كتب الكاتب الفاتح جبرا المتوفرة بمعرض الدوحة
|
الشايقية ،، شيَالة حال ..!
|
خط الاستواء عبد الله الشيخ
الشايقية ..شيَالة حال رياح الأيام لم تترك السنجك سيد أحمد يهنأ في ليالي (مولاص)الجزيرة، بالرغم من أن (بت محبوبة) ست البيت كانت تحجز له الركن والبنبر وتقول بنبرة حاسمة للقادمين:- "هوي، دا محل السنجك"!.. مع تمدد سلطان البنك الدولي وصندوق النقد الدولي في مؤسسات القطاع العام بمعاونة (استثمارية) من المتعافى عرف سيد أحمد السنجك انه بعد بيع الانقاذ لمشروع الجزيرة ،، لن يطيب له المقام فى (صعيد الله الرسول) كما كان يسمى تلك النواحى ..صار السنجك كثيراً ما يهذي كثيراً بعبارة( البلد بقت مِقحطي، الله يسنح السناحي السواها فينا )..! ويكتفى بهذا المستوى من الدعاء ضد الانقاذ لكون ان بعض المتوجسين من أهالى جزيرة الفيل ، ( خوفاً وهروباً من نقد الحزب الحاكم يشتمون سناجكه،، فقط).. كان سيد أحمد السنجك يسخر من حاله ويقول أن (منوفلى ـ أي الفلس ـ مصنقر فى ضهرو زي اللستك الإسبير منذ أن جاءت الانقاذ)..! ..وهو فى هذا الحال وصلته رسالة شفاهية من أمه مع إحدى الشايقيات .. و،، زي ما إنتو عارفين، إنو الشايقية ( شيالة حال)..! داهمته الشايقية وسط السوق وقالت له: آآ مايل الرجال ، أُمك خجيجي قالت لك (الأصبع اليابس ما بيتلحس)!.. أهمل الرد عليها وقد فهم مضمون ، وجوهر الرسالة .. لكنه طنطن بنبرة عالية وقال في نفسه:- زمن، والله زمن.. رعيناها زمن مخدري.. يا ربي أخير الواحد يرجع كريمي؟. وما مرّ شهر على ذلك ( البث المباشر) حتى جاءت شايقية أخرى من طرف أمه، كانت شايقية قاهرة ،، وصلته عند بيت بت محبوبة صاحبة أشهر محل للبقنية فى حلة موسى .. وقالت له قِدام الرجال:- آآ سجم الرماد ،،أُمك خجيجي (قالتلك) إنت ماك عارف أمر الشاي صعيب؟ رد عليها:- قوليلا إنتي ماكي عارفي الناس ديل باعوا السناحي دا..؟ ... وأضاف:- قوليلا نان أنا أجيب من وين ؟الحكاية جات زانقي من ورا.. وأضاف أيضاً:- قوليلاً كاتلي كاتلي بي شوية التمير لامن ربنا يفرجا.. تدخلت بت محبوبة في الحوار وقالت :- يا سنجك ،، يا مايل الرجال إنت عندك تمر في البلد ؟؟ و ،، يوم من ذات الأيام ما ضوقتنا من تمرك دا..؟.. صفق سيد أحمد الشايقي يديه حسرة وقال لها :- آ خرابه،، قولي بسم الله.. تمر شنو البياكلوهو؟ يا خرابة التمر بيشربوهو ، وبس .. حرَّم ،، و،، وحات سيدي الحسن أنا في كريمي عندي اكتر من مية عود بركاوي ، يوم من ذات الأيام ما دخلت لي حباية منو في خشمي؟.. ضاقت الأحوال أكثر على مؤسسات القطاع العام بتمدد استثمارات النظام، وضاقت (الوسيعي) على السنجك،، الذي شوهد داخل بيت بت محبوبة كثير الشكوى، وكثير التذلل لبنت محبوبة :- (ضيقوها علينا، تضيق عليهم الوسيعي).. كان في الليالي يأتي إلى بنت محبوبة فارغ الجيوب ويقول لها:- آآ خرابة.. انا الليلي معِّلم الله.. أسكتي أكتبي في الحيطة لامِن تجي التعويضات . وتشخبط بت محبوبة الحساب في الحيطة.. هي الأخرى بدأت تطنطن وتقول له :- السنجك يا مايل الرجال.. الحيطة دي ،،بعدين ،،بتبقى راجلاً تليِّسا؟.. فيرد عليها السنجك :- آخرابة انتي دايري تشطبي حسابات الدفتر العمومي؟.. في ليلة من الليالي جاءت بت محبوبة غاضبة .. و وقفت أمام السنجك سيد أحمد الشايقي وقالت:- يا سنجك هوي.. أديني حقي.. !! قال لها :- آآ خرابة قولي بسم الله.. خليني أنجم، قطعتي قلبي، الله يقطع قلبك ،، إنتي ماكي عارفي إنو الناس ديل باعوا العفش كلو)..؟.. فوجئ السنجك ببنت محبوبة تسأله :ـ ( الناس منو..؟) ،، عرف السنجك أن بت محبوبة ( الليلة ما براها).. هذه المرة كانت صارمة وأبعد ما تكون عن الهزار والانتظار.. قالت :ـ يا سنجك هوي.. يا مايل الرجال.. أنا دايرة حقي الليلي؟.. الليلي؟.. ـ نان يا خرابه اجيب ليكي من وين؟.. قالت:ـ ما بعرف.. أكان ما اديتني حقي بكورك وأفرَّج فيك ناس الكمبو.. ـ قال لها :ـ آخرابة، ناس الكمبو كلهم مافى واحد فيهم صرف ...! و،، مرقت بت محبوبة إلى الشارع وكشفت رأسها وبدأت تكورك.. و السنجك سيد أحمد الشايقي يقول لها:- آآ سناحي أدخلي، أدخلي،، تدخل فيكي الدخلت فى الكنابي ..!! وبنت محبوبة تكورك وتقول له :ـ لا ما بدخل..! شكيتك علي الله.. حق مريستي دا أشيلو منك يوم القيامة.. يوم الخلوق واقفين صفوف.. !.. و،، لن تفت عضد السنجك سيد أحمد الشايقي مثل هذه العبارات "الدينية"..! فقد قال لبنت محبوبة:- آآ خرابة.. حرَّم تجيبي سيرة المريسي دي في طرف خشمك ،، في اليوم داك ،، إلا يتفرجوا فيكي خلايق يوم القيامة ، إنس، وجِن،، إنس وجِن، إنس، وجِن،، إنس وجِن.. وظل يرددها حتى حال بينهما الظلام ..!!
|
|
|
|
|
|
|
|
Re: الشايقية ،، شيَالة حال ..! (Re: رغيم عثمان رغيم الحسن)
|
الاخ رغيم.. تحياتى .. (وضح ، أبن ، افصح).. مافهمت عبارتك دي .. ارجو ان تشرح لنا معناها.. الاخ ياسر .. يلزمنى اقول ليك إنو العبارة ( الاصبع اليابس ما بيتلحس) ،، هذه عبارة لا يفهمها إلا زول ربتو حبوبتو ..! لكما التحايا ..
| |
|
|
|
|
|
|
Re: الشايقية ،، شيَالة حال ..! (Re: رغيم عثمان رغيم الحسن)
|
ما كانش العشم يا عبدالله... عاد شلت حالنا بالحيل!
عموما تسلم على الإبداع التصويري ده تصور كنت بقرأ ليك في خط الإستواء الأخير بتاع "حان وقت دفع الفواتير" ودكتور أيزك قانغ طلب ترجمتو ليهو
........
تحت تحت: نحنا فعلاً ناس شيالين حال يا أخي نحنا كان ما ليقنا لينا زولاً نشيل حالو بنشيل حالنا برانا...
| |
|
|
|
|
|
|
Re: الشايقية ،، شيَالة حال ..! (Re: Mohamed Yassin Khalifa)
|
يا محمد .. سلامات.. اضحكتنى العبارة:( لو ما لقينا زول نشيل حالو بنشيل حالنا برانا).. هههههههههه.. مش دي ياها قمة الشفافية التى تحتاج اليها شعوب العالم الثالث ..! ده مش ياهو( النقد الذاتى )اللى بيقولوا عليهو الشيوعيين؟.. العمود الذي يطلب د. ايزاك ترجمته هو عمود يوم غد الخميس .. أنا قلت انتو هسه نايمين ، وحتقوموا تشوفوهو الصباح مع ناس السودان..! كنت قد كتبت عدة اعمدة عن ملاحظاتى فى امريكا ، ومقارناتى بين هنا وهناك ،، رأيت ان نشرها ( حيجيب هوا) ، اصلو اليومين ديل الجماعة سمهم ــ فاير ..
| |
|
|
|
|
|
|
Re: الشايقية ،، شيَالة حال ..! (Re: عبد الله الشيخ)
|
استاذنا مساء الخيرات بتوقيت السودان...
غايتو ما بعرف،لكن انت واسامة معاوية،طارق جبريل بتعرفوا الحكي الطاعم بلغة الشوايقة قبلكم ووحدكم برضو حميد...تجهجهوا الناس بلغة اهلنا الشوايقة
ما بعرف لكن يمكن نحن لسانا عجمي شوية يمكن ما بنقدر نعبر زيكم، مع انو جيرانكم في الارض ونفس البيئة والتفاصيل الفي شمالكم وياها نفس الهجرات والتفاصيل،الا حكيكم جميل ومنسق.
Quote: قوليلاً كاتلي كاتلي بي شوية التمير لامن ربنا يفرجا.. |
طيب هي ردت ليك عليه بلسان حميد: الله يا رب كربك كرب عاولى التمور .. الواطة بور .. الناس حطب بابور شهور غلبان يدور .. مافيش مطور .. ويجيك بعد ده علم طلب الله يا رب العالمين
... غايتو حكاوي الشايقية الجميلة دي ذكرتني زول من ناسنا ما بدفع قروش في جمعية في السعودية لكن كلاّاام،جا كبا ليه نقة بالعربي ثبتوه ناس اللجنة قالوا ليه عليك خمسمية ريال متأخرات وما من حقك تتكلم،وفي زول رطاني غالبه التعبير ومتكيف منه..رمي ليهم الخمسمية من جيبه وقال ليه واصل وياخي طلع ميتين* الناس دي
_ ميتين دي محسنة
| |
|
|
|
|
|
|
Re: الشايقية ،، شيَالة حال ..! (Re: GamarBoBa)
|
الاخ قمر بوبا .. سلامات المهم إنو خجيجي أم سيد أحمد ـ زي ما شايف ـ ما قالتلو رسل ،، حميد قال :0( ما قالتلو جيب).. ،، اشتغلت معاهو بالترميز ( التضليلي) من نوع : الاصبع اليابس ما بيتلحس ماك عارف أمر الشاي صعيب .. الخ .. طبعاً أخطر حكاوي الشوايقة هي تلك الحكاوي التى لا يمكن أن نتجرأ ونكتبها ، لا هنا ، لا هناك .. أكان ما مصدقنى أسال حمور الجمبك دا ..
| |
|
|
|
|
|
|
|