نحن جوهر الكون ( أغنية للبلد )

مرحبا Guest
اخر زيارك لك: 03-19-2024, 11:48 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف الربع الثالث للعام 2010م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
06-30-2010, 01:45 PM

ابو جهينة
<aابو جهينة
تاريخ التسجيل: 05-20-2003
مجموع المشاركات: 22443

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
نحن جوهر الكون ( أغنية للبلد )

    البلد ..
    رغم العبوس ال بادي في محياهُ
    و ال بَتابِتْ ال نازلة يوماتي
    و عكْرة فضاواتو و سماهُ

    مع كلُّ دة .. و كل داك
    صورْتو كاسياها الوسامة ..
    لوحة ماليها الوجاهة
    ( موناليزا سمرا و قيافة
    مرة باسمة .. و مرة غاشِيها الحُزُن ..
    سِيرَتَا في الآفاق تحوم ...
    تاريخاً يمْلا صفحات المُتُن )
    ....
    ياها ذاتا الوجوه أل من زمان
    و نفس النوايا الطيبة ..بلا ظنون
    نحن و إنتو .. كنا و لا زلنا ...
    و حنكون للأبد .. أصل الدنيا .. و جوهر كُون
    نبْذُر الآمال للخلِق .. و نحن أحوج ما نكون
    ( و لسان الحال .. أن نكون أو ما نكون )
    منو ال من جدودنا فارق ترابو
    و سلك... درباً للسفر مجنون ؟

    يانا نحن
    فاردين جناحاتنا صوب الغربة
    طابقين جراحاتنا سنين و دنين
    نعاود السفرة بعد السفرة
    لا فتر عصا الترحال .. لا العزيمة تلين
    و نرجع نحن يانا و إنتو ياكم
    تلاقونا و نلاقيكم :
    ( حبابك .. يا حشاى .. )
    ( و حليلك يا روحي و حبيب قساى .. )
    ( يا بعد جوع روحي الطويل .. دخري و عشاى )

    نفس السؤال الما بارح خيالاتنا و خيالاتكم
    يا ألف مرحب و يا حبابكم
    حالكم و أحوالكم ..؟
    وليداتكم ..؟ بنياتكم ؟
    فلانة عساها .. و فلان داك عساهُ

    لا تكِلّوا من كتر السؤال ..
    لا نحن من الرد نَمِلْ


    نفس الإمتحان و نفس الدرِس
    و إنتو ياكم .. لابسين من زمان ذات اللبس
    في خريفكم و في شتاكم
    هن لافحات نفس التياب
    هم شايلين نفس العِصي
    هن متوشحات توب القدر الما بِتْعَصي
    هم فاردين شراع الصبُر .. شاقين بحر الصعاب


    نحن يانا و إنتو ياكم
    جبلا ما بهزو الريح
    تاريخاً كِتَاُبو .. ما بيلزمو التوضيح
    لساناً تصاريفو عجَب ...
    رَطِن أعاجمو فصيح

    و نحن يانا و إنتو ياكم
    واقف محلو زمن .. قادوس حياتنا و تِرِس حياتكم
    لا بِقَدم لا بِِأخّر ..
    زى ساعات الميادين العتيقة
    و زى عُنُق الحقيقة ..لا بِتْلَوي لا بِنْكَسِر
    سِرْ يا يا بلد .. ما تقيف محلك ... سِرْ


    و إنتو ياكم
    مضمونين تمام .. ضمان موية الدميرة
    معجونين شديد بالطمي.. فال حنة و ضريرة
    أعلام ترفرف فوق كل القمم
    مزاحمين كل الأمم
    مواثيق عهود و بصمات ذمم

    و إنتو ياكم
    بي صيامكم و خم رمادكم
    بي سجودكم .. و بي قيامكم
    معفّرة بي أديم الأرض جِباهْكم
    سديدة في قلب الهدف رمية سهامكم
    و كل البلاوي الجات مسامحانا و مسامحاكم
    في المال و الولد ..و في هامات مقامكم


    و عشان كدة
    أركز يا بلد ..
    حنكون للأبد .. أصل الدنيا .. و جوهر كُون
    نبْذُر الآمال للخلِق .. و نحن أحوج ما نكون
                  

07-01-2010, 00:41 AM

Elmosley
<aElmosley
تاريخ التسجيل: 03-14-2002
مجموع المشاركات: 34683

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: نحن جوهر الكون ( أغنية للبلد ) (Re: ابو جهينة)

    Quote: و عشان كدة
    أركز يا بلد ..
    حنكون للأبد .. أصل الدنيا .. و جوهر كُون
    نبْذُر الآمال للخلِق .. و نحن أحوج ما نكون


    انت زول جميل
                  

07-01-2010, 12:19 PM

ابو جهينة
<aابو جهينة
تاريخ التسجيل: 05-20-2003
مجموع المشاركات: 22443

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: نحن جوهر الكون ( أغنية للبلد ) (Re: Elmosley)

    أبو هديل

    سلام كبير

    جمّل الله حياتك بكل طيب
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de