|
|
|
 Re: بلد رايح .. هل تحققت نبوءة الدوش .. يوجد وردي .. يوجد وجع شديد (Re: طه إبراهيم عبد الله)
|
بلد رايح
عمر الطيب الدوش
حأسأل عن بلد رايح
وأفتش عن بلد سايح
وأسأل عن أمانينا
اللي ما بتدينا
صوت صايح
وأسأل وين مخابينا
إذا جانا الزمن...
لافح
وأسأل عن بلد مجروح
وعارف الجارحو ليه جارح
وأبكي على بلد ممدوح
وعارف المادحو
ما مادح
وأحلم بي حلم مسروق
لا هو الليلة
لا امبارح
أعلق في جناح سفري
خطابات لي زمن فجري
وأدخل من درب سري
لكل مضاجع الأحزان
وأضفِّر من شجر بلدي
بروقاً مارقة من صدري
حأسأل عن بلد غاطٍ
لحدِّ الليلهْ في الوجعة
أَنط فوق سرجي واتْحزَّم
أقوم من وقعة
لي وقعة
أخُتْ ايدي البتوجِعْني
على السأم البراجِعْني
وأسأل..
يا وطن يا بيتنا
ليه شوقك مواجهني
ليه حبك مجهجهني
وليه تاريخ زمن خسران
موكّر لسَّه في شجني؟
حأكتب لي شجر مقطوع
مسادير
يمكن يتحرك
خطابات لي طفل مجدوع
يقوم
يجرى
يقع
يبرُك
رسالة لكل قُمْريّة
إذا دم الشقا اتوزع
على كل البيوت
ما تْرِك
وأسأل..
عن وطن رايِح
وأديكم خبر جارح :
بأنو جميع جموع الناس
حيفضلوا لا كراع
لا راس
ونشترى في الدكاكين يوم
مسابح من دموع الناس
مساحيق من هموم الناس
زهج
يتْعَبّا في الأكياس
ونعلن في المزاد علنا
وترغي الجوقة والأجراس :
"!نبيع الطفلة والكراس"
واصرَخ
! ياوطن! يا بيتنا
ليه ما تبقى لينا الساس
قدر ما تجري فيك
أفكار...
يزيدوا الحبس والحراس
قدر ما تجري فيك الخيل
تدوس الهيبة
والإحساس
وأسأل
يا وطن رايح
اذا كل القبور دخلت
بيوت الناس
بلا استئذان
بلا صلوات
بلا أكفان
جريمة أسائل الدفَان؟
حريمة طلب تمن قبري
من البايع في أي مكان؟
وأقولك يا وطن
رايح
وأقولك يا وطن
آمر
سلام النفس ما كافر
ولا كافر
ولا كافر
| |
 
|
|
|
|
|
| |
Mamoun Ahmed
فيس بوك
تويتر
انستقرام
يوتيوب
بنتيريست