|
ُدراب - إحتمال يكون للحكاية بقية
|
لمن الواحد فينا أى واحد يقوم يستف ليهو بوست في المنتدى خلاص الموضوع بيكون ما حقه يعني ببقي بوست مشاع عام زيو وزي ميادين الروابط زمان ما في زول بيقدر يحميك من أن تتفرج بل كل ما كنت طويل التيلة مشرئب العنق بتشوف بي مزاج وتصرخ في الحكم وفي رجل الخط والباك البليــــد القرش الكورة شديد للقون والقون الوهم الما كان متوقع الكورة. ومرات تكورك شماته في التانيين "يا الله درون". البوست لمن يتحكر ويتمدد في المنتدى بكون بمثابة منبر مفتوح بين الكاتب أو المقال موضوع البوست وكل الناس الهنا بإختلاف توجهاتهم وثقافاتهم ، والناس هنا ملل وفرق وطوائف وجماعات ونحل وزرافات فيهم ومن بينهم السليمة والموقوذة والمتردية والنطيحة وبرضو ما أكل السبع وما ذبح على النُصُب ، يعني مهما قلبت الهوبه في أى مقال ناقله أو مؤلفه ما تخلي الغرور يدخلك ويركبك فهنا في ناس خطرين وفطاحلة وجهابذة وعتاوله بس مكبرين أدمغتهم ، فما تستخف بمقال أو مداخلة أو كتابة أو عبارة بعقلية القارئ أو ثقافته وأنت أصلاً لا تعرفه إلا من خلال كتاباته ومداخلاته هذا إن كنت أصلاً تقرأها ، زما كان المثل بيقول "يا عجوزاً ما ليهو نديد يا كضاباً أهله بعيد" فالأول بيعتمد على الأحداث الموغلة في التاريخ لأن كل الناس البيكونو من دوره إتلحسوا وبقي يبرطع براهو ويفكها عكس الهوا ويصدقها كمان وزول واحد يقول ليهو الكلام دا ما صاح لأنو بمسألة السن والدفعة الإتلحست دي ما بيكون في Evidence تخت الكورة واااااطه أو تقول لي العجوز الما ليهو نديد دا كضاب كضاب يا جلكين يمين كضاب .. لكين الحمد لله بعد إكتشاف التدوين والتطور العلمي المذهل في كافة المجالات أنتفي عامل التاريخ وبقي الموضوع يبعد عن القارئ للتحقق منه أو طلب المعلومة بمقدار كليك في أى ماوس. لو جينا للجغرافيا التي جعلت الكضاب التاني يستفيد من عامل الأرض "أهله بعيد" ، يقول لينا عندنا طيور بنفسجية وصقر بي أربعة كرعين وتور ملتي شويس وهلم ، نقول ليهو لم يعد عامل الأرض مهما يا وهم فقد شالت إسبانيا كأس العالم من جنوب أفريقيا ، يعني حكاية أهلك بعيد دي بحححح بعد أن أصبح العالم قرية صغيرة إذا بكي ود حاج فضل تسمعه مرة ود الحاج وإذا صاح ديك شيخ مُحمد تداعي له سائر ديوك القرية بالصياح والعوعاي. أها الباب التاني برضو كركرب إتقفل.
|
|
|
|
|
|