دعواتكم لزميلنا المفكر د.الباقر العفيف بالشفاء العاجل
|
|
 السحابات المطوطرة بالحزن!
|
السحابات المطوطرة بالحزن
شاذلى جعفر شقَّاق
السحابات المطوطرة بالحزن
صبَّت على بلد الغلابه
خدَّر شِدَر كلَّ المواجع
واتشابكت غابات كآبه
وقصة الألم القديمة
جات تحرِّش فى كلابه
والضياع القالو روَّح
عاد من السكة المشابه
اتْكَنْدكتْ فرحة سنينهم
والسواد اصبح تيابه
والمسادير الحزينه
السجن قدَّد جُرابه
والبيوتات الكئيبة
واقفة تلعن فى الرتابه
والصغار من فوق يحاحو
قبلِ ما ينزل غرابه
والدنانين التنونى
لجَّمت نغم الربابه
والدبابير التلالى عكَّرت
بحر القصائد والكتابه
والمصايب ديمة تغرز
فى عويناتم حرابه
قِلَّة الحيلة وعنادها
طفَّشت قولة حبابكم مرحبابا
الظلم يوم سلَّ سيفو
ضاير الواقفين وصقَّرْ
كاوش الراقصات وشبَّل
جاوط الفنان وبشَّر
برَّم الشنبات وكشَّر
جُوَّه يَبْرُج ومابى يمرُق
ومافى واحد ليهو فَنْدَر
كلَّهم واقفين يعاينو
وما فى زولاً ليهو فندر
ومن بعيييد جات (النصيحة)
جارَّه لى توبه المغبَّر
فجَّت القاعدات وقالت:
طُزِّ فى القانون بتاعكم
طُزِّ فى الحاكم المحكَّر
أريتو كان شالّيهو شملة
وشافلو دكَّة وفوقها صنقر
شيلو من كتفو البِيَلْصِف
خُتو فى ايديهو مُبخر
حوِّطو الجيش المكاجر
كجِّرو الكجر المكجَّر
طرِّقو السيف المسالم
رجِّلو الخوف المطهَّر
والرجاله الفى النفاسه
ودُّوها للبحر العكَّر
نحن ما دايرين عساكر
نحن ما دايرين بنادر
نحن ناكل من ارضنا
انشا الله كَمْتَر
خلُّونا نفرح زى نخلنا
نحن نرقص للمحنَّنْ
وانتو تركزو للمضَرْضَر
وقولو شِن فايدة حُكُمْكُمْ
والمظالو بابها فاتح
لو مَتاقه ولو مدقَّر
خلُّو للرازق شئونو
وسرِّحو القدر المسطَّر
الله قادر
الله قادر يِمشِّى كونو
بلا عصابات لا نقابات لا مجنْدَر
الله قادر يرشد الحق لى صحابو
فى طريقاً لو موعَّر لو محفَّر
الله قادر يصبح المظلوم مظفَّر
ويصبح الظالم محدَّر
الله قادر
الله قادر
وطفَّر الدَّمِع المسخِّن
من طرف عينها المفطَّر
وكلَّهم واقفين يعاينو
ويسمعو القول المضفَّر
الخجل صفَّر وشُوشُم
ومافى واحد الَّا دَنْقَر
وبرضو منتظرين يعاينو
ومافى زولاً ليها عبَّر
ناحت السيدة (النصيحة)
ولملمت توبها المغبَّر
وسافرت فى الليل وحيدة
بارت النجم المحيَّر
|
|
 
|
|
|
|
|
|
|
 Re: السحابات المطوطرة بالحزن! (Re: shazaly gafar)
|
شازلى الشاعر الرائع ,
روعة وصف الفصاح لكل شىء
وما خلا شى ,
سلام وتحية ,
قصيدة جميلة فى مصاف ما كتب شعراؤنا الأفذاذ !
أبيات عامية رصينة وكلمات مختارة فى مواقعها !
ووزن , وكلا م فى الصميم !
يا سلام
يا سلام
والى المام ,
وانشر لنا هذا الأبداع وما لديك !
ست البنات .
| |
|
|
|
|
|
|
| |
shazaly gafar
المسافر
ست البنات
فيس بوك
تويتر
انستقرام
يوتيوب
بنتيريست