|
|
 أبو اليتـامي و (( العكاليت)) ..
|
بشوف
في زحمة الخرطوم
سماح إنسان
حِدا بحري
ومعلّق قلبو
بي امدرمان
دُغش داقِش
لظي الأسواق
أكيد في بالو
كوم (دلميت)
خدار البيت
وباقة الزيت
فواتير الجن اللخبيت
ديون التاجر (العِكليت)
وباقي الرصّه
والعولاق
قصادو الشُفّع القُصّر
عصافيراً جفاها الريش
فراق أم زين حرق قلبو
يعافر في حلال العيش
يدارق بالصبر غلبو
وماضي الزكري
في المُعلاق
شقاوة زول فقد خِلو
حراق الروح هوا يقِلو
يفِنو في آخر الأصقاع
برغم مرارة الأوجاع
صبر صبراً كما أيوب
ركز شامخ طويل الباع
برغم الحاضر المقلوب
وموت الفرحه
في الأحداق
وإن قلت البال
مالبال باللخمه معبا
قد طال الليل قد طال
إن طال ببقالو مسبّه
كم ليلاً مشي يدبّي
في نهاراً يقلي الحبه
قد باع مايملك
عِدِم الحبه
لو حاجاتهُم يوم تتلبي
ساق للسوق (البَهَم) التبّ
وكوم (حِِملاناً) ليهن ربّي
سته (بَطَطَن) ليهُن حبّ
إلا القدر الشاين خبّ
شال الوالده بعيداً خبّا
سب وتبّ
تبّ وسبّ
السوق الكبّ
زيت فوق لهباً شبّ
يا هبابه أديهُن هبّه
إنتي ضميرك ودّر وغبّي
ديل يتامي
وشوف
ومحبه
وحاتكم يا عباد الله
يكابس من حَمَار الله
عشان أرزاقو ما انذلّ
ينوم مهموم بهم بلدو
خبارو بدِس رغيف ولدو
يقوم في حلقو خنجر هم
يعافر العبره تندلّ
يصاقِر لي روادي الجن
إمكن كواريكًن تَصِن
وإمكن ترخص الغله
ويروح مجروح
مفارقه الجِتّه حيل الروح
فلا قِدرت (نصايبو) تروح
ولا غرقت سفينة نوح
يتمتم في دعاه يقول:
متين
ننحلّّ
يالله ؟
ويرجع في عقَاب اليوم
وجع فوق قلبو
كوم مردوم
(مغس) من قسوةَ الحالة
ومن أسيادنا وانجالا
صبرنا نكابد أفعالا
غصب خلونا عتّاله
عشان يتعدلو نرتَاله
(نُخَب) واطيانا بي نعالا
ملت (إضنينا) أقوالا
وبرضو الحاله بطاله
وحات المولي يا عالَم
ما عشمان سوي حاجتين:
أول حاجه نتفكّ
من الفي الغابه منفكّه
وما سائلين
من أحوالنا
من اطفالنا
ومن التموين
أول حاجه نتفكّ
من الحتّونَا زي فكّّه
من الباعونا (للتمكين)
من الزرعونا جوه الطين
من الما راعو فينا الدين
أول حاجه نتفكّ
وتاني الباقي
الله بعين
|
|
 
|
|
|
|
|
|
|
|
Re: أبو اليتـامي و (( العكاليت)) .. (Re: اسماء الجنيد)
|
Quote: يا اللـــــــــــــــــــه عليك اخي ابو حوة
نص بديع حد الدهشة معبر معبر معبر تماما لما آل اليه حالنا البطال..............
اهديك ندي الحقول وامنيات بمزيد من الابداع,,,
تسلم ويسلم قلمك المميز |
بت الجنيد يا عزيزه:
أوووف!
بلغ السيل (الحِله الفوق)
وهذا قليل من كثير وموجع.
الحال بطال يا بت الجنيد
وبئس المآل.
بعين الله
تسلمي علي جبر الخواطر
كل الود يا رائعة
| |
|
|
|
|
|
|
| |
فاروق أبوحوه
اسماء الجنيد
فيس بوك
تويتر
انستقرام
يوتيوب
بنتيريست