|
صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟
|
اولا اتقدم بجزيل الشكر والتقدير لكل من زارني او اتصل بي عقب الحادث ( العنيف ) الذي تعرضت له نهاية رمضان الماضي ..
وبعد ان من الله علي بالشفاء ذهبت ابحث عن سيارتي ووجدت ان شركة التامين قد سحبتها الى ورشتها وفوجئت ببشاعة المنظر وحمدت الله على النجاة من ذلك الحادث الكبير ..
المؤلم في الامر ان شركة التامين رفضت ( تلجين ) السيارة المؤمن عليها تامينا شاملا وتصر انها يمكن اصلاحها ولا زالت المفاوضات جارية بعد اكثر من شهرين اضطررت خلالها لتاجير سيارات ثم شراء سيارة تفاديا لجرجرة شركة التامين التي لازالت تحيل اوراق سيارتي من مهندس الى لجنة الى شركة ..
ارجو من الاخوة الزملاء بالمنبر والقانونيين على وجه الخصوص مدنا بالمشورة اللازمة في مثل هذه الحالات ..؟
|
|
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: معتصم محمد صالح)
|
معتصم دبايوا حمدا لله على السلامة والمال يروح ولكن سلامتك اهم من السيارة انا لست قانونى او من اهل الاختصاص ولكن هنالك قاعدة عامة تقول "العقد شريعة المتعاقدين" وعليه المرجعية بينك وبين شركة التامين هو العقد المبرم بينكم هذا ابتداء واعتقد ان شركة التامين لها الحق فى تقدير الضرر الذى لحق بالسيارة وتقييمه والاختيار بين اصلاحها او بدفع قيمتها وفقا لحالتها قبل الحادث وهذا يعتمد على الموديل وكم من الاميال قطعت وسعرها فى السوق وايضا تقارن الشركة بين التكلفتين الاصلاح او دفع القيمة التى تقدرها الشركة وعندها تختار الشركة باخف الضررين وان رجعت الى العقد ستجد هذه الاشياء مضمنة فيه ولكن ان كان لك بند يقول بانك تحصل على سيارة بديلة لحين اصلاح تلك السيارة او دفع قيمتها لك هنا انت لن تشعر بفقدانك لسيارتك لحين استبدالها او اصلاحها فكل هذه الاشياء تعتمد على العقد المبرم بينكما انت فى الحالتين لن تخسر مهما كان منظر السيارة الان لانك ستستلمها كانها جديدة ولكن قد تخسر عند بيها لان سجلها سيحوى انها تعرضت لحادث فهذا حتما سيخفض من سعرها لبابى
| |
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: معتصم محمد صالح)
|
اولا حمدالله على السلامة وبعدين سيارة زي دي وبهذا الشكل فان ثمن تصليحها اغلى بكثير من شراء سيارة جديدة واذا اصرت شركة التأمين على اصلاحها فأنت الكسبان والشركة هي الخسرانة.. لأن الشركة لازم ترجع ليك العربية وكأنها جديدة.. وطول بالك شوية فأكيد أن الشركة سوف تتراجع وتقول نشتري ليك سيارة جديدة وانا نصيحتي ليك انت من هسع ابدأ قول ليهم انا عاوز عربيتي دي ذاتها تصلحوها لي وما عاوز عربية تانية لأن ذكراها عزيزة علي!! وهم طبعا عارفين ان تصليح مثل هذا الدمار الذي لحق بالعربة لا يمكن تصليحها إلا بثمن غالي... وفي النهاية انت الكسبان ما دام الصحة كويسة .. والله يديك العافية
| |
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: معتصم محمد صالح)
|
ربك قدر لطف يا معتصم لكن ناس التأمين ببالغوا و بشذوا يفلحوا لاخد الفلوس بدون مقابل!!!
الحكاية ما حكاية اختلاف قوانين مسألة ذمم و ضماير و مفاهيم الجشع بقى هو القاعدة حتى عند الدولة و ناس التأمينات بينسوا انه القروش البلموها دي مفروض يستفيد منها دافعيعوها عند الحاجة
هنا يا معتصم تأمين شامل بيدفع ليك حتى لو انت الغلطان يدفع لخصمك وزي عربيتك موش تتلجن بس بل يتم التخلص منها حال اكتمال اجراءات الشرطة و على طول التأمين يأجر ليك عربية لحد ما تنتهي معاملتك
| |
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: السمؤال بدرالدين)
|
ألف سلامة يا معتصم وربنا فعلا كفاك شرها,,
يا معتصم عشان عربيةة عاملة حادث يحصل ليها تلجين مطلوب واحد إتنين تلاتة عربيتك دى أكيد حصلوا ليها كلهم وأولهم الشاسيه ومن ضمنهم القائم,,
التأمين فى السودان عبارة عن إستهبال فى معظم الأحوال وشركات التأمين تعرفك عندما تأتى لتِؤمن عندها وعند الشدائد بعملوا رايحين ويدوك البيش على أصوله,,
العربية تتلجن والتأمين يدفع,,
الف سلامة يا رجل,,
| |
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: صلاح الفكي)
|
الاخ : معتصم
الف حمــــدلله على سلامتك
وربنا لطف عليك شكل العربية يوحي
بكبــــر الحادث
والجاتك في مالك سامحت
وماتخلي حقك وحتى فترة الشهرين وايجار العربات المفروض تضمنهم
ضمن التكلفة وذي ما قال ليك اخونا الفوق قول ليهم صلحوا لي عربتي عـــديل كده
وما بستلمها بعد التصليح الا بواسطة مهندس
والله العربية دي لورجعوها اليبان ما تتصلح
ناس التامين ديل مستهبيل ولا شنو شوف ليك محامي شاااااااطر واتصل علي مهندس شركة التامين اعرفه من التقرير الكتبه شنو مره اخرى الف سلامة ليك
| |
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: Awadallah Bashir)
|
ألف حمد لله على سلامتك يا معتصم ..
واضح من الصور إنه الحادث كان كبير وخطير ..
حمد لله على سلامتك وسلامة الوالد يا أخوي ..
شركة التأمين بتستهبل .. وما عايزة توفي بإلتزاماتها القانونية ..
عشان كده الموضوع عايز محامي لايووووق ... وحقك ما تخليو تبْ ..
خلي بالك من نفسك يا معتصم ..
السواقة في الخرطوم إنتحار عديل كده .. فوضى مبالغ فيها ..
وعدم تقيد بقواعد المرور .. والعالم كلها زهجانة .. ومستعجلة ...
وزي ما قالوا ليك الجماعة الفوق .. الجاتك في مالك سامحتك ..
تسلم من كل شر يا حبيب ..
| |
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: عبد الله كسلا)
|
معتصم !! الف سلامة والببقى على العربية كلو هين ..
يعنى انت لو كنت جبت صورة العربية قبل الحادث لكفيتنا شر القتال .. ولعرف الجميع هنا انو ناس التامين ليهم حق لافرق بين شكل العربة قبل الحادث وبعد .. ما عارفه انتو بتسوقوا الصفيح دا كيف ؟ يااااى .
ويا الشايقى هنا وثيقة التامين دى وااااحدة تبصم بس ذى عقود الاذعان .. غالبا بحيلوك لشركة العربية وهى البتقييم لكن لما تسوق عربية ما عندها شركة ذاتو الله غالب !
ــــــــــــــ معتصم حقو تدخل فى اتفاق الذهب مقابل سيارة جديدة لنج سيببك من التلتيق دا وتعال اوديك ناس شركتى وخش فى حادث ذى دا اخو ود امو وابو لو اتطفقت ساى جيب الصور هنا
| |
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: Awadallah Bashir)
|
الأخ/ معتصم
تحياتي
حمدا لله على سلامتكم والوالد.
فعلا الحادث كبير.
وإنت كنت سايق سرعة كم؟ والعربية دي كأنها فكت فرامل، وضربت بذات السرعة!
أعوذ بالله. السودان دا هسي فيه شوارع الواحد يمشي فيها بسرعة عالية؟؟؟ والناس
والبهايم، البتتحاوم دي؟؟؟ ربك ستر. والجاتك في مالك سامحتك.
موضوع تعويض التأمين يعتمد على وثيقة التأمين، صلاحيتها، تغطيتها، عمر العربية،
عمر الوثيقة، الإهلاك المتوقع، القيمة الدفترية قبل الحادث..... الخ... فالمسالة
هي تجارية بحتة، طبعا هنالك عوامل أخري تؤثر مثلا، موجوداتكم الأخري الخاضعة للتأمين
وبالتالي رغبة شركة التأمين في إستمرارية التعامل معكم... لذا فالتعويض أو الإتلاف لا
يعتمد على شكل أو تكلفة الحادث فحسب، إنما كمية من الخيارات لإتخاذ القرار.... ثم علاقة
الأطراف الأخرى (إن وجدت)، بما فيها الحق العام.... الموضوع بإختصار لو شركة التأمين هذه
تريد أن تكسبك مستقبلا، فبإمكانها تبسيط الإجراءات وإرضاءك كعميل متعاون، وأما إن إختارت
المكسب الوقتي وقررت أن تخسرك، فستدخل في دوامة ما انزل الله بها من سلطان، ولن يحلك إلا
محامي شاطر ( خبيث ) يعني من النوع البهرش والبدفع والبهدد والبعمل الموبقات السبعين
عشان يكسب..... الله يعينك على شركة التأمين وعلى هيك محامي.
| |
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: د.نجاة محمود)
|
الاخ معتصــم تحياتى
الف حمد لله على السلامة!! والله حالة عربيتك دى ذكرتنى قصة خفيفة الظل حدثت فى بحرى.
لورى ضرب ليه واحد فرتك راسو تماما. المهم المنظر بشع جدا والناس متلمين فى مكان الحادث. شرطى المرور جاء بى موتر كبير ولما وصل ادى ليك صوت ورررر.....وررررررر وراح موقف الموتر وقعد جنب الراجل المتوفى ورفع يده كانه يتحسس النبض. اتخيل والراس مدشدش. واحد من الواقفين قال ليهو: اها يا العسكرى قول فيه نبض بتجيب ليهو راس من وين.
عربيتك دى قول ليهم صـلحوها نشوف بجيبوا ليها راس من وين!!!
تحياتى
| |
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: حماد الطاهر عبدالله)
|
سلام عليكم والف حمدالله علي السلامه والحمدلله انها جات في السياره ودي سلامه كبيره تستوجب الشكر والحمد لله اللطيف الخبير
عشان كده لما انا بعمل تامين في شركات تامين عندك فيها معارف واصدقاء حتي امورك تسهل تاكد انك لو كنت بتعرف المهندس كان طاعها ليك total loss ومع ذلك بقول ليك انو الضرر الذي اصاب بودي العربيه علاجه ساهل جدا رفرفين ومسطره وزينه وفوانيس اماميه وجنب وربما الطبلون واحتمال كمبرسور المكيف ولديتر للمكيف وللماكينه ليس من السهل تضرر الماكينه احتمالات شيالات الماكينه في حدود 10 الي 12 مليون تنفضها ليك نفضه تمام حاول انك تصل معاهم للمبلغ دا
والله يعينك
| |
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: نيازي عبدالله مرحوم احمد)
|
الاخ معتصم الحمد لله علي سلامتك ودي أهم حاجه بعدين السيارة دي بلغة أخواننا السعوديين مشلحه رسمي وتباع قطع ولو زرت التشليح في الرياض سوف تجد أحسن منها بكتير وقد خرجت من الخدمة عموما أنا فكرتي عن قوانين السودان تعبابه جدا لكن السؤال هل تأمينك شامل بعدين اذا أصرت شركة التأمين مفروض هم يقومو بالتصليح ويسلموك سيارتك بحالة ( كما كانت ) وفي هذه الاثناء يؤجرون لك سيارة بديله وكما قال الاخوان حاول تستعين بمحامي
Quote: يا حليل زمن النقل الميكانيكي في السودان. |
هذا الكلام من الاخ دينق لا علاقة له بالموضوع لكن المعارضه خشم بيوت
| |
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: ياسر السر)
|
** ابو نون.. ** صباحك خير.. ## حمداً لله على سلامتك وسلامة الوالد.. ## العربيه على حسب الصوره التى أوردتها ,, لو دخلت المصنع الصنعا يمكن أن ترجع ولكن بتكلفة تصنيع عربه جديده.. ** حلك ياخوى:- ## يعتمد الامر على تقرير الشرطه والذى بموجبه يُحدد بأن السياره غير صالحه للسير ويوضح فيهو بضرورة شطبها ... إذا كان الامر كذلك فيجب عليك :- ## تجيب ليك تلاته تقارير من قراشات كبيره لتقييم وضع العربيه والشئ المتأكد منو حيكنسلو العربيه بنلءاً على تقرير الشرطه ومعاينتهم الفعليه لها ,, ومن ثم توجه إنذار قانونى عن طريق مُعلن من محكمة الخرطوم الجزئيه وليس عن طريق مكتب مُحاماه وتديهم مُهله اسبوعين لسداد قيمة العربيه على قيمة التأمين فى وثيقة التأمين (وسوف تُخصم شركة التأمين 20% من قيمة التأمين "إستهلاك") ..
## فى حالة عدم الإستجابه تقييم دعوى مدنيه للمُطالبه بقيمة التأمين وتستخدم تقرير الشرطه + التقارير التى أرفقت صور منها مع الإنذار + الإنذار كمستندات فى دعواك بالإضافه الى الصور ,, مع المُطالبه بتعويض عن الضرر بحرمانك من إستعمال سيارتك نتيجةً للمُمطاله وإستئجارك لسياره طوال هذه الفتره .. (ودام الود بيننا) (ابو محمد فؤاد)
** كسره:- آسف لعدم مُقابلتك عند حضورك الاسبوع الماضى لدبى لوجودى خارجها..
| |
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: التيجاني عبد الباقي)
|
لكم جميعا خالص تقديري اخوتي واخواتي على مشاعركم الطيبة .. ولم تنقطع الاتصالات عن هواتفي منذ الامس من داخل وخارج السودان .. بعضها للسلام والاطمئنان وبعضها للنصح وتقديم المساعدة .
وبحمد الله فقد استطاعت ( حكومة سودانيز اونلاين ) حل المشكلة تماما بفضل احد الزملاء هنا واصبحت الخيارات في يدي .
اود ان انصح جميع الاخوة والاخوات بالاهتمام بربط حزام الامان الذي بدونه لا تفتح الوسائد الهوائية التي انقذتني من موت محقق .
نسيت ان اذكر في بداية البوست انني لم اكن مخطئا في الحادث وانما الطرف الاخر الذي دخل الشارع خطأ وهو امر مثبت في تقرير الشرطة وبذلك تستطيع شركة التامين استرداد كل ما تدفعه لي من شركة الطرف الاخر الذي وصفته الشرطة في تقريرها بالمتهم .
واذكر اخوتي واخواتي بانه لا شطارة في القيادة وانما هي اقدار مسطرة لانني اقود السيارات منذ اكثر من20 عاما وتجولت في جميع طرقات السودان ولكن في ذلك الحادث لم تنفعني خبرتي ولامهارتي لان ما حدث لا يمكن ان يتوقعه احد وكلنا نمشي على كف القدر.
لكم تقديري جميعا ..
| |
|
|
|
|
|
|
Re: صور سيارتي بعد الحادث .. وتصر شركة التأمين انه يمكن اصلاحها .. رايكم شنو ؟ (Re: معتصم محمد صالح)
|
لا حول ولا قوة الا بالله
اقسم بالله العظيم ما سمعنا بالحادث دا يا حبيب اتكتب ليك عمر جديد مافي شك ، العربية ملجنة نهائي
Quote: واذكر اخوتي واخواتي بانه لا شطارة في القيادة وانما هي اقدار مسطرة لانني اقود السيارات منذ اكثر من20 عاما وتجولت في جميع طرقات السودان ولكن في ذلك الحادث لم تنفعني خبرتي ولامهارتي لان ما حدث لا يمكن ان يتوقعه احد وكلنا نمشي على كف القدر. |
حمدلله على السلامة يا عمكـ
| |
|
|
|
|
|
|
|