كتب الكاتب الفاتح جبرا المتوفرة بمعرض الدوحة
|
|
 يا تاجوج .. سلامتك ياخ
|
يمسيك بالخير يُمه .
...............
تاجوج ياخي مشتاقك أنا , و واحشاني . عارفك ح تقولي لي : أوحش مية زيك ..
و شويتين تقبلي علي مناكفة ..
قلت لصلاح أخوي يديك بوسة جوووووووووه قدومك . و بالرجالة كده . زي ما كنت بعمل معاك و و تقومي تهيجي و تندقري لأقرب شي تحتك : أمشي يا عواليق يا اب صوف .. قرف يقرفك , تزح من قدام وشي وللا برسل ليك الهناي ده يمسح كتابة وشك ؟؟ .. و تضحكي ياخي ضحكتك العجيبة ديك . تعرفي ضحكتك عجيبة !! ضحكة وناسة و مريحة .. بتشبهك براك .
صوتك ما عاجبني الليلة .. متوترة إنتي ..صاح ؟؟ يا صنديدة ياخي الكلام ده عيب .. زول زيك طول عمرو في وش المدفع , و راكز و رتيان و ميقن .. يقلق من عملية ؟؟ أفووو !!!
يعني أرجع أعيد ليك كل كلامك القلتيهو لينا طول عمرنا داك .. في كيف ما تنكسر و لا تنخ و لا تفقد إيمانك ؟؟ ..
ما بينفع معانا الكلام ده .. هو في عملية أكبر من عمليتك العملتيها في الدنيا دي ؟ .. ماسكة بلاوي ستة تيران براك لامن مرقوا في السليم و بقوا رجال و نسوان .. بقوا : ( أولاد تاجه ) .. و ريسينهم فوق .
ضحكيني .. كعادتك . يللا ..
أضحكك أنا ؟؟ .. تتذكري لما قلت ليك ياخي " الـ T النقرابي " الفي خدك ده هو البيكون كتل ابوي حباً و هياما .
قلتي لي شنو ؟ .. : الله الهيم اليقوم ليك في راسك ده يا البكر .. يا الفاكي . ثم أديتها صنة : و يقوم في راس ابوك زاتو . أمشي من قدام وشي أخير ليك .
و الليلة ديك في العشا و من غيظتك من ضحكي انا و أبوي .. قمتي دسيتي قرن الشطة الخضرا في صحن الفول قدام ابوي .. و قام المسكين قرشها .
و نطّ واقف : أعوزو بللاه .. نار جهنم ووقدت في خشمي .. بللاي شوف المره ده !!
و انفجرتي إنتي ضحك .. و انا قمت جاري .. و كانت الدنيا ليل و سماحة و روقة و سلام .
ياخي صوتك سمح , و غناك سمح لما مزاجك يروق و تسرحي في ( يا ناسينا .. إلامَ البين إلامَ .. متين الشوق يرسينا على بر السلامة ) .. و يكون ليل و سرايرنا في الحوش . ما ح تتذكري طبعاً .. زول زيك لاواي للمحن و النصايب بتكون لحظات السلام دي نادرة عندو و شحيحة . لكن عديتينا بيها .. كل البلاوي كنتي ليها ترس , و داسانا وراك و واقفة جبل قدامها .. كيف عملتي ده ؟ ما عارف .
العارفو إنك زولة نسمة و برااااحه , بتحبي الله و الغنا و الضحك و الناس . يا ست الناس إنتي .
أنا مشتاق ليك .. و داعي ليك و محتاج ليك ..
داير أكتب ليك وعنك .. أبت الكتابة . أبت .
فسامحيني يُمه ..
....
قولي يا لطيف يا تاجه ..
زول زيك حلو مع ربنا و خلايقو .. زول يتخت على الجرح يبرا , ما بتجيهو عوجة ..
ربنا يحفظك و يغتي عليك و يواليك بالعافية .. و يطول عمرك و يخليك لينا يا رب ..
من هنا و لغاية ما تطلعي من العملية دعواتي ليك ما واقفة ..
..........
يمسيك بالخير يُمه , و يصبحك .
|
|
  
|
|
|
|
|
|
|
|
Re: يا تاجوج .. سلامتك ياخ (Re: Emad Abdulla)
|
Quote: قولي يا لطيف يا تاجه ..
زول زيك حلو مع ربنا و خلايقو .. زول يتخت على الجرح يبرا , ما بتجيهو عوجة ..
ربنا يحفظك و يغتي عليك و يواليك بالعافية .. و يطول عمرك و يخليك لينا يا رب ..
من هنا و لغاية ما تطلعي من العملية دعواتي ليك ما واقفة ..
|
اللهم اشفي فأنت الشافي
شفاء لا يغادر سقما
| |
|
|
|
|
|
|
|
|
|
Re: يا تاجوج .. سلامتك ياخ (Re: Emad Abdulla)
|
عجل بشفائها يا مولاي فأنت الشافي وأنت الكريم أجبنا إلى مسألتنا فنحن الفقراء إليك ،
يا إلهي أفرِحنا وعماد يهاتفنا : خالتكم تمام التمام ،
يا رب إنك لا ترد ضعيفا ،
ببركة جاه الحبيب المصطفى معاك في كرامتا يا حبيب،
المرض زكاة جسد وكفارة ذنوب يا عماد وربنا إذا أحب عبده ابتلاه،
شفاءا لايبارح سقما ، إنك عليه قدير..
آمين ،
آمين يا كريم ..
| |
|
|
|
|
|
|
|
|
|
Re: يا تاجوج .. سلامتك ياخ (Re: Emad Abdulla)
|
ها زول ها .
والله شغلك الصادق ده كلو مستجاب .
أنا غايتو لا خايف ولا شتين على حبيبتنا تاجوج .
ويا عماد تشوف كلامى .
الزولة مجاهدة ياخ .
الزولة صنديدة وبركة وأنت عارف .
| |
|
|
|
|
|
|
|
|
|
Re: يا تاجوج .. سلامتك ياخ (Re: Emad Abdulla)
|
يارب هذا الصباح
تديها العافية
والصحة وتمد في
ايامه بالخير والبركة .
سلامتك يمة وما تشوفي شر
ـــــــــــــــــــــ
ياعمدة ياخ امنا بتأمنا
ونصيحة وشديدة بأذن الله
تمشي قدامنا ونعقبه في
طرف توبا.
| |
|
|
|
|
|
|
|
|
 Re: يا تاجوج .. سلامتك ياخ (Re: سفيان بشير نابرى)
|
Quote:
قولي يا لطيف يا تاجه ..
زول زيك حلو مع ربنا و خلايقو .. زول يتخت على الجرح يبرا , ما بتجيهو عوجة ..
ربنا يحفظك و يغتي عليك و يواليك بالعافية .. و يطول عمرك و يخليك لينا يا رب ..
من هنا و لغاية ما تطلعي من العملية دعواتي ليك ما واقفة .. |
سلامة الماما يا عمدة
ربنا يواليها بشفاء سريع سريع
ويطول عمرها و يخليها ليكم يا رب
ودعواتنا معاك ما واقفة ..
| |
|
|
|
|
|
|
|
|
|
Re: يا تاجوج .. سلامتك ياخ (Re: omer osman)
|
| Quote: من هنا و لغاية ما تطلعي من العملية دعواتي ليك ما واقفة .. |
ونحن كمان ندعو ليها معاك
يا شافى يا معافى تشفيها وتهون ليها العملية وتقومها سالمة غانمة يارحمن يارحيم
آمييييييييين
| |
|
|
|
|
|
|
|
|
|
Re: يا تاجوج .. سلامتك ياخ (Re: مهيرة)
|
يا سلام ياخ ..
كتر خيرك يا مهيرة ..
دعواتكم استجابت و ربنا كتب العافية للحجة ..
ما تشوفي إلا كل طيب يا مهيرة ..
و ربنا يخليك و يزيدك من نعيمو .
شاكر ليك كتير .
| |
|
|
|
|
|
|
|
|
|
Re: يا تاجوج .. سلامتك ياخ (Re: فادية اليمني)
|
فادية يا بت الحلة ..
- حلة .. بكسر الحاء .. عشان ما تجوا تجوطونا بعدين -
ياخي شاكر ليك صادق الدعوات دي ..
الحمدلله ربنا استجاب .
كتر خيرك يا فادية ياخ ..
نجيك في السمح , قولي آمين .
| |
|
|
|
|
|
|
|
|
|
Re: يا تاجوج .. سلامتك ياخ (Re: Hadeer Alzain)
|
تسلمي يا هدير ..
ربنا يتقبل دعاك و يسلمك ..
الوالده هسه بخير ..
طلعوها الغرفة و الدكتور طمننا عليها و على نجاح العملية ..
شاكر ليك كتير يا هدير .
ربنا يخليك و يديك الفي مرادك .
| |
|
|
|
|
|
|
|
|
|
Re: يا تاجوج .. سلامتك ياخ (Re: سفيان بشير نابرى)
|
عمده يا عمد !
تسلم تاجوج والجابت تاجوج
والجابتهم تاجوج ذاتو !!
والله يا عمد العملية ما عارفه محل تمشى ساى
ضلت الطريق ..
انا قلت الود عمد شاف بعنخى وتراهاقا
قال ينصرنا بى تاجوج ..
لقيت الكلام احلى والمعانى اعمق
ربنا يخلى ليكم الوالدة تنهلوا لسه ولسه
منها ماهى المنبع وماهى المصب وماهى ست الكل ..
| Quote: بتحبي الله و الغنا |
اذن فهى تعرف سر الوجود يا عماد !!
ـــــــــــــــــ
طبعا الحاجة والده ذنوووبها ..
لذلك فهى نضيفة من الذنوب كصحن الصينى
دى كفارة ولادتها بس ،،
ربنا يشفيها وتقوم
اروع وتغنى وتغنوا معاها .. فالغنا سرررر
الوجود ..
| |
|
|
|
|
|
|
|
|
|
Re: يا تاجوج .. سلامتك ياخ (Re: بكري عباس علي)
|
شكرا ليك يا بكري ..
شكرا كتير , ربنا يطمنك دايما على كل البتحبهم .
يديك العافية يا بكري
............
الخريطة شينة يا بكري ..
شينة شناة العدو , على رغم حتمية الجايينا و السويناهو بإيدنا ..
تسلم يا صاحب
| |
|
|
|
|
|
|
|
|
|
Re: يا تاجوج .. سلامتك ياخ (Re: دينا خالد)
|
تسلم ست الحبابيب ياعمدة من كل شر
وتسلم ست الحب والعطف والحنان...
كلو أجر وكفارة بإذن الواحد الأحد
ربنا يقوما لينا بالسلامة ويجعلها
بردا وسلاما عليها..
سلامى وحبي ليها قوى ياعماد
| |
|
|
|
|
|
|
|
|
|
Re: يا تاجوج .. سلامتك ياخ (Re: سمندلاوى)
|
جميلنا سمندلاوي ..
باقة وردك حية زي مشاعرك دي ..
فياخي كتر خيرك و خير الله ..
شاكر ليك كتير كتير .
دعوات الطيبات و دعوات الصادقين استجيبت ..
ربنا يحفظكم و يخليكم .
شكرا يا زول يا جميل .
| |
|
|
|
|
|
|
|
|
|
Re: يا تاجوج .. سلامتك ياخ (Re: دينا خالد)
|
دينا يا حنينة ..
ياخي و الله كتر خيرك ..
أخيرا لميت فيك و في ملف ضيق ..
شكرا للدعوات , و للكلام الطيب , و للغنا الحلو ..
يديكي العافية ياخي و يخليك .
الحاجة والده ذنوبها ؟؟؟ هههههههه ..
غايتو , دي بمشيها ليك ساكت .. فيشان خاتر أمي ..
المرة الجاية بلفخك .
تسلمي يا دندون .. نجيك في السمح .
و سوي السمح سريع سريع بللاي .. عشان الواحد أخلاقو ضيقة و كده .
| |
|
|
|
|
|
|
|
|
|
Re: يا تاجوج .. سلامتك ياخ (Re: سفيان بشير نابرى)
|
سفيان الحكيم ..
و استجاب الله لدعواتكم الصادقة .
الوالدة خرجت من العملية , هي الآن بخير ..
شفت يا حكيم كيف دعوات الناس الصادقة و طيبة بتصيب ؟؟
تسلم يا جميل ..
كتر خيرك ياخ .. و عاجز عنشكرك .
| |
|
|
|
|
|
|
|
|
|
Re: يا تاجوج .. سلامتك ياخ (Re: Emad Abdulla)
|
Quote: ربنا يحفظك و يغتي عليك و يواليك بالعافية .. و يطول عمرك و يخليك لينا يا رب ..
من هنا و لغاية ما تطلعي من العملية دعواتي ليك ما واقفة .. |
ولا دعاي بيقيف ..ألف لا بأس عليها يا عمدة
وان شاء الله امنا تشفى و يروح عنها التعب
| |
|
|
|
|
|
|
|
|
|
Re: يا تاجوج .. سلامتك ياخ (Re: Amany Elamin)
|
يا صاحبي
طلبتك بالنبي تقوليهاعندك وليد اسمو الطيب ود سعدية
مديك روحو هدية
روحو كلها.. والله ما تنقص نبضة
ما ترجاها لمن تصحى
أدخل ليها من باب النفس
رتب شهقيا كويس
دوزن زفيرا تمام
مالك صغير غبيان ولما ما بتعرف
ما عندي يا صاحبي غير الروح ليها..
والمحبة
| |
|
|
|
|
|
|
|
|
|
Re: يا تاجوج .. سلامتك ياخ (Re: Emad Abdulla)
|
الحمد لله .. واهب العافية
الحمد لله الذي جعل البأس كفاره
الحمد لله علي الدعوات الصادقة فبها وحدها تتم الاستجابة
الله يخليكم لي بعض يا عماد .... عليك الله امانة : قول ليها ولدك ناصر بسلم عليك.
| |
|
|
|
|
|
|
|
|
|
Re: يا تاجوج .. سلامتك ياخ (Re: khaleel)
|
Quote:
و استجاب الله لدعواتكم الصادقة .
الوالدة خرجت من العملية , هي الآن بخير ..
شفت يا حكيم كيف دعوات الناس الصادقة و طيبة بتصيب ؟؟
|
الحمد لله الذي
يستحق الحمد والثناء والشكر
ياخ فرحان فرح النار بعود
الزان.
الحمد لله...الحمد لله
| |
|
|
|
|
|
|
|
|
|
Re: يا تاجوج .. سلامتك ياخ (Re: ناظم علي طاهر)
|
Quote: ربنا يحفظك و يغتي عليك و يواليك بالعافية .. و يطول عمرك و يخليك لينا يا رب ..
من هنا و لغاية ما تطلعي من العملية دعواتي ليك ما واقفة .. |
ربنا يحفظه ليكم ويواليها بالعافيه
شكرا على الحكي الطاعم عن ذلك الزمان الجميل
| |
|
|
|
|
|
|
| |
Emad Abdulla
سلمى الشيخ سلامة
محمد عبد الماجد الصايم
osman righeem
احمد محمد بشير
عمران حسن صالح
حافظ حسن ابراهيم
محمد المرتضى حامد
خضر حسين خليل
عبدالوهاب علي الحاج
كمال عباس
Osman Musa
احمد معتصم الطيب
سفيان بشير نابرى
Hadeer Alzain
فادية اليمني
GamarBoBa
الجندرية
محمد عبدالرحمن محمد
محمد يوسف الزين
omer osman
مهيرة
دينا خالد
انعام عبد الحفيظ
بكري عباس علي
سمندلاوى
Faris Mohamed
عبد القادر شادول
بدر الدين الأمير
محمد عبدالرحمن
Hussein Mallasi
حمور زيادة
امير مصطفى احمد
ماجدة عوض خوجلى
محمد البشرى الخضر
الطيب برير يوسف
ناصر احمد الامين
khaleel
ناظم ابراهيم
doma
Khalid Kodi
Adil Hamza
عاطف نورالهدى الطاهر
هواري نمر
الشاذلى خيرى عبد الله
ناظم علي طاهر
داليا حافظ
مرتضى احمد عبد القادر
محمد سنى دفع الله
فيس بوك
تويتر
انستقرام
يوتيوب
بنتيريست