|
خـريطة السودان الجغرافية الجديدة راح تشبه شكل الصـَبرَة الـميتة
|
دقوها بنية فوق راسا من جهة حلايب شالوا منها جزو وذهبت حلايب وشلاتين وأبو رماد بقت زي الزول الضاربنو بنية فوق راسو.. وقلموها من تحت من الجنوب شالوا الجزو الحلزوني داك الجميل بقت ملطوشة زي الزول اللابس ليهو عراقي دمورية مقطع ومشرمل وطعنوها ناس دارفور في كلوتا بالجنب الغربي بقت زى الزول اللاطشو مكيف في خشمو ملوي.. وكمان ناس الشرق لو لقوا غرضن عايزين يلطشوها من الشرق راح تبقى زى الزول الشقو واحد ميت المهم تقلص الأمر وصار زي الصبرة الميتة.. الصبرة لما تكون ميتة بتكون ميتة وفاتحه خشما.. وكرعينا معنقلات لافوق وميتة على ضهرا.. .............. واحدة من جرايد الإمارات قبل اسبوعين قالت في كلمة العدد( الذي يجري في السودان لايخرج منه إلا بمعجزة) غاتيو ربنا يلطف على وحدتنا يديمها.. وخريطتنا يسلمها من التمزق.. حلاة فيها خريطة السودان كانت.. اسمح خريطة في الوطن العربي وأسمح خريطة في العالم.. عشقناها منذ الصغر لما يرسموها لينا على السبورة بفروع نيلها وأنهرها والروافد والمصبات..شكلها شكل القلب.. الله يديم قلب السودان نابضاً ويكضب الشينة
|
|
|
|
|
|
|
|
Re: خـريطة السودان الجغرافية الجديدة راح تشبه شكل الصـَبرَة الـميتة (Re: jini)
|
لمان تشوف خريطة السودان مع مجموعة خريطة الوطن العربي. جاية متدلية كدة وجميلة وروعة زي شكل العنقود.. ( عنقود العنب طبعاً) شكلو كدة وجاهتها راح تبوظ وتتقطع وتبقى زي صورة الصبرة الميتة التي ذكرناها.. إفتكر كل ناس السودان بيعرفوا الصبرة الصبرة هي أنثى الثعلب العجوز . فصيلة كبيرة من فصائل الثعالب ........... ناس النيل الأزرق برضو إفتكر عندهم فقرة كدة تخصهم في إتفاقية نيفاشا ولو لاقين غرضهم كمان عايزين يبعجوها ةأي يبعجوا الخريطة بي هناك.. وكمان ناس جبال النوبة برضو عندهم فقرة في إتفاقية نيفاشا.. برضو لو لاقين غرضهم عايزين يشرطوها بي هناك اي الخريطة.. غايتو ربنا يتولى أمر الوحدة العايزنها. الله يتولاها هو براهو.. ويخلي لينا خريطتنا ووحدتنا وقلب العالم النابض السودان
| |
|
|
|
|
|
|
|