شيخ العرب يا خاين العشرة متين فتحت البكائية دي؟؟؟ مش كت معاك أونلاين لامن قامت الطيارة؟؟؟ يومين تبكي براك؟؟ وا شريري عليك يابا ما كان تكلمني أجي أكابرك وأخم معاك الرماد وكان ما عندك حرم أجيب ليك معاي من رمادي الخاص....
11-05-2010, 09:46 AM
Al-Shaygi
Al-Shaygi
تاريخ التسجيل: 11-16-2002
مجموع المشاركات: 7904
يا هندسة رأي أنا طاير إنت رأيك شنو في الموضوع اسماعيل عباس مدد وعليك الله خليها مستوره بكى ولا ما بكـــــــــــــــــــى؟؟؟ وبعد داك تعال نحلل نوع البكاء!!!! أما موضوع لوري العكاكيز ده بنشوف ليهو صرفه في السوق وليك علي يجوا أهلنا البطاحين ويرجعوا مبسوطين تب..
Quote: انا داير اعرف السبب شنو يا مولانا من دون خلق الله اتو حنيتكم زايدى كدا هل الموضوع ليه علاقه بى النيل والنخيل والخضره والارض الخصبه افتونا ما جورين
كل ما ذكر أعلاه
بالإضافة إلى رأي خاص: العوامل التي ذكرتها تتوفر على طول حوض نهر النيل العظيم من منبعه إلى مصبه بفرعيه أبيضهم وأزرقهم... لكن الحنية الشديدة ما بتلقاها إلا في (منحنى النيل النازل من أبو حمد إلى الدبة في أتجاه الجنوب الغربي) وذلك عكس أتجاه النيل المعتاد.... ومنحنى النيل عبارة أطلقها الراحل المقيم الطيب صالح .... وإذا نظرت لهذه الرقعة تجد الحنين والحنان والبكى على أختلاف السكان (مناصير وشايقية وبديرية) وكلهم يشتركون في اللهجة والغنى والعادات وحتى الشلوخ....
الحكاية دي دايره ليها دراسة جادة،، ولا رأيكم شنو؟؟؟
وكدي هاك البكا ده .... وبهديها لأمي حاجة فاطنة بت محمدالحسن ود عوض الله يطول عميره ويديها الصحة والعافية:
إتساقاً مع المقولة التي تقول أن الشوايقة (تحت تحت كدا) هم من أصل لبناني واضح جداً في تكسير الحروف ودبكة لبنان الشهيرة،،
حسن الشايقي : أشهد بكل الحق إنه أكثر الناس صبراً وجلداً وتماسكاً ، وهو من أحسن الناس إخفاءا لمشاعرهم، والدليل أننا للتو نكتشف هذا البكائيات،،
حسن الشايقي : وطالما أنه لم ينكر إنهداد) الحيل ، (كعب الداسينها، نهديه هذه الأغنيات المنتقاة بجرأة رجل يبكي على قارعة الطريق : ود المحرب وآخرون!!هههه
حسن : أبكي يازول ، والله فايتنك بالصبر ، وكان على الريس المحرب : كلها يومين وفضحن دموعك ياشيخ المحرب : أفووووو!!!! (تكسير تلج عدييييييل يا بو الحسن ) الله يكافينا شرك!!!!! ههههههه!!
الأغنيات دي غايتو كان ما كتلتك أبتجيك عوجة تب!!! (وعليك الله تسمعه لنهايتها)
حسن الشايقي عنوان للتفاني والتضحية في أبهى صورها وهو نموذج حي لتضحيات الكثيرين منا من أجل العيال علهم يقدرون هذا الفراق المر،،
بوست يصلح دعاية كلينكس،،
سير ونحن على الدرب!
11-06-2010, 05:59 PM
Al-Shaygi
Al-Shaygi
تاريخ التسجيل: 11-16-2002
مجموع المشاركات: 7904
لا لا ما كده يا هندسة... شية شنو ؟؟؟ نبيع لوري العكاكيز في حراج بن قاسم وبعد داك العرب لامن يصلوا نغشيهم البطحا جلاليب وعمم وحافلة من أبو ريالين خصوصي وعلى الجنادرية عدل.... والله تاني واحد يمشي على الشيخ مافي.... وبعدين الزورل ده راسه غالي دايروا يتكسر كدة في فد بكية؟؟؟
أغنية زروني كل سنة مرة من الثانية واحد الى 59 لنواح الليل والنهار
من 59 إلى 1.45 للعزيز طارق مرغني عله يفتينا في هذا الإبداع الاوركسترالي الرهيب
لطفي بقيت تحسبها بالثواني؟؟؟؟؟ يعني هو البكى دا إلا يدقو ليهو جرس؟؟؟؟ قبل كدا حسبنا بالوقت لأبوجهينة في (ألينا زلم) قوم قيامتي ...
حسي يابا نلقى لينا فكي يربطك في البلد البتسوي الفكي ساحر دي وييييييييييييييييييين.... غايتو مافي في محلنا ده غير الدعاء... يا ربي تهدي أخوي عبداللطيف ود عمي بكري وأبو خالد زميل ولدي وتلطف به وتنزع البكا من قلبه....
Quote: بالإضافة إلى الغربة الطويلة المتكررة بسبب ضيق مساحة الأرض في شريط النيل الشمالي التي لا تسع طموحات سكان تلك المناطق
طيب يا مولانا حنين وبكاء أهلنا القاعدين في البلد وما مرقوا منها أكتر من السلم اللا فوق شوي للتمتع برؤية الغزلان... ديل لا أتغربوا ولا أتشرقوا وحنينين وبكايين تقول عليهم شنو؟؟؟ الحكاية فيها سر مرتبط بمنحنى النيل يا مولانا ودايره ليها دراسة جادة.....
وكان للسفر والغربة بالله شوف اوحة السر عثمان الطيب الإبداعية دي، وكل الحكاية أنه ماشي من البلد للخرطوم:
وا مغستي رحل تلوت الليل شقاوتي رحل تلوت الليل مسالكي ضلمه ما بتنشق سكت روح نويرة الفرقة جوة الجوف تسوي البق مشيت لا زاد أشيلو معاي ولا زولاً معا اترفق لما بقيت مفارق الدار نجيم الليل مشي إتفرق بكيت و بكيت طريف العين متمسح و بالدموع رقرق اسوى الوووب نحاس احزانى جوه قليبى ينقر دق يلوعنى يوهدبنى و اخاف من المصير واشفق اوادع الناس افوت مجبور يجيني نغيم من الطنبور اشوفلي جني وقف صفق ينط لا فوق يطير يندق واطير واندق وادنقر فوق تراب بلدي أخم بي إيدي في رحلي اقول يا ليل افارق الدار اجر فوق الوداع مسدار ادخل إيدي في رحلي تراباً فيهو تسوى الكون تراب اهلى..تراب اهلى بشم طيبة اهلي منو تفوح ترد الروح عويناتن تلوح وتلوح انين الساقي لما تنوح حسيس البربخ المفتوح عراريقن طواقيهن طواريهن سواقيهن واشيل من زادي واتكرف واشوف فيك يا تراب اهلى الحنين المابي يتوصف اشوف فيك صورة ماب تنشاف واشم ريحة الكُليت والشاف بنات بلدي... بنات بلدي رقيصاتن... شبابيلن طريحاتن... مناديلن سماح ناساً حلاة ناساً بلا السكر طعم قراصه في قدحاً من الدبكر كواريك شفع المغرب يقلبوا في الجمر قنقر ولاد بلدي يا ناس... ولاد بلدى جبابيدن سنانيرن نقاقيرن طنابيرن وافوت يا ناسي في دربي أقول يا أهلى واغلبي خلاص ريدكن ملك قلبي منو الغيركن بشيل حبي... وا عذابي رحل تلوت وا كِتِلتي رحل تلوت الليل وا شقاوتي رحل تلوت الليل وا مغستي رحل تلوت الليل
ولا رسالة محمد سعيد دفع الله لمامان من جامعة الخرطوم (غربة) ومامان أيضاً كان في غربة (مروي الثانوية) بس محمدسعيد يراه أكثر حظاً منه لأنه يعود للقرير كل نهاية أسبوع!!!!! يا مامان عساهو قريرنا بي خير وإنبساط وسرور بختك إنت عاد والله تمشي له في كل دور.
Quote: صوت ملائكي عذب والعجيبه انها حتي الان محافظه بمقدره هائله علي صوتها
ما شاء الله علي المحافظه رغم تقدم العمر
والله يا طارق صدقت الولية دي من فتحنا وعرفنا نسمع الغناء من زمن من الشرق والغرب وما يطلبه المستمعون وناس حمدي بولاد نفس الصوت وروعة الأداء كان ما زاد ما نقص... وعبداللطيف راجل فنان وبيعرف يختار (بس ناكر البكاء)،،،
له التحية من الرياض للأبيض ونقول ليهو عيدك مبارك وبالله وصل تحياتنا ومعايدتنا للعم بكري، يجده بخير..... وعيدك والأسرة مبارك أخي طارق وكل سنة وأنت طيب...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة