القرنتية .......... هاشم صديق
القرنتية ( هاشم صديق ) قرنتيه .. ما غواصة روسية قرنتيه لا دبابة برمائية لا جاسوسة مدسوسة لا جندية في حركة لا مختلسة مال شركة لا قصفت حود فشلا ولا كشرت صريف كسلا ولا معروفه ختمية قرنتيـــه .. لا صعلوكة لبست شورت لا بتعرف شنو البظبورت لا محتاجة جنسية هي قايلة النيل سقف بيتها وقايلة ضفافو محمية جات منسابة عز الصيف قايلة الناس بكرمو الضيف وقايلة النيل أمان والقيف وقايلة الحاضرة عصرية قرنتيــه جات بصغارا دايرة الخير لا شافت يفط تحذير لا نزحت تكوس توزير لا جاطت حركة السير لا دارت وسام تقدير لا مستلفة عشرين وش ولا بتعرف تعيش بالغش وكانت محتاجة بس للقش وجات أحلامها دوغرية قرنتية لا بلعت عديل السوق لا نضمت بدون طايوق لا كنزت دهب أو ماس لا ظلمت بدون إحساس لا عصرت شاب الناس لا كتمت على الأنفاس لا قطعت عشم بي فاس لا داستنا زندية قرنتية لا شربت مريسة العيش لا شبطوها في التفتيش لا سجنوها شالو الفيش لا خانت قسم أو ديش لا أجتمعت بمستر جون لا أكلت مؤونة العون لا سدت علينا الكون لا سبت كتاب أو دين لا سامتنا حمرة عين ولا باعتنا ضهرية قرنتية جات مشتاقة للخرطوم تزور أحبابها خايفة اللوم تصيح وتنادي يالحلقوم جنينة النزه وين يا زول لقت حال الجنينة خلا حليل زمنها وحليل اهلها لا قرنتية لا أصلة لا ككو لا بغلة لا حلوف لا أسدا مهاب بالخوف لا نمرا يشد الشوف لا شل فيل لا تيتل جريهو جميل ولا غزلان ولا طاووس يباهي النيل لا زفة طيور ونعام لا نمرا دفر قدام كل الشلة يا قرنتية غمضة عين .. أحالوهم لصالح عام تقول الدنيا مهدية قرنيتة جات زي ضيفة ما غارة لا محتاجة لي فيزا ولا تصديق على زيارة جات والشوق دموع حارة تجدد في العيون والشوف بين توتي .. وعلايل أبروف قايلة الدنيا لسه سلام ما خيم زمان الخوف لسه هناك ضفاف حره ما مطمورة للمرة قايلة الناس بعزو الضيف ما بيسوقوهو لي حفرة وجوار القيف .. وما بياكلوهو في السفرة ومصيرو مخيف قايلة الحاضرة ما غابة وقايلة حقوقا محمية قرنتية ... لا قدلت في شارع القصر لا حامت في وقت الحظر لا خشت على المامور ولا نطت سلك أو سور لا دخلت على أم درمان ولا كسرت قفل دكان لا دفرت على التلفاز لا عضت كراع فنان لا ذاعت بيان للناس لا احتلت كمان حيشان ولا نصبت شبك للحش جات بصغارا كايسة القش تلاقي القوت صبح محظور وخير البقعة جوه السور سماح لدنيا منسية قرنتية .. لا بتعرف عجن أو لخ جات أحلامها دوغرية عجب ساقوها جوه الفح عجب ... من طولها وقعت تخ عجب .. سلخوها صبحية عجب .. ونحنا بنسلخ الإنسان كيف ما نغدر الحيوان عجب .. والدنيا عصرية قرنتية لا دبابة برمائية لا جاسوسة مدسوسة لا غواصة روسية لا جندية في حركة لا مختلسة ما شركة لا حزبية بعثية قرنتيــــة .... ________________________________ شكر وتقدير لاخي وصديقي رابح موسي رابح الذي ارسل هذه الرائعة " القرنتية"

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]