|
طالعني الخلا أون لاين .. طلعت شليق وفاهم البورد غلط !
|
" بالرغم من تعلقي مثلي والكثيرين بسودانيز اون لاين وذلك من زمن بعيد ، إلا أني لا أعلم لما لم أطرق بابكم قبلاً طالباً حق اللجوء إلى هذا العالم الذي تقفون عليه . ربما وإلى زمن قريب لم تراودني فكرة المشاركة الفعلية فيما يجري من حولنا وكنت أكتفي فقط بمتابعة ما يكتب .
أما الآن ومع كثافة ما يطرق أبواب وطننا يوماً بعد يوم ومع مجريات الأحداث التي آخذة وطن المليون ميل إلى حيث لا نعلم ، بت أرى بحتمية إحتمائي بآخرين أشاركهم ويشاركوني الهم ، أنعم بصحبتهم وخبراتهم .. أضحك معهم وأبكي حين يبكون . بت أكثر قناعة بأن في التكتل والإلتفاف حول من أقصى أحلامهم هو وطن يسع الجميع وجيل قادم (لا مقهور ولا منهور ) أمر لا مفر منه . لذا أطلب حق الملاذ ."
كانت تلك صدرية طلبي الذي تقدمت به إلى الأخ بكري للإنضمام إلى (سودانيز) .. لكن ما لفتني حين ( إتشالقت ) لأول مرة وبعدها كل المرات التي إما أتيت مداخلاً أو حدثت نفسي (بغباء) في أن أتداخل في إحدى المواضيع .. أن ظاهر الأمر ليس كباطنه .. وما أتيت باحثاً عنه هنا هو حتماً ... سراب ...! فأصل الحكاية هنا هو ببساطة لا يتعلق بما يكتب فهو للأسف يدور حول من يكتب .. " يعني اللعب على الجسم ما على الكورة " فما أكثر الفاولات ... ! كان أن تداخلت مرة في إحدى المواضيع .. وعبرت عن رؤيتي البريئة فيما قرأت .. ومع شكل المداخلات الأخرى تنبهت إلى أن البوست - أصلاً- كان شكلاً وفصلاً آخر من فصول " طالعني الخلا " بين صاحب البوست وآخرين ... فسخرت من ( شلاقتي) وهذا ما يتكرر في كل حين .. إذا وكما هو جلي وبين أن للزملاء هنا (أعداء) .. فحين يكتب أحدهم (موضوع) ..تطلق (صفارة الحرب ) فيأتي العدو ومعه آخرون للنيل من هذا الزميل أو ذاك .. فيلتهب البوست غباراً و .. عراك .. وبعدها يقوم ( الخائن ) بفتح موضوع آخر في مقام آخر ... وهنا يتاح المجال لمن لهم ثار .. ليأتوا ليأثروا ...! هذا ينطبق على كل ما يطرح .. أكرر .. كل ما يطرح ... فلو - تشرفت - بتكوين أعداء ... وكتبت مرة عن بديهية ( أن الأرض كروية ) سينبري لي من أعدائي الأعزاء من يقول بجهلي وسطحيتي .. وسأرد عليه بأسوأ مما جاءني به ... ( وسنداوس جنس دواس ) .. فهل لي بأعداء .. فقط لإكون فاعلاً ... ؟!!
عشان بس ما أتفهم غلط فما أنا للإصلاح قد أتيت ... أنا أطرح سؤال .. ما هو شكل التكتلات هنا ؟ عشان أتكتل وكده ..
سياسي ؟ ما كيزان وكيزان ( أها أنا ما كوز) يعني ناسي منو ؟ علماني وما علماني ( أها أنا علماني ) يعني ناسي منو ؟
عنصري ؟ أفارقه وعرب ؟ أنا سوداني يعني ناسي منو ؟
رياضي ؟ هلالاب ومريخاب ؟ أنا هلالابي يعني ناسي منو ؟
ثقافي ؟ مثقفاتيه وناس بساط ساااي ؟ أنا زول سااااي اها ناسي منو ؟
طيب ده بروفيلي يا البورداب .. وروني أسجل في ياتو فريق.. بس شان أبطل شلاقتي دي .. والشوت الضفاري ..
وأجي متحزم !
|
|
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: حاتم كاهن)
|
والله ياكاهن لقيتك شديد شدة الحرامى السرق تلفزيون الناس وهم بتفرجو فى المسلسل... ساكن الرياض ودارس كمبونى وتقول طالعنى الخلا ؟؟ الكلمة دا انا قايلة ناقشة ايمن الطيب بس هنا ..
وبعدين ياخ قاعد فى المنبر من شهر 4 وماقلت بغم دا غير مقاعد المتفرجين ماعارفة قعدت فيها كم سنة .. كتابتك دى ما كتابة زول بسال ودايراجابة دى كتابة زول ناااااقش كويس ومارق من زقاقات اونلاين دى ..
بصراحة كيفتنى الكتابة وقريتها مرة ومرتين وتلاتة وياهى نفس المخاوف والاسئلة عند كل زول بدخل جديد المنبر .. المنبر بقى زى اوكار الارهابيين(الليلةوووب) اى زول يجى داخل ملاوز ومتحسس مسدسو وشايل قفة مخاوفو ..
نجى لاسئلة بروفايك غايتو ماعندى اجابة لكن لى اجر الاجتهاد
Quote: سياسي ؟ ما كيزان وكيزان ( أها أنا ما كوز) يعني ناسي منو ؟ علماني وما علماني ( أها أنا علماني ) يعني ناسي منو ؟
|
سؤالك دا هو سبب الغبار والكترابة القايمة فى المنبر علمانى دى ناس الكفار ....بطريقتك
Quote: عنصري ؟ أفارقه وعرب ؟ أنا سوداني يعني ناسي منو ؟
|
السؤال دا اجابتو بعد الانفصال (لاحظ انفصال ما استفتاء)
Quote: رياضي ؟ هلالاب ومريخاب ؟ أنا هلالابي يعني ناسي منو ؟
|
ناس هلال مريخ ديل اسمهم الانصرافيين ...وقع ليك ؟
Quote: ثقافي ؟ مثقفاتيه وناس بساط ساااي ؟ أنا زول سااااي اها ناسي منو ؟
|
دا بقدر اجابو ليك بصراحة .. ناس بساط ساى ديل ناس خالو امين محمد سليمان والرجرجة والرهط بتاعو وديل صعب حصرهم فى الوقت الحالى...
ياخ الف مرحب واتمنى ما اكون خستكت ليك بالبوست بتاعك ......
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: Amira Elsheikh)
|
Quote: طيب ده بروفيلي يا البورداب .. وروني أسجل في ياتو فريق |
مرحب بيك اخ حاتم و نتمنى ليك اقامة طيبة في سودانيز ... احسن حاجة تعمل رايح في المنبر دا و تبقى تقيل يعني أعمل بحكمة اذا كان الكلام من فضة فالسكوت من ذهب و الصمت ابلغ وناس لسانك حصانك ..... و الخ بالنسبة للتسجيل ... ندعوك للانضمام لحزب البهجة دا لو عندك زمن و مزاج للكتابة
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: Amira Elsheikh)
|
ألف مرحب بالعزيز حاتم كاهن , يا زول انت ما محتاج لناس , دخلت البورد وشايل معاك طبنجة وعلبتين قرنيت وعصاية جنب ومع ديل كى بورد سنين الزيك منو , سجلنى معاك من ناسك , تحايا حارة لسعادة الفريق وبلغه محبتى وتقديرى هذا الرجل له على من الافضال ما تنوء بحمله الجبال , تتلمذت على أياديه الكريمة بكلية الشرطة السودانية حين كان مديرها , وعملت تحت امرته فى المباحث الجنائية المركزية وكان لى نعم القائد والأب , انا بالمناسبة يا حاتم جيت بيتكم العامر عدة مرات أيام الخرطوم غرب , وكنت انت واخوتك ضغار وكلكم لابسين نضارات نظر ما عارف العمى ده جبتوهو من وين , رغم أنو سعادة الفريق لم يكن يضع نظارة طبية .
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: Amira Elsheikh)
|
يا أميرة .. ياخي والله إنت زاتك لفيتي لي راسي هسه ..
لكن ..
Quote: ساكن الرياض ودارس كمبونى وتقول طالعنى الخلا ؟؟ الكلمة دا انا قايلة ناقشة ايمن الطيب بس هنا ..
|
إنت الرياض دي فاهماها غلط شكلك .. شفتي نحنا ساكنين في حتة بقولو عليها إشلاق الرياض .. إتوزعت لي ضباط الشرطه والجيش الهسي مرافيد ديل ...من زمن الرياض كانت خلا ...
شكراً على ( البريف ) وكده ...أديني فرصة أفكر وأشوف أنا طلعت بشبه ناس منو .. تحياتي ..
عايني .. إنتي أيمن ده منو كمان ؟
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: Gaafar Ismail)
|
Quote: عايني .. إنتي أيمن ده منو كمان ؟ |
ايمن ,دا الوكيل الحصرى لمنتجات جونسون بالبورد,,
زايد مهمتو الاصلية هى متابعة السلوك العريانة(بتاعة الكهرباء)بالبورد خوفا من الحريق والمفاجات الاخرى,,,يعنى كهربجى ,,,,
ياكاهن فى داعى?
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: Amira Elsheikh)
|
أميرة الشيخ ,,,سلامات
حاتم ده تفتيحه ,, أبوه عمنا عبد الله عبد كاهن
كان مدير كلية الشرطة ثم مدير المباحث المركزية
ثم مدير عام الشرطة ,,يعني ماخد من الوالد الحيطة والحذر
ما تخافي عليهو ,, الراجل طالع طوف استكشافي فقط وان شاء
الله القشة ما تعتر ليهو,,, دخليهو ضمن الزمره ويكون تحت
الحماية.
تقديري
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: سيف الدولة كامل)
|
سيف الدولة الهلالابى,,,,سلاااام,,
اخاف عليهو شنو??
دا انا خفت منو....
مداخلتى معاهو دى اسي مداخلة زول خايف على زول?
دا ختاها طاااااااخ طررخ لماكيفنى زاتو ,,
بتاع سياسة وكورةوعلمانى ويطيرو الكيزان وشنو كدا ماعارفة,,,
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: Amira Elsheikh)
|
Quote: سلامي الكتييير للوالد العزيز عبد الله عبده كاهن |
تحياتي لسعادة الفريق ومرحب بيك ياحاتم بعدين ياجماعة الزول ده ما يعمل ليكم فيها مسكين ..... ولد بوليس وفي البوليس مباحث مركزية وكان ما
اخاف الكضب بكون سكن اشلاق قبل كده يعني زول مقرم وواقع من السما سبعة مرات ...........
جنابو عمر عثمان (النفاي الرسمي للشرطةفي المنبر)
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: عزام حسن فرح)
|
حاتم
أنا برضي قاصدك عديل ...
لكن كدي قول لي ده منو القصدتو قدر ده ؟ وقصدتو في شنو .. شان يمكن نتقاصد ...
دة ما أنا ولا في زولا معين بالإسم دة حال البورد ياخوي لسان الحال هو : قاصدك عديل لو سألت عن السبب أو عن من هو هذا المقصود عديل ، ستجد الإجابة في مضامين النص و هي نفس الأسئلة التي أتت في صدر البوست أعلاه
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: أمين محمد سليمان)
|
حاااااتم كاهن والله نوًرت البورد يا ود الخالة و بالجد إتمنيتك في المكان دا من بدري ، خوش يا زول بي رجلك اليمين و سمي بالرحمن إتلفت كوووويس بي جاي و بي جاي و شووووت طواااالي و التصنيف بلبسك برااااهو ، و فجاءة كدة لا ايدك لا كراعك تلقي نفسك إتصنفت !! المهم ما تشتغل بي زول خليك نفسك و بس ...
يا جماعة حاتم دا زول كويس والله بس عيبه حاجة وااااحدة، أسوأ حاجة ممكن الزول يعملها في نفسه ... هلالابي !!
Quote: يا حبيبنا ، سلام كدي ورينا إنت وين لخالد و اسامه كاهن و بعدين بنجي نشوف قصتك شنو !! |
خالد و اسامة أخوان حاتم و هم التلاتة ( ربنا يحفظهم ) أولاد خالتي
تحيااااات كميااات يا حاتم
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: heba Elmahi)
|
هبه يا بت خالتي .. ( أها يا القال لي جيت بي ولي أمرك داك ، بقى عندي ولي أمر وبت خاله والمافي شنو ؟ )
والله يا هبه داخل بالاتنين وغايتو ربنا يكضب الشينه ..
Quote: يا جماعة حاتم دا زول كويس والله بس عيبه حاجة وااااحدة، أسوأ حاجة ممكن الزول يعملها في نفسه ... هلالابي !! |
أنا هلالابي فرع الجنوب بعد ما ينفصل .. يعني ما عندي دخل بي هلالابكم الشمالين الهنا ديل ... فدحين ما ظنيت في أي مشكل ...!
تحياتي للكل ...
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: heba Elmahi)
|
Quote: يا عمكـ .. عندي حساسات في البورض! أول ما أجي خاشي الشاشة بتعمل لي جك .. جك! أها لقيت ليكـ الشاشة كلها ماشة على البوست دا! |
شفتا يا كاهن .. دا الكنا عاملين حسابو الزول دا لو ما لحّقك الوش الأخدر الذي يتخذه شعاراً دا لومني
ـــــــــــ
Quote: زايد مهمتو الاصلية هى متابعة السلوك العريانة(بتاعة الكهرباء)بالبورد خوفا من الحريق والمفاجات الاخرى,,, |
يا أميرة غايتو دا أدق توصيف يقابلني لأيمن الطيب
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: حاتم كاهن)
|
سلام يا حاتم كاهن,,
غالبا ما ستصبح كاهن البورد قريبا..يازول إنت مذاكر تمام التمام لكن برضو دخول المنطقة الصناعية ما زى المرقة منها !!! لا كيف يا صاحب!!!ياخ محاولاتك فى الفهم عالية جدا جدا وتكتيكك تكتيك شفوت شرق الخرطوم دا غالبا تكتل جديد فيه عدة فصائل بعضها منشق وبعضها موال وكل ما نتزنق نكلم لينا فصيل منهم يطلعو الخلا ويدفرو الجماعة دانتين وشوية هاونات وبالطريقة دى حا يفاوضونا,,سنعلن عن تشكيله قريبا فلا تذهب بعيدا ..Quote: أنا بقرأ فيها من أمبارح وما فهمتها بالمرة ... |
المرة دى مافى مشكلة لكن من الآن فصاعدا لما ما تفهم أعمل رايح خاصة لما تقع ليك بين فكى كماشة زى الوقعت فيها دى,, Cycling 1000 .وال Recyclig قدام,,
مودتى وسلامى لناس مربع واحد وعشرين,,,
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: أيمن الطيب)
|
أووو أيمن الطيب ياخي ...
يا صديقي .. ياخي البلد ملانه كهنه ومدفقه عديل .. الله لينا نحنا ناس مربع 21 ديل .. خايف بس من قصة الروحه دي ما تبقى إختياريه .. وتبقى واقع وتحصيل حاصل .. إف يو نو وت آي مين !!!
طبعاً أنا زول إنشقاقي بي طبعي وكده .. بس عندي حساسية من ال Recycling من تبيت برضو ...
والمنطقة الصناعية ( الصناعية) دي .. ما داير أمرق منها أصلي .. ما شايفني جاي حافي .. ومفلفل ليها شعري كيف ؟؟؟
يا أيمن .. بس ألكزني لمن أجي قريب من السلوك (العريانه طبعاً ) .. والبتعمل حريق .. وقولي لي : (ها)...
تشكر يا صاحب ...
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: أمين محمد سليمان)
|
Quote: دا ختاها طاااااااخ طررخ لماكيفنى زاتو ,,
بتاع سياسة وكورةوعلمانى ويطيرو الكيزان وشنو كدا ماعارفة |
الاخ حــــاتم كاهن
مرحب بيك يا جسور
ما فضل ليك غير تكون من اولاد ام درمــــــــــــــان
يكفي انك من عشاق الازرق أنسي انو لو ماناس ام درمان ديل قطعوا راس غردون كان بحصل شنو ؟
النجيضة المريخاب .... ديل ما يدردقـــوك ... اوعك من الســــــارق
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: مجاهد محمد عباس)
|
حاتم يادفعـــة سلامـــــات تعرف انا كمان زيك وواحد,,,, بس قلتا لحدت ماالواحد يشوف شايت وين ينتظر شوية ويلزم الصمت عشان مايقولوليك ايو مداخلة قد تحسب ضدك ولك الحق فى الاحتماء تحت جناح ما.. غايتو ياالحبيب وحسب كتابتك الانيقه شكلاً ومعنى الا تعملينا تكتل ولك ان تقوده ونحن وراك وومعاك وبالجنبتين كمان
تحايا لك وللمتداخلين الذين رحبوا بك وبنا من قبل والشكر مجدداً لسيد الحوش بكرى وبالمعية كدا لى ود الصايم زاتو
| |
|
|
|
|
|
|
Re: طالعني الخلا أون لاين .. طلعت شليق وفاهم البورد غلط ! (Re: حاتم كاهن)
|
Quote: والحرية والعدالة ... |
هو ذاك...هو ذاك كما قُلت من قبل,في تعليق لصورة حفل افتتاح كاس العالم\جنوب افريقيا (الصورة توضح اختلاف الآلوان,ووحدة الآنسان) نرتقي بانسانيتنا فوق,الظلم,العنف,الفحش من القول والفعل,العنصرية,الاستعلاء,الكراهية,وووووووووو
ولك آضعافه
__ الكلمة الطيبة جواز سفر.....
| |
|
|
|
|
|
|
|