كتب الكاتب الفاتح جبرا المتوفرة بمعرض الدوحة
|
Re: عاطف عبدون: إلى هاشم صديق وحده دون آخرين .. فيما يتعلق بحديثكـ (للنيل الأزرق) عن عركي وآخري (Re: محمد عبد الماجد الصايم)
|
Quote: عاطف عبدون قبال نفتح في الجروح خليني أقول ليك إني مدمن شعرك حد الجنون بس دا ما بمنع انو الزول يقول كل الكلام الما انكتب في الحصل قبال سنين بينك وبين اخوك وصديقك عركي. أولا يا هاشم بعيدا عن الغني والشعر، البينك وبين عركي كان أكبر بي كتير من انك تخاطبوا عبر الصحف وتتعامل معاهو كمجرد زول غنى غناك ذات يوم. كلامك عن الملكية الفكرية كان ممكن يكون بي طريقه أفيد وأحسن من طريقتك العبرت بيها عن ارائك وكان ممكن زول زي عركي كمغني يبدي معاك المشوار الانت بديتو واعتبرتو أول عدو. كان ممكن عركي يقيف معاك في حملتك البتدعو فيها بي إنصاف الشعراء، لانو عركي عمروا ما كان بعيد عنهم وياما كان بيتوجع وهو بيحكي عن الدوش وعوض جبريل وغيرهم، بس إنت الاخترت إنك تبدا المشوار وأول خطوه كانت علي حساب عركي. إنت البديت في محاولة تشويه صوره عركي وعفاف، وإنت الوصفتهم بي اقبح الكلمات، وانت الكنت بتكتب في صحف الخرطوم عن عركي وعفاف وكانك بتكتب عن زول ما بتعرفو، ولو نسيت يا هاشم في أرشيف لي مقالاتك العنونتها (إلى عركي وآخرين) حتلقاها في أرشيف الصحافي الدولي، وبعد دا كلوا يا هاشم إنت الاعتذرت يوم ما اتلاقيتو ووكتها كان موقف عركي انو ما حيقدر يرجع يغني غناك، ودا من حقوا يا هاشم، ولو انت مكانو ما كنت قدرت حتي انك تقري شعرو في الصحف. عركي بعد ما وقف من غناك او بي معني اصح بعد ما وقفتو من غناك، ما وقف جدد وغني واصل مشوارو وما اتلفت لي ورا وانت مشيت علي الصحف وكتبت ونشرت. عركي ما فقد جمهورو ولا انت فقدت قرائك علي قولك، وكان من الطبيعي انو كل زول يواصل مشوارو في الطريق الهو اختارو، وانت الاخترت طريقك بانو الناس ما تغني غناك، ليه بعد سنوات تعدي تاني بتفتح في الجروح؟ وكيف داير عركي يرجع وانت بتقول انو يدي ممدوده وما حتكون ممدوده لي يوم القيامه وانو كلامك بيرجع صدى؟ ليه داير تنسي كلامك لمن كان بيدخل زي الرصاص في قلوب اصدقائك؟ وليه يا هاشم بتتعامل معنا نحن البنحب شعرك وبنحب غني عركي اكتر ليه بتتعامل معانا علي اننا اغبياء؟ تفتكر حتكون فايته علينا انو انذاراتك القانونيه الصدرت ضد عركي ومحمد والامين وغيرو ما ممكن تتلغي بي كلام في سهره؟ وليه ما مشيت في نفس الاتجاه وسحبت الانذار بعد ما لاقيت عركي وقلت ليهو ارجع وغني غناي؟ يا هاشم كلامك عن انو يدك ممدوده متناقض مع فكرة الانذارات المنتظره عركي وغيرو لو غنو غناك، ويا هاشم عركي لمن لاقيتو في اكتر من مناسبه قال ليك انو العلاقات الانسانيه البين الناس حتستمر بس اغانيك دي ما حاقدر اغنيها.
يا هاشم عركي وعفاف الاصابم منك كتير وكتير جدا، وهم وحدهم المن حقهم يغفروا ليك كلامك عنهم او يرفضو اعتذارك.
غناك معاك يا هاشم والصحف قدامك اختار طريقك الشقيتو من غير عركي ومن غير سيرتو في كل مكان بي مناسبه ومن غير مناسبه، لو راجعت نفسك في حكاية انو مافي زول يغني غناك الساحه ملانه فنانين اديهم غناك وخلي عركي في حالو، او كمان ابقي قدر انك تمد ايدك واسحب انذارك واعتذر عن البدر منك في حق عركي بي نفس الحماس الاول البديتبيهو حربك ضد عركي في الصحف، بعدها نحن البنحب عركي البنحب غناك ونحنا المتضررين من الحصل نحن الممكن نجبر عركي انو يغني لينا أضحكي وأذن الاذآن ومعاك وبرق الصحوه و يرجع معاهو الغني الجميل.
|
| |
|
|
|
|
|
|
|