|
اجمل رمضان فى السودان
|
مرت اكثر من 13 عام ولم اصم رمضان فى السودان وبحمد الله تمكنت من صيام 19 يوم هذا العام وكم هو جميل ان تصوم رمضان فى السودان بين اهلك وحبايبك واصدقائك ، والله شئ لا يوصف رغم سخونة الجو الا ان وجودك وسط اهلك وفى وطنا الحبيب السودان يجعلك تحس بلطف الجو وهدوء الليل . وكما يعلم الجميع فعجلة التغيير فى السودان اصبحت تسير بصورة مخيفة، تندهش كلما ذهبت الى مكان ما فهناك مبانى ظهرت على السطح وبسرعة البرق ، وهناك طرقات جديدة وعديدة وبالرغم من كل ذلك لا تحس بالناحية الجمالية لوجودالاوساخ فى كل مكان وركوض المياة المتعفن، وازدحام وسائل المواصلات فى كل ارجاء العاصمة الخرطوم ( سبحان الله يعنى يا مافى مواصلات يا مافى ركاب) زمان كانت مشكلة المواصلات كبيرة والان كترتها تسبب ازمة كبيرة........... اما اذا رجعنا لرمضان فجمالة فى الافطار فى البرش بره مع الجيران والاحباب وتجمع الصغير مع الكبير والحكاوى والقفشات السريعة من هنا وهناك وتبادل الاماكن مع الاخرين كلما ظهر ( صحن كارب) والله حاجة عظمة عديل ، بعدين الشاى والقهوة وناس التدخين براهم وناس التمباك براهم ، وتحس بعظمة الشهر الكريم وانت جالس تاكل ويمر احد المارة بالطريق وترى الاصرار فى وجوه الجميع على ان يجلس المارة قبلهم وبينهم بالحليفة والقوه ، هذا هو انسان السودان الذى يشهد له بالكرم والجود. اتمنى من الله ان يمكن الجميع من الصوم فى السودان حتى تنعموا بالاحساس الحقيقي لرمضان وكل عام والجميع بخير وصحة وعافية
ولكم مودتى
رياض همت
|
|
|
|
|
|