طلوعة
ضوت فوقنا صولة وقدرتاً مشروعة
سودان حر قبايلو أصيلة مي مقلوعة
شكرا شكرا لكم على هذا الألق الذي غمرتموني به عساي أنهل منه لأكون عند حسن الظن بي فأنا تربال بدوي رحال
وعاشق لبلد النال والسيال والسدر والحراز والأبنوس والطندب والجوغان والدروباوالأراك والمرخ والعصافير الملونة الجميلة
شكرا لكم
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: محمد أبوعاقلة)
|
خالد المحرب
الطيب شيقوق
عبدالعزيز عيسى
الشامي الحبر عبدالوهاب
الحاج أحمد المصطفى
سيف الدولة كامل
عثمان نواي
محمد المرتضى حامد
الشايقي
أبو حسين
آدم جمال أحمد
معتز الجيلي
مرتضى عبدالجليل
صبري الشريف
أسامة الكاشف
البشير دفع الله
محمد عبدالماجد الصائم
عفاف ابوحريرة
أمير عوض الجمري
عبدالقادر شادول
طارق أحمد عثمان
يحيي ابن عوف
محاسن محمد أحمد
طارق ميرغني
عمر قسم السيد
ترحابكم شاهد على الأصالة والسمو
أنتم في محل التقدير والإعزازوطن يسعى على كل الدروب يمنح الخير شمالا وجنوب
فدعوني في حضرتكم أتداعى عفوا سهوا ورهوا:
صعيد سافل غروب ؤشروق
جميع الفيهو متعافي ؤهمو بروق
وكت تتعمر الفجة ؤفوقنا سمانا كلو بروق
تعال قرب تكوع ؤللسمــــح بتضوق
وأنتم قد يسعفني لسان مقال يليق بكم:
أولادك بشاير جبهتم مرفوعة
نيلا سيلو تسَّب شيمتو مي مقروعة
بالنفس السخية الفى السماك مودوعة
شمس العزة نايرة اتخنتلت في طلوعة
ضوت فوقنا صولة وقدرتاً مشروعة
سودان حر قبايلو أصيلة مي مقلوعة
شكرا شكرا لكم على هذا الألق الذي غمرتموني به عساي أنهل منه لأكون عند حسن الظن بي فأنا تربال بدوي رحال
وعاشق لبلد النال والسيال والسدر والحراز والأبنوس والطندب والجوغان والدروباوالأراك والمرخ والعصافير الملونة الجميلة
شكرا لكم
عذرا للإعادة والتعديل الطارئ في النص " باللون الأحمر" الذي استدعيته من ذاكرتي فداخلت بعض عناصره
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: محمد أبوعاقلة)
|
أستاذي الجميل ..
Quote: صعيد سافل غروب ؤشروق
جميع الفيهو متعافي ؤهمو بروق
وكت تتعمر الفجة ؤفوقنا سمانا كلو بروق
تعال قرب تكوع ؤللسمــــح بتضوق |
أشهد أني أتعلم منك حتى هذه اللحظة..
ويلاحظ ذلك في الواو أبو همزة ..وهو في دارجيتنا الجميلة
يُنطق هكذا..على اختلاف موقعه عطفاً كان ذلك أو معية..
وأرجو أن تقبل من تلميذك هذا المربع (الوحدوي)..
صعيداً حدو يوغندا ؤمو دون جاي
وسافلاً من حدود اسوان دفق لا جاي
وغرباً ناغم انجمينا نم هداي
وشرقاً قوقا فوق جبالو صوت الناي
أها شنو ليكُنْ آآزُمَّالْ؟؟ أمانْةً في ضُمَّتْكمْ..ماني تلميذ ود أبْ عاقلة؟؟
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: خالد المحرب)
|
صعيد سافل غروب ؤشروق
جميع الفيهو متعافي ؤهمو بروق
وكت تتعمر الفجة ؤفوقنا سمانا كلو بروق
تعال قرب تكوع ؤللسمــــح بتضوق
هييييييييييييييييييييييييييييييييييييييع كع يا خالد اخوي طاقية في الهامة ونقزة في تراب العزاز ومو بادوب وتااااااااااااااااح نامن حجباتي في ضرعاتي يكركبن
تقولي شنو وتقولي منو ؟
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: doma)
|
الاخ خالد المحرب السلام عليكم ورحمة الله وبركاته
اخى خالد انى بصدد بوست توثيقى للشعر القومى فى السودان لاثراء النقاش حول هذا الموضوع المهم لهذا الفن الملئ بالسحر والجمال
استاذى الدكتور محمد الفاتح يوسف ابوعاقلة بعد التحية والسلام والترحاب وبمناسبة قدودومك الينا وبعد عودة الباص ويرد لى اناشدك والاخوة
*خالد المحرب
*محمد يوسف ابو حريرة
*عمنا الفخيم صديق الموج
*عبدالله عقيد
*عمنا مهدى
وكل الاعضاء والقراء الكرام التداخل
فى هذا البوست لعله يكون متكأ لنا
وساتناول معكم الشعر القومى فى السودان
ساتناول معكم فن الدوبيت اصوله واشكالة
*فن (الدوبيت)فى الشعر القومى السودانى واسع الانتشار وموقعه فى نفس كل سودانى لايكاد يضاهيه تاثير اى فن اخر من فنون الشعر وهو فى الوقت نفسه فن بلغ حدا كبيرا من النضج والاستواء من حيث الشكل الفنى
*اما من حيث الموضوع فقد استوعب كل الاغراض التى يحتاج اليها الانسان السودانى فى اطار حياته العامة والخاصة ورغم ان هذا الفن لاينتشر بين كل قبائل السودان الا انه معروف للجميع حتى تلك القبائل التى لها فنها الخاص .
*انه من اقدم الفنون الشعرية الشعبية القولية فى السودان وانه عاش ومازال يعيش فى البوادى ولكن استطاع ان يغزو المدينة وان يفرض لنفسه وجودا فيها .
لما فيه من المرونة ما جعله سهلا لحياة المدينة ويعبر عنها ايضا فلقى بذلك نفس الاهتمام الذى لقيه فى البادية .
*وهناك عدة تساؤلات تطرح نفسها عن هذاوما المقصود منها ولماذا هذه الاسماء وماهى الفوارق بين وماهو
*الدوبيت -اصوله واشكاله
*ظواهره الفنية
*اغراض الدوبيت الفنية
*الجرارى
*التوية
*البوشان
*المشكار
*وعن اشكال غنائية اخرى
وللدكتور محمد الفاتح ابوعاقلة باع طويل فى هذا المجال
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: gessan)
|
Quote: لى اناشدك والاخوة
*خالد المحرب
*محمد يوسف ابو حريرة
*عمنا الفخيم صديق الموج
*عبدالله عقيد
*عمنا مهدى |
عبد القادر العزيز تحياتى
غايتو انا ممتن ليك انك وضعتنى مع هولاء الافذاذ
وما بطال فالتشبه بالرجال فلاح...
غايتو بنحاول نناول عسى ان تنال اجر المناوله
شيخنا محمد الفاتح مرق هذا البوست التوثيقى والمعلم الاكبر
نحن ترانا خاتين طوارينا ومصنقرين ومعاك اخونا عبد القادر
بناء جوانى ونحن طلب ساكت يلا نقول هيلا هوب،،
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: محمد أبوعاقلة)
|
Quote: والسودان غني بالمناطق الخلوية التي يمارس فيها الصيد بأشكاله المختلفة وهناك ضوابط وقوانين مهمة تضبط عملية الصيد حفاظا على ثرواتنا الطبيعية وحياتنا البرية الرائعة.
وفي السودان خبراء عرفوا بالقنيص وفنونه. أذكر منهم على سبيل المثال عبدالله الدكيم الرفاعي بالدندر وعمر محمد صقير السَّدراني بالرفاعيين الفوق. وعمر محمَّد صقير بالتحديد من أمهر الذين عرفتهم وشهدتهم يقنصون. فهو بارع في العديد من الفنون التراثية الشعبية كالدوباي بصوت قل أن تجد له مثيلاً. وهو مغن بارع وعراض من العراضين المشهود لهم بالإجادة وهو خبير بالقنيص وله "حرحافة" أو سفروق يشرع به الكلاب للقنيص يجدعه أمام الكلاب في الجهة التي يتوقع فيها الفريسة، فينطلق( السفروق) جهة الفريسة ويأخذ دورته مرة أخرى عائداً إليه ليتناوله بيده. |
الاخ ابوعاقله ارجو ان تفتح خيط جديد غير هذا البوست لان البوست دا ما بفيد فى مداخلاتك الجميله دى
شكرا
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: عبدالقادر محمد عبدالقادر)
|
Quote: الاخ خالد المحرب السلام عليكم ورحمة الله وبركاته
اخى خالد انى بصدد بوست توثيقى للشعر القومى فى السودان لاثراء النقاش حول هذا الموضوع المهم لهذا الفن الملئ بالسحر والجمال
استاذى الدكتور محمد الفاتح يوسف ابوعاقلة بعد التحية والسلام والترحاب وبمناسبة قدودومك الينا وبعد عودة الباص ويرد لى اناشدك والاخوة |
قدوره منتظرين هذا البوست وكل مره انا اجى اتاوق واكيد بجيب ناس كتار وداير اقول انو جنس هيك نضمى فى ناس كتار
قراء واعضاء بتابعو ولكن ماقاعدين يداخلو بكونو مستمتعين جدا وانا سمعت هذا الراى من ناس كثر
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: الطيب شيقوق)
|
عنكوليب فداسي الزارعنو فوق تراسو
هبالو النسيم واتزرقن فصاصـــــــو
ريقك يمسح اللافنو فوق اكاياســــــــو
الطيب اخوى والله بقيت كمان تغنى فى العنكوليب
وانا اتم ليك الرباعيه
بى تفسير لى عنكوليب فداسى فى التروس والترس يعنى انو مروى اكتر من غيرو
لان محجوز بى الارض المسنوده التى تحجز الماء لعدة ايام
هبالو النسيم دى زرق لو الشاتى وادو حلاوه يعنى هواء بارد ما نشف الارض
وبقا فيه شى من الدم ويعنى الغذاء زى الزول لامن تشوف عروق ايدو فيهم من الخضار
يدل على انو دمو تام
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: خالد المحرب)
|
هذا الجزء من المربوع جميل وعذب ولكنه ينقص ربعا فالدوباي مربع ومربوع أي من أربعة مقاطع
فأين المربع الرابع أخي الطيب؟
هلا بحثتم عنه؟
لأن الدوباي عندما يأتي في ثلاتة مقاطع يسمى الدوباي الأعرج
ألا تتفقان معي
للطيب شيقوق وخالد المجرب مع التحية والتقدير ... ابوعاقلة!!!!!!!!
| |
|
|
|
|
|
|
|
|
|
Re: رحبو معى بالاخ محمد الفاتح ابو عاقلة شكرا ياريس (Re: خالد المحرب)
|
بس لانك فاكر عبارة عنكوليب الفوق دي مقصود بيها العنكوليب السقداوي في حين ان شاعرنا المخضرم قاصد بيها البنية القاصة قلبو
ما تستحي خالد اخوي لا حياء في الدين
الناس كلها منتظراك تحكي ليهم وانت متبلم بتوبك حق الدمورية وبتراوغ جاى وجاى
كدا بكري ذاتو بزعل منك و بسحب باسويردك لانه من دعاة الشفافية والافصاح
| |
|
|
|
|
|
|
| |
خالد المحرب
صديق الموج
Abdlaziz Eisa
الشامي الحبر عبدالوهاب
الحاج احمد مصطفي
سيف الدولة كامل
عثمان نواي
محمد المرتضى حامد
محمد أبوعاقلة
Al-Shaygi
Mahmoud Mustafa Mahmoud
الامين موسى البشاري
ABUHUSSEIN
البشير دفع الله
محمد عبد الماجد الصايم
آدم جمال أحمد
عفاف أبو حريرة
عفاف الصادق بابكر
Ahmed Yousif Abu Harira
عمر قسم السيد
أحمد الشايقي
الطيب شيقوق
امير عوض الجمري
اسامة الكاشف
عبد القادر شادول
يحي ابن عوف
محاسن أحمد محمد
حليمة محمد عبد الرحمن
أبوعبيدة محمد الأمين
doma
gessan
Amani Al Ajab
فيس بوك
تويتر
انستقرام
يوتيوب
بنتيريست