|
|
 بـيت كل السوادنيين ,, وانا اتيت من هناك !
|
بت الجـزوولي .. دايرين لينا قراصتن حاااره كدي !
وبت الجزولي , هي امي , امراه جميله , ولطيفه , وحلوه المعشر ,
لمن تتونس معاها , تأكد انك حا تتفتش في ذاكرتك : ياربي انا لاقيت الزوله دي ووين قبل كدا ..؟؟
وفوق هذا كوولو ,
طباخـه من الدرجه الاولى ,
طبيخ كدا احلى مافيهو كرمها الفياض , واصرارها دوما على دعوه كل العزابـه ومن تقطعت بهم السبل الى غداء الجمعه ببيتنا!
هجرتنا المبكره الى السعوديه ,
جعلت من امي المرأه السودانيه الوحيده في مدينه تعج بـ العزابه السودانيين,
من مختلف المهن واللهجات ,
اطباء , صيادله , ممرضين , ميانيكيين , رعاه ..الخ
ما يجمعهم جميعا , هو افتقادهم الى الاكل السوادني ,
العصايد , والقراريص بي ملاح الويكه الحمرا والباميه المفروكه بالشبت !
تعودت دوما منظر التجمع المهول للسودانيين بـ (رفحاء) في شقتنا المتواضعه كل جمعه ,
كما تعودت مرافقه ابي الى سوق الخضار واللحمه كل يوم خميس ,
للتزود بما لذ وطاب ليوم الجمعه , والذي يوافق تجمع السودانيين من القرى الصغيره المجاوره لـ(رفحاء) ,
وهدفهم جميعا , التحلق حول مائده بت الجزولـي يوم الجمعه !
-----------
رفحـاء .. منطقه بمنطقه الحدود الشماليه بالممكه العربيه السعوديه حيث تربيت واكلمت مراحلي الدراسيه !
|
|
 
|
|
|
|
|
|
|
 Re: بـيت كل السوادنيين ,, وانا اتيت من هناك ! (Re: داليا الكباشى)
|
Quote: تعودت دوما منظر التجمع المهول للسودانيين بـ (رفحاء) في شقتنا المتواضعه كل جمعه ,
كما تعودت مرافقه ابي الى سوق الخضار واللحمه كل يوم خميس ,
للتزود بما لذ وطاب ليوم الجمعه , والذي يوافق تجمع السودانيين من القرى الصغيره المجاوره لـ(رفحاء) ,
وهدفهم جميعا , التحلق حول مائده بت الجزولـي يوم الجمعه ! |
دكتورة داليا .. رمضان كريم،
ربنا يتقبل منا ومنكم ويجعلنا من عتقائه
التحية لوالدتكم الفاضلة (بت الجزولي) ..
وربنا يديها الصحة والعاافية ..
فوراء كل امرأة ناجحة أم عظيمة
| |
|
|
|
|
|
|
|
|
|
Re: بـيت كل السوادنيين ,, وانا اتيت من هناك ! (Re: داليا الكباشى)
|
تصدقوا ما عارفه لحدي اسي !
على اختلاف مهنهم , وسحناتهم , ولهجاتهم ,
وهلى صغر سني انذاك ,
الا انني لم اكن اعرف منو فيهم دكتور ومنو فيهم سواق ومنو فيهم شايقي ومنو فيهم من ام طرقا عراض !
ما حصل طقشت اضاني , مناداه احدهم للاخر بي مهنته او بعرقه او بمكان قدومه ,
كل ما كنت الاحظه واسمعه وما لصق بذاكرتي ,
هي والونسه والكوشتينه , وصياحهم وتعالي اصواتهم وهم يشاهدون (برنامج الرياضه)في التلفزيون السعودي يوم الجمعه ,
وموسيقاه المميزه , والتي احفظها حتى الان عن ظهر قلب !
العزابه هم العزابه ,
بيجوا ببقراصه , والملاح , بياكلوها كوولها ,
وانا بكون مع ماما في المطبخ ,
بتديني القراصه في غتايه الحله , وتقول لي: اجري لحقيهم ليها في المجلس واوعي الملاح يتدفق منك !
أما الدجاج والسمك والسلطات المتبقيه من الغدا ,
فـ ما بيقصر عمو صديق الكاسب , انو يكبها كوولها فوق بعض ويشيلها معاهو في كيس !
خاصه انو وراهو سفر طويل , لحدي قريه (الكاسب) , والتي اصبحت ملتصقه بي اسمه , حتى بعد نقله الى (رفحاء) بسنوات !
ولا اعجب انه ينادى بهذا الاسم حتى الان !
| |
|
|
|
|
|
|
|
|
 Re: بـيت كل السوادنيين ,, وانا اتيت من هناك ! (Re: Moneim Malik)
|
Quote: ياخ دا المجنن بوبي
ذاتو.....المفروكه بالشبت |
يا منعم الحاجه طبعا بتعمل ملاح خطيير جدا ,
بالشمار الاخضر , تاكل ما تدي الجمبك :)
لمن قريت ليها تعليقك قالت : كر علـي , جيبيو يفطر معانا يوم !
| Quote: كنت داير اجى اشحدك حلومر لكن لقيت المرة مدكنه شويه |
والله يا منعم
الحلو مر السنه دي ماشالله ,
عوسنا , وقسمنا , وودينا لي زميل البورض ,
واسي بنعمل في الدور التاني ,
زميل البورض كمل حقو بعد 10 يوم من ما وصلو ,
شكلو كدا والله اعلم كان بياكلو بالعيـش
| |
|
|
|
|
|
|
|
|
|
Re: بـيت كل السوادنيين ,, وانا اتيت من هناك ! (Re: داليا الكباشى)
|
رمضـان في بيتنا !
العصيده والملاح ,
الدجاج بالفرن ,
الكفته بالمكرونه ,
البيتزا , الطعميه , سلطه الروب,
فطيره خليه النحل,
السمبوسه باللحمه ,
البيض الاسكتلندي ,
البلييله , والخشاف , والتمر ,
ياربي كفايه ولا نعمل قراصه بي ملاح ..؟؟
دي كانت ماما ,
عندها ورقه بتكتبها قبل كل عزومه في رمضان ,
بتقول لي : ارح نكتب الورقه , عشان ما ننسى شي !
وننهمك ليله العزومه (غالبا الخميس) , في تحضير الخيار والجزر لي سلطه الرووب ,
ولف السمبوسه , وفرم الطعميه , وتقطيع سلطه الفواكه و وبل الحـلو مر !
فرش الصفر ورص العده ,
كانت مهمي مع ابي , في ظل غياب الولد الكبير ,
وشغلي لهذا المنصب (حتى الان) ,
فقد كنت اهتم بالتفاصيل الدقيقه : في صابونه في حمام الرجال , الحوش مغسل والفرش مقشوش , نقل الاكل من المطبخ وحمل الاطباق الخاويه
استعدادا لمهمه غسيل الاطباق والحلل !
لملمه البواقي في صواني كبيره , وتقسيمها في اكياس استعدادا لتحميل كل عزابي نصيبه للعشاء ,
كانت مهمه عموصديق الكاسب , وصديق لوقا !
ومع انهم ساكنين في نفس بيت العزابه ,
الا انو كل واحد فيهم كان بيشيل نصيبو براهو ,
وتكون النهايه ضحكات جميله , بينهم وبين ابوي وامي في المطبخ ,
تنتهي غاليا بسكب البواقي فوق بعض (بما فيها الملاح) بواسطه عمو صديق الكاسب حساااده في الباقين ,
وعشان يشيلو كلو براهو بعد ما يقنع الناس منها !
| |
|
|
|
|
|
|
|
|
|
Re: بـيت كل السوادنيين ,, وانا اتيت من هناك ! (Re: داليا الكباشى)
|
عطـاالطويـل .. !!
لطالما احترت في تسميه عمو عطا بهذا الاسم ,
فهو على طوله المعهود , وسحنته المسكينه جدا,
الا انا طوله الفارع لم يكن السبب في تسميته ,
وانما قصد بالطويل , طوله البال !!
انسان ماااهل , وهادىء , يتقدم داخل اليت بخجل بعد ان تدعوه الى الدخول بي تحانيس شديده ,
كانو عزابه ناس عمو عطا , ساكنين قصادنا في عماره مشهوره في سوق (الرجال) ( ماعندو علاقه بي اسمو نوهائي فمعطم رواده من النساء)
عمو معاويه الفريح , وعمو فيصل الدهب , كانو من ساكني هذا البيت ,
القروب دا طبيعي جدا معزوم عندنا كل يوم , لو ما غدا عشا , ولو ما فطور بيجوا يشيلو السحور وترامس القهوه والباسطه !
| |
|
|
|
|
|
|
|
|
|
Re: بـيت كل السوادنيين ,, وانا اتيت من هناك ! (Re: Mohammed Awad)
|
Quote: لكن اسى باقى ليك زميل البورض دا كان ضرب البيض الاسكتلندى
ودخل البورض دا بيكون نافع؟ قطع شك حيردمو ليك...
ما خلاص اتدلع |
اسي انت اللفه الطويله حقتك دي عشان تعرف البيض الاسكتلندي دا بيعملوهو كيف صاح ؟
ابيييييت , مششششم , ماف ليك !
اقول ليك قوله ,
امشي الدار السودانيه للكتب ,
وقول ليهم داير كتاب منال العالم للطبخ ,
واقعد ذاكر فيهو ,, احتمال كبير تلقى الطريقه ,
بس اوعى يغشوك ويقولو ليك فيها بيض
| |
|
|
|
|
|
|
|
|
 Re: بـيت كل السوادنيين ,, وانا اتيت من هناك ! (Re: داليا الكباشى)
|
الكريمة ازيك انت وامك (دى وصية ) ....
الوالدة ربنا يمتعها بالصحة والعافية ..
وانتى قائلــه الناس العزابة ديلك بينسوهــا ابدا تلقاهم طوالى
عاملين المقارنة حليل قراصــة حاجة فلانه ( الله يطراها بالخير )
الفراق قاســى قالو ..
شكلك عايزه تقولــى مع السلامة يا امــى ...
| |
|
|
|
|
|
|
|
|
|
Re: بـيت كل السوادنيين ,, وانا اتيت من هناك ! (Re: خدر)
|
Quote: بت الجـزوولي .. دايرين لينا قراصتن حاااره كدي !
وبت الجزولي , هي امي , امراه جميله , ولطيفه , وحلوه المعشر ,
لمن تتونس معاها , تأكد انك حا تتفتش في ذاكرتك : ياربي انا لاقيت الزوله دي ووين قبل كدا ..؟؟
وفوق هذا كوولو ,
طباخـه من الدرجه الاولى ,
طبيخ كدا احلى مافيهو كرمها الفياض , واصرارها دوما على دعوه كل العزابـه ومن تقطعت بهم السبل الى غداء الجمعه ببيتنا! |
لاعجب فهي من (نوري) .............
زول بكسر تلج لي نسابتو ................. 
| |
|
|
|
|
|
|
|
|
|
Re: بـيت كل السوادنيين ,, وانا اتيت من هناك ! (Re: خدر)
|
| Quote: الشاف زميل البورض متّكل في رفحاء كل جمعة ما كضب |
لمن زميل البورض دا كان في السودان ,
جا يسوقني من البيت وكنا مارقين معزومين فطور بره .,
لقى امي خاته الفطور في الصينيه جمب ناس ابوي ,
قراااصه حـاااره بي ملاح ويكه حمـراا , وسلطه عجور وبصل وجرجير وشطه بس !
واختك طبعا لسه كانت فوق بتتسرح , وامي استغلت فرصه عدم وجودي , ويلا حلفتو ليك ,
عليييك الله اقعد دخل يدك بس مسافه ما داليا تنزل ,
ووحياتك , بعد ما كان هو المنتظرني , بقيت انا المنتظراهو ,
لمممن كمل الصحن كللو ,(ماشالله) ,
غايتو الناس المشينا ليهو بيكونو زعلانين لحدي اسي من عدم اكلو
| |
|
|
|
|
|
|
|
|
|
Re: بـيت كل السوادنيين ,, وانا اتيت من هناك ! (Re: بدر الدين اسحاق احمد)
|
| Quote: عاملين المقارنة حليل قراصــة حاجة فلانه ( الله يطراها بالخير ) |
قبل فتره قصيره ,
كنا انا وامي في السوق الشعبي ,
لاقانا عزابي من الكانو معانا زمان في رفحاء ,
طبعا اول شي ما صدق انو دي انا داليا !
اظنو قايل الدينا بتقيف ولا شنو ما عارفه , المهم ,
اول ما شاف امي : سلم علينا سلام شديد , وقال ليها : علييك الله بتعملي قراصه زي بتاعت زمان ديك ؟
انا لمن ضحكتا , قال ليوالله يا دلويه القراصه القطعتها امك لينا زمان ,
لو رصوها جمب بعض , كان بتتلف حولين الكره الارضيه 8 مـرات !
تحياتك وصلت , والحاجه بتسلم علييك :)
| |
|
|
|
|
|
|
|
|
|
Re: بـيت كل السوادنيين ,, وانا اتيت من هناك ! (Re: عاطف عمر)
|
يوم مشيت بيتهم دقيت الجرس دخلوني قعدت اتونست كويييس
كلهم ملمومين وماف زول عارفني وكل واحد قايلني صاحب التاني!
عمكـ عبد المنعم انداح ليكـ معاي لما قال الزول دا يا ربي جانا طاشي من وين!!
وأنا يا معلم كمّلت ليكـ الاندياح على الآخر .. ولا اشتغلت ليكـ بي داليا الما ظهرت
إلا وأنا طالع .. كملت ونستي وشلت منها الشربوت وقمت متخارج!
بكونوا لحدي الليلة بسألوا دا منو!
| |
|
|
|
|
|
|
|
|
|
Re: بـيت كل السوادنيين ,, وانا اتيت من هناك ! (Re: Moneim Malik)
|
وأنا أقول البت دى جابت الجدعنه والشطاره دى من وين ؟؟!!
فعلا من شب على شئ شاب عليه .
والله ياداليا إنتى كنتى محيرانى ,, أول حاجه بطيبتك وكرمك
وتانى حاجه بشطارتك الأكاديميه والإجتماعيه ,, لكن بعد البوست
ده عرفت إنه طالما أمك بهذه الصفات فلا بد أن تكونى مثلها ,,
ثم إنك درستى كافة مراحلك فى السعوديه والتى صارت فى زمنكم
هذا تتفوق على السودان فى الناحيه التعليميه .
فالحمدلله كل كتاباتك هنا بلغه سليمه ومبرأه من كل عيب ,, وأظننى
لن أبالغ إذا قلت لك إنك تتفوقين على كثير من حملة الماجستير والدكتواره
من خريجى هذه الأيام والذين لايفرقون بين ال ( ض ) وال ( ظ ) .
تحيه ليك وتحيه لوالدك الذى أحسن تربيتك وتحيه لتلك الوالده العظيمه
التى أظنها أم كل السودانيين .
| |
|
|
|
|
|
|
| |
داليا الكباشى
نصر الدين عثمان
Moneim Malik
Mohammed Awad
بدر الدين اسحاق احمد
حبيب نورة
أبو عبيدة البصاص
خدر
omer osman
عاطف عمر
محمد عبد الماجد الصايم
صلاح أبودية
طارق جبريل
معاوية الزبير
خضر حسين خليل
الشاذلى خيرى عبد الله
عفاف الصادق بابكر
tmbis
ABUHUSSEIN
حذيفه ابراهيم الكباشي
عمر صديق
WAD ELGAALI#4
كمال سالم
الصادق اسماعيل
فيس بوك
تويتر
انستقرام
يوتيوب
بنتيريست