|
|
|
 Re: ماهنت يا سوداننا يوما علينا (Re: أحلام إسماعيل حسن)
|
بلادي بلد ناساً مواريثم
في أول شي ..كتاب الله
وخيل مسروج، وسيف مسنون حداه درع
كتاتيبم تسرج الليل مع الحيران
وشيخا في الخلاوي ورع
وكم نخلات تهبهب في جروفا الساق
وبقرة حلوبة تتضرّع وليها ضرع
بلدي أنا
تشيل الناس ، كل الناس وساع بي حيلا وليلا يسع
وتتدفق مياه النيل على الوديان
بياض الفضة في وهج الهجير بيشع
بلدي سهول ، بلدي حقول بلدي الجنة للشافوها
ولي البرّة بيها سمع
بلادي أنا بلاد ناساً تكرم الضيف
وحتى الطير يجيها جعان ومن أطراف تقيها شبع
بلادي أنا بلاد الصفقة والطنبور وجاراتن تنق بالليل
وبنوتن تحاكي الخيل
يشابن زي جدي الريل
بلدي أمان ، بلدي حنان وناسا حُنان
يكفكفوا دمعة المفجوع
ويبدّوا الغير على زاتم
يقسموا اللقمة بيناتم
ويدّوا الزاد حتن كان مصيرم جوع
يحبّوا الجار
يموتوا عشان حقوق الجار
يضوقوا النار عشان فد دمعة
وكيف الحال لو شافوها سايلة دموع!
ديل أهلي .. واللــــــــــه ديل أهلي
البقيف في الدار في نص الدار
وأقول لي الدنيا. كل الدنيا ديل أهلي
عرب ممزوجة بي دم الزنوج الحارّة
ديل أهلي ..
ديل قبيلتي لمّن أدور أفصل للبدور فصلي
ديل فصلي
أقول بعضي
ألاقيهم تسرّبوا في مسارب الروح
بقوا كُلي
ألاقي قلبي والإحساس
وسافر في بحار شوقم زمــــان عقلي
أنا محل قبّلت ألقاهم معاي ، معاي زي ضليّ
أنا لو ما جيت من زي ديل كان وا أسافاي ، وا مأساتي وا زّلي
تصوّر كيف يكون الحال لو ما كنت سوداني...
وأهل الحارّة ما أهلي
تصوّر...
| |
  
|
|
|
|
|
|
|
|
Re: ماهنت يا سوداننا يوما علينا (Re: أحلام إسماعيل حسن)
|
يا حليلِك يا بلدنا! .. الفيكِ ربّونا اتولدنا
يا كريم يا الله حلحل لي وثاقي! .. أصلي مشتاق .. أصلي غرقان في اشتياقي
لى نخيلنا .. ولى جروفنا وللسواقي .. لى صديرياتا لى لبس الطواقي
يا حليلك يا بلدنا
شوف دموعي الكابّه مِنْ ساعة فراقي .. بى وراكم أصلو ما فضّلتا باقي
يا حليل ناس آمنة عِنْ ساعة التلاقي .. ياحليلك يا بلدنا
يا حليلو لعبنا فوق رمل الجزاير .. نرعى في وديانا فوقنا الطير دا طاير
كنا فرحانين ومرتاحين ضماير .. لا زعل بيناتنا خاتّين الصغاير
شوف بناتنا بُدور ومِنْ فوقِن ضفاير .. يا حليل ناس آمنة سِتّات الحراير
جن تقول غزلان واردات للحفاير .. يا حليلك يا بلدنا
وقت الليل يروق بطراك يالعشاوي .. الدليب إنْ دقّهَ بَسْمَعو في مِسّاوي
الطنابير التّرِنْ تروي الحكاوي .. واللبيب بي صوته لي جرحي بيداوي
يا حليلك .. يا بلدنا
يا حليلي اللى بلدنا بقيتَ غاوي .. الحنين والغربة ديل خلوني راوي
يا حليلك .. يا بلدنا
في الليل كنا عاد نمشي الخلاوي .. شيخنا واقف سوطو في ايديهو لاوي
نقرا في ليحانّا .. صوتنا الدّيمة عاوي .. وبى حطب السّلم ساحاتنا ضاوي
يا حليلك .. يا بلدنا
يابا ود حاج .. ويابا أبنعوفْ ... يابا تور الزّومة العطوفْ
ود حجر يا راجل الدفوفْ ... ود بليل في موره معروف
الحقوني أنا .. لِمّوا الصفوفْ ... قصدي لى قببكم أشوفْ
يا بلدنا أزورك واطوفْ ... يا حليلك يا بلدنا .. ويا حليلك يا بلدنا
ويا حليلك يا بلدنا .. ويا حليلك يا بلدنا .. ويا حليلك يا بلدن
| |
|
|
|
|
|
|
|
|
|
Re: ماهنت يا سوداننا يوما علينا (Re: لؤى)
|
العزيز الغالى لوى
لك من الود كتير
نحن نعيش فى زمان تنكر لنا إيقاعه فصرنا نبحث عن سرب الزمن المغرد
فهذا الكلام هو السودان نحمله فى داخلنا
ذاد الغربة الذى لا نشبع منه ولا نرتوى
| |
|
|
|
|
|
|
|
|
|
Re: ماهنت يا سوداننا يوما علينا (Re: jini)
|
يا سلااااااااااام يا احلام
مشتاقين والله للزمن الجميل
زمن امتدادنا الرائع وشارعنا المتفرد
زمن وليد اسماعيل وعماد ميرغني (مودي) وامير الجمري
ومرسال عمنا الرائع اسماعين ود حد الزين للدكان وحبوبتنا الشول
وجدنا ابراهيم حميدة وعمك الجمري وعمنا عبد الاسد وعمنا الامين
وعمنا ميرغني وعمنا محمد احمد الجمل وعمنا هاشم محمد حامد وصالح سيد الدكان
وحاجة النعمة وحاجة فتحية وبنورة وحاجة فاطمة حسين وحاجة عشة وحاجة سعاد وحاجة
زينب بت ابونائب ومريم وآمنة وفوقة وحسنة .... واولاد حلتنا الحلوة ومسرحية (طبلة) تأليف واخراج
الوليد .... جلسات اماتنا وسط الشارع ولعب الكمبليتة وفليع زنك المدوسة وقت الدرس .. والدافوري القدام
بيتنا وبيتكم ....... يااااااااااااااا زمناً هرول منا في رمشة عين
ويااا وطناً لم يهن علينا ولكن يبدو انّا هنّا عليه.
عوفيتي يا احلام واحمّلك السلام لامي فتحية ولاخواني الوليد والشريف وعبد الجليل وابو القاسم ولاخواتي اماني و غادة ومهيرة
| |
|
|
|
|
|
|
|
|
|
Re: ماهنت يا سوداننا يوما علينا (Re: أحلام إسماعيل حسن)
|
يا هلا jini
في داخل هذه المساحة الخضراء المتسعة لكل اهل بلادي كما كان يحب اسماعيل كل اهل السودان , فاليوم يتجمع اهلنا واحبتنا لتشرق انوارها ترحابا بمقدمكم الرائع في ظل هذه الحديقة , فالجو جميل والرذاذ دائما يحيط بكل جوانبها والغمام , ويضمنا الحب والألفة ويجذبنا في عمق الحديقة سحر كلمات اسماعيل حسن وفنه الأصيل واتمنى ان يطيب لكم المقام في ظل هذه الحديقة الوارفة مع حروفها الراقية وموسيقاها وطنبورها
| |
|
|
|
|
|
|
|
|
|
Re: ماهنت يا سوداننا يوما علينا (Re: أحلام إسماعيل حسن)
|
العزيز الغالى جمال السنوسي
تحية تقدير وإعزاز
كتلك النسمات التى تعبر صيفا تنثر علينا كلماتك الروائع
هى محطات نقف عندها بين الحين والحين .. نستنشق عبير جمالها ونزفر آهات أحزانها
هو إحساس أن الطير فى (قوقاى) قماريه وتغريد بلابله يرسم فينا الفرح
| |
|
|
|
|
|
|
|
|
|
Re: ماهنت يا سوداننا يوما علينا (Re: أحلام إسماعيل حسن)
|
الاخ العزيز امير الجمري لك مني كل التحايا الجميلة ارسلها اليك منبعثة من ذاك الزمان الرائع الجميل الذي عشناه سويا في حلتنا امتداد الدرجة الثالثة وكان اسطورة ذاك الزمان وكتبت عنه الكثير واخر ما كتبت قصة بعنوان شليل وينو شليل وين راح يا حليل شليل اهديتها الى روح جدتي الشول
والى اهلي واحبتي في امتداد الدرجة الثالثة وخاصة مربع ثمانية وحكيت عن كل قصة وكل بيت الحكايات الكثيرة وهكذا كان سوداننا
حتى علاقة عمي الجمري بي اسرة اسماعيل الازهري التي امتدت كذلك مع جميع اهل الحلة
لك الود يا امير وسلامي الى جميع افراد اسرتك خاصة خالتي النعمة
| |
|
|
|
|
|
|
|
|
|
Re: ماهنت يا سوداننا يوما علينا (Re: أحلام إسماعيل حسن)
|
تسسسسسسلمي يا احلام يا غالية ... وعليك الله طلب خااااااااااص اذا في امكانية تدليني على كيفية الحصول على كل
ما كتبتي يا احلام فجيناتك معطونة بحلو القول والكلام من رجل شهد له الجميع بدخول كلماته الى الدواخل دونما استئذان
وبت الوز عواااااااااااااااااااااااااااااااااامة .
| |
|
|
|
|
|
|
|
|
|
Re: ماهنت يا سوداننا يوما علينا (Re: يحي ابن عوف)
|
كل عام وانت بالف خير يحي ابن عوف
لك التحية والاعزاز يا عزيزي شكرا لك على مشاركتك الجميلة لي والتي تحكي عن الزمن المضى انت وسامي وذكرياتك مع سامي
في تلك الايام الجميلة
وذاك الزمن الاخضر الجميل
| |
|
|
|
|
|
|
|
|
|
Re: ماهنت يا سوداننا يوما علينا (Re: أحلام إسماعيل حسن)
|
| Quote: ماهنت يا سوداننا يوما علينا |
الرايعة بنت الرائع سماعين حسن علية الف رحمة الاخت العزيزة احلام ، اثلجتى صدورنا بهذة الدردر النفيسة
هم الذين حبوا الوطن ونظموا اعذب الحروف والكلمات المعبرة عن هذا الحب النبيل .
اجيال مثوارثة فى حب الوطن نسال الله ان تمتد السلسلة الطيبة يا بنت الاصول
بوست يتسحق ان يرفع يا باشمهندس بكرى
ومليار ماهنت ياسوداننا يوما علينا
| |
|
|
|
|
|
|
|
|
|
Re: ماهنت يا سوداننا يوما علينا (Re: أحلام إسماعيل حسن)
|
وجع النفوس
وجع يكسرها
النفوس حطام
الم يمزقها
الجلود سهام
صرخات انثى
لم تجد في
كل محفل
شعبنا الا الكلام
تتلوى من
الم السياط
والنصل في
عنق الحمام
والسوط عربد
في ضفائر ليلها
وبعنقها والظهر
والابهام
صرخت تنادي امها
بين الزحام
لا ناصر كف
السياط ولا ارعوى
معنى الكلام
والذل حاضر يرتدي
عجز الشعوب
ينافق الحكام
كانت جريمتها
ارتداء بنطالها
و الصيف يوغل
في المسام
قبح لكم يا شرطة
الظلم الظلام
قبح لدولة ظلمنا
قبح وعار لا سلام
ويطل نافع يرتدي
القبح البغيض
"هي إمرأة لا
تنتمي للاحترام "
قبح لك عار عليك
ماذا يكون الاحترام
جلاادك العربيد
يذبحها وتاتي لتكمل
الموت الكلام
من اين انجبت البلاد
عار السنين
وكيف غادرها انتقام
بل كيف
يصمت شعبنا
وهو الذي
قد علم الدنيا
معاني الاحتشام
أختاه اني استقيل
من الرجولة
والشهامة والوئام
إني انا
المسئول عنك
عن حر صوتك
في العظام
عار على
نفسي احتضارك
تحت سوط الموت
لا يشفي النفوس
سوى انتقام
ماذا اقول
وكيف انشد منك
قهوة صبحي المجلود
والدنيا خصام
بل كيف لي أن
أحتسي منك الغرام
وكيف ألمح وجهك
الوضاء يشرق
في ابتسام .
الخميس 9 ديسمبر 2010م
الوسيلة محمد
| |
|
|
|
|
|
|
| |
أحلام إسماعيل حسن
omer osman
لؤى
عثمان نواي
jini
جمال السنوسي
امير عوض الجمري
عاطف عمر
يحي ابن عوف
Yousif A Abusinina
فيس بوك
تويتر
انستقرام
يوتيوب
بنتيريست