لو ما ماسورة ما كان ودوهو ليبيا ..من الحفرة للحفرة

Quote: ثقالة وارغو !! إذا كانت الكثير من جوائز سوداني التي نالها وارغو قد وجدت تأييداً من البعض واستغراباً من البعض الآخر فإن جائزة (الثقالة) التي نالها وارغو وهو يحرز هاتريك في حي العرب في مباراة وداعه للمريخ لم تجد اعتراضاً من أحد !! وارغو(الشيك الراجع) الذي فشل مجلس المريخ في إعارته خلال عشر محاولات نجح في إحراز ثلاثة أهداف بعد تأكد من إعارته!! ووارغو الذي جعل إعلام المريخ يكتب عن أغلى (ماسورة) تسجيلات أجنبية وضع إعلام المريخ في موقف حرج وهو يغادر للإعارة بعد أن جلس على صدارة هدافي الدوري الممتاز!! بالمناسبة أهداف وارغو دي كانت وين ؟ فجأة كده لقيناهو هداف الدوري الممتاز !! ثقالة وارغو دي قديمة.. فعندما كان يلعب في إنييمبا النيجيري أصبح هداف دوري أبطال إفريقيا دون أن يستطيع فريقه إحراز البطولة !! وعندما وقع للمريخ قال إن المريخ بوابته لأوربا ولكنه أغلق على المريخ حتى بوابة كأس السودان !! وعندما احتاجه المريخ في البطولة الإفريقية خرج المريخ لأول مرة في تاريخ البطولات الإفريقية بدون أن يفوز في أي مباراة في دوري المجموعات!! وعندما كان مجلس المريخ يدافع عنه كان يحرج المجلس بتصرفاته داخل وخارج الملعب.. وعندما قرر المجلس الاستغناء عنه أحرج المجلس بأهدافه داخل الملعب!! ووارغو الذي لم يكن المريخ يحتاجه في بداية الموسم وحاول إعارته وفشل في ذلك.. نجحت إعارته بعد أن أصبح المريخ محتاجاً له !! ووارغو الذي لم يقنع المدربين في الفترة الأخيرة وجلس كثيراً على دكة البدلاء.. يغادر الآن في فترة المدرب الذي يحبه ويعتبره لاعب يستحق عشرة مليون دولار !! ووارغو الذي فشل جمال الوالي بكل علاقاته الخارجية في إعارته.. تتم إعارته بعد استقالة جمال الوالي!! ووارغو صاحب أغلى صفقة في انتقالات اللاعبين في السودان وربما إفريقيا بالانتقال الداخلي في القارة ينتقل معاراً بسبب الالتزامات المادية العالية التي عجز المريخ عن توفيرها له!! أثقل حاجة في وارغو أنو ماشي من السودان من غير ما يجيب قون في الهلال!! يعني لو حاضر زمن (شاخور) الله يرحمه كان قال ليهو العشرة أقوان بتاعتك في الدوري الممتاز دي (بلها واشرب مويتها) وغادرنا بالسلامة.. نعمل بي أقوانك شنو ولا واحد فيها في الهلال ما في!! وارغو أحرج أي زول حتى الطبيب النفساني دكتور حاتم إدريس الذي قال إن هذا الموسم موسم وارغو ما عندو طريقة الا يتابع موسم وارغو مع الأهلي الليبي!! مباراة المريخ مع أهلي مدني حتنتهي صفر/ صفر.. هجوم المريخ حيضيع أهداف كثيرة.. الناس كلها حتقول يا حليل وارغو.. ما سودانيين.. بتذكروا هاتريك وارغو في حي العرب بس.. أحمد محمد أحمد ذاتو احتمال يقول ليك يا حليل وارغو.. حتجي مباراة الهلال.. هجوم المريخ (الفضل) حيزعل من إعلام المريخ ويغيب من التدريبات.. جمهور المريخ حيقول يا حليل وارغو.. ما سودانيين بنسو أنو وارغو ما جاب ولا قون في الهلال.. الهلال حيغلب المريخ واحد صفر.. واحد فقط لا غير.. جمهور المريخ حيهتف ضد المجلس.. لو كان وارغو موجود كان اتعادلنا مع الهلال.. كأس الدوري الممتاز كالعادة حيمشي للهلال.. المريخ كلو حيقول أنو الهلال فاز بالدوري عشان وارغو مافي!! بالمناسبة.. انتو وارغو ماشي الأهلي الليبي ولا الاتحاد !! ماشي الأهلي.. ونحن ما لنا ومالو طالما ماشي الأهلي!! يعني لا يلاقينا لا نلاقيهو لا نتلم!! كده يمشي بي (صمة خشمو) قون فينا ما جابو !! وارغو.. الهلال حارقو !! والله حارقنا فراقو.. نحن برضو حنفقدو !! ياخي ده من جا المريخ.. المريخ ما ضاق عافية.. يعني كده هجوم المريخ زي (الشلة) الاتفرتق.. طمبل في الإمارات.. وبن ضيف الله في تونس.. وكلتشي في لندن.. هو لسه في لندن !! والعجب في الذاكرة !!! ووارغو في ليبيا.. ليبيا فتحت!! انتو قائلين ثقالة وارغو انتهت ؟ أبداً.. حيتألق مع الأهلي الليبي في المباريات الأولية.. إعلام المريخ حيعمل مشاكل زي ما عاملها هسة في إعارتو.. بعد تلاتة أربعة مباريات حـ(يمرض) ليك ناس الأهلي.. ناس الأهلي حيقولو للمريخ شيلو (الشيك الراجع ده) المريخ حيرجع وارغو.. جمهور الأهلي الليبي حيعترض باعتبار أنو اللاعب تألق في البداية ومن المفترض الأهلي كان يصبر عليهو.. حتحصل مشكلة في الأهلي الليبي.. وارغو حيتأخر عن معسكر المريخ الإعدادي في الموسم الجديد.. حتحصل مشكلة في المريخ !! المريخ حيحاول يعير وارغو من جديد.. إعارة وارغو حتفشل.. مجلس المريخ الجديد حتكون عندو مشكلة في توفير مقدم عقد وارغو السنوي والبالغ اربعمائة ألف دولار !! وارغو ما ثقيل ما حيتنازل عن تعريفة !!! بالمناسبة جمال الوال ملتزم بالدعم المادي حتى ديسمبر فقط لا غير !! يعني ثقالة وارغو الجاية حتكون مبااااالغة !!