|
|
 حنة عواطف .. صاحبها الفاتح جبرا ( صدر تحت توقيعي)
|
البصمة الابداعية مثل ( البصمة الوراثية)، و(الكتابة الساخرة) تكشف شفرة البصمة الابداعية، بكلمة او جملة تكشف شخصية كاتبهاوانها من (بنات افكاره)، وبتحليل الاسلوب تكتشف ان (الاب الشرعي والابداعي) لـ (حنة عواطف) هو الاستاذ والكاتب الساخر الفاتح جبرا!
.....
يكفي العنوان ( ساخر سبيل)،اقتباس حميد من( عابر سبيل).
....
الملكية الفكرية قرارها لدى محكمة (القراء)، ونسبة بنوة(حنة عواطف) لا تحتاج لمحكمة، فالجينات تتطابق مع كتابة الفاتح جبرا الابداعية،فـ(البنت لابوها)!
|
|
 
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: Faisal Al Zubeir)
|
ومن غيره :
Quote: ساخر سبيل
حنة عواطف
الفاتح يوسف جبرا
كان ذلك فى منتصف ثمانينات القرن الماضى وكنا وقتها نأخذ (نصيبنا) من الإغتراب بإحدى دول (البترول) ، فى نفس العمارة التى كنا نقطنها كان يسكن صديقنا (سعيد) فى الطابق الأعلى للشقة التى أسكن فيها حينها
وسعيد هذا ينتمى إلى أحدى القبايل التى تتكسر فى (الزوجة) كسير شديد وتجعل (طلباتها) مستجابه فى (لمح البصر) بل تجعل الزوج كما (الربوت) يسير وهو مبرمج تماماً … يمين يمين .. شمال شمال .. كان (سعيد) ينصاع إنصياعا تاما لزوجته (عواطف) والتى أسميناها (الحكومة) فما أن يسمع سعيد صوت (الحكومة) وهى تنده له إلا و(يرمى) ورق (الويست) الذى كنا ندمن لعبه فى العطلات ذاهباً نحو مصدر صوتها ملبياً لأوامرها تماماً .كان سعيد يهيم حباً بزوجته (عواطف) حتى تخال أنها عشيقته فأنت إذا ما قدر الله وذهبت معه للتبضع فى السوق فاجأك قائلاً :
- والله التوب (المشجر) داك أريتو فى (عواطف) !
- شفت (أحفظ مالك ) الفى البترينه داك يجنن أنا ح أشتريهو لى عواطف !
فى أحد الأيام وبينما أنا أصعد درجات السلم نحو (شقتى) مرورا بشقة (سعيد) وجدته أمام باب شقته عائداً من (الشغل) وهو يحمل فى يده (بطيخة) وعددا من (الأكياس) وبعض الصحف والأوراق ونفسو (طالع ونازل) من الشيل .
- مالك يا سعيد واقف متحير ؟
- (وهو يشير بنفس مقطوع نحو شقته) : الشقة مقفولة والمفتاح جوه مع (عواطف)
- طيب ما تكورك ليها !
- لا .. لا .. ما أصلو هى قاعده محننة
- ويعنى شنو؟ ما تخليها تطلع الحنة و تجى تفتح ليك
- كيفن تجى تفتح ليا أكان جات فتحت ليا حنتا ما بتبوظ ! قالت ليا إنتظر الحنة لامن تشيل و(أخرتا) حتين أجى أفتح ليك !
- وأنت هسه قاعد راجى حنة عواطف لامن تشيل ليك بعد ساعتين ؟
- ساعتين شنو؟ فى أقل من ساعة ح تشيل .. دى أصلو (حنة التاج) جايبا ليها أنا (من السودان) مع الشاف والطلح والمحلبية (نمرة واحد) أصلية (ميسو) … أنا حاجات (عواطف) دى ما بلعب فيه كلو كلو!
- طيب خلاص وكت ما عايزا (تفرتق) حنتا تعال أطلع معاى فوق فى الشقه لحدت ما (حنتا) تشيل وتطلعا وتفتح ليك الباب !
وطلع معى (سعيد) إلى شقتى وهو يحمل (البطيخة) وكل تلك الأكياس والأوراق والصحف وما أن جلسنا ورأى علامات الإندهاش على وجهى حتى بادرنى قائلاً :
- كل حاجه ولا بشتنت عواطف دى .. أنا عاوزا لمن تمشى عرس ناس سعاد بت بابكر بعد بكرة النسوان ديل لمن يتضايرن
- هى لاكن .. أنت كده الوقفه البره دى عليك ما حارة ؟
- لا حارة ولا حاجة أنا كل شئ ولا زعل عواطف دى .. لازم حنتا دى تطلع سمحه وذى سواد الليل !
رفض (سعيد) رفضا قاطعا مبدأ ان يتناول معى طعام (الغداء) قائلا لى :
- عواطف دى لو أنا ما أكلت معاها ما بتاكل !
إنقضت حوالى ساعة من الزمان كان يحدثنى فيها (سعيد) عن علاقته الحميمة مع زوجته (عواطف) وكيف أنه حريص على تجنب (زعلها) ودائم العمل على إرضائها كما عرج على موضوع (حنة عواطف) وكيفية إختيارها (للنقشات) وعدد (الحنانات) اللواتى كن يقمن بعملية رسم الحنة لها فى السودان وإختياره للنوع الجيد من (الطلح) والشاف من شاطئ (أبوروف) وأخذه معه (صحبت راكب) فى الطائرة وبعد أن إستمعت له قلت له مندهشاً :
- ياخ معقول فى راجل بيهتم بالحاجات دى كده !
- كيفن ما أهتم ؟ دى (عطوفه) ياخ !
- طيب قوم شوف (عطوفه) بتاعتك دى (حنتا شالت) !؟ عشان تدخل المأوراق والملفات الشايلا ليك ساعتين دى !
خرجت مع (سعيد) وهو يحمل الذى إتكأ مرة أخرى على الأنبوبه وقال مخاطبا (عواطف) فى رقه زأئدة :
- عواطف .. عواطف .. حنتك ما شالت؟
- (جاءه الرد سريعا فى حده) : ياخى كرهتنا الحنة ذاتا .. ما قلنا ليك لسه ما شالت !
أحمر وجه سعيد وإصفر ثم إحمر مرة أخرى ونظر لى مبتسماً وهو يقول :
- عواطف دى مرات كده عندها عصبية زياده شوية !
|
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: Faisal Al Zubeir)
|
استاذ فيصل لا اعتقد انو ما اوردت يكفي لحل الإشتباك الحاصل
ثم هناك ملاحظات Quote: كان يسكن صديقنا (سعيد) فى الطابق الأعلى للشقة التى أسكن فيها حينها
.
.
.
.
.
.
فى أحد الأيام وبينما أنا أصعد درجات السلم نحو (شقتى) مرورا بشقة (سعيد) |
هنا في خطأ منطقي يحتمل عدة تفسيرات
احدهل على الأقل ليس في صالح الأستاذ
كمان شوف دي Quote: وهو يحمل فى يده (بطيخة) وعددا من (الأكياس) وبعض الصحف والأوراق
.
.
.
.
.
.
.
.
وطلع معى (سعيد) إلى شقتى وهو يحمل (البطيخة) وكل تلك الأكياس والأوراق والصحف .
.
.
.
.
.
.
.
خرجت مع (سعيد) وهو يحمل الذى إتكأ مرة أخرى على الأنبوبه |
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: على محمد الخير)
|
فيصل .. سلامات ..
دي قصة سجيمان :
Quote: حنة عواطف / دكتور عادل الصادق المكي "" سجيمان""
لقيتو قاعد جنب باب الشقة حقتو.. جنبو أنبوبة غاز.. متفن في واطة الله.. سلمت عليهو.. إزيك يا أخينا.. مالك قاعد هنا؟.. عاين لي.. وهو يأشر بإيدو للشقة.. وقال الشقة مقفولة وأنا ما عندي مفتاح.. المفتاح جوا.. أصلها عواطف قاعدة جوا.. لكن متحننة.. وما دايرة تقوم تحوم وتخرب حنتها.. قالت لي انتظر لحدي ما الحنة تشيل.. وأخرتها.. وبعدين أجي أفتح لك الباب.. أهه أنا حسي قاعد وراجي الحنة تشيل.. لكن يا جنى الحنة بتشيل في كم ساعة؟.. عاينت ليهو.. وحقيقة شفقت على هذا الزوج الأليف.. الوديع.. الذي أبدع الفكي بتاع عواطف.. في أن يخلق منه نعجة.. وقلت ليهو.. والله يا أخينا شيل الحنة ومدتو بيعتمد على عوامل كتيرة.. لكن أهمها.. نوع الحنة.. نوع المحلبية أو الصبغة.. وأهم حاجة كرعين المرا المتحننة.. كل ما كانن ناعمات.. الملمس.. كل ما كانت المدة أطول.. وبرضو بتعتمد إذا كانت الحنة منقوشة.. ولاّ.. مفروشة ومجلوطة ساكت.. وبرضو طبقات الحنة.. ليها دور.. انتهيت من نضمي وعاينت ليه.. لقيتو الهم باين على وشيهو.. وعلى وشك أن يذرف الدمع السخين.. قال لي.. تعرف الحنة نمرة واحد جايانا مخصوص من الدامر.. والمحلبية ميسو الأصلية.. ما قاعدة تستعمل صبغة عندها حساسية الله يحفظها من عين الناس.. وبطن كرعين عواطف صلاتي على النبي.. جضوم ليلى علوي وداخلات في سفنجة.. يعني بي نضمك دا حنتها عشان تشيل دايرة لها تلاتة ساعات.. وأنا ماشي الشغل.. كيف الحل؟.. قلت ليهو.. طيب يا أخي كلمها.. وخليها تفرتق الحنة وتقوم تفتح لك الباب.. عاين لي وبانزعاج وغضب.. نهرني لمن نطيت.. يا زول إنت ماك نصيح..؟ داير حنتها تخرب.. وتطلع شينة.. والنسوان يقعدن يقارصن ويتونسن فيها؟.. يا أخوي كل شيء ولا زعل عطوفتي دي.. إن شاء الله يرفدوني.. بس هي حنتها تطلع سمحة.. واتلفت على باب الشقة وقعد يكورك.. يا عواطف.. عواطف.. ما شالت؟.. وجاء صوت من الداخل.. وكأنو صوت عسكري في الحركة.. وبحدة شديدة.. قالت ليهو.. ما قلنا لك لسه.. كرهتني الحنة ذاتها يا أخي.. زولي هنا.. قعد يبلع في ريقو.. ويضاحك.. وعاين لي وقال.. والله.. الله يهديها بس.. عصبية خلاص.. إلا طيبة.. والله.. وحنينة.. لملمت بعضي.. ونزلت وأنا ما مشيت تلاتة خطوات إلا وأسمع أخونا يغني.. ويدندن الزول السمح... فات الكبار والقدرو |
نجد ان الروايتين مختلفتان في الاسلوب وفي طريقة السرد وكل واحدة تعبر عن صاحبها ...فرواية الاستاذ جبرا فيها بصماته الواضحة وكذلك رواية الاستاذ سجيمان هي بصمة مميزة له ..وهنا لا اعني القصة كفكرة او احداث ولكن اختلاف طريقة السرد بين الكتابتين لاتخطؤه العين ... لذلك الراوية الموقعة بإسم الفاتج جبرا هى له والاخرى هي لسجيمان وربما هنا الجميع متفق ...ولكن لمن فكرة الاحداث ؟!! هو المطلوب اثباته ...
لذلك اخي فيصل انت تحاول ان تثبت ماهو مثبت لاثبات ماليس بمثبت ..
تحياتي ،،
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: انور التكينة)
|
الساده الأكارم
لو جأنا للثغرات في كلا النصين سنجد ثغرات
وهاكم مداخله لأخونا بركات الشريف في نص سجيمان
Quote:
أتناول الموضوع من ناحية(الحبكة) في هذه القضية موضوع النزاع، وفي رأيي أن حبكة الأستاذ الفاتح مترابطة أكثر لولا التردد الذي اشار إليه ما بين البطيخة والأنبوبة، فالرجل حسب رواية الأستاذ الفاتح كان عائدا من العمل إلى المنزل وفوجئ بهذا الموقف من (عواطف) ست الأسم، وبالتالي لا مناص من الإنتظار.
لكن بالنظر إلى رواية سجيمان سنحتاج إلى تفسير ما يلي:
Quote: 1- لقيتو قاعد جنب باب الشقة حقتو.. جنبو أنبوبة غاز.. متفن في واطة الله
2-
Quote: يعني بي نضمك دا حنتها عشان تشيل دايرة لها تلاتة ساعات.. وأنا ماشي الشغل.. كيف الحل؟
ألأفتراض الأول: إن كان بعل عواطف هذا يعمل دواما واحدا فجملة وأنا ماشي الشغل لا محل لها من الإعراب
الإفتراض الثاني: إن كان هذا السيد المحترم يعمل دوامين فهل حضر للمنزل واخذ الأنبوبة ليملأها بالغاز وعاد ليجد عواطف متحننة؟ هذا غير جائز لأن السيدة عواطف تعرف أنه سيعود بالأنبوبة وهي لن تجازف (بخت) الحنة في هذا التوقيت.
الإفتراض الثالث: أنه أخذ الأنبوبة صباحا وعاد ظهرا ليجد الباب مقفولا وفي هذه الحالة سيكون من المنطقي والرجل ريشة في مهب عواطف، أن تطلب منه الذهاب مع انبوبته صحبة راكب وتناول الغداء في أي مطعم والذهاب لدوامه الثاني بدل الإنتظار لثلاث ساعات.
هذه ثغرات اخفق سيناريو سجيمان في سدها
نحن هنا لا نتحدث عمن كتب اولا ومن كتب تاليا، فلا زلت على قناعة أن الكاتبين تناولا موضوعا مشاعا دون سرقة ولا أرى أنهما بحاجة لذلك
(عدل بواسطة Barakat Alsharif on 07-07-2010, 11:41 ص) |
ثم نعرج لمذكره دفاع عن المتهم الغائب جبرا
الذي كتب في موقعه الرسمي هذه الكلمات
Quote:
مقالاتى جميعها أكتبها على الكيبورد مباشرة ولا أستخدم (الورقه والقلم) ولا تستغرق كتابتها وقتاً طويلاً إذا كانت (الفكرة) موجوده و(شيطان الكنابة) حاضر أما فى حالت (لاحظ حالت دى بالتاء المفتوحة) كونو إنو (مافيش فكرة) والشيطان (غياب) - أعنى أن معينات الكتابة غير متوفرة- فبتبقى القصة طويلة والزول بيحس بإنو عادى جدا وما بقدر يكتب ليهو جملة مفيده !!! |
لاحظ هذه الجمله التي كتبت قبل فتره كافيه من هذا النزاع
الكتابه مباشره على الكيبورد وهي ربما تدل إنه لا يراجع حتى ما كتب
فمؤكد إن التركيز في لحظه سيخذله وستظهر هذه الهنات
وربما لو رجعنا لكل ما كتب الرجل لوجدنا الكثير من الثغرات والأخطاء
التي لم ننتبه لها في حينها
كسره
بالله الموضوع ده لو إنتهى الزول زاتو ما عارف راح يكتب شنو تاني هنا
خاتمه
السؤال الآزلي
يا دكتور سجيمان القصه دي كتبتها وألفتها إنت ولا أعدت صياغتها يا دكتور سجيمان القصه دي كتبتها وألفتها إنت ولا أعدت صياغتها
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: فدياس نجم الدين)
|
فيصل يا صديقى ..
وقد اصبحت مقلا بعض الشى فى تصفح المنبر , الا انى مررت تقريبا على مجمل ما كتب حول هذا الموضوع , وخرجت بعدة انطباعات
اولا لفت انتباهى شبهة تنظيم ما يشبه الحمله ضد الاستاذ الفاتح جبرا .. فالترصد والترتيب لم يغادران بالى وانا أقرأ ..
ثانيا ساءلت نفسى كثيرا عن أهمية نسبة الفكره ( عواطف وحنتها المشؤومه ) .. وما اختلف اثنان على فروقات الاسلوب البائنه
بينونه كبري ..
ثالثا .. ما دوافع الفاتح جبرا لسرقة العنوان و( عواطف ) بالتحديد .. وهو القادر على اتيان الكتابه الساخره وباسلوب يكاد
يكون علامة مسجله باسمه .. ولم اتردد لحظة واحده فى تصديقه حين اشار لزيوع الفكره اوساط المغتربين .. وحتى ان كانت الفكره
من بنات افكار دكتور عادل , فذا يرجح زيوعها فى تلك الاوساط .. فالنكته تمشى بين الناس دونما صك ابداع مرافق ..
رابعا وبتجاوز اعلاه والوصول للحظة قرار استاذنا الفاتح جبرا سرقة الفكره بنت افكار د. عادل .. واستحضار قدرته على بنيان نصه الساخر
الجميل وهو الجانب الشاق من العمل او الخلق الادبى والابداعى .. اما كان بامكانه تبديل الاسم ( عواطف ) ب ( حنان ) والمانع من الحركه ( الحنه ) ب ( حفرة الدخان ) ليستحيل الاسم ( حفرة دخان حنان ) .. اقترح ابدال الانتظار امام ( الشقه ) بالانتظار ليترافقا الى حفلة
عرس صديق عمره ( الامين ) من صديقتها( نعمات ) والتى هى من قامت بترشيحها للزواج ب ( اللمين )
خامسا ساءتنى جدا المزايدات والزرزره للاستاذ الفاتح جبرا .. وأري فيها اجحاف كبير فى حق الرجل ( التقول فى قبه فوق للفكى )
سادسا كنت , مازلت وساستمتع دوما بكتابات د.عادل واستاذنا الفاتح جبره .. فليقوما الى ابداعهما رحمهما الله , وارجو الا ينجرا وراء
( أنا ) فى طريقها للتضخم بسبب اشعياء السوء ..
تحياتى يا صديقى
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: محمد حيدر المشرف)
|
Quote: البصمة الابداعية مثل ( البصمة الوراثية)، و(الكتابة الساخرة) تكشف شفرة البصمة الابداعية، بكلمة او جملة تكشف شخصية كاتبهاوانها من (بنات افكاره)، وبتحليل الاسلوب تكتشف ان (الاب الشرعي والابداعي) لـ (حنة عواطف) هو الدكتور والكاتب الساخر عادل سجيمان!
.....
يكفي العنوان ( ساخر سبيل)،اقتباس حميد من( عابر سبيل).
....
الملكية الفكرية قرارها لدى محكمة (القراء)، ونسبة بنوة(حنة عواطف) لا تحتاج لمحكمة، فالجينات تتطابق مع كتابة عادل سجيمان الابداعية،فـ(البنت لابوها- الصحيح البنت لأبيها)! |
يا معاوية الزبير:
لو كان الفاتح جبرا لك به علاقة فهذا لا يعني أن تغمض حق الدكتور عادل. هذه أول هام.
تاني هام: قمت بالإقتباس منك وفقط غيرت اسم الفاتح جبرا وصفته باسم دكتور عادل سجيمان وابنت ذلك باللون الأحمر فهل تأثر نصك؟ الإجابة لا.
تالت هام: لا أظنك في الموقع الذي تحكم فيه على ملكية قطعة أدبية ساذحة حتى مثل (حنة عواطف) وأنت لا تعرف حروف الجر. عدلت لك الجملة الأخيرة من اقتباسي منك، البنت لأبيها بدلاً عما كتبته أنت البنت لأبوها. فاللام حرف جر وابو من الأسماء الخمسة. يرفع بالواو وينصب بالألف ويجر بالياء.
راجع متن الأجرومية ومتن العشماوية عشان ما تغلط غلطات زي دي طالما تتحدث عن الأدب والقواعد.
المهم هل رجع جمعة من القاهرة أم لا؟
رابع هام: سوف أزور القاهرة مخصوص للحصول على عدد صحيفة الخرطوم الذي نشر فيه جبرا المقالة سيدة المشكلة. فمن فضلك اسأل لي صديقك جبرا عن الشهر الذي نشرت فيه المقالة. عشان ما أتعب كتير في البحث. وجزاك الله خير.
(العوج راي والعديل راي)
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: cantona_1)
|
Quote:
المهم هل رجع جمعة من القاهرة أم لا؟ |
دليل جديد على الحمله المنظمه الفاشله
فأخينا هنا وقبله الأخ أنور التكينه وأضح تماماً إنهما غير متابعين لمجريات الأحداث
وإنهما قد جاء لنصره جانب ضد الآخر
لأنهما ببساطه لا يعلمان إن موضوع جمعه قد تجاوزته الأحداث
بظهور محمد شيخ العرب مسئول الأرشيف في جده
والذي قابل كاتب البوست الأول في هذا الموضوع الدكتور محمد الطيب يوسف
ووعده بعد نهايه عطلته إن يعود لجده للبحث في الأرشيف
كان من الصائب إن يسألا عن شيخ العرب وليس عن جمعه
لكن لأن الغرض مرض ولأنهما ككثيرين هنا حددوا وجهتهم بناء على
معلومات مغلوطه جاءا ليسالأ عن جمعه
عموماً إذا عادا هنا مره آخرى نرجوا أن يسالأ لي الدكتور سجيمان
هل كتبت هذا النص يا دكتور سجيمان أم أعدت صياغته
مع خالص الود
بالمناسبه
القواعد والإملاء عندي ضعيفه جداً فمافي زول يتعب يحاول يصلح لي ..... ثمح
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: Faisal Al Zubeir)
|
Quote: فيصل يا صديقى ..
وقد اصبحت مقلا بعض الشى فى تصفح المنبر , الا انى مررت تقريبا على مجمل ما كتب حول هذا الموضوع , وخرجت بعدة انطباعات
اولا لفت انتباهى شبهة تنظيم ما يشبه الحمله ضد الاستاذ الفاتح جبرا .. فالترصد والترتيب لم يغادران بالى وانا أقرأ ..
ثانيا ساءلت نفسى كثيرا عن أهمية نسبة الفكره ( عواطف وحنتها المشؤومه ) .. وما اختلف اثنان على فروقات الاسلوب البائنه
بينونه كبري ..
ثالثا .. ما دوافع الفاتح جبرا لسرقة العنوان و( عواطف ) بالتحديد .. وهو القادر على اتيان الكتابه الساخره وباسلوب يكاد
يكون علامة مسجله باسمه .. ولم اتردد لحظة واحده فى تصديقه حين اشار لزيوع الفكره اوساط المغتربين .. وحتى ان كانت الفكره
من بنات افكار دكتور عادل , فذا يرجح زيوعها فى تلك الاوساط .. فالنكته تمشى بين الناس دونما صك ابداع مرافق ..
رابعا وبتجاوز اعلاه والوصول للحظة قرار استاذنا الفاتح جبرا سرقة الفكره بنت افكار د. عادل .. واستحضار قدرته على بنيان نصه الساخر
الجميل وهو الجانب الشاق من العمل او الخلق الادبى والابداعى .. اما كان بامكانه تبديل الاسم ( عواطف ) ب ( حنان ) والمانع من الحركه ( الحنه ) ب ( حفرة الدخان ) ليستحيل الاسم ( حفرة دخان حنان ) .. اقترح ابدال الانتظار امام ( الشقه ) بالانتظار ليترافقا الى حفلة
عرس صديق عمره ( الامين ) من صديقتها( نعمات ) والتى هى من قامت بترشيحها للزواج ب ( اللمين )
خامسا ساءتنى جدا المزايدات والزرزره للاستاذ الفاتح جبرا .. وأري فيها اجحاف كبير فى حق الرجل ( التقول فى قبه فوق للفكى )
سادسا كنت , مازلت وساستمتع دوما بكتابات د.عادل واستاذنا الفاتح جبره .. فليقوما الى ابداعهما رحمهما الله , وارجو الا ينجرا وراء
( أنا ) فى طريقها للتضخم بسبب اشعياء السوء ..
تحياتى يا صديقى |
الزميل ود المشرف: تحياتي:
(انا) متلازمة فقدان الابداع،ولايزال جبرا وسجيمان في كامل صحتهما الابداعية،والاختلاف وارد،لكن تبقى الروح الرياضية هي الاساس،وهو ما نرجوه من الجميع.
ليتهم يمرون ، ويستفيدون من النصح المفيد.
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: Faisal Al Zubeir)
|
يا جماعة.... شيخ الفاتح دا.. ما اتلقو ولاد حلال يحنسوهو يقعد وما بحرد؟... ان رضا عليكم الله ما يجينا ايد ورا وايد قدام... يجيب معاهو جريدة الخرتوم...والفيها العدد الحنن فيهو عواطف... سنه 97..... سمح؟... اوعى يتعب و يجيب بتيخة معاهو....بافي البتيخ البومين ديل غاااااالي ما بتهبش... اليحيب لو كيلو اللليل موز...!!!!! وخسمتك بالرسول تجيب اب نفطة... وان ما لقيت اب نقطة اشتري العادي و شيلو والبد ورا الجامع ونقطو... بنقبلو منك....!!!!. انت قايل في زول بيفرزو؟... وبعدين النقط ما بوصوك عليهو.... مو ايا؟...ووحات الله تجيبو هنا ناسك بجو ناطين.. ويقولو الموز دا ابنقطة الاصلي... وحاضرين وقت قطعوهو من امو.....!!!!!!
والان اخد لي رقيدة واترك المكرفون لزميلي فدياس.... في شان يسعلني... وانا اطنشو
المغلوب على امره/ سجيمان
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: سجيمان)
|
الأخ فيصل الزبير (يمين دي صحيحة 100% المرة دي) شكراً إنت ود ناس. نتلاقى في ساعة خير.
Quote: فدياس نجم الدين
فأخينا هنا وقبله الأخ أنور التكينه وأضح تماماً إنهما غير متابعين لمجريات الأحداث
لأنهما ببساطه لا يعلمان إن موضوع جمعه قد تجاوزته الأحداث
بظهور محمد شيخ العرب مسئول الأرشيف في جده
والذي قابل كاتب البوست الأول في هذا الموضوع الدكتور محمد الطيب يوسف
لكن لأن الغرض مرض
|
يا فدياس هل أنت صاحب الإزميل المعروف؟ أشك في ذلك .. داك زول عجوز مات وشبع موت. الله يديك الصحة والعافية وطول العمر. لكن:
أنا لا يهمني جمعة ولا شيخ العرب بس دايرك تسأل لي صاحبك جبرا الموضوع منشور سنة 97 شهر كم؟ حلفت يمين أجي من لندن وأنزل في القاهرة وأمشي محل ما خاتين أرشيفهم وأفتش الشهر القالوا صفحة صفحة وبعدين نشوف آخرتها على قول سعد الدين إبراهيم.
والخلاصة لو لقيت الموضوع غير موجود بعدين لينا رأي مع جبرا. وكان لقيتوا صحي مكتوب بقلمه في التاريخ الذي ذكر فخلي سجيمان علينا حنورية الويل وسهر الليل والنجوم في عز الظهر. طبعاً طبقاً لأحكام الشريعة فسنقطع يد سجيمان اليمنى من الكوع (خلوا بالكم من ا لكوع وليس المرفق) السودانيون يخلطون بين الكوع والمرفق. عليكم بقراءة فرائض الوضوء لمعرفة الكوع والمرفق. أما حكاية تعرفوا كوعكم من بوعكم دي فكتيرة على كثيرين هنا. والله أعلم.
نمرض بسبب شنو؟ واحد فارغ عنده فراغ رأسه مليان كلام نصه فارغ ونصه التاني مليان كلام فارغ بكتب كلام أفرغ من ا لفراغ نحسده فوق شنو؟ كلنا بنعرف نفك الخط وبنكتب عربي وأفرنجي بس ما بنتعيش من ا لكتابة يعني مش وراقين على حد قول الأستاذ حسين خوجلي.
ولهذا كتب جبرا أم توقف أوحتى نسى الأبجدية فلا يهمنا في شئ والكتاب المثله زي الهم على القلب.
(العوج راي والعديل راي)
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: cantona_1)
|
| Quote: واحد فارغ عنده فراغ رأسه مليان كلام نصه فارغ ونصه التاني مليان كلام فارغ بكتب كلام أفرغ من ا لفراغ نحسده فوق شنو؟ |
هسه يا أخينافي داعي تسئ للرجل
لو كلامي ما عجبك كان المفترض أن توجهه حديثك لي
لا إن تبهت الرجل بما ليس فيه
الجو في لندن كيف بالله
نرجع لموضوعنا
هل قمت يا سجيمان بتأليف نص قصه حنه عواطف أم أعدت صياغتها
بالمناسبه
دي حطوه متقدمه من سجيمان إنه يعترف بتجاهل الرد
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: فدياس نجم الدين)
|
Quote: هسه يا أخينافي داعي تسئ للرجل
لو كلامي ما عجبك كان المفترض أن توجهه حديثك لي
لا إن تبهت الرجل بما ليس فيه
الجو في لندن كيف بالله
|
يا فدياس كلامك عاجبني ولا ما عاجبني دا رأيك وأنا على استعداد لسماع رأيك والدفاع عنك حتى الموت لتقوله ولكني لست ملزماً بقبوله.
على حد قول الإمام الشافعي: (رأيناصواب يحتمل الخطأ. ورأي غيرنا خطأ يحتمل الصواب)
أنا ما قصدت إساءة زول لكن وصفت كتاباتهما الإثنين جبرا وسجيمان يعني كلامهما (ما بطلعوا بيا الدرنقل) دي بكلام بقارة. شوف ليك بقاري أصلي مش تايوان يشرحها ليك. ما تزعل خلى بالك طويل وروحك سلبة. بتعرف السلبة ولا أشرحها ليك؟
الجو في لندن جو فول . درجة الحرارة الآن 13 درجة سنتيقريد الساعة الواحدة وربع صباح الأحد 18 يوليو.
(العوج راي والعديل راي)
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: سجيمان)
|
إلى متى تنسب القصص والنكات التى تتناول الظواهر إلى نفسك ؟ إنه والله الإفلاس .. ظاهرة تأجير الأغنياء لنسوة يقمن بالبكاء على الميت وتعديد مآثره ظاهرة حقيقية تناولها الكثير من الكتاب على مستوى الصحف أو المنتديات الأسفيرية وبنفس السرد والشئ الأعجب فى الموضوع أن الكاتب (المحترم) الدكتور فتح العليم عبد الله قد قام بتناول هذه الظاهرة بنفس الصورة التى تتحدث بها مجالس المدينة وبنفس السيناريو والأعجب والأغرب أن المقال نشر فى نفس الصفحة التى كنت تكتب بها أنت فى صحيفة الصحافة والتى أشرت أنت إليها وها هو المقال ...
Quote:
ليست النائحة الثكلى كالنائحة المستأجرة
د. فتح العليم عبد الله
الايقاع الميكانيكي المسرع، تمدد الرغبات الشخصية على حساب الشعور النبيل، الخذلان الذي صار وباءً يهدد المخلصين أينما ذهبوا، كل هذه وأخريات جعلت معظم الناس خالين من اي التزام عاطفي او اخلاقي تجاه الآخرين. وبذلك صاروا يشترون كل شيء حتى المشاعر، فهناك من يفرح لهم وهناك من يحزن لهم، بل هناك من يقضي عقوبة السجن او طالب يمتحن لآخر. والمقابل الوحيد المعترف به في هذه البورصة هو المال ثابتاً كان ام منقولاً.
قبل أكثر من الف سنة من الآن قال المتنبئ:
غاض الوفاء فما تلقاه في عدة
واعور الصدق في الأخبار والقسم
فاذا بنينا قراءتنا على نظرية هذا الشاعر الشيخ الكريم، فإن الناس ستعود همجاً من جديد بعد عشرين سنة فقط من الآن.
لفت انتباهي قبل ثلاثة اسابيع من اليوم. وفي منزل ضخم واسع بوسط محافظة الخرطوم، حيث ذهبنا لتعزية صديق في والده، لفت انتباهي مرور امرأتين في حالة بكاء وعويل وهما تدوران حول المبنى الداخلي. وبالتفرس في وجهيهما وسحنتهما، أيقنت انهما ليستا من اقارب المرحوم ولا حتى من معارفه. ولما اشتد بي «الشمار» سألت احد اقارب المرحوم من الشباب عنهما، فقال لي: ديل يا عمو بكايات، يعني ببكو بالقروش المستطيع يستأجرهما طوال ايام المأتم. والعاجز يكتفي باليوم الاول فقط «لاحظ العاجز دي».
عزيزي القارئ بالمناسبة هذه العادة ليست جديدة، بل ظهرت عند العرب منذ الجاهلية. وانتشرت في العهد العباسي، حيث ظهرت طبقة من المسحوقين لاداء كافة انواع الخدمات للبلاط الاميري مقابل المال. وقد رثى احد الشعراء ابن احد امراء المؤمنين بأبيات ركيكة هزيلة. ولما مات ابن الشاعر قال فيه ابوه من الرثاء ما يجعل المآقي تنزف دماً. ولما سئل عن هذا الفرق بين الشعرين قال قولته المشهورة التي صارت مثلاً سار به الركبان وهو: ليست النائحة الثكلى كالنائحة المستأجرة.
تحضر النائحة إلى منزل العزاء وتطلب الـ C.V اي السيرة الذاتية للميت من زوجته او ابنته الكبرى.
العمر: 70 عاماً.
المهنة: ضابط معاشي وله وكالة سفر وسياحة.
المستوى التعليمي: دبلوم الحربية زائداً بعض الكورسات في الترجمة والحاسوب.
اسماء أكبر الابناء والبنات: فيصل، رابحة، وعواطف.
هل قام باي عمل بطولي؟ نعم محاولة انقلابية فشلت في فترة الرئيس نميري.
تأخذ النائحة المعلومات وتعقد اجتماعا عاجلا لزميلاتها. وبعد التداول يخرجن للملأ وهن يرددن:
الليلة يا أب دقناً دايرة وخدوداً نايرة وقدرةً فايرة. وشيكاتاً طايرة.. كِتلنا فيك..
الليلة يا أبو احلام يا الشالوك للصالح العام وحكموا عليك بالاعدام مو دايم الا الله.
الليلة يا السايق الكراون يا اب سلاحاًَ هاون- وينك لينا؟
وهنا يعج البيت ويفور بالعويل والنواح. وتميل النائحة يساراً ثم تنحني ضاغطة بيدها اليسرى على انفها حتى ينقطع حبل «البوستك» الذي تدلى، ثم تنظر الى ابنته الكبرى نظرة فحواها: لقيتيني كيف؟ او.. ده الشغل.
الليلة يا الساكن ديم لطفي أب كلمة تشفي الما متزوج عرفي- زايلة وخربانة.
البجيك بتجيروا والوقع بتشيلو يا السايق الباجيرو- مو دار عمار.
فقدتك السكرتيرة والطربيزة المستديرة والمارسيدس الخنزيرة- خليتنا لمنو؟
لاحظ ان العربة قبل دقائق كانت كراون!!
بعد هذه الجلبة والهرج تذهب النائحات الى غرفة قصية ثم يؤتي لهن بالثريد والادام والزواحف والبارد والساخن. وعند الانتهاء من هذه المأدبة تنقد البنت الكبرى النائحات مبلغ 300.000 جنيه. وتقول لهن همساً: ضروري حضوركن بكرة المغرب عشان ناس السعودية والبلد جايين.. كويس؟
واذا كانت البنت الكبرى طبيبة والوسطى مهندسة مدنية، فمن الذي يقدم هذا الادب الحزين بهذا العرض الجذاب؟ المناحة والسجع وذكر المآثر صار مثل عواسة الآبري او عجن الدلكة، لا تجيده الا العجائز من النساء، لذلك دخل بعض النساء هذا السوق ووجدن ربحاً وسمعة طيبة.
وده الرابط : http://www.alsahafa.info/index.php?type=3&id=2147492355
كسرة (على قول أستاذ جبرا) :
يا(سجيمان) حكاية تنسب ليك (ظاهرة إجتماعية) أو (نكتة) دى خليك منها وشوف ليك حاجة فيها إبداع وخيال تكون عملتها إنتا ومافى زول غيرك سواها وبعد داك تعال وقول سرقونى .. وكان قايل زى كلامك بتاع (إتظكرت) و(البظبورطى) ح يعمل منك كاتب ساخر تكون (غلطان) .. وكفى تطاولاً على (القامات) والمبدعين يا (سجيمان) ..
وتااانى السؤال التاريخى (بعد) الإضافة :
Quote:
كده إنتا يا دكتور أكدت إنك شايف السؤال وما عاوز تجاوب عليهو وده بيعنى إنك ما ألفت (قصة حنة عواطف) و(قصة حنان سكليب) دى وسمعتها زى ما سمعا الأستاذ جبرا .. طيب مقوم نفس الناس مالك ..سرقونى سرقونى إنتا حاجة ما بتاعتك يسرقوك ليها كيف .. إنتا ما تخليك شجاع وتقول القصة دى أنا سمعتها زى ما قال أستاذ جبرا سمعا وما أدعى إنو قام بتأليفها .. هسه فى ظمتك موقفك ده ما شين نكته عاوز تعملا حقتك وفاتحين ليك ليها بوست كبير وعريض .. ياخى إحترم القراء بتوعنك هم بيسألوك : يا سجيمان ما تزوغ من سؤالنا إنتا قمت بتأليف (حنة عواطف) و(قصة حنان سكليب) دى ؟
ياخى قوم شوف ليك شغلة
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: فدياس نجم الدين)
|
الناس الثلاثة: دكتور سجيمان ودكتور فتح العليم ودكتور جبرا ما عندهم موضوع وبكتبوا مواضيع فارغة ومقدودة.
فيهم المحلفنوا ما يكتب في السياسة وفيهم الما بفهم في السياسة والكورة وفيهم الذي لا يعجبه والعجب ولا الصيام في رجب.
لماذا تتعاركون نيابة عنهم وكتاباتهم لا بتودي ولا بتجيب.
ما تعملوا للعنابر قنابر ولا للقطية سبلوقة.
(العوج راي والعديل راي)
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: cantona_1)
|
cantona_1
ليك وحشة
| Quote: فيهم المحلفنوا ما يكتب في السياسة وفيهم الما بفهم في السياسة والكورة وفيهم الذي لا يعجبه والعجب ولا الصيام في رجب. |
يا ربي انا ياتو فيهم؟؟؟؟؟؟
( ثم يخت ايدو فوق جضمو متمحّنن... خايف من حكاية رجب دي)
فيصل.. يا فيصل...
سيد البوصطي...منكن.. اجيب كديستي هنا؟؟؟؟
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: سجيمان)
|
و ساكت بس .. ما عندي موضوع ..
مش كل البكان ده بقى لافي في اللاموضوعية ؟؟ كلنا نلف و نتعولق .. بإذن واحد أحد .
هسه يا شيخنا صاحب النقة دي أنا جيتك في مسماك - بعيداً عن عواطف و بتيخة راجلها -
أولاً بالتبادي كدي أديها صنة هنا | Quote: لو كان الفاتح جبرا لك به علاقة فهذا لا يعني أن تغمض حق الدكتور عادل. |
تغمض بتاع شنو ياخ ؟؟؟
هذا , و من ناحيةٍ أخرى فياخي برضو جاية .. مش كل الحاجات مغمضة و مكبسة و عميانة مليسة ؟؟ و طيب ؟؟
غمضها ياخ .. أخير زاتو من التفتيح في هذا الزمان أب سُردُبّة .. هو زاتو ( تغمط ) و لا حلوة و ما ظابطة .
و عكازك ده | Quote: راجع متن الأجرومية ومتن العشماوية عشان ما تغلط غلطات زي دي طالما تتحدث عن الأدب والقواعد |
أديني بيهو لبعة ياخي في خشمي ده ..
زي لبعة فيصل دي .. يستاهل .
.........
ود المشرف .. إنت الجابك هنا شنو ؟؟
شيل كلامك السمح ده يا زول و ورينا عرض اكتافك ..
يا كمان امسكو عليك لـ ( يوماً عبوساً قمطريرا ) أطرطر و أعبس من هذا الوكت إبن اللزينا الربنا بلانا بيهو .
___________
مش من الاول قلت ليك يا فيصل .. ما عندي موضوع ؟؟
إزيك ياخ .
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: سجيمان)
|
| Quote: (هو وأنبوب الغاز المتنكّر فى شكل بطيخة) . |
برضو مخرج....
| Quote: ترى هل ستوجد صحيفة الخرطوم 1997؟ |
تعال عضيني في نص راسي...ممكن تتلقى كل الاعداد.....لكن حنة عواطف لا....
لازم نعرف السنة كبيسة واللا بسيطة.. والاعداد التي لم تصدر لسبب او لاخر...
انا متاكد يا تبارك... انو شيخ الفاتح يعاني من عُقدة الذنب... وانه قد ظلمني ظلم بيّن!!.. الغريبة بعضهم مصمم على ان يشجعه على النهب الادبي!
وهذه كديستي!!
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: سجيمان)
|
الحتة الوحيدة الكان فيها ارشيف محترم ومرتب لجريدة الخرطوم هي مركز الدراسات السودانية بالقاهرة الذي يديره الدكتور حيدر ابراهيم,
ما عارف هل تم نقل الارشيف مع المركز الى الخرطوم أم لا.
أما ناس جريدة الخرطوم ديل اقنعوا منهم, قبل أكتر من عشرة سنوات, أيام مجد جريدة الخرطوم, كنت بفتش لي في عدد معين, مشيت مكاتبهم في القاهرة, وقدر ما بحّت ما لقيت حاجة,,, مافيش نظام,,, وفي النهاية مشيت مركز الدراسات السودانية بشارع "معروف" وووجدت ضالتي بكل سهولة!
| |
|
|
|
|
|
|
|
|
|
Re: حنة عواطف .. صاحبها الفاتح جبرا ( صدر تحت توقيعي) (Re: Marouf Sanad)
|
شكرا معروف...... وربنا يكتر من ناس الخير الزيك
| Quote: وفي النهاية مشيت مركز الدراسات السودانية بشارع "معروف" وووجدت ضالتي بكل سهولة! |
واهو يا شيخ الفاتح .. معروف لقى ليك حل يلا... دربك عديل علي شارع معروف... او لو بتعرف زول هناك وصيهو يمشي يكوس ليك العدد...وبرضو حقو توصيهو يشوف ليك العدد بتاع حنان سكليب...عشان تبقى سُترة و صُلحة.... والله ولي التوفيق!!!
مع تحيات
بُرة
العُرة
| |
|
|
|
|
|
|
| |
Faisal Al Zubeir
محمد البشرى الخضر
قلقو
فدياس نجم الدين
Hussein Mallasi
فايزودالقاضي
أسامة عبد الجليل
انور التكينة
محمد حيدر المشرف
cantona_1
Mohamed E. Seliaman
سجيمان
الصادق اسماعيل
Emad Abdulla
Marouf Sanad
فيس بوك
تويتر
انستقرام
يوتيوب
بنتيريست