|
خلونا نفهم الكنته
|
جد ما عارف الذكرني الشئ ده شنو,لكن عموماً في كلمات كتيره تلقانا بنستعملها في حياتنا اليوميه بي شكل متكرر لكن ما اظن في واحد قاعد اقيف عندها عشان احللها من وين جات ومنشاها شنو,يعني اشوف فصلها واصلها,فكلمه مثلا زي الكتراااابه بنستعمل لما نكون مندهشين من شئ او مستغربين ليهو او مستنكرين علي حسب الحاله,فالواحد لما تقول ليه شئ استغربو او استنكرو او اندهش منو طوالي يقول ليك الكترااابه,وانت تحاول تقنع فيهو بس ما بتنتبه لي الكتراااابه دي,مره واحد صاحبي قال لي الكترابه,بقي في الطريقه البتحلو مني لانو حكيتو في معني الكترابه دي زاتها ونسي موضوعو وبقي في الكترابه. ولا واحد يقول ليك ديشاااااااك برضو لفظ اندهاشي,مرات بحس انو البستعملوها رايحه ليهم سبة دين ساي وما قادرين اقولها قامو استلفو ديشاااك دي,ده غايتو احتمال. في ناس اقول ليك ابو الزفت,ودي بستعملوها لما تعجبهم حاجه معينه وتريحهم في حنانهم,بس انا ما قادر اربط بين الزفت وابوهو وفعل الاعجاب.تاني كلمه مركبه شنه ورنه يقول ليك ما تعمل ليهو شنه ورنه,الرنه عرفناها الشنه دي شنو؟. اخر حاجه ولي اسي مجهجهه باكاتي كلمه كانت بتقولها لي حبوبتي الله يرحمها لما تزعل مني تقول لي بجي بنقي شعيرك,وغايتو العارف شئ ولا تفسير يجينا بي جاي اقول لينا شئ عشان نفهم الكنته.
|
|
|
|
|
|