|
|
 الشين شين لو إشتري آي فون والسمح سمح لو ما عندو تلفون
|
قال ليك يا عمك شركة أبل فكت ليها تطبيق عكس الهوا على هاتف "آي فون" شغلو الشاغل قياس درجة جمال الوجه ، وذلك مقابل واحد دولار أمريكي بس ، وأكيد هذا التطبيق الجديد حا يساعد المهتمين بعالم الموضه وعروض الأزياء والباحثين عن وجوه جميلة لعارضات أزياء جديدات ، أو لمن يريد التأكد إن كان سيبدو وسيما في عيون الآخرين. والأخيرة دي الحتة الحا توجع ناس كتيرين يعني في ناس أنا متأكد حا يفارقو التلفون عديل كده بلا تحويل رصيد بلا مس كولات. المهم في الأمر ناس أبل ومحنهم تشيل التلفون يقوم يقول ليك لا حولا ولا قوة إلا بالله "كم أنت قبيح" شناتك مُرّه يا فرده ، أو يقول ليك إسم النبي حارسك حلاتك وحلات زاتك أسمعنا مره يا حا تعمل لينا جلطه عديل كده يا جميل يا مدلل وفي الحالتين في موسيقى تصويرية.
المهم البرنامج تم تسميته بـ "مقياس القبح" The Ugly Meter كل ما هناك أن تقوم بتصوير وشك أو وش البيع أو وش الملاح أو وش من تحب بعدين يقوم الجهاز ياخد ليهو صنّه (نظام بحلل في البيانات وكده) وفرتروب يقوم يديك النتيجة وغالباً ما تكون فتاكه وكل الكلام ده يتم في وقت قصير أها إظهار العلامة التي يسجلها بتكون من عشرة. وكلما زادت العلامة زادت درجة القبح.
ويتم الاختبار من خلال مساعدة المستخدم بوضع الصورة على خريطة مربعات تظهر على شاشة الهاتف للحصول على أفضل النتائج وبعد ثوان تظهر النتيجة على الشاشة مع تعليق يشبه وجهك على أقل تقدير من وجهة نظر الجهاز.
لكين الشين شين كان إستحم كل يوم كما يقول منص والبرنامج برضو ممكن يدقس فعندما تم تجربته على بعض أكثر الوجوه فتنة في العالم كانت النتائج مثيرة للجدل قليلا. فالمغنية البريطانية الشابة تشيرل كول قد حصلت على 4.2 في سلم القبح بينما سجلت داني مينوغ (اخت المغنية الاسترالية الشهيرة كايلي مينوغ) أعلى علامة على هذا السلم إذ حصلت على 9.8 مع تعليق يقول: أنت قبيحة جدا، وتستطيعين جعل العين تذرف كأسا من الدمع". بالله عليكم جهاز بيقول لي داني مينوغ كده دايرين بيهو شنو أو منتظرين يقول لينا شنو.
لكين برضو البرنامج صدق في تحليلاته مع الكثيرين يعني مثلاً أنجلينا جولي الشديدة بعد ما صوروها وفرحت أمها يا عديله ليها الجهاز أخد ليهو وقفه صغيرونه إرتفعت خلالها دقات قلب النجمة قبل أن يكتب ليها بالخط العريض الكوفي عبارة "ساخنة" مع رمشة عين (إلكترونية طبعاَ) وفي رواية أخرى "شديدة شدة الحرامي الـ ..... إلى نهاية الجريمة" وطبعاً أداها درجتين إثنين فقط في سلم القبح. وكان التعليق: "أنت ساخنة جدا إلى الدرجة التي تجعلين الشمس معها غيورة" وبالبلدي كده يعني قال ليها "أحّي الحر".
ولمن الحكاية جات عند راجل أنجليا جولي المدعو براد بيت قال ليهو "إنت بصراحة دقّست المرا دي وممكن تكون كتبتها في كراع أم قيردون" بستغرب كيف قبلت بيك أوعك تقول لي الحب أعمي لأنه في حتتك دي ما عندو عيون أصلاً ولا حاسة بصر ، الغريب في الأمر أن الجهاز طلّع براد بيت أقبح من ديفيد كاميرون رئيس الوزراء البريطاني على الرغم من حنكه الحاد إذ كانت علامته أقل بنقطة عن العلامة التي سجلها الممثل الوسيم براد بيت.
|
|
  
|
|
|
|
|
|
|
|
Re: الشين شين لو إشتري آي فون والسمح سمح لو ما عندو تلفون (Re: almulaomar)
|
الملا عمر
تسلم على المحن دي
كيف صورتك؟
| Quote: بالله عليكم جهاز بيقول لي داني مينوغ كده دايرين بيهو شنو أو منتظرين يقول لينا شنو. |
معناها لما نخت صورتنا دي للجهاز دا ، حتقوم الشاشه تطفي
تجيك رساله تقول ليك اعد المحاوله مره اخرى، تعيد المحاوله
يقوم الجهاز يعمل نفس الحركه الاولى ومعاها صوت صرخه
بعدها تجيك رساله من الجهاز يقوليك ، هذا الجهاز مصمم للبشر ،لول
مبااااالغه
| |
|
|
|
|
|
|
|
|
|
Re: الشين شين لو إشتري آي فون والسمح سمح لو ما عندو تلفون (Re: خضر الطيب)
|
خضر يا جميل صورتي الخايف عليها ، تعرف يا عمك غشيت ليك التكنولوجيا ودقّست ليك الآي فون زاتو قمت قلبت الشاشه الغشاشه على الجيز أباي (دا ما الفلم زاتو إنت بس أمشي بحر دار في الحبشة وأسأل وحا تدعي لي في الصلوات الخمس) المهم كان المنظر التالي
عمكم الملا مواجها لمساقط النيل الأزرق في بحيرة تانا وهو يستمع إلى أنغام الواشنت "الفلوت" ويستمتع بالجو البديع ، وفي الحالة دي حتى لو كنت شين الآي فون ما بقدر يقول بغم لأن من بين أدوات القياس أن الذي يري الوجود جميلاً لابد أن يكون جميلاً.
عمكم الملا وسط أطفال الأمهرا على إرتفاع سوست موتو جاما عن سطح البحر.
| |
|
|
|
|
|
|
| |
almulaomar
خضر الطيب
محمد عبد الماجد الصايم
Hassan Makkawi
فيس بوك
تويتر
انستقرام
يوتيوب
بنتيريست