|
|
 رفع دعوى على شركة طيران فلاى دبى
|
ياجماعة عندى رغبة فى ان ارفع دعوى على شركة طيران فلاى دبى والناس ديل انا زعلان منهم شديد واذا كان هناك اى من اخوانا القانونيين الموجودين فى دبى مهتم بالموضوع يجينى بى جاى عشان نتشاور .
|
|
 
|
|
|
|
|
|
|
|
Re: رفع دعوى على شركة طيران فلاى دبى (Re: عابدون محمد عابدون)
|
الأخ عابدون
أرفع ولا يهمك
فلاي دبي لا ترتقي للدعاية العاملنها ليها
مع الأسف سافرت بيها مرة وأتخذلت فيهم وخسرت كتير
خدعونا بالفكرة الطيبة الماخدنها عن طيران الإمارات وكنا قايلنها حا تكون في نفس مستواها لكن مع الأسف لقيت سودانير أحسن منها وبقينا كالمستجير من الرمضاء بالنار لاني جيتها هارب من عمايل سودانير وأستهتاره موظفيها
أولا شروط العقد عندهم ما واضحه لانها بتصلك في الميل والموقع ما موضح فيه شيئ يعني مفروض تكون شروطهم واضحة مثلاً في حالة تراجعك عن السفر مابرجعو ليك قروشك كاملة ولا كاش بل كوبونات تستخدمها في شراء تذاكر من عندهم ولمدة محددة
ثانيا قسم خدمات العملاء عندهم زي الزفت موظفين غير منضبطين ولغتهم فجة ومتعالية وصدورهم ضيقه وماعندهم تجاوب أو مرونه في التعامل وصلاحياتهم محدودة جداً والوصول ليهم صعب والتعامل معهم يستغرق زمن طويل في الاتصال والكلام والحجز عن طريقهم كله أخطاء تمليهم رغباتك ويعملوا ليك من راسهم وما تقدر تغالطهم وتكون محظوظ لو اكتشفت غلطهم وتدفع قروش عشان تصلحه
اكتشفت انه الموظف نقص حقيبة من ما كنت حاجز ولمن طلبت حقيبة إضافية رفض مما اضطرني لتحويل حجزي لليوم التالي ودفع مبلغ 100 درهم وتحويل حجزي وتحويل حجزي لليوم المقرر فيه السفر ودفع مبلغ 100 مع قيمة الحقيبة الإضافية 150
اكتشفت انه الموظف قام بحجز العودة خطأ وقمت بدفع مبلغ 100 للحجز الجديد
النظام المعتمد للحجز عندهم في الانترنيت فيه مشكلة كبيرة والحجز عن طريق الفيز كارد مشكلة لانه قام بحجز مبلغ الحجز ولم يؤكد الحجز وحتى الأن المبلغ محجوز وقمت بالدفع مرتين للحجز وحتى الأن ما عارف الخطأ في الدفع للمرة الأولى من الموظف ولا من النت ولا من البنك
ثالثاً مطار دبي الثاني زي الطين زحمه وعدم أنضباط وسافرت عشرات المرات بمطار دبي الاول وما كنت اعتقد انه مطار دبي التاني بالسؤ دا تاخير وإهمال ولخبطة وعدم تواجد موظفين من فلاي دبي لخدمة ركابهم وعدم معرفة الركاب للكاوننترات يخلق ربكة كبيرة في مطار كبير زي مطار دبي
قابلت شباب سودانين زعلانين وكانت شكواهم أنهم كانو مسافرين باليوم السابق ليوم سفرنا ومواعيد الإقلاع كانت الساعة 8 ونص وحضروا للمطار من الساعة 6 وبعضهم من الساعة 5 وانتظموا في طابور لوزن الامتعة والامتعة بعد عناء الساعة 7 ليتم تمرير عدد بسيط من الركاب وقفل الكاونتر بعد نصف ساعة وانصراف الموظفين ولم يجدو من يسألوه وقاموا بالتوجه لإدارة المطار ليتم الأتصال بالشركة ليخطروهم بأنهم تأخروا والكاونتر يغلق في زمن محدد وعليهم عمل حجز جديد لليوم التالي وسافرت الطائرة خالية
رابعاً رغم أنه الطائرة كويسه ونظيفة وجديدة لكن لاحظت تأخير في الإقلاع وطاقم الخدمة في الطائرة كله عجم ومافيه شخص بعرف عربي
خامساً مواعيد الطيارة من الخرطوم غريبة جداً الساعة اتناشر وكل الناس بحصل ليهم لخبطة وبفتكروا انهم حايسافروا اليوم التاني يعني مثلاً انت مسافر يوم 16 حا تفتكر نفسك تمشي المطار يوم 16 الساعة 9 مساء عشان الاقلاع الساعة اتناشر لتكتشف انه طيارتك سافرت من امس وانو كان مفروض تجي المطار الساعة 9 يوم 15 بالليل وتسافر اول يوم 16
دي بعض الملاحظات رغم أني كنت مستأء جداً قبل السفر من الأخطاء والتعامل وحاولت الوصول لمسؤولين في الشركة لكن جهد دلوني أن لديهم قسم للمتابعة وعلي تقديم شكوي هنا وقمت بكتابة شكوي وافية شرحت فيها كل الملابسات حتى الأن لم يصلني رد ولا انتظره
يا أخي أشجعك واقيف معاك في إقامة دعوتك
وأحذر كل من يرغب في السفر بفلاي دبي الحذر والحذر
برضه مشكلة في السودان لانه الدفع عن طريق الفيز كارد موقوف نهائي وما تقدر تحجز والمشكلة دي من السودان
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: Faisal Elrasheed)
|
يا أخونا فيصل
| Quote: الرخيص برخصته يضوقك مغسته (مثل اوكراني) |
صحيح فلاي دبي رخيصة لكن الرخص دا عشان مافي خدمات يعني مافي عضه في الطيارة ولا تلفزيون ودي نحنا رضيانين بيها
لكن بالنسبة للمشاكل الحاصلة دي أصلاً ما عندها علاقة بي أنها شركة رخيصة وطيران اقتصادي وكدا دي بسبب إدارة الشركة
لو لاحظت تلقى أنو فكرة الشركة جميلة جداً وممكن تكون ناجحه جداً وتنافس وتسرق السوق من بقية الشركات ويركبها كل الناس الغني والفقير لسهولة السفر بيها والحجز والتوفير لكن الربكة والجوطة دي سببه إدارتها وتولي ناس مافاهمين الحاصل شنو
طيب أها دي رخيصة سودانير ديل مع شنو
تذكرتهم غالية وخدماتهم زي الزفت ووجبتهم اكعب وجبة ونحنا قاعدين ناكل قبل ما ناكل سودانير والطيارة مافيها اي خدمات ومضيفاتهم بتاعت مشاكل وطياراتهم زي الدفارات ممكن تقع بيك اي لحظة ويأخروك في السفر وياخروا ليك عفشك كان ما ضيعوه
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: عبدالعزيز حسين عبدالرحيم)
|
Quote: طيب أها دي رخيصة سودانير ديل مع شنو
تذكرتهم غالية وخدماتهم زي الزفت ووجبتهم اكعب وجبة ونحنا قاعدين ناكل قبل ما ناكل سودانير والطيارة مافيها اي خدمات ومضيفاتهم بتاعت مشاكل وطياراتهم زي الدفارات ممكن تقع بيك اي لحظة ويأخروك في السفر وياخروا ليك عفشك كان ما ضيعوه |
يا عبد العزيز ..
بالله سيبك من حكايت سودانير دي اساسا دي حاجات انتهت ليها زمن طويل ..
والناس زي اتعودوا علي حكاية انها سجمانه ورمدانه وادراته حراميه ولجنة الخصخصه بتاعته ناس ما عندها ضمير ..
يعني الضرب علي الميت حرام .. يا عبد العزيز الناس ديل لا برحمو ولا ببغرو ولا بحسو ..
مسئولين سودانير والله علي ما اقول شهيد بركبو طيران الامارات وانا شاهد علي ذلك ..وقد رافقتهم مرات عدة علي الاماراتيه وخلافها ..
وقد حدثت بيني وبين احدهم وهو كويتي الجنسيه مشاده كلاميه ونقاش حاد حول بيعهم لخط لندن الخرطوم المملوك منذ ان قامت سودانير والذي باعته عارف الكويتيه الي بي ام اي الانجليزيه وحرمت سودانير من الهبوط في هيثروا الي الابد و قد امتد حوارنا بصوت عال جدا بطول الرحلة من الخرطوم وحتي دبي ..ولم ينقذه مني غير الكونكشن فافترقنا عند بوابات المغادره ..
ما تتعب حلقك يا اخوي ..دي ناس ما عندها دم ..
يا عبد العزيز اي شركة طيران لو قدمته فيها شكوي اكيد حتلقي رد واحترام حتي طيران دبي ..ويمكن تطير فيها رؤس وتتغير فيها ادارات وتسمع اعتذارات ومؤتمرات صحفيه ..
الا سودانير دي ما بشتغلو بي اي شكوي ..وعادي ممكن المضيف يقبل منك ويسب ليك دين وما تعرف تقول شنو ..
اما الادارة العليا فديل خليهم بس لي الله ..
ديل مافي زول بقدر عليهم ..صدقني جد ..
هاك كدي متع عيونك وهم لو بقرو كلامنا ده حق يختو ليهم تراب في حلقم ويتلموا بلا يخمهم ..
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: Faisal Elrasheed)
|
يا فيصل يا أخوي والله اول مره اعرف بيع الخط
زمان نحنا كنا بنخلي حقنا لي سودانير عشان حقت الحكومة وحقتنا كلنا لكن هسع بقت حقت شركاء اجانب يعني يربحوا من خسارتي تصدق وزني كان 54 كيلو دفعوني 125 درهم جابو لي عفشي بعد 8 أيام شحن ومكسر ولخبطة وخسارة كبيرة ليه يعني
مرة قبل ما تنباع ضيعو لي كرتونة أمانه اوصلها الأمارات وأتاخرت جداً في المطار في انتظارها وعرفت انها ضاعت واحرجت جداً مع أصحابها وعرفت انو في تعويض عشانهاقلت اجيبه اديه لاصحابها وسالوني فيها شنو سالت اصحابها قالوا فيها طلح والزمن داك انا كنت عزابي ضحكو فيني الجماعة وخجلت وزعلت وتاني ماسكيتها وخليتها قلت يعني اخسر حكومة السودان 400 دولار عشان طلح وأنا زاتي عزابي البوديني اشيل طلح شنو زاتو وبركة الضاع
أخر مرة كنت زعلان شديد ومشيت قابلت مديرها زاته العبيد فضل المولى راجل مسكين ومهذب وخلوق ومتفهم ومغلوب حيلة وهو زاته اشتكي لي من موظفينه لمن حنني وبصراحة عذرته يعني يسوي ليهم شنو الناس ديل
سودانير فيها العجب والعجائب الطيارة الوحيدة البتركبها بدون رقم مقاعد بتذكرني الشفع أول يوم في المدرسة وحجز الكنب زمان
والطيارة الوحيدة البكون فيها مضيف راكب شماعة وقبل فترة سمعنا انو قبضوا نشال فيها في رحلة داخلية
والطيارة الوحيدة البنزل مضيفيها للسوق الحر في الدول التانية يشتروا موبايلات وشاي ولبن بدره وكريمات الغريب البشتري الكريمات المضيفين الرجال
والله كان قعدت احكي ليك محن سودانير يضيع البوست دا على صاحبه وينحرف
بالنسبة لفلاي دبي طاردت موظفين خدمة العملاء وهددت موظفة بعد ما اخدت اسمها وقلت ليها حااجي عندكم واشتكيك انت زاتك واقول ما اتعاونت معاي ادتني ميل رسلت ليهم شكوي مليان وبي اسبابه وما جاني رد اتصلت عليهم قلت ليهم ردو علي وعدوني لي هسع مافي حاجه جات
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: عبدالعزيز حسين عبدالرحيم)
|
| Quote: لاني جيتها هارب من عمايل سودانير |
والله دي كان معاها 40 جلده للراكب - أخير من سودانير بي مراحل ،،
يا اخوي بكره تتعودوا عليها زي ما ناس السعودية إتعودوا على
البحرينية والعربية !
ـــــــــ
هـــســـع دي غُُــــربة ؟؟
الغُربة ما حلوه كدا !!
الغُربة بقت كُلها ( الرخيص - الرخيص - ،،، )
هشام
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: Hisham Ibrahim)
|
تحياتي أخ عبدون
زي ما ذكروا الأخوان فوق رغماً عن سوء طيران دبي ببقى أحسن من سودانير بس لمن تسافر المرة الجاية حاول ظبط حاجاتك من بدري مواعيد وشحن وخلافه ، اما سودانير بعد كدة المقاطعة ثم المقاطعة ما لم يراعوا الله فينا ، ياخي سعر التذكرة جدة الخرطوم جدة أحياناً أغلى من جدة كوالا لمبور جدة !!!
أنصح مغتربي السعودية بطيران ناس أسعار ممتازة وتعامل جيد ودقة في المواعيد عشان سودانير تعرف في ظل وجود منافس ما حا ياكلوا عيش ..
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: بكري اسماعيل)
|
| Quote: وأحذر كل من يرغب في السفر بفلاي دبي الحذر والحذر |
اصلك ما تخليهم .. اعمل اي شيء يرجع حقوقك ..
عملته تذكرة لي اخوي من دبي للدوحة ..
قالوا ليهو لازم تذكرة عودة .. عمل تذكرة العوده في نفس الوقت ..
قالو ليهو صورة الفيذاء ما واضحة رسل فى نفس اللحظة للصورة الواضحه وصلتهم ..
قالوا ليهو لازم تدفع ضمان وانت طالع .. مع انه مقيم فى الامارات ..
المهم بعد المشاورات واللواقه دي كلها الميزان قفل ..
قالوا الميزان قفل و التذكره سقطت ..؟؟؟؟؟؟
اها ديل يعملوا ليهم شنو ...؟
والاسطاف بتاعهم حدث ولا حرج ..
غايتو اليوم داك لو ما كنت فى الدوام كنت بشتنته حالهم فى المطار ..
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: عفاف الصادق بابكر)
|
Quote: خامساً مواعيد الطيارة من الخرطوم غريبة جداً الساعة اتناشر وكل الناس بحصل ليهم لخبطة وبفتكروا انهم حايسافروا اليوم التاني يعني مثلاً انت مسافر يوم 16 حا تفتكر نفسك تمشي المطار يوم 16 الساعة 9 مساء عشان الاقلاع الساعة اتناشر لتكتشف انه طيارتك سافرت من امس وانو كان مفروض تجي المطار الساعة 9 يوم 15 بالليل وتسافر اول يوم 16
|
حلوه :)
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: celecon)
|
شكرا جزيلا لكل الاخوة والاخوات وانا فى انتظار اى من اخوانا القانونيين عشان نتفق على رفع دعوى انا اصلا ماناوى اخليهم وبعدها حأقوم انشر خبرهم فى الجرايد فى ابوظبى ودبى وكل مكان وفى الاندية السودانية ..
| |
|
|
|
|
|
|
|
|
 Re: رفع دعوى على شركة طيران فلاى دبى (Re: celecon)
|
** صديقى عابدون..
** مساءك خير..
## قبل رفع الدعوى او توجيه إنذار للشركه ,, يُرجى الإتصال بجريدة الإمارات اليوم ونشر شكواك فيها ,, بالكتير بعد ساعتين من صدور الجريده بتلقى مُدير الشركه والموظفين الماعايزين يردوا عليك عندك فى أبوظبى ,, وهاك ياإعتذارات ,, وشو بِدك ,, وتكرم عينك ,, وليش سرت جريدة الإمارات لو دقيت علينا كنا حلينا الموضوع ..
## هل مُعاملة موظفى فلاى دبى المُستفزه للمسافرين قاصره على رحلة الخرطوم فقط أم كل الرحلات؟؟؟
## بعض المسافريين السودانيين فى حاجه لمعرفة كيفية أُتكيت السفر ؟؟ وكيف يتعاملون مع موظفى خطوط الطيران فى الكاونترات؟؟
## مانشاهده من سلوك لبعض الرُكاب السودانيين فى المطارت أمر يُندى له الجبين ويجعلك تنزوى خجلاً !!!
[green]** عابدون نفذ فكرتى الفوق دى ,, وشوف النتيجه .. (عشان نقلل ليك رسوم المحاكم والاتعاب والمصاريف)
(ودام الود بيننا)
(ابو محمد فؤاد)
| |
|
|
|
|
|
|
|
|
Re: رفع دعوى على شركة طيران فلاى دبى (Re: عابدون محمد عابدون)
|
Quote: بعض المسافريين السودانيين فى حاجه لمعرفة كيفية أُتكيت السفر ؟؟ وكيف يتعاملون مع موظفى خطوط الطيران فى الكاونترات؟؟
## مانشاهده من سلوك لبعض الرُكاب السودانيين فى المطارت أمر يُندى له الجبين ويجعلك تنزوى خجلاً !!! |
يديك العافية يا عبدالكريم لصاحب البوست تحياتي
وانا اعمل بالقرب من صالات تيرمنال 2 اشاهد العجب فى رحلة الخرطوم
الواحد فيهم شايل 5 او 6 حقائب ودافع لحقيبة او حقيبتين
الاخ عابدون الطيران الاقتصادى له شروط يجب علينا معرفتها بدقة
الشركات دى بتعمل بنظام تقليل كلفة التشغيل لذلك تجد عدد الموظفين اقل
والخدمة المعتادة فى مجال الطيران اقل بكثير من ماهو عليه بالشركات الاخرى
سعر التذكرة الان بفلاى دبي ( دبي الخرطوم دبي ) فى حدود ال 200 دولار وده مبلغ بسيط
بالنسبة لطول الرحلة والوقود وحساب تكلفة تشغيل الطائرة والخدمة ورسوم المطارات
لذلك دائما هناك شكاوى من المتعاملين مع الشركات التى تعمل بهذا النظام
فلاى دبي طيران العربية انديان اكسبريس طيران الجزيرة البحرينية وما اكثرهم
على العموم يمكنك ان تبعث بشكواك على ايميلى وسوف اقوم بتوصيلها للمدير مباشرة
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: عصام علي أحمد)
|
سعر التذكرة الان بفلاى دبي ( دبي الخرطوم دبي ) فى حدود ال 200 دولار وده مبلغ بسيط
بالنسبة لطول الرحلة والوقود وحساب تكلفة تشغيل الطائرة والخدمة ورسوم المطارات
لذلك دائما هناك شكاوى من المتعاملين مع الشركات التى تعمل بهذا النظام
فلاى دبي طيران العربية انديان اكسبريس طيران الجزيرة البحرينية وما اكثرهم
على العموم يمكنك ان تبعث بشكواك على ايميلى وسوف اقوم بتوصيلها للمدير مباشرة
## الصديق ود على أحمد ..
## مساءك خير..
** عابدون ,, عصام دا مننا وفينا مع أنو من اولاد الإمتداد لكن جل وقته كان بالمزاد ,, أرسل له الشكوى وتابع مع جريدة الأمارات اليوم ..
** ياعصام
## والبرفع ليك الضغط وتكره السفر المُحاججه الفى الكاونتر وتعطيل الناس الوراهو ,, عشان كدا بيعاملوا الراكب السودانى بجلافه ,, بإعتبار كُل السودانيين عينه واحده ,, دا غير ناس بالله شيل لى الموبايلات دى واللاتوب دا وأختى أو اخوى بيقابلك فى مطار الخرطوم..
## عدم إحترام الراكب من مضار السفر الإقتصادى..
(ودام الود بيننا)
(ابو محمد فؤاد)
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: عبدالكريم أحمد الامين)
|
الأخ الفاضل عبد العزيز
أسمح لي بالتعقيب على بعض ملاحظاتك
| Quote: خدعونا بالفكرة الطيبة الماخدنها عن طيران الإمارات وكنا قايلنها حا تكون في نفس مستواها |
لم تقل فلاي دبي أنها مثل طيران الإمارات بل ولم تلمح مجرد تلميح إلى أي صلة تربطها بطيران الإمارات، وبالتالي لا أدري من خدعك تحديداً
| Quote: شروط العقد عندهم ما واضحه لانها بتصلك في الميل والموقع ما موضح فيه شيئ يعني مفروض تكون شروطهم واضحة مثلاً في حالة تراجعك عن السفر مابرجعو ليك قروشك كاملة ولا كاش بل كوبونات تستخدمها في شراء تذاكر من عندهم ولمدة محددة |
الشروط واضحة للغاية وكل ما ذكرته موجود في تلك الشروط ولكن جرت العادة أن لا يقرأ الناس تلك الشروط بل يضغطوا تلقائياً على زر القبول بها. كما استغرب "استغرابك" من وصول الشروط بالبريد الإلكتروني. هذا النظام معمول به في معظم شركات الطيران الاقتصادي والغرض منه هو تسهيل الإجراءات وتبسيطها للحد البعيد بالاستفادة من التطور التكنولوجي. هل كنت تتوقع وصول الشروط بالبريد العادي أم كنت تحبذ إصدار تذكرة ورقية بالطريقة القديمة مكتوب فيها نفس الشروط وهو أمر يتطلب منك الذهاب بنفسك لمكتب الحجز والانتظار في صف طويل ريثما يأتي دورك من أجل إنهاء الإجراءات الورقية. بدلاً عن ذلك، يمكنك القيام بهذا الإجراء من مكانك وبمجرد كبسة زر
| Quote: اكتشفت انه الموظف نقص حقيبة من ما كنت حاجز ولمن طلبت حقيبة إضافية رفض مما اضطرني لتحويل حجزي لليوم التالي ودفع مبلغ 100 درهم وتحويل حجزي وتحويل حجزي لليوم المقرر فيه السفر ودفع مبلغ 100 مع قيمة الحقيبة الإضافية |
خطأ يقع الكثير منا فيه نتيجة للجهل بالإجراءات (وهو ليس عيباً بالمناسبة). عليك أن تطلب الحقيبة الإضافية عند قيامك بإجراءات الحجز الإلكتروني. النظام الإلكتروني ليس بشر وموظف الكاونتر يتعامل مع المعطيات التي أمامه والتي وضعتها أنت بمحض رغبتك واختيارك عند شرائد للتذكرة عبر الإنترنت
| Quote: مطار دبي الثاني زي الطين زحمه وعدم أنضباط وسافرت عشرات المرات بمطار دبي الاول وما كنت اعتقد انه مطار دبي التاني بالسؤ دا |
سبحان الله. هل يحق لنا التعليق على حالة مطار مثل المبنى رقم 2 وحال مطارنا يغني عن أي سؤال؟ الزحمة يا سيدي سببها الطلب الكبير والعدد الكبير لشركات الطيران التي تستخدم ذلك المطار، وهي دليل على النجاح وليس على الفشل. ومع ذلك، ما هو الشيئ السيئ بالمبنى رقم 2 والذي تتوفر فيه جميع المرافق والتسهيلات من أسواق حرة ومقاه ومطاعم ومصارف وأماكن انتظار للمسافرين وطاقم كفء لخدمة العملاء يجيب على أي استفسار وعناصر أمنية تتميز بالتهذيب والتعامل الراقي. وفي النهاية، المبنى رقم 2 مخصص لشركات الطيران الاقتصادي والتي لا يحفل المسافرين على متنها بالرفاهية الفائقة بل أن غرضهم الأساسي هو الوصول لوجهاتهم بأقل التكاليف. من نحن حتى ننتقد؟
| Quote: وطاقم الخدمة في الطائرة كله عجم ومافيه شخص بعرف عربي |
أنت كمسافر لا تحتاج للحديث مع الطاقم. في العادة يكون هناك أحد أفراد الطاقم الذي يجيد لغة بلد الوجهة، وإلا فكيف تتلقى التنويهات أثناء الرحلة وإعلانات الإقلاع والوصول وتعليمات السلامة داخل الطائرة باللغة العربية؟
| Quote: خامساً مواعيد الطيارة من الخرطوم غريبة جداً الساعة اتناشر وكل الناس بحصل ليهم لخبطة وبفتكروا انهم حايسافروا اليوم التاني يعني مثلاً انت مسافر يوم 16 حا تفتكر نفسك تمشي المطار يوم 16 الساعة 9 مساء عشان الاقلاع الساعة اتناشر لتكتشف انه طيارتك سافرت من امس وانو كان مفروض تجي المطار الساعة 9 يوم 15 بالليل وتسافر اول يوم 16 |
لا تعليق.
| Quote: برضه مشكلة في السودان لانه الدفع عن طريق الفيز كارد موقوف نهائي |
هل هذه مشكلة شركات الطيران أم مشكلة الدولة التي آثرت أن تختار طريق التخلف وعدم الالتحاق بركب التطور الذي عم العالم.
وأخيراً نصيحة صغيرة يا أخي: هذا النوع من الشركات يسمى بالطيران الاقتصادي ومن اسمه تستطيع أن تميز أنك لن تحصل على الرفاهية المتوفرة في شركات الطيران العادية (مثل طيران الإمارات). وإذا ما رغبت في خدمات أفضل عليك أن تدفع أكثر
مع خالص أمنياتي برحلة سعيدة في السفرية القادمة
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: عبدالعزيز حسين عبدالرحيم)
|
سلام
المشكلة غالبا ما في فلاي دبي المشلكة غالبا وليس دائما فينا الواحد شايل عشرة شنط وعاوز يحاجج. انا شخصيا سافرت بفلاي دبي 3 مرات ومعاي سبعة كيلو جاريهم في شنطة زيارات سريعة يومين او ثلاثة ايام دقة في المواعيد لدرجة تقدر تخطط لويك اند بكل سهولة
مشكلة فلاي دبي ممكن تكون انها بتصل الدغش ووردية الليل في مطار الخرطوم بيكونو دابهم صاحين لتكتمل كآبة منظر مطار الخرطوم الذي قيل عنه انه دولي
معزتي
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: Dr.Mohammed Ali Elmusharaf)
|
Quote: برضه يا أخي شكراً على النصيحة وياريت يستفيد منها زول مابعرف المعلومة دي لكن بالنسبة لي أحب اوضح ليك خبرتي في السفر طويلة وكبيرة وسافرت على اغلب شركات الطيران العاملة في الشرق الاوسط وكنت من اول ركاب طيران العربية واول ركاب طيران البحرين وجربت شركات طيران كتيرة وعارف الطيران الاقتصادي وعارف مميزاته وعارف حقوقي ووالواجبات المفروض تقدمها لي الشركة مش كمان عشان انا راكب طيران اقتصادي الشركة تقصر اسكت وانا لي الخيار اختار الشركة البتعجبني واسافر بيها ودي حريتي وبرضه اتكلم واطالب وانتقد لمن تنتقص حقوقي او يحصل تقصير من الشركة
وياريت صاحب الموضوع يشرح لينا مشكلته شنو هنا
|
شكرا على الرد المطول اخى عبد العزيز اما عن مشكلتى والله الحكاية بسيطة فى انو قررت اجيب اولادى محمد والمعتز عشان يقضوا معاى اخر شهر من اجازتهم فى ابوظبى ، اها ياسيدى انا بى جاى وامهم بى هناك مرينا بكل الالام المترتبة عشان فى النهاية اقوم ارسل ليهم تذاكر فى تاريخ 19 / 5 لكن زى ماقال واحد من الاخوان فوق انو السفرية كانت قبلها بى يوم يعنى يوم 18 / 5 .. طيب دى معليش غلطتنا وقلنا نقوم نعمل تذاكر جديدة فى نفس اليوم 19/5 عشان يسافروا بالليل الساعة 30-00 اها قمت اتصلت على ناس فلاى دبى وين مكتبكم عشان امشى اعمل حجز وادفع القروش قالوا ماعندنا مكتب ولما كان السفر فى نفس اليوم واحدة منهم فى التلفون قالت اعمل ليهم حجز اونلاين بالكريديت كارد ورسل ليهم صورة من الكريديت كارد فى السودان مع التذاكر وقوم يامؤمن يامصدق عملت نفس الكلام والاولاد جوا المطار وقام مندوب الشركة فى مطار الخرطوم منعهم من السفر بحجة انو التذاكر مستخرجة عن طريق كريديت كارد والكلام دا قالوا ممنوع وفعلا فى الشروط عندهم ممنوع لكن المشكلة انو انا اتصلت عليهم وقالوا اعمل كدة من ابوظبى والشىء التانى انو المعاملة اكتملت وتم سحب المبلغ من حسابى واستلمت التذاكر يعنى اصبحت التذاكر ملكى طالما قيمتها تم دفعها وبعدها اتصلت على فلاى دبى عدة مرات للرد عن سبب منع اولادى من السفر فوعدوا بعمل تحقيق فى الموضوع والرجوع بعد تلاتة ايام لكن مرت قرابة الثلاثة اسابيع ولم اجد اى رد واتصلت عدة مرات عشان آخد رقم اى مسؤول او مدير لكن موظف خدمة العملاء اللى بيرد التلفونات رفض رفضا قاطعا انو يدينى تلفون اى شخص مسؤول .. طيب وين مكتب المدير عشان اقابله شخصيا .. برضو ممنوع .. طيب وين مكاتبكم .. برضو ممنوع يعنى باختصار رفضوا اى نوع من انواع التعاون .
ولدى محمد كان جايب معاهو تقارير طبية لاجراء عملية لازالة اللوزتين لأنو فى الفترة الاخيرة بقت تسبب ليهو مشاكل كتيرة فى رجله ومفاصله وقلنا بالمرة يعمل العملية فى الاجازة ومنها يقضوا اجازتهم فى ابوظبى .
عايز اقول انو عدم معرفة السودانيين بانظمة الطيران الاقتصادى ياجماعة عدم المعرفة موش شىء غلط لكن الغلط الاستخفاف بالناس ومعاملتهم معاملة موش كويسة
| |
|
|
|
|
|
|
|
|
 Re: رفع دعوى على شركة طيران فلاى دبى (Re: عابدون محمد عابدون)
|
| Quote: عايز اقول انو عدم معرفة السودانيين بانظمة الطيران الاقتصادى ياجماعة عدم المعرفة موش شىء غلط لكن الغلط الاستخفاف بالناس ومعاملتهم معاملة موش كويسة |
** عابدون.
** عشان كده كان هذا التساؤل:-
## هل مُعاملة موظفى فلاى دبى المُستفزه للمسافرين قاصره على رحلة الخرطوم فقط أم كل الرحلات؟؟؟
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: عبدالكريم أحمد الامين)
|
عبد الكريم صبحك الله بالخير ..
اعتقد انو معاملة موظفى فلاى دبى تنطبق على كل الرحلات وموش رحلات الخرطوم بس والسبب قد يعود الى عدم تدريب الموظفين تدريبا مهنيا يؤهلهم للقيام بمثل هذا النوع من العمل .. اضافة طبعا الى افكار البشر المسبقة عن غيرهم من الناس واعنى بذلك ان بعض الناس واذا ضربنا مثلا نقول انو المصرى بيعتقد انو فى موضع احسن من الجنسية الفلانية مثلا وبالتالى تنعكس فى معاملته حسب مايحمله عنه من افكار .. طبعا مثل هذه الافكار السلبية تنتهى بمجرد ان يكون الانسان يتعامل بمهنية وحرفية مع وظيفته ومع الناس الذين يقدم لهم الخدمات الامر الذى اعتقد انه غير متوفر فى مثل هؤلاء الموظفين الذين اعتقد انهم لايمتازون بالمهنية اللازمة والتدريب وذلك واضح من اسلوب معاملتهم ومخاطبتهم وافرق هنا فى اسلوب المخاطبة التى تمتاز بالمهنية والحرفية والتى تؤدى فى النهاية لانجاز عمل يرضى عنه كلا الطرفين وبين اسلوب المخاطبة المهذب ولكن لايؤدى الى شىء فى النهاية ..
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: عابدون محمد عابدون)
|
الأخ الفاضل عبد العزيز
Quote: يا سيد شايف تعقيبك زي البتدافع عن شركة فلاي دبي وياريت توضح لينا هل هناك سبب يخليك تدافع عن الشركة دي
أو كلامنا ما عجبك وحبيت توضح
أوبتعقب ساي كدا وبسالك هل سافرت على فلاي دبي ؟ |
ليس هناك سبب محدد يجعلني أدافع عن فلاي دبي سوى أنها شركة ولدت بأسنانها وأتوقع لها نجاحاً باهراً في عالم الطيران الاقتصادي خاصة بعد التوسعات التي أعلنتها مؤخراً وهي تحتفل بالذكرى الأولى لتأسيسها. بالطبع سافرت على فلاي دبي عدة مرات وفي المرة الأولى حملت حقيبة إضافية بدون أن ألاحظ أنني لم اختار ذلك أثناء تعبئة البيانات على الإنترنت، ولكني تعاملت مع الأمر باعتبار أنه خطأ مني وتحملت بكل طيب خاطر تبعات ذلك. أما في المطار، فلم تواجهني مطلقاً صعوبات في معرفة رقم الكاونتر الذي توجب على التوجه إليه لإكمال إجراءات السفر ولا رقم البوابة الذي انطلقت منه نحو الطائرة الرابضة، خاصة وأن التذكرة التي طبعتها تحمل الشيفرة المقروءة بالماسحات الضوئية أما ما يعرف بالباركود والتي تختصر الكثير من الوقت والجهد، ولذلك استغربت حديثك عن تلك الصعوبات.
لاحظت أيضاً تركيزك على عامل اللغة وأثره في إرباك المسافرين. لا أود بالطبع أن أتحدث عن تغول اللغة الإنجليزية وهيمنتها على اللغة العربية في دبي (وفي الكثير من الدول العربية وبقية دول العالم) فهذا شأن مختلف، ولكن اللغة لا تشكل ذلك العائق الكبير للمسافر. وبما أنك شخص كثير الأسفار كما أوضحت، فلا بد أنك مررت كثيراً بمطارات دول لا تتحدث العربية أو حتى الإنجليزية، فكيف تصرفت؟
قبل أن استرسل في ردي على ملاحظاتك الأخرى أود أن أؤكد على حقك في انتقاد فلاي دبي وانتقاد قطاع الطيران الاقتصادي بشكل عام وعلى احترامي الشديد لكافة ملاحظاتك وسعيي الشخصي للاستفادة منها مستقبلاً.
سوف أعود مجدداً للتعقيب على بقية ملاحظاتك وملاحظات الأخ العزيز عابدون، شاكراً لكم سعة صدركم ولغة الحوار الراقية.
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: عابدون محمد عابدون)
|
Things you need to know
About your booking
It includes the cost of your seat, all taxes, a 10 kg hand baggage allowance and any optional extras purchased.
It’s bound by flydubai’s fare rules, terms and conditions and conditions of carriage.
You’ll receive your confirmation once you’ve paid for your booking.
Don’t forget, you can view and re-print your confirmation at flydubai.com.
About arriving at the airport
You’ll need to present this confirmation together with the documents required for your journey and acceptance at your final destination.
If you’re under 16, you’ll need to be accompanied by an adult. The under 16 and adult must be travelling together with the same booking reference.
If you don’t have baggage to check-in, you can proceed directly to the hand baggage desk.
About hand baggage
Each passenger can take a single piece of hand baggage weighing up to 10 kg on board without charge. It must not measure more than 56 cm x 45 cm x 25 cm.
If you buy duty free, it must fit into your hand baggage and still weigh less than 10 kg.
If your hand baggage is too big or too heavy, it’ll be checked into the aircraft hold at a cost of AED 150 for the first piece and AED 500 for each additional piece.
About checked baggage
Bags can be checked-in from 3 hours to 60 minutes before you depart. If your baggage isn’t checked-in more than 60 minutes before take-off, you’ll not be allowed to take it.
If you have not pre-purchased checked baggage, subject to availability, you’ll be charged AED 150 for the first bag you want to check-in and AED 500 for each additional bag.
Each piece of checked baggage can weigh up to 32 kg but not measure more than 90 cm x 75 cm x 43 cm.
Checked baggage can be pre-purchased at a discount up to 4 hours before you depart at flydubai.com or through the call centre.
About arriving on time
You must be at the airport 3 hours before the scheduled departure.
The flydubai hand baggage desk and the flydubai bag drop desk both close 60 minutes before departure.
Don’t forget, it can take up to 30 minutes to pass through immigration and security.
And you must be at the departure gate no later than 45 minutes before take-off.
If you’re late, flydubai cannot allow you to travel and no alternative travel or refund will be offered.
About changing your mind
You can amend your booking up to 24 hours before you depart.
If you have a ‘pay to change’ fare, you can change your booking for a fee of AED 100 per person, per flight, plus any difference in fare.
If you selected a ‘free to change’ fare, you’ll only be charged for any difference in fare.
You can cancel your booking up to 24 hours before you depart.
The cancellation fee is AED 100 per person, per flight. The balance will be paid to you as a flydubai voucher.
You can amend or cancel your booking less than 24 hours before you depart, but the cancellation or change fee is 100% of the money paid to flydubai.
About group fares
If you're booked as part of a group, you need to check to find out from the group organiser how your fare works. It may be different from the way our fares usually work.
About credit card payments
If you paid with your credit card, flydubai will ask to see this card.
If your booking was paid for with someone else’s credit card, flydubai will ask to see a photocopy of the front of the card and the cardholder’s passport.
If the card or photocopies cannot be produced at the airport, you will not be allowed to travel and no refund will be offered.
Please note that a credit card cannot be used to pay on behalf of someone else for travel to or from Sudan or Nepal.
دى الشروط المرفقة مع التذكرة والتى عادة مانتجاهلها
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: عابدون محمد عابدون)
|
شكراً أخي عابدون
والحمد لله أنك جيت أكدت نفس المشاكل الأنا ذكرتها وبالمناسبة مرات علي أكتر من حالة لعدد كتير من المعارف حاولوا السفر عن طريق فلاي دبي اتعرضوا للمشاكل دي وأظن النسبة في تعرض ليها كبيرة والشركة ما تحركت حتى الأن لحل المشاكل
| Quote: ولما كان السفر فى نفس اليوم واحدة منهم فى التلفون قالت اعمل ليهم حجز اونلاين بالكريديت كارد ورسل ليهم صورة من الكريديت كارد فى السودان مع التذاكر وقوم يامؤمن يامصدق عملت نفس الكلام والاولاد جوا المطار وقام مندوب الشركة فى مطار الخرطوم منعهم من السفر بحجة انو التذاكر مستخرجة عن طريق كريديت كارد والكلام دا قالوا ممنوع وفعلا فى الشروط عندهم ممنوع لكن المشكلة انو انا اتصلت عليهم وقالوا اعمل كدة من ابوظبى والشىء التانى انو المعاملة اكتملت وتم سحب المبلغ من حسابى واستلمت التذاكر يعنى اصبحت التذاكر ملكى طالما قيمتها تم دفعها وبعدها اتصلت على فلاى دبى |
يا أخ عابدون بالنسبة لي ناس دبي ما أظن ممنوع بس بشترطوا عليك في حالة أنه التذاكر مشتراه بواسطة الفيزا كارد أحضار صور للفيزا بالإضافة لأثبات لصاحب البطاقة والحال بمشي وأنا أشتريت تذاكر لقرايبي بالفيزا حقتي وسافروا عادي ورجعوا وحتى ماطلبوا مننا صور للفيزا ولا أثباتات
لكن المشكلة في السودان وناس فلاي دبي في الخرطوم وكيل وأظن واحدة من شركات النفيدي والله العالم وهذا حسب ظنون فقط وليس لدي ما يثبت ولان هناك تعميم من بنك السودان ولا حاجة زي دي بخصوص التذاكر بالفيزا كارد الوكيل متمسك بالحاجة دي لكن برضه مسؤولية الوكيل مفترض يحل المشكلة دي لانو برضه من مسؤولياته
وأظن أنه ناس دبي حايقولو ليك دي ما مشكلتنا نحنا ما عندنا مشكلة المشكله عندكم في السودان
حسبنا الله ونعم الوكيل في من ظلمنا كلنا يعني أنا لو عندي فيزا كارد وعاوز اسرق بيها حا اشتري بيها تذاكر سفر وأجيب صورها وأثباتات كمان
بعدين الموظفين ديل لو عاينو حا يلقو المسافرين اولادك واساميهم على جوازات السفر واسمك على الفيزا كارد يعني ابوهم مشتري ليهم التذاكر
بعدين ناس السودان ولا الوكيل ولا بنك السودان هم زاتهم مالهم ومال الشغلانه دي زول تذكرته جات من بره ومحجوز ليه من بره السودان وأسمه نازل في النظام عندهم كمسافر وعليهم تكلمة إجراءاته ورسوم تذكرته مسددة خارج البلد هم مالهم وماله دا يعني هسع انا كان جبت ليهم عملية بتاعت نصب بالفيزا كارد حا يعملو شنو
بعدين يعني هسع الموظفين ديل استفادو شنو يعني غير الأذي والضرر للناس الحا يتسبب من نفور الناس من الشركة مما يؤدي لبوارها وخسارتهم
والطلع القرار ولا التعليمات بتاعت منع السفر دا مفروض يتحاكم لانه قرار غير قانوني ولا اخلاقي مفروض أي شخص عنده تذكرة يسافر في حالة في شكك في شيء يتخذ إجراء قانوني يعني الله أنا جيت ادفع ليك بي فيزا كارد يا تمشيني يا كان شكيت فيها تحجزها وتبلغ الشرطة
ياريت الأخ حسن بشير يجي ينصحنا هنا كمان نسوي شنو
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: عبدالعزيز حسين عبدالرحيم)
|
الأخ حسن بشير
أولا أشكرك على رد المهذب الجميل وليك التحية
| Quote: ليس هناك سبب محدد يجعلني أدافع عن فلاي دبي سوى أنها شركة ولدت بأسنانها وأتوقع لها نجاحاً باهراً في عالم الطيران الاقتصادي خاصة بعد التوسعات التي أعلنتها مؤخراً وهي تحتفل بالذكرى الأولى لتأسيسها. |
قد تكون شركة فلاي دبي ولدت باسنانهالضخامة راس المال للميزانية الكبيرة لتشغيلها لكن برضه رغم أنه كبر راس المال من اسباب نجاح المشاريع لكن يوازيه الإدارة الجيدة والإدارة ممكن تزيد في نجاح المشروع فوق ماهو متوقع ومخطط وممكن تتسبب في فشله وفي شركات الطيران الطيران تمثل الخدمات والمزايا البتقدمها الشركات جزء من خطط إدارة الشركة للنجاح وفي حمى التنافس الحالي بين شركات الطيران
بعد سفري سالني عدد من الأصدقاء عن السفر بفلاي دبي نصحتهم بالتوجة لشركات طيران اخرى وتسببت تجربتي السيئة في ابعاد عدد كبير من السفر عن طريق الشركة مما يعني خسارة للشركة على حسب المحاسبة الأقتصادية لأنو مفترض أنو اكون سبب في ارباح متوقعة
مثلا يعني فلاي دبي ممكن تخسر الاف الدراهم في الترويج لخط الخرطوم لكن المعلومة البوصلها الراكب المجرب أهم من الدعاية
مثال تاني برضه أنا نصحت خمسة اشخاص بعدم السفر بفلاي دبي وعابدون نصح خمسة اشخاص وشخص تاني نصح خمسة اشخاص في أبوظبي بعدم السفر بفلاي دبي لانو ما عندهم خدمات ترحيل من أبوظبي الخمسة ديل ممكن كل واحد منهم ينقل النصيحة لشخص واحد فقط شوف كمية الناس الكانو متوقع سفرهم على فلاي دبي
مفترض زي ما قلت ليك يكون أهم قسم في فلاي دبي هو مراقبة الجودة وتحسس المشاكل والعقبات بسرعة وتذليلها حتى لو أدت لخسارة من الشركة فالشركة تشتري عملاء بعملاء والراكب المرتاح يغنيك عن ملايين للدعاية وخصوصا زي ما قلت ليك هسع في حمى بالتنافس بين الشركات
في شركة صينية عندها موظفين سودانين بلفوا على السودانين في المكاتب يعرضوا ليهم السفر عن طريقها وبتقدم ليهم مميزات جميلة وعندهم بروشور فتشته مالقيته لو لقيته حا انزله ليك هنا
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: عابدون محمد عابدون)
|
الاخ عابدون ...انها فعلا معاناة وبالذات عندما ترتبط بالسفر والمواعيد واقدر زعلك ولكن الغريبة فى عدم ردهم واستخفافهم بالعقول وبالناس انا عن نفسى ليس لى تجربة بفلاى دبى ولكنى اصدقك لان كل شركات الطيران الجديدة تقع فى اخطاء مثيلة ولابد من التصدى لهم لكى ينصلح حالهم.
بعدين...ما فى اى مبرر عشان واحد يقول السودانيين ما بيعرفوا الاتيكيت وووووووووهلمجرا واذا سلمنا جدلا بذلك اين ثقافة الاخرين اى مقدمى الخدمة ..ياخى هناك مثل ضرب فى كيفية ارضاء العميل عندما توجه احدهم الى شركة اطارات ( سيارات) وصب جام غضبه عليهم لان احد الاطارات الجديدة اللى اشتراها طلعت بايظة وفوجى هذا الغاضب بان الشركة قامت بتركيب اطارات جديدة فى عربته ولكنه استدرك فيما بعد بان الشركة التى قصدها هى غير تلك التى اشترى منها الاطارات المرة الاولى ...!!
قبل ثلاثة اسابيع كان عندى سفرية عن طريق اربع مطارات وعدد 2 ناقل جوى وفى العودة اصر اللى فى الكاونتر على عشان اشحن الشنطة الوحيدة اللى فى ايدى مدعيا بان الوزن اكثر من 10 كيلو وقلت ليه هى نفس الشنطة اللى جيت بيها وما زاد وزنها بل قل وفوجئت لما قال لى اللى سمح ليك كان حمار وبس لقطت ليك الكلمة من خشمه وما خليت ليه حتة يقيف فيها ودخلت الطيارة فى قمة غضبى وطبعا الشنطة اتشحنت وطلبت اورنيك رضا المسافر وكتبت كلام يوجع طبعا المسئولة تشيل وتعتذر وفى اول يوم وصول لى جاءنى اعتذار كبير من ادارة الشركة الناقلة يعتذرون عن ما حدث لى .
اخى عابدون لو انت حاسى ولو بنسبة قليلة ان الفلاى دبى ما عاملتك كويس تقدم بشكواك ..
كن بخير
| |
|
|
|
|
|
|
|
|
|
Re: رفع دعوى على شركة طيران فلاى دبى (Re: عابدون محمد عابدون)
|
| Quote: Please note that a credit card cannot be used to pay on behalf of someone else for travel to or from Sudan or Nepal. |
أغرب شيء أنا دفعت رسوم تذكرة من الفيزا بتاعتي لأشخاص سافروا عادي وشفت ناس قاطعين تذاكر بي فيز بتاع ناس تانين وعادي سافروا
الشروط دي بتصل للشخص بعدما يقوم بالدفع بواسطة الميل يعني ما بتقراها إلا لمن تقطع التذكرة
طيب الموظفة بتاعت فلاي دبي القطعت لأخونا عابدون وقطعت لي التذاكر دي ما عارفه الشروط دي و من المفترض كان تنبهه وتوقف إجراء الدفع
بعدين الدخل السودان في الحكاية دي شنو إذا كان الدفع تم بره السودان لشركة أصلاً ما سودانية علاقة بين عميل وشركة طيران وإذا كان في ضرر حايكون لشركة الطيران حا تتخذ إجراءاتها مع الطرف التاني
| |
|
|
|
|
|
|
| |
عابدون محمد عابدون
Faisal Elrasheed
Hisham Ibrahim
عفاف الصادق بابكر
عبدالكريم أحمد الامين
عصام علي أحمد
مزمل خيرى
hassan bashir
حامد محمد حامد
فيس بوك
تويتر
انستقرام
يوتيوب
بنتيريست