غايتو يا زياد .. لحدت ما يجو المكهربجية ديل ما بخليك بي عودك دا .. أول حاجة العود دا جبتو من وووين ..؟ ياخ دا صوتو عامل زي أبو الزنان .. بيعمل زنننن .. كدا دا .. بعدين الريشة البتعزف بيها دي .. ذكرتني (التبخه) الكنت قاعد اطلعة من اللياقة بتاعت القميص .. لياقة القميص فيها (تبخه) صغيرة كدا بي الجمبات بي جوه .. إنت قاعد تعزف بالتبخة دي واللا شنــو ..؟
05-23-2010, 01:43 PM
amir jabir amir jabir
تاريخ التسجيل: 01-12-2006
مجموع المشاركات: 5550
أووو تمبسكو يااا... والله الريشة قاطعا من جركانة عصير فاضية!! العود جاني هدية.. كان حق الفنان خوجلي عثمان كما أخبرت...بس رقبتو كانت مكسورة و ملحومة للأسف..يمكن دا مؤثر في أداءه!! عندي..التبخات بتاعة الياقة لكين قوية و ما تنفع للعزف... بعدين يا تمبس خليهو العود و الريشة! أخوك لقيتو كيف؟؟ ما فنان كبييير
05-23-2010, 02:13 PM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
بعدين يا شباب براحة علينا أخوكم والله أول مرة أمسك لي عود و أنقر في حياتي كان قبل حوالي 8 شهور !! و خلال ال8 شهور كان تمريني متقطع جداً للمشغوليات الكثييييرة
فبالله : راعي أحساسي و أ خشى عامل السن (أو كما يقول ترباس)
05-23-2010, 02:18 PM
Magdi Ahmed Elsheikh Magdi Ahmed Elsheikh
تاريخ التسجيل: 03-11-2008
مجموع المشاركات: 7720
الأخ العزيز زياد تحية طيبة بالله رجاءا كان العود جد كان عود خوجلي عثمان عليه الرحمة بالله حافظ عليه شديد و خوجلي كان مسمي (العود النقراشي باشا) من النقرشة و كان عازف ماهر و مجيد على العود و كان داير الرأي في عزفك و من ناس محترفين و ممكن يوروك أسرار العود وطريقة أحسن للتمرين.. أثبت صحة ما ذهبت إليه من أن ملكية العود هي فعلا للمرحوم خوجلي عثمان و الكيفية الإنت إتحصلت بيها علي العود..... كيف؟؟؟ بعد داك...... ليك علي كان إنت جاد تبقى زي خوجلي عثمان ذاته في عزف العود....إنشاء الله
أستاذنا أزهري حبابك 10 أنا ما قلتا جبتو من الراحل خوجلي عثمان.. قلتا أخبرت أنو كان حقو...العود جاني هدية من شخص عزيز علي جدا جداً.. على العموم بتصل ليك بي هذا الشخص (مقيم في قطر) و بسألو عن تثبيت أو نفي ما قلته....المتأكد أنو حق فنان سوداني..أعتقد أنو خوجلي عثمان...بتأكد و بجيك. بعدين يا أستاذ أزهري...يعني لو العود ما حق الشهيد الراحل خوجلي عثمان..بتبخلوا علينا بالشورة؟؟ أنا العود بحافظ عليهو حتى لو جبت واحد تاني...كان حق الراحل خوجلي أم لا
05-24-2010, 08:52 PM
Azhari Nurelhuda Azhari Nurelhuda
تاريخ التسجيل: 03-01-2007
مجموع المشاركات: 1958
الأخ زياد تحياتي قول واحد يا سيدي هنا أنا دايرك تلاحظ فقط لوضعية الإمساك برقبة العود و شكل اليد اليسرى (الذراع و الكف خاصة ) في الفيديو أعلاه... ثم من الأهمية بمكان محاولة تحقيق الشكل( الكروي*) البيبدأ في التشكيل من منطقة الرسخ ثم الكف و الأصابع و يرتكز عند منطقة عفق الأوتار بطرف الأصابع قريبا جدا من الظفر(و هي المنطقة الصحيحة من الأصبع للعفق و التي تصدر صوتا جميلا جدا) * (كروية شكل اليد اليسري أي كانك ممسكا بكرة تنس أو تفاحة) يجب أن تتأكد دائما أن(وش العود) في وضع عمودي و إليك أول تمرين و هو هام جدا إستعمال أصابع اليد اليسرى الأربعة في نقر الوتر و عفقه في نفس الوقت في أربعة مواقع من الوتر الواحد مع المحافظة على الشكل الكروي للكف و الأصابع طول الوقت محاولة تكرار التمرين في جميع أوتار العود دون إستعمال الريشة في نبر الاوتار التأكد من نزول الأصبع الواحد تلو الآخر زي الشاكوش في عملية تبادلية و عفق الوتر بقوة حاول تحقيق أكبر قدر من الإسترخاء العضلي و العصبي أثناء التمرين و يبدأ ذلك من إسترخاء الكتف الأيسر و الكوع و من ثم الرسخ و نقل قوة العفق كلها لطرف الأصبع عند عفق الوتر أبدأ التمرين ببطء شديد و تدرج في السرعة و توقف فورا عند شعورك بأي شد عصبي أو عضلي أبدأ التمرين بالعفق المتقطع (Staccato) ثم بنفس العدد و بالتساوي في العفق المربوط (Legato) بمعنى عشرة لكل طريقة هذا التمرين يدرب أصابع اليد اليسرى و هناك مؤلفات كاملة للعود من الموسيقى الشرقية بهذا النوع من العزف (راجع نصير شمة) المدوامة و التكرار......
مع أمنياتي لك بحظ سعيد و العود آلة جميلة بس شيل الصبر.....
05-25-2010, 07:41 AM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
... والله يا زياد دي شجاعة ادبية منك ساااي .. يا حراق روح .. زمان في زول صاحبنا نزل لي ملف زي دا قاعد اعزف واغني قبال اليوتيوب دا يظهر ملف بتاع صوت .. ياخ .. خدر اللي هو طارق أبوعبيدة (بلعني ) ليهو .. كبرت ليك اللفه منو وعملت ما بعرف الزول دا منو والغريبة كنت قاعد اتداخل عااادي من اليوم داك العود القاعد عندي في البيت كلما اشوفو اتذكر ليك خدر .. حسع عودك دا ذكرني خدر والملف اياهو .. وذكرني بابا فزاري .. حمد الريح مرة جابوهو في التلفزيون قاعد يغني والعود فارق في الوزنة .. الزول دا ساهر بي يومين بي فرقتو دي .. حسع العود بتاعك دا فارق .. والجركانة بتاعتك دي نجضت بيها العود نجاض والله البوست دا اصلو ما بخليك بيهو .. يا حليل الناقد الفني عمر الفاروق .. والله لو كان في يا زياد كان عرفت حاجة ..
05-23-2010, 02:35 PM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
دا ما المطلع عيني يا تمبس العود ما موزون جبتا لي جهاز بتاع وزن ديجيتال...برضو ما نافع!!! البلع هيييين...ديييك الكولا العائلي في التلاجة بتناولا و بجي بس نفهم حاجة ... وين البوست دا خلينا نضحك شوية
05-23-2010, 02:37 PM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
Quote: جبتا لي جهاز بتاع وزن ديجيتال...برضو ما نافع!!!
والله يا زياد انا دا هين كان ختيت ناس المسلمي الحبه ما بتجيك .. (التيونر) الديجيتال دا زاتو مخستك .. عندي واحد في البيت كرهني البلي زاتو .. لو لقيت ليك صوت ثابت بتاع بيانهو أو اكورديون بيكون كويس .. لكن عازة في هواك دي .. والله قعدة ما تعملة ليك أنا وأخوي الأصغر مني كان عندنا عود عجيب جدا .. أخوي دا كان شال مني قروش لي شنو ما عارف كدا قام مشى الدلالة جاب ليهو عود .. عود بمعني الكلمة زي المقطوع من شجرة بس عبارة عن (ضقل) اوتارو جربانة جدا .. المهم كنا بنجازف بيهو المغربيات كدا واحيانا بالليل خالص .. والمسالة دي تاعبه ليك ابوي شديد صوت العود العجيب دا قوم يا العود انقطع فيك (وترين) الفوق (لا+مي) .. يللا كان عندنا شغل في البيت بتاع بنيان معانا الشباب من الحلة .. بعدما انتهينا من الشغل المغربية جبت العود أبو تلاتة أوتار دا .. والجماعة جابو الباقات الكانو شغالين بيها (المونة) .. ياخ عملنا قعدة عجيبة جدا بي التلاتة اوتار الباقية دي .. أبوي كان بره البيت لما جا داخل .. سمع الحفلة دي بي التلاتة أوتار دي .. ياخي (ساكينا) الحلة كلها بدعوى إنو العود دا لازم ما يبيت الليلة في البيت دا
05-24-2010, 09:50 AM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
والله يا تمبس التيونر الدجتال بتاعي ماأظنو مخستك شكلي أنا المخستك لأنو ظبّتا التيونر الدجتال مع عود جيد موزون...و كتبتا الحروف حسب ترتيب الاوتار...دا كلو ما جايب مريسة تامزينو!!! الوزنة تخرب,,,أقعد اعافر اعافر...في النهاية يبقى لي أبو الدنان زي ما قلتا والله شكلو عودك أبو تلاتة أوتار داك مظبوط اكتر من دا!د
Quote: ياخي (ساكينا) الحلة كلها بدعوى إنو العود دا لازم ما يبيت الليلة في البيت دا
كان كدى الوالد كان سمع عزفي دا بجي مارق لي بي طبنجة عدييل
05-23-2010, 02:44 PM
Magdi Ahmed Elsheikh Magdi Ahmed Elsheikh
تاريخ التسجيل: 03-11-2008
مجموع المشاركات: 7720
Quote: غايتو يا زياد .. لحدت ما يجو المكهربجية ديل ما بخليك بي عودك دا .. أول حاجة العود دا جبتو من وووين ..؟ ياخ دا صوتو عامل زي أبو الزنان .. بيعمل زنننن .. كدا دا .. بعدين الريشة البتعزف بيها دي .. ذكرتني (التبخه) الكنت قاعد اطلعة من اللياقة بتاعت القميص .. لياقة القميص فيها (تبخه) صغيرة كدا بي الجمبات بي جوه .. إنت قاعد تعزف بالتبخة دي واللا شنــو ..؟
Quote: ليه يالحبيب تمبس ليه بس كدة ؟ يا خي على الأقل أبقى زي إبراهيم عوض لى وردي :
( الفن طريقو صعب ) وكدة
لكن أبو الدنان !!
ليه الراجل دة عندو مستقبل ، حتى لو بلدو ما عندها مستقبل .. هو عندو مستقبل .
نحنا عندنا " صُباع " في الموسيقى وكلامنا أريتو يكون بارد عليهو :
(1)
الجزء الأول ... الزمن مزبوط الجزء الثاني الزمن مش مزبوط
(2) غير الريشة ..لأخرى ناعمة ، وحسن طريقة ضربها . (3)
قلت شنو يا تمبس ... أبو منو ...؟
أخي الأكرم : واظب على التمارين ، و استخدم ريشة ناعمة ..
وقلّد الأخ الرهيب دة
وهو يغني قصيدة من شعر خليل فرح :
*
05-23-2010, 04:16 PM
Deng Deng
تاريخ التسجيل: 11-28-2002
مجموع المشاركات: 52555
يا زياد ياخي ما بطال خاسة واني ازعم انو عندك اذن موسيقية ما بطالة. يا خي ما وريتنا موضع الاصابع في "الرقبة"لأنو دا مهم جداعشان نعرفك خاتيها صاح ولا لا. في وتر مذدوج فارق بسيط من زميلو الختة بتاعت الحنك على العود و النظرة لحركة اصابع اليد اليمين دي مهمة طبعا في بداية التعلم لكن ممكن تخليها شوية شوية عشان بعدين عندما تغني تقدر توفق مابين صوتك و الأيقاع و العزف و الموضوع اصلو اقتحام وكدى. و أخوك عندو قصة ظريفة مع الأقتحام دا: في المدرسة الثانوية وصلتنا لجمعية الموسيقى مجموعة آلات موسيقية من أعواد وكمانات و جيتارات و اكورديون و ساس و طرمبة( شوف الزمن داك) و المدرسة ما فيها غير زول واحد بيعزف كمان ( هو صديقنا المخرج التلفزيوني يحيا الهجا)و الأخ صديق عازف عود و شخصي برضو كنت بعزف شوية عود.حاولنا استكشاف تلك الآلات بالله العظيم الساكسفون و الطرمبة مافي اي واحد في المدرسة قدر يطلع منها صوت. أخوك (كلت) في الأكورديون وادعى انو عندو فكرة وممكن نتمرن عليهو للمشاركة في الدورة المدرسية بعد تلات شهور, في عطبرة ,مع ناس منو؟مع ناس ساطور و عبد اللطيف وردي الصغير!!!!!!!. المهم استلمت الجهاز وعلى طول على بيت الخال عبد الرحيم الشيخ عازف الكمان و تدريب لمدة 14 ساعة في اليوم. البروفات بدت وحفظنا المطلوب وهو : معزوفة ونشيد و اغنيتين . يازول أخوك حفظ ليك بمساعدة الألوان بوضع الوان علي المفاتيح المكملة لأنصاف و ارباع التون لأانو دي لو غلطت ودست واحد فيها بتطلعك من الموضوع نوهائي. بدأ الحفل بمدرسة عطبرة الثانوية للبنات وأخدنا توجيهات من ساطور و عوض الكعيك و أخوك قافلعلى موضوع الالوان و خاتي ليك الحنك على الجهاز و العيون مبحلطة تحت في المفاتيح وبدأ الحفل وكان عندنا عود -كمان- ايقاع طبل و بنقذ و الأكورديون. بس اولما بدينا قووووووومي يا الكهرباء اقطعي و اخوك اتجهجه لانو اللجنة قالت مافي مشكلة! استمروا! يا جماعة نستمر كيفن ونحن ما شايفين حاجة و اصروواعلينا. صاحبي الهجا عرفني وقال لي انت بس حرك المنفاخ دا وخلي الباقي علينا... و دقائق الحمد لله فرجت وعادت الكهرباء!!
05-24-2010, 10:32 AM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
الأستاذ محمد الشيخ شكراً كتير على النصائح الغالية تدريب 14 ساعة يوميا دي لا بقدر عليها ولا حتى ربعها...ياخ دا والله كان مجهود كبير منك ضحكتني حرك المنفاخ ولا يهمك دي...أها لو عود كيف؟؟...الا تكون ماسكو و هم يعزفوا في الباك قراوند
05-23-2010, 07:56 PM
Hassan Makkawi Hassan Makkawi
تاريخ التسجيل: 02-27-2008
مجموع المشاركات: 6157
يا زياد أراك واسمعك ( مكنكشًا ) فى رقبة العود وظهرة حتى إستغاث طالباً الفكاك من براثنك وعضلاتك ( التبش )!!! تخلص من باغة العصير وتعامل مع العود بأحاسيس الأصابع أصابع اليمنى ترسل وأصابع اليسرى تستقبل ثم لا تنظر لمواضع أصابعك وترنم بكلمات ما تعزف من ألحان وحافظ على الزمن (خليك مع الزمن يا..)_ رمضان زايد_ بمشاركة مقدمة رجلك اليمنى
______________________________
ولومنى كان ما نجحت!!!!
05-24-2010, 03:08 AM
خالد العبيد خالد العبيد
تاريخ التسجيل: 05-07-2003
مجموع المشاركات: 21983
ولاباس للنظر للاوتار وانت بتعزف سوف تكتسب المهارة بالممارسة
واسرع حاجة تتعلم بها ان تحاول تعزف مع حد بيغنى ولو مالاقى زول اعزف مع التسجيلات وخاصة الفيديوهات لانو نقماتها بتكون غالبا موزنة مع الحروف الموسيقية بشكل استاندر وحاول تعزف اللحن اللى بتجيدوا فى اكتر من سلم حاول تظبط الاوتار استاندر بواسطة اى اورغ او اشترى تيونر فمثلا اذا عودك كما هو واضح خمسة اوتار اضبط الوتر التحت على (دو) (بالضم الخفيف للدال) والذى يليه على (صول) واللى فى النص على ري (بترقيق الراء) واللى قبل الفوق على لا (بتفخيم اللام) واللى فوق خالص على (مى) بالكسر الحادة للميم
وبى كدا ح تقدر تضبط اللحن مع الاغانى الصادرة من الفيديو واذا ماضبط معاك بيكون فى خلل فى سرعة الفيديو لكن غالبا بتضبط معاك
اكرر عزفك كويس ويرجى منك الكثير
وكمعلومة اضافية وطالما ان العزف على العود عادة يتم بواسطة استعمال الاربعة اصابع (المفترض طبعا) فالاصبع اللى ماسك الرقبة داك ما تحسبو لاحظ ايضا لو عودك مخطط مثلا اذا ضغطت على الوتر التحت بالاصبع الاول على الخط الثانى من بداية الرقبة حتلقى النقمة بتساوى نقمة الوتر الاوسط (رى) وهو مفتوح بس بسوط اغلظ وهذا يسمى جواب ذلك وهكذا اذا عملت نفس الشيى مع الوتر الثانى حيساوى ليك الوتر الرابع مفتوح والثلث ح يساوى الخامس مفتوح
يلا كمان اذا ضغطت بالابع الثالث بتاع الخاتم على الوتر الفوق (مى) فى خطه الثاث حيديك نفس نغمة الوتر الثانى (صول) وتفعل نفس الشيئ مع الوتر اللى تحت الفوق (لا) بيعطيك نغمة الوتر التحت (دو)
استعمال هذه التشابهات بين غليظ وحاد بقدر الامكان ستعطى عزفك اكثر جمالا واستمتاعا بالعزف
الممارسة تكسبك السرعة
والطناش يتقل الاصابع وتعيدك القهقرى لا تلقى بالا للمحبطين بل اجعل تريقتهم لك نوع من التحدى وستصل لمرادك باذن الله
فى وقت لاحق ح ارسم ليك رسم توضيحى لعلاقة الاصابع بالاوتار والخطوط الموضحة او الوهمية واسم صوت كل حرف والسلالم تعنى ايه بالتوفيق
05-24-2010, 08:25 AM
amir jabir amir jabir
تاريخ التسجيل: 01-12-2006
مجموع المشاركات: 5550
Quote: لا تلقى بالا للمحبطين بل اجعل تريقتهم لك نوع من التحدىوستصل لمرادك باذن الله
عن إذنك يا زياد .. والله ما كنت عايز ارد ليك علشان ما البوست يتحول لي حتة تانية .. البورد دا مليان خبراء بتاعين مزيقا .. في ناس قعدو ليها وقروها واتخرجوا من معاهد موسيقية عديل كدا .. ودي شغلتم واكل عيشم .. وحسع البوست دا جاب الخبير .. أزهري نور الهدى .. اكاديميا وخبرة فهو من علماء الاكورديون .. والاستاذ طارق ميرغني برضو من الاساتذة العارفين .. الزينا ديل جرباندية ساااي .. لكن دا ما بينفي علاقتنا بالموسيقى اكاديميا دراسة .. وعمليا ممارسة .. التريقة الهنا دي عادي جدا بتحصل لي اي زميل وما الغرض منها الاحباط .. وإذا تأملت التريقة حقتي بديت اوصل ليهو فيها المعلومة .. وكان عايز اكتب ليهو توصيل معلومة بي طريقتك دي .. والله ما كان غالبني ..
طمام بطن عجيب ياخ ..
05-24-2010, 09:47 AM
محمد النيل محمد النيل
تاريخ التسجيل: 10-08-2009
مجموع المشاركات: 5899
. صدقني نوعيتك دي ما بحتاج لي إني اجي بي جمبها نهائي .. لكن كلامك الكتبتو صلاخية فوق داك .. هو زاتو البياكد حقيقة ما كتبت .. عوس عواستك في الفن الراقي دا والموسيقى .. وفي الانقاذ برضو .. المشاكل اريت لو مكانه هنا .. كان ويتك ليها كويس بتكون عاملة كيفن ..
Quote: عايزين الفاظ جميلة على قدر الحدث
.. حدث شنو ..؟ إنت عايز تدينا حصة كمان ..؟ دي مزيكا .. ما نضال .. حسع الدخل الانقاذ هنا شنو ..؟ عوس عواستك ياخ وتعال خلي الزول دا يستفيد منك يا استاذ .. وما ليك دخل بي البتريق .. أو الانقاذي البيطرش هنا .. فكنا ياخ ..
05-24-2010, 10:03 AM
محمد النيل محمد النيل
تاريخ التسجيل: 10-08-2009
مجموع المشاركات: 5899
Quote: والدخل طمام البطن هنا شنو فى ردى لصاحب البوست واصلا انت الدخلك شنو من الاول؟ تداخلك الهمجى العشوائى ذو الالفاظ السيئة ربطتو بمداخلاتك السياسية الانقاذية الهوجاء المعهودة.
Quote: لا تلقى بالا للمحبطين بل اجعل تريقتهم لك نوع من التحدى وستصل لمرادك باذن الله
.. إنت البتكتبو ما بتقراهو ..؟ دا مش كلامك الفوق دا انا جبتو من عندي ..؟ بعدين انا البحدد إنو بطني تطم كيف .. وأنا البعرف انو نوعيتك دي ممكن تكتب شنو زي ما كتبت الهوجاء المعهودة دي .. لانو كتييير زيك كدا عادي جدا بيدخل ويكتب ليهو مداخلة صلاخية .. ويعمل ليك فيها ما شايف .. بالمناسبة: الطمام زاد اكتر من قبيل .. مع كل حرف بتكتب فوقو .. خارج نفسك ياخ أنا يادوبك فطرته .. يا ما انقاذي
05-24-2010, 11:06 AM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
ألاخ محمد النيل شكرا يا سيدي على النصائح المفيدة والغالية التشابهات الذكرتها مهمة و مفيدة برغم بساطتها...طبعا التطبيق صعب في الأول...لاكين بحاول... بس في الاول نجيب عود كويس و ريشة كويسة حسب نصائح الاخوة.. الممارسة هذه هي الكلمة السحرية البعتقد ممكن تعمل المستحيل و زي ما بقولوا الخواجات: Repeatition makes perfection
05-24-2010, 10:56 AM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
حبيبنا خالد العبيد كان لقيت طريقة بجيكم في كانبرا بي عودي دا أكرهكم البلي زاتو وللا كان جيت سيدني أديني خبر وتعال لينا في البيت شاي مغرب وكدا... عشان تشوف على الطبيعة
05-24-2010, 10:35 AM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
أستاذنا طارق ميرغني والله أنا من ناحية عايز النصيحة من الناس الخبرة دي جادي فيها جداً جداً أما حكاية أني فنان دي..ولاااااااااابحلم بيها ولا دايرا كل الدايرو أني أعزف كويس عشان أطرب نفسي و الناس المعاي ...كان قعدة وللا خلافو...وللا حتى ناس سودانيزاون لاين....كاااك ... بعدين ياخوانا أشرحوا لينا نظف الريشة دي كيف يعني؟؟؟....أغسلا بي صابون قلنا ليكم تعلمجي..تعلمجييييييييييييييييييييييييي
05-24-2010, 10:07 AM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
أوووو بروف أكرم شخصياً وينك يا حبيب والله شوقنا بحر
Quote: انا غايتو خشمي ماسكو علي انشاءالله بقدرعليه
قلتا لي ما بتعمل يهو أيه...برودكاستينق...هه ها...والله الشافك طلّعت صاج الطعمية من المخزن و نفضّتو من الغبار و كوركتا لي معتصم SNAKE يناولك الزيت مااااااااااكضب أبقى قريب يا حبة شان تشوف بقية الأبداعات...........دلللللل
05-24-2010, 10:00 AM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
عبدالله الشلقيني التمارين غايتو حسب المزاج و الزمن لكين يا خوانا فهمونا: ريشة ناعمة كيف؟؟؟ لينة يعني؟ كان ما فهمتونا الحاصل شنو...يا ني ببقى علي جركانة العصير عشرة
05-24-2010, 10:38 AM
nazar hussien nazar hussien
تاريخ التسجيل: 09-04-2002
مجموع المشاركات: 10409
اولا حدد لي انت وين عشان ارسل ليك مجموعة ريش بالبريد عشان الناس ديل ما يشبكوك ريشتك خفيفة...ومقطوعة من باغة او ياقة قميص...
ثانيا: تمرن لوحدك...ومرراصابعك علي الاوتار باستعمال الريشة الباغية لحين وصول ريشي الاحترافية... من فوق لي تحت ومن تحت لي فوق...بعد شوية حا تلقي حركة اصابعيك خفيفة...
نجي للضرب بالريشة: ما تتعامل معاها كأنما بتعزف ربابة...فاضرب بقوة علي الوتر..وما تنخاف منو
شويتين تلاتة حا تلقي الصوت الابودناني راح...
سوي ديل لامن ارجع ليك
05-24-2010, 11:09 AM
غباشي غباشي
تاريخ التسجيل: 01-19-2007
مجموع المشاركات: 1729
سلام يا ذياد امسك في كلام نزار دا قوي .... فهو سليل اسرة فنية تخصص عود بالاضافة لباقي الاخوة المختصين من البورد .. و عن رأي الشخصي (مع اني ما عندي علاقه بالموسيقى و العزف .... اكعب من تمبس ) , مذيد من الممارسة ابو الزنان دا بيروح (من واقع تجربة صديق عزيز) ..... و يا ذياد انا بقيت جاركم , لكن البلد ما واقعة لي عشان دايما بقارن بمحلي القديم لكن عموماً ما بطالة (لكن في التكنولجيا صفر كبييييير) .
ـــــــــــــــــــــــــــــــــ يا نزار اخوك دا وين لا تلفون لا فيسبوك الحاصل عليهو شنو? عرس وللا لسة?
05-24-2010, 11:32 AM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
نزار حسين تشكر جداً يا سيدي دا عنواني بتاع الشغل: Bomedical Engineering Department St George Public Hospital Gray St Kogarah NSW 2217, Australia التمرين بنواصل فيهو لمن نشوف آخرتا
05-24-2010, 10:51 AM
محمد النيل محمد النيل
تاريخ التسجيل: 10-08-2009
مجموع المشاركات: 5899
طمة البطن فكت شوية .. لكن عندي نفاخ .. معليش يا زياد ح اكتب ليك بي النفاخ الماسكني دا .. عارف البورد دا مليان زي ما قلت ليك هواة .. واساتذة .. اصلو البني آدم فينا والسوداني بالذات بيتولد جواهو آلة موسيقية .. أول آلة ممكن يتعامل معاها .. هي آلة العود .. أو البيانو .. أو الاورغ. يا اما بيعزف عود أو عايز يتعلم عود .. آلة العود لانها سهلة في إنك تتحصل عليها .. في البيت .. يا تشدها من جاركم .. لكن الأورغن شوية سعب .. زمان كان في الأورغن ابوحجار داك .. أول حاجة بتتعلمه فوقو عازة في هواك يعني حسع دي إنت .. (ارغنت) لينا (العود) .. ياخ في ول بيتعلم عود بي عازة في هواك ..؟ الواحد ممكن يتعلم الاورغن بسهولة لانو الاصوات ثابتة .. وموجودة بتقدر تطلعة لو كان عندك شوية وزنة جواك .. العود المشكلة البتواجه الواحد في تعليمو .. كيف إنك تتأكد إنو موزون (تيونن) ودي أهم حاجة علشان تقدر تطلع الصوت .. بشكل سليم وسمعك يعتاد عليهو .. وتقدر تقارن الاصوات الفيهو بي باقي سماعك لي اي ميلودية .. ودي أول خطوات التعليم الجربندي ساااي كدا .. لو إنت قاعد تعزف بالعود بتاعك المنشز دا كدا دا .. أوعك تمشي تعمل ليك قعدة لي ناس واعيين .. كان ما ضربو ليهم حاجة كويسة أوعك تغني ليهم .. والله تتدق دق العيش كخطوة أولى يا زياد .. في مواقع على النت فيها (التيونر) ممكن توزن بيهوالعود .. (خلي) النفاخ دا يروح شوية .. بشوف ليك التيونر دا وين واجيبو ليك هنا دا .. http://www.justdosoft.com/InTune_MultiInstrument_Tuner-x19101.html حاليا دا واحد ممكن تتصرف معاهو يحل ليك المشكلة الحالية دي
05-24-2010, 11:03 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: السودانيز دى كمان صادرتوها وبقت من ممتلكاتكم واحنا ماعارفين؟
والله بي صراحة انا متأسف .. متأسف شديد جدا .. ما كنت قايلك من الفرقة كم كدا ما عارف نضال اسفيري .. يعني بعد شوية الواحد لو دخل معاك لي قدام احتمال تجيب ليهو نمرتو العسكرية بتاعت الطبنجة حقتو .. إنت مش من النوعية بتاعت .. يا ايها الأمنجي ال######## .. وتعالو نلعب لعبة القبعة ..؟
قد ياخ .. قد تراك (غثيتنا)
05-24-2010, 11:18 AM
غباشي غباشي
تاريخ التسجيل: 01-19-2007
مجموع المشاركات: 1729
.. الله يسامحك يا غباشي .. البرنامج الفوق بتاع الوزنة دا يا زياد يمكن يجهجهك شوية بس اقعد ليهو وللضمان كدا أوتار العود هي من الآسفل للاعلى: دو صول ري لا مي أو بالانقليزي : C G D A E لو بحثت في اي موقع ليهو علاقة بالعود .. بتلقاهم الوتر الأول من فوق (مي) بيوزنوهو على النغمة (صول) ما تشتغل بيهم كتير .. أوزنو على إنو (مي) لانو ناس الشرقي ديل بلاويهم كتيرة .. لو وزنت العود بي طريقتم دي وعايز تعزف عازه في هواك .. احتمال كبير تجيك (قطيعة)..
05-24-2010, 11:30 AM
tmbis tmbis
تاريخ التسجيل: 10-19-2002
مجموع المشاركات: 24862
والله يا تمبس لاكين أديتني فهم بي طريقة ماتتخيلا بي لنكات التيونن دي... سؤال: الوتر الاول طبعا من تحت...وللا أنا غلطان بعدين الدو مثلاً ممكن تكون غليظة وممكن تكون رقيقة..صاح؟؟...طيب أنا أظبط الاوتار كيف بحيث أنو السلم ما يكون عالي شديد أو واطي شديد؟؟ ... شباب تشكراتنا ليكم جميعاً الشغل الشغل....بجيكم باكر إنشاالله
05-24-2010, 12:29 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: سؤال: الوتر الاول طبعا من تحت ... وللا أنا غلطان
بالضبط الوتر الأول من تحت .. وإذا لاحظت ليهو بتلقاهو .. اقل غلظة من بقية الأوتار .. والبعديهو .. أغلظ .. والوتر الوسطاني اكثر غلظة .. وديل كلهم غالبا بتلقاهم من (العصب) ولونم غالبا بيكون واحد أما شفاف .. أو اسود حسب الشركة المصنعة .. لما تطلع فوق بتلقى الوترين الفوق .. لونم واحد وغالبنا بيكونو حرير مغلف بي سلك ناعم .. والوتر الرابع اقل غلظه من الوتر الخامس وهو اكبر أوتار العود .. في حالات بستخدمو فيها ستة أوتار للعود .. ودي حسع ما بتحتاج ليها .. خرمج في خرمجتك دي وإدق دقانك ساااي ..
Quote: بعدين الدو مثلاً ممكن تكون غليظة وممكن تكون رقيقة..صاح؟؟...طيب أنا أظبط الاوتار كيف بحيث أنو السلم ما يكون عالي شديد أو واطي شديد؟؟
دا سؤال سمح .. لكن مرحلتو لسة بدري عليها شوية .. الاضان لما تكون متمرسة على النغمة الموسيقية الاصلية واللي هي التيونن البتتلقي في الاصوات الثابتة زي الاكورديون .. أو البيانو أو الأورغ .. بتقدر بعداك تتحكم في طريقة الدوزنة دي .. لكن حاليا حاول بقدر الامكان إنك تتعود على الوزنة التيونن العادية .. بي اي آلة صوته ثابت علشان تديك الصوت الحقيقي .. الطريقة البتتكلم عنها دي برضو ممكن تتحكم فيها بي وزنة الوتر الوسطاني (صول) أو الوتر الأول (دو) بي طريقة تتوافق مع صوتك حال إنك بتغني .. لكن بالشايفو دا .. ما اظنك بتغني قريبات دي العود طبعا .. في طريقة الدوزنة حقتو اصعب شوية من الجيتار .. لانو الجيتار المسافات فيهو موزعة بشكل جيد يعني ممكن تضرب الوتر الفلاني مقفول يديك البعديهو مثلا فاتح .. ودي بتكون ليك ساهلة جدا .. العود برضو ممكن تتعامل معاهو بالطريقة دي .. زي ما شرح ليك بتاع الانقاذ الفوق داك .. خليني افتش ليك رقبة بتاعت عود .. مناسبة علشان اقدر اشرح ليك بيها .. لانو الكلام دا سماعي .. بيكون ممل شوية ..
05-24-2010, 11:56 AM
داليا الكباشى داليا الكباشى
تاريخ التسجيل: 07-23-2009
مجموع المشاركات: 4105
غايتو انا فتحت البوست دا وما سامعة اى حاجة عشان ما اكذب ,, لكن جيت على اثر النداء بتاع صاحب البوست ،، بدا الموسيقين من نازر ولى تحت .. لووووووب تستاهل يا زياد اى زول يجيك هنا مش دى الفئة ال حددتها ؟؟
اما عن راينا ،، والله يا زياد تستمر تعزف عود فى المنبر دا انا امشى اشترى لى درمز ,,, اصلو اللمة دى ما دايرة تتفرتق !
دينا ازيك يا عزيزتي..مشتاقين بالاكتر تعرفي...أختي اسمها دينا...بعدين تكون بتعمل في الشاي..أقول ليها(دينا اسمعي دي ووريني رأيك)..بعد ما اخلص تقول لي (والله ما عارفاك بتعزف في ياتو غنية) أنتي قايلة العنوان الكاتبو دا لي شنو ما عشان ما يجوا عينتك و عينة دينا اختي ديل و يسألوني: دي غنية شنو؟؟؟؟ ...
Quote: حقو الزول يشيلو يسمعوا ناس بربر ..
ما تقولي أنا ماشي السودان نهاية السنة دي..و ناوي امشي بربر و الباوقة... وشايل عودي معاي كمان...أها تاني في شنو
05-25-2010, 08:00 AM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
تمبس قطيعة؟؟؟ يا خوي انا من هسي عندي قطيعة ما كلمَك انا بالعصبة الاتشمطت لي يومين...كنت بوزن في العود و الصابعين كانت عاصية ... غايتو كلام الجيتار دا كان حاولتو بتجيني حسكنة في الضمير عديييل كدا
05-24-2010, 11:44 AM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
تمبس و محمد النيل واصلوا...عاااادي...زول بحجزكم ماف اصلوا عزف مخستكين ...ف..كان غلبك سدها وسع قدها ... تمبس قلتا ليك يا مان...التيونن دا هو الجايب تايمي زاتو أتدقا ساكت!!!...أولاد خالتنا و أولاد خالنا هنا عامليني مضحكة... بالنسبة لي عازة في هواك..بديت بيها لأنو شعرتا بيها ساهلة أمال لو سمعتني بتعلَم في (أنتا يا نيل) بتاعة عثمان حسين كان تقول شنو..والله دي كمان فلما براهو ... تشكر كتير يا حبة على جلب اللنك... أشرب ليك فوار...كااااك
05-24-2010, 12:52 PM
محمد عبد الماجد الصايم محمد عبد الماجد الصايم
تاريخ التسجيل: 10-16-2005
مجموع المشاركات: 35312
العزف حقيقة لا بأس به مقارنة بالمدة التي قضيتها في تعلم العود (8 شهور) .. لكن في حاجة مهمة جدا دايرك تنتبه ليها :
لاحظت إنك بتضرب الريشة زي الإيقاع .. يعني بتمسك زمن الأغنية بضربات الريشة وديا طريقة ما سليمة أبدا .. طبعا ما محتاج أقول ليك إنو اي عازف عود عندو طريقتو الخاصة في إستخدام الريشة وحتى في نوع الريشة نفسها .. لكن الطريقة الإنت بتستعمل بيها الريشة ما هي الطريقة السليمة وحا تجهجهك بعدين في الإيقاعات المختلفة وأكاد أجزم إنك ما عزفت حتى الان أغنية على إيقاع الريقي .. لأنو لو حاولت حا تكتشف إنو طريقتك الحالية في العزف فيها خلل ..
شايف في شباب إتكلموا معاك في موضوع الريشة نفسها .. وفي الحتة دي داير أقول إنو ما في حاجة إسمها ريشة أصلية او ريشة ما أصلية .. أي عازف بيرتاح مع ريشة معينة بيختار الحتة البيجيبا منها او الحاجة المصنوعة منها ..
انا لمن أشتري عود جديد ويدوني معاهو ريشة أول حاجة بعملا بجدع الريشة لأني شايف إنها ما مريحاني في العزف ولا بتديني الإحساس الدايرو في العزف .. سيف الجامعة مثلا بيختار ريشة (تخينة) يعزف بيها .. أنا شخصيا ما بقدر أعزف بي زيها لإني حاسي بيها بتكتم صوت الاوتار .. ود الامين بيختار ريشة ثابتة ووسط وما تخينة .. بالمناسبة في نوع من الريش بتخليك تحس إنو بترفع السلم ربع درجة لكن بتطلع صوت العود بي طريقة جميلة ودي الريش الرفيعة الماعريضة ..
عن نفسي شخصيا .. كنت زمان يستخدم ريش بقطعا من بيت شريط فيديو ماركة jvc .. بيت الشريط دا كان بيصنع من مادة زي البلاستيك .. كنت بفتش للبيت دا وبقطعو كلو ريش رفيعة ومدببة من الجهتين ودي كانت مريحة جدا معاي لحدي ما شركة الجي في سي إنتبهت لي إستخدامي السيء لي منتجاتا فقررت تصنع الأبيات دي من الورق المقوى ..
موضوع الريشة القالا ليك تمبس بتاعت لياقة القميصة برضو فكرة جيدة لكن ما كل الريش بتنفع .. في واحد صحبي ما بيعزف عود إلا من ريشة مصنوعة من الإسكراتشات بتاعت موبيتيل ..!!
الحاجة الأنا بعزف بيها حاليا وبفتكر إنها مناسبة هي ريش عود بجيبا من البنك !!
أي والله من البنك .. بنك السودان المركزي لمن يوزع أموال على بقية المصارف بتكون مربوطة بي احزمة بلاستيكية أو مادة شبه بلاستيكية .. هذه الرباطات تنفع ريش عود ممتازة وصوتا جميل جدا وأنا يستخدم الريش دي لي اكتر من أريع سنوات وما شكيت منها أبدا..
طريقتك يا زياد في مسك العود برضو فيها نظر .. مرفقك اليمين ما مرتاح مع العود وبالتالي محل بتعزف بالريشة ظهر قدام شوية ..ريح مرفقك مع العود زي كأنك حاضنو وما تعزف الاوتار في مكان الفتحة الكبيرة .. رجع يدك ورا شوية وحا تلقى الصوت بقى جميل ...
التسجيل الجاي حاول ركز الكاميرا على الاصابع(خلاص عرفنا طاقيتك شديدة وسماعاتك أصلية ههه) عشان لو في ملاحظة تانية نقدر نوريك ليها ..
بس الشي المؤكد إنك بتعزف حاليا بإستخدام الخنصر والسبابة .. وأنا ما داير اقول الطريقة دي خطأ لكن بقول انها قد تحجمك لي قدام عند التعامل مع سلالم معينة أو لو داير تبقى مؤلف موسيقي أو ملحن لانو الطريقة دي محدودة جدا أو قد تكون صعبة شوية ودايرة منك مجهود ممكن تتفاداه بتغيير طريقة العزف .. وبالتالي أنا أحبذ إنك تعزف بإستخدام الوسطى والخنصر و البنصر (الخنصر في النغمة فا والنغمة سي في حالة عزفك على سكيل فا بي مول أو سي بي مول وأيضا للنغمة دو في حالة عزفك على سلم دو ميجر أو دو الكبير ) .. السبابة خليها حاليا وما تعزف بيها .. عشان لي قدام لقدر تشتغل بيها على سلالم البيمول .. دا لي قدام إنشاء الله ..
كدي جرب عازة في هواك بالطريقة القلتها ليك دي وحا تكتشف الفرق ..!
العود الوزنة فارقة شوية ودي ما مشكلة لي قدام شوية شوية بتعرف توزن وللعلم أنا لحدي ما كملت عشرة أو حداشر شهر في العزف ما كنت بعرف أوزن العود وكنت بعتمد في كدة على جاري محمود الكردفاني عضو فرقة الهيلاهوبا .. بعد داك هو سافر وأنا إنجبرت إتعلمت الوزنة براي ..
أرجو إنك تزور الرابط دا يا زياد وتطلع على مداخلات الناس الفيهو :
Quote: كل الدايرو أني أعزف كويس عشان أطرب نفسي و الناس المعاي ...كان قعدة وللا خلافو...وللا حتى ناس سودانيزاون لاين....كاااك ... بعدين ياخوانا أشرحوا لينا نظف الريشة دي كيف يعني؟؟؟....أغسلا بي صابون
اخي زياد
علك بالف خير
والله في ناس خبره قدموا نصائح غاليه وجميل مشاركتك
اولا لتعلم العزف الجيد المداومه علي التمارين
لا يوجد اي عازف ماهر لا يداوم علي التمارين اليوميه
اما قصدي بتنظيف الريشه لا اقصد تنظيف مادي بمعني تجيب موس ولا سكين وتنجر...لا
قصدي ان يكون استعمالك للريشه ان تضرب في الاوتار فقط دون ان تضرب في جسم العود نفسه
اما نوع الريشة كما قال اخي ناذر كل انسان وريشته
بمعني انا افضل مثلا ريشه من بلاستيك ربط الصناديق
يعني احب الريشه الخفيفه لان حركتها في الاوتار تكون اسرع وانعم
مع قدرتك علي التحكم فيها وعمل الرعشه والنقرشه بصوره جميله
بعض الفنانين يستعملون ريشه قويه انا لا استطيع بالمره العزف بها.
حكايه...
كان في جامعة الخرطوم عندنا جمعيه اسمها جمعية الاداب والفنون
وكان لدينا فرقه موسيقيه مكتمله وكان عندنا حفله بالاستاذ محمد الامين
وبينما نحن في غرفة الموسيقي دخل عليناابو اللمين وطلب مننا العود ليعزف عليه
ربما لوجود مشكله في عوده
استلم مني العود وقام بنقر كرش العود بطرف اصبعه
فارجعه الي دون تواني ودون ان يضرب وتر واحد.....!!!
شفت الناس الخبره كيف؟؟؟؟؟
05-24-2010, 07:09 PM
nazar hussien nazar hussien
تاريخ التسجيل: 09-04-2002
مجموع المشاركات: 10409
ناذر مرحب بيك يا حبيب الحتة بتاعة (تمسك زمن الغنية) دي ما فهمتها! المسكة بتخيل لي ممكن تكون غلط و بحاول أصلحا...شوف الفيديو التاني بتاع فلق الصباح الكامير فيهو بعيدة شوية
Quote: الحاجة الأنا بعزف بيها حاليا وبفتكر إنها مناسبة هي ريش عود بجيبا من البنك !!
المشكلة لو مشيت هنا البنك و قلتا ليهم داير ريشة من رباطات القروش للعود..بودوني مصحة عقلية....خليني لمن أجي السودان بجيك توريني ليها صاح..أنا بستخدم السبابة و الخنصر (القبل الاصبع الصغير)...بحاول الوسطى مع انها صعبة شوية شوف فلق الصباح ووريني ملاحظاتك
05-25-2010, 08:38 AM
nazar hussien nazar hussien
تاريخ التسجيل: 09-04-2002
مجموع المشاركات: 10409
تصدق البيعرف يشتري بطيخ واستعمل نفس تكنيك البطيخ مع العود ممكن يكون اشد من محمد الامين في اختيار الاعواد...باعتبار انو بكون نقر ليه مليون بطيخة بينما محمد الامين بيكون عملها مرتين تلاته.. لكن بس توريه ...عايز قرعة صوتا شنو؟؟؟
05-25-2010, 08:38 AM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
والله يا ناذر الملاحظات كلللها أخذتها بعين الاعتبار-حلوة عين الاعتبار دي.. و تراني بحاول بنزل المزيد في الويكيند...مشغول وكمان عندي نزلة شديدة مفقدَاني تركيزي!!! لاكين بنزل المزيد..أصبر...والله غايتو حامرضكم مرض ... ضلفة الدولاب بقفلها...الضلفة التاني كان فتحتها بفتحا..أنتا قايل فيهو دهب؟..فنايل و بناطلين و دلاقين ساكت
05-26-2010, 07:50 AM
nazar hussien nazar hussien
تاريخ التسجيل: 09-04-2002
مجموع المشاركات: 10409
نزار شكلها خفيفة لاكين اللحن با عمك ألحقنا باللحن و ليك علي تكون الفيدية الجاي ... أنتو الفيديو أبى يتنقل لي في المنبر من يوتيوب...أفيدونا بالترك عشان نضيفه
05-26-2010, 02:27 PM
nazar hussien nazar hussien
تاريخ التسجيل: 09-04-2002
مجموع المشاركات: 10409
Quote: وبالتالي أنا أحبذ إنك تعزف بإستخدام الوسطى والخنصر و البنصر (الخنصر في النغمة فا والنغمة سي في حالة عزفك على سكيل فا بي مول أو سي بي مول وأيضا للنغمة دو في حالة عزفك على سلم دو ميجر أو دو الكبير ) .. السبابة خليها حاليا وما تعزف بيها .. عشان لي قدام لقدر تشتغل بيها على سلالم البيمول .. دا لي قدام إنشاء الله ..
ازيك يا ناذر الراجل بالراحة عليهو ... الزول عاوز ليهو طريقة يوزن العود. انا لي تجربة جربندية جدا ومازلت متمسك بها. في حالة التمارين وعدم التداخل مع آلات أخرى بعمل كالآتي: افرض احد الأوتار من تحت =1 و ابعدو 2 حتى 5. امسك رقبة العود في المكان المناسب اللي قالو ليك ناذر(حمد بن خليفة) شد الوتر واحد (وهو مذدوج) على اي نغمة ممكنة بس معقولة ركز على واحد في الوترين رقم 1. قم بالضغط عل الوتر رقم واحدبالسبابة يعطيك نفس الصوت المفترض صدوره من الوتر تلاتة حر. اضغط على تلاتة بالسبابة برضو يديك صوت الوتر 5. الآن خلصنا من 1-3-5 طيب: أضغط على الوتر خمسة بالبنصر يديك الوتر رقم 2 حر(غير مضغوط). الآن بقي الوتر رقم 4 و بالضغط على الوتر رقم 2 بالسبابة يعطيك الصوت المفترض للوتر 4 مفتوح.
بس تأكدانو التيوننق دا ما حايكون ماشي مع اي آلةمن ذوات الصوت الثابت.
Quote: ازيك يا ناذر الراجل بالراحة عليهو ... الزول عاوز ليهو طريقة يوزن العود. انا لي تجربة جربندية جدا ومازلت متمسك بها. في حالة التمارين وعدم التداخل مع آلات أخرى بعمل كالآتي: افرض احد الأوتار من تحت =1 و ابعدو 2 حتى 5. امسك رقبة العود في المكان المناسب اللي قالو ليك ناذر(حمد بن خليفة) شد الوتر واحد (وهو مذدوج) على اي نغمة ممكنة بس معقولة ركز على واحد في الوترين رقم 1. قم بالضغط عل الوتر رقم واحدبالسبابة يعطيك نفس الصوت المفترض صدوره من الوتر تلاتة حر. اضغط على تلاتة بالسبابة برضو يديك صوت الوتر 5. الآن خلصنا من 1-3-5 طيب: أضغط على الوتر خمسة بالبنصر يديك الوتر رقم 2 حر(غير مضغوط). الآن بقي الوتر رقم 4 و بالضغط على الوتر رقم 2 بالسبابة يعطيك الصوت المفترض للوتر 4 مفتوح.
بس تأكدانو التيوننق دا ما حايكون ماشي مع اي آلةمن ذوات الصوت الثابت.
تعرف يا محمد طريقتك دي ما جربندية .. العكس هي طريقة قد تكون صحيحة .. لكن أعتقد بتاخد معاك زمن طويل في وزن العود .. بعدين ما أظنها بتنفع لي زول زي زياد لسع في أول الطريق .. الدوزنة الإنت شرحتها هنا دي دايرة أذن موسيقية حساسة عشان تخلي الوتر رقم واحد مضغوط يكون صوتو زي نمرة تلاتة مفتوح .. والحال برضو في بقية الاوتار .. طريقتك قد تنفع مع زياد إنو يتأكد بيها من دوزنة الاوتار وإنها مضبوطة بعد ما يوزن العود مش يعتمد عليها في حد زاتا لي وزن العود ..
لكن برجع وبقول أي زول عندو مدرستو الخاصة وطريقتو البيعرفا في التعامل مع العود ..
كدي يا زياد جرب الطريقة الشرحا ليك محمد الشيخ إحتمال تنفع معاك ..
تسلم ..
06-04-2010, 03:49 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زياد جعفر عبدالله
tmbis
amir jabir
Magdi Ahmed Elsheikh
Azhari Nurelhuda
عبدالله الشقليني
Deng
Akram Omara
MOHAMMED ELSHEIKH
Hassan Makkawi
خالد العبيد
محمد عبد الماجد الصايم
محمد النيل
nazar hussien
غباشي
داليا الكباشى
دينا خالد
ناذر محمد الخليفة
Osman Musa
فيس بوك
تويتر
انستقرام
يوتيوب
بنتيريست