|
|
 الحكومة اللكومة
|
كنت والى عهد قريب اظن إن هذه الحلوى الجميلة والتي يسميها المصريين ( ملبن) إن اسمها حلاوة لكوم إلى إن اكتشفت بعد قسرية الاغتراب الثاني ( الاغتراب الاول بقصد الدراسة) إن هذه الحلوى في جزيرة العرب تسمى حلقوم. وهذا هو سبب ربط الحكومة باللكومة، لانه في تاريخ البشرية منذ قابيل وهابيل ما في حكومة وقفت في حلقوم الناس مثل حكومة الانقاذ
اول حلقوم استباحته كان حلقوم الشعب السوداني وقالت ليه ( ناكل مما نزرع، وليس مما يزرع هو) واتلصقت ليه في حلقه لاهي زرعت لا خلته يزرع
الحلقوم التاني كان حلقوم صدام اتلصقت ليه وهللت ليه اضرب اضرب يا صدام وبالكيماوي يا صدام لمن انضرب في حفرة بالاقمال الطبيعية
الحلقوم التالت كان حلقوم اسامة بن لادن اتلصقت ليه لحد ما طفشته من عمارات الطائف بالخرطوم إلى كهوف تورا بورا وبقى لا مال لا حسن حال ولا عيال
اما حلقوم كارلوس ده براه اعجوبة لانه حلقوم وطهورة ( في مقابلة صحفية له وهو في سجن بفرنسا مع احدى المجلات وان لم تخني الذاكرة مجلة المجلة ذكر كارلوس الكثير عن حياته المثيرة بدءا من امريكا اللاتينية وآسيا ، لبنان ، فلسطين .. الخ وحيما ساله الصحفي عن فترته بالسودان ما كان نكارلوس الا إن انفجر ضاحكا)
الحلقوم الرهيب كان حلقوم الراحل د. جون قرنق ، التصقت بحلقه في كل جولات المفاوضات منذ ابوجا 1،2 الايقا طرابلس كينيا يوغندا اوروبا، القاهرة. أي حتة مشاها كانت لاصقة في حلقه لمن دوخته في مشاكوس ووقع البروتوكولات التي يفترض إن تكون مسودة دستور يا اسيادنا حتى ذلك الحين ينزل الشعب السوداني على انغام لولي الحبشية
اما حلقوم التجمع ده فشتغلت عليه بسياسة ارنب نط فيقول التجمع تراني بنطن تتلصق ليه في حلقه يبدأ ينطط يا امم متحدة ، يا شعوب محبة للسلام انقذونا من نظام الانقاذ الارهابي العنصري القمعي الخ من قاموس المصطلحات لسياسية تقو تاني تتصق ليه ويتحول من( تهتدون) إلى( تنططون) والمرة دي تدخل جيبوتي في منظومة احتضان السلام ويتحاضن التجمع والانقاذ وندخل مرحلة(تستهبلون) والتى تتحول تدريجيا إلى (تستجمعون) كناية عن المؤتمر الجامع. اما ناس (سلم تسلم) فيتحولون إلى شعار ( حبيبي تعال تعال نتلم مادام الدم اختلط بالدم) وتظل القاهرة هي الشقيقة
وتفننت في حلقوم دارفور شي جنجويد وشي بسكويت بس ناس دارفور فيهم ناس معكلتين وواللكوم بعمل ليهم حساسية اها قالوا كو ومليون كو الحكمة تكس لسهم لي جاي يكسوا ليها لي غادي بس الحكمة حلقمتها لا يوقة وما بتكل ولا بتمل
وقمة ابداع حلقمة الحكومة كان مع الأمم المتحدة
فحيرت دول الاستكبار ودول الاستنفار والاستحمار، فصارت الامم المتحدة زي العروس السودانية ، الحومة تغني ليها( يا حلوة ميلي كدة .. والله ما بقدر) والامم المتحدة ترقص
الامم المتحدة تقول قوات اممية بنطوا ليها في حلقها امميو؟! لا لا خلوها دعم لو جستي ، يقوم الريس حلف بأغلظ الايمان ( لأجاهدن فيهم في دارفور) الامم المتحدة تقول ليهم خلاص حصار جوي ، الحكومة تقول ليهم خلوها قوات هجين
يقوم الريس يقول ليهم ( لا هجين ولا عجين)
ومازال العرض مستمر
(تم استثناء حلقوم المغتربين حفاظا على ما تبقى من صحتهم)
|
|
 
|
|
|
|
د.محمد حسن
ابو جهينة
فيس بوك
تويتر
انستقرام
يوتيوب
بنتيريست