بص الوالي "" يا ناذر الخليفة

Quote: طبعاً زي ما عارف اخوك ساكن الثورة (بالوادي يوديني وبالنص بيوديني لاني بلفق الباقي بركشه ) المهم أنا بحب اطلع بشارع الوادي وحاتك من يوم عرفته الباصات دي يومي بطلتش اقلا حاجة 35 دقيقة حتين بص الوالي يشرف بي طلعتو البهية (بالمناسبة هو اللون بتاعو ده شنو؟) يعني ياناذر واضح جداً انو الباصات دي عندها مشكلة في التحرك من اخر محطة (وقصدي اخر محطة في الثورات) لانو نفس الحالة دي حاصلة في شارع النص وشارع الشنقيطي . اها (ياسيد الأمنتي ليك) بعد اللطعه دي جاء وركبته (بسم الله ماشاء الله) من حراية تفسخ دخلته كندشه ممتازه (قطع شك البص ده وبرج الفاتح واحد رغم اني ما جربته برج الفاتح بس شايفو سمح) المهم ... مع الكندشه ديك والحراية رأسي فار بس شوية كده وهمد في آمان الله وصلته اخر محطة الخرطوم غرب الجامع الكبير ونزلت انتهيت من قصصي وحاجاتي المساء الساعه 9 رجعته غرب الجامع الكبير القي ليك خلق الله واقفه والباصات طووويلة وواقفه وشعب الله (المحتار) تحت والسواق والكمساري جوه الباص وقافلين ابوابهم عليهم وبعض الباصات فيها عدد من الشعب السوداني (الفضل) والسواقين ما عايزين يتحركوا يودوهم قلنا الحاصل شنو ؟ قالوا:- سواقين الباصات قالوا الزمن بتاع الرجوع لحوش الشركة قرب ولو مشوا مشوار تاني بيتأخروا ولو اتأخروا حيحاسبوهم بالخصم من المرتبات !!! اها اللحجة والعوا والجوطة قامت اخر شي السواقين قالوا هم مستعدين ياخدو ناس جبرة لانو من جبرة حوش الشركة قريب وحاتك ده الحصل ونحنا دقشنا كداري لحدود ميدان -الالبوم- جاكسون ومن هناك اتسهلنا علي اهلنا . وحاتك اليوم البعديهو ذات الانتظار الصباحي (اكتر من 35 دقيقة) بعدها ركبته ووصلته غرب الجامع الكبير وشتته اشوف اشغالي المساء جيت بدري الساعه 8 مساء عشان مايحصل معاي الحصل امس اها جيت ليك الموقف لقيت ليك الموقف (سراب بقيع) ولا بص ولا الشعب داك !!!! ياناس الحاصل شنو ؟؟؟ قالوا الموقف غيروهو !!! ودوهو ؟؟؟ قالوا شارع الجمهورية هنااك جمب صيدلية كمبال . دقشته علي صيدلية كمبال لقيت ليك الباصات واقفه بشكل طولي مع شارع الزلط وتمتد من امام القنصلية المصرية لحدود تقاطع الجهورية مع القصر ووقعته من وراء افتش في خط الثورة بالوادي اخر شي لقيتو ليك قداااام حمدته الله علي اني لسه بي عافيتي وركبته ووصلته اهلي . اليوم البعدو برضو ذات الانتظار الصباحي الكريه المهم جاء البص وركبته وكان فااااضي قعدته وعندي كتاب طلعتوا اقراء فيهو شويتين كده اسمع الحوار التاني بين الكمساري وواحد مواطن (من مواطني قدرة الامكان علي صراع المستحيل) :- الكمساري :- الكلام ده ما بينفع يا سيد . المواطن :- مابينفع ليه ياخ !؟ الكمساري :- ما بينفع لانو نحنا ما داخل الكلام ده . المواطن :- لكن انحنا ما كتبوا لينا انكم ما داخلو ! الكمساري :- ايوة عشان نحنا نزلنا الشغل جديد . الشاب :- طيب أنا اعمل شنو ؟ الكمساري :- والله ما عارف ! لكن انا ذاتي اعمل شنو؟ انتهي الحوار ده فجأة بذهاب الكمساري وبقاء المواطن في مقعده (في نهاية الرحلة اكتشفته انو المواطن شخص معاق وبالقطع اخرج للكمساري بطاقة ركوب دون أن يدفع شي ) وهذا الامر مرفوض داخل هذه الباصات . اها وصلنا ونزلنا في شارع الجهورية وانتشرنا نسعي لما قُسم لنا ... جيت راجع المساء اركب اول ما وصلته شارع القصر القي ليك الباصات قدامي كتييييره ياناس الحاصل شنو ؟ قالوا الباصات حولوها هنا ضحكته وقلت الحمد لله اها فتشته الوادي ولقيتو وركبته . بكرة طلعت برضو انتظرته مسافة وبرضو ركبته بص فاضي والله اكرمني بانو الكمساري بعد قضى شغلو جاء قعد جمبي فابتدرته :- أنا :- بختكم ضاربين التراطيب . الكمساري :- ههههههههه ياخ مافي اي شغل بارد . أنا :- كيف الكلام ده ؟؟ ياخ دي كندشه الف . الكمساري:- ومشاكل ونقه 5 الف هههههههه. أنا :- مشاكل شنو ياخ الله لا جاب المشاكل . الكمساري :- والله مشاكل كتيره خصوصاً نحنا الباصات الشغاله الثورات دي . أنا :- كيف الكلام ده ؟ الكمساري :- ياخ نحنا خطنا لانو طويل تذكرتنا بي 2 جنيه اها في ناس بتركب وتنزل في نص الطريق وما عايزين يدفعوا 2 جنيه وبنسمع منهم نبذ وكلام فارغ كتير جداً جداً ياخ هسي خط الشنقيطي وقفوهوا ليهم يومين لانو في مواطن ضرب كمساري قرب يقتلو . أنا :- معقول ؟؟ وما لقوا ليكم حل ؟ الكمساري :- حل شنو ياخ !!! الحل الحليناهو نحنا الكماسرا ديل قالوا لينا انسوهو أو بنخصم من مرتباتكم . أنا :- وانتو عملتو شنو وحليتوها كيف؟ الكمساري:- لما كتروا الناس البتنزل في نص الطريق وبقوا يعملوا مشاكل بقينا التذكرة الواحده نقطعه نصين ونوزعه بين نفرين واي نفر ناخد منو 1 جنيه وبي كده حلينا المشكلة لكن ناس الشركة رفضوا الحل ده وقالوا الايرادات بقت قليلة ولازم التذكرة بي اتنين جنيه واي نقيصة من الايرادات بنخصمه من مرتبة السواق والكمساري !. أنا :- ده كلام عجيب ياخ !! الكمساري:- غايتوا تتحله كيف ما عارف ! أنا :- وهسي مرتباتكم البخصموها دي كفاية عليكم قبل الخصم ؟ الكمساري :- ياخ السودان ده لو بتصرف فيهو 4 مليون في الشهر ما بيكفيك ... ياخ شوف الاسعار كيف وشوف العلاج كيف وشوف الطماطم سااااي وشوف لو عندك ناس بتقراء يازول ما بتكفي . أنا :- ربك يكون في العون وانشاء الله يلقوا ليكم حته واضحه تقيفوا فيها عشان لا تتجهجهو لا تجهجهونا معاكم . الكمساري:- هههههههه اها دي قصة تانية عجيبة ياخ اصلاً موقفنا كان غرب الجامع اول أمس اصحاب الحافلات عملوا اضراب ورفعوا مذكرة قالوا يا ترجعونا معاهم غرب الجامع يا تشيلوهم من غرب الجامع . أنا :- يا راجل ؟؟! واها لو ماشالوكم ؟ الكمساري:- إي والله قالوا كده ولو ما شالونا قالوا هم بيعرفوا يتصرفوا وبيكرهونا الطريق . أنا :- يعني كيف ؟ وبيسوا شنو ؟ الكمساري:- يا شاب ديل ناس عجيبين لو عاكسونا بي عرباتهم في الطريق ساااي ممكن يسببوا مشاكل كبيرة جداً جداً . أنا :- كمان عايزة تبقي القصة في حوادث وموت . الكمساري:- ههههههههههههههه والله زي ما بتقول كده . اها حوارنا ودردشتنا دي انتهت ونزلته - للامانة من دردشة الكمساري ده وحوار الكمساري السابق مع المواطن المعاق اخدته طابع انو كماسرة الباصات دي تحديداً كويسين - . اها البرنامج بقي كده يومي الصباح انتظار والمساء لازم تجي بدري جداً جداً عشان زمن حوش الباص ما يكبس وطبعاً تاني زمن الحوش ذادوهو ساعه وبقت التقريشه الساعه 11 مساء (انتو قصة 11 دي شنو معانا؟) . اها في مرة من مراير رمضان ده وتالت يوم طلعته المساء جاي علي الخرطوم وكان الوقت 9 مساء الغريبة وقفته كده جاء طوالي بص ركبته واتحركنا ولما وصلنا العربي بتاع البص دخل بشارع الحرية وطوالي اخد الاتجاه ماشي علي كبري الحرية ولما وصل بالقرب من بداية الكبري وقف بالجمبة والركاب بدو ينزلوا انا طبعاً ماشي شارع القصر ما نزلته ومعاي زي تلاته شباب كده برضو قاعدين السواق قام قال :- يا شباب خلاص رحلتنا انتهت هنا . انا قلته ليهو :- وهنا دي وين ؟ السواق :- الموقف الجديد في ميدان جاكسون . أنا :- وده من متين كمان - لانو في رأسي كل شي جائز - السواق :- لا لا ما كده القصة كلها انو نحنا زمن رجوعنا للشركة خلاص جاء وعايزين نمشي نقرش . أنا :- طيب ياخ أنا لو كان عايز اجي ميدان اكسون ما كان اركب اي حافلة تجيبني هنا ؟ السواق :- يا ابو الشباب يعني أنت عايز شنو ؟ أنا :- عايزك توصلني شارع القصر لانو شارع القصر ده هو محطتكم . السواق :- ابداً ما محطتنا ونحنا بص دائري. انا :- بص دائري يعني شنو ؟ السواق :- يعني بنتحرك حركة دائرية حتي داخل الخرطوم السوق العربي القديم . أنا :- تمام مشكلة مافي أها انت هسي اتحركته حركة دائرية داخل الخرطوم وجيت ميدان جاكسون الجديد يلا اتوكل علي الله وكمل حركتك الدائرية ووصلنا علي الخرطوم السوق العربي القديم ويكون اديت شغلك وعداك العيب ونحنا ذاتو وصلنا . السواق :- يا ابن العم الله يهديك ويفتحه عليك انزل ياخ . انا :- ابدا ما ح انزل . السواق برجع ليك ال2 جنيه انزل . انا :- ابدا . السواق :- يعني لازم اوصلك ؟ انا :- نعم . وبالفعل وصلنا لحدود شارع القصر . اها يا ناذر كيف معاك ؟؟ هسي القصة دي شوف فيها كم حكاية بتوضح مشكلة بص الوالي دي ؟؟ وانت ماسك لي في الكندشه والترطيبة ؟؟! وواحد جاي من جبل اولياء لاطش !!؟ ياناذر هسي جيب ليك جيعان والا فقران قعدو في كندشه شوفوا ما بيمرض ؟.