|
|
 حنان سكليب!!
|
ملاح قرع وبامية مفروكة وكسرة وصحن سلطة و(ملاحة) ... ده كان الأكل فى بيوت البكا قبل أن يصبح (البكاء ذاتو) مظهر إجتماعى ونوع من أنواع (الفشخرة) بعد أن اجتاحت البلد أعداد مهولة من (المليارديرات الجدد) أصبحت تؤثر سلوكياً على بقية الطبقات الأخرى حتى صارت (الفاتحة) هى الفرق الوحيد بين الأتراح والأفراح!
عندما توفى رجل الأعمال (حسن يورو) قامت أسرته بفتح أبواب (الفيلا) الفاخرة لأفواج المعزين علاوة على (صيوان) ضخم نصب بطول الشارع العريض مزود بعدد مهول من مكيفات الهواء تغطى أرضيته (السجاد) لزوم (عدم الغبار وكده)!
عند موعد الغداء انتشر أفراد يرتدون زياً موحداً يحملون (صوانى الأكل) النيكل الناصعة التى ترتاح بداخلها أطباق المشويات والمحمرات والمقبلات وقطع الرغيف الفاخر بينما وضعت امام كل صينية عدد من زجاجات المياه المعدنية البااااردة!
فى صالون النساء جلست سوسو (فى الأصل ست البنات قبل أن يصبح حسن يورو رجل أعمال) جلست على سرير خشبى مستورد عليه ملاية قطيفة تتلقى التعازى من جاراتها وصويحباتها اللواتى جئن وهن فى كامل زينتهن (ناقشات) الحنة الما خمج يرتدين ثياب (الشيفون) المطرزة والشباشب ذات الكعب (البلية) تمتلئ أياديهن ورقابهن بآخر صيحات سوق الدهب فى (دبى) وبقية العواصم الخليجية!
- كلمتى (عوضية ردحى)؟
همست (سوسو) لجارتها وصديقتها (نوسة) والتى مالت قريبا منها وهى تجيبها:
- والله (عوضية ردحى) دى قالو عندها مناسبت بكاء فى (مدنى) سافرت مشت ليها، قمت مشيت لى (هاجر حى ووب) قالو ليا عندها إرتباط خارجى فى (دبى) فى واحد من ناس الجالية مات هناك أها فى الأخير مشيت كلمت ليكى (حنان سكليب) لقينا ما عندها ارتباط ووقعت العقد مع مدير أعمالا! وأديتو مليون عربون مقدم.
- وشالت منك البيانات!
- أديتا ليها كووولها.. المرحوم كان شغال شنو؟ وعندو كم عمارة؟ وقاعد يتبرع لى ياتو (نادى) وإشترى ليهم كم (لاعب)؟ وعربيتو الراكبا نوعا شنو؟ وموبايلو الشايلو موديلو كم؟
انتهت مجموعات النساء من تناول طعام الغداء الفندقى (الما خمج) ثم جئن لهن بالتحلية (باسطة وبسبوسة وكنافة وعين جمل وأم على) شئ باللوز وشئ بالجوز وشئ يالما بعرفو شنو داااك وبعد أن (ضربن) بدأن فى زحزحة الكراسى (البامبو) والجلوس كيمان كيمان (للشمارات) وهن يمسكن بثرامس الشاى (المذهبة) المتشابهة (الكبيرة حقت الشاى والصغيرة للجبنة) التى تفوح من (فناجينها) رائحة (المستكا)..
وفجأة دخلت إلى الصالون شابة (آخر شياكة) ذات مظهر يطابق كثيرا مظهر مغنيات هذا الزمان يمشى خلفها ستة (شابات آخريات) من نفس الشاكلة يرتدين زياً موحداً وهن يرفعن أياديهن عاليا فى حركات متتابعة ويصحن بصوت كالجرس يشق عنان السماء:
ووووب ووووب
وووووووووووووووووووووووووووووووووووووووووووووووب..
ثم تبدأ (حنان سكليب) فى السكلى و(الوصف) وهن يرددن خلفها:
- ووووب عليا والله ليا يا حسن يوروو يا البتدى البتدورو والما بتدورو
يا الغمتتك احسن من علاوة اليورو
ووووب عليا والله يا صغير وجاهل يا البتجيب القروش بالساهل
يا ود امي.. هيء يء يء يء ..
الكورس : وووب ... وووب ...ووووووووب
الليله يا حليلك يا زين الرجال ياملك الدولار يا البتستر الحال
الليله يا حليلك يا البتشيل من البنوك وتشتت قبال ما يلحقوك
يا ود امي.. هيء يء يء يء ..
الكورس: وووب ... وووب ...ووووووووب
الليلة وينك إنتا يا الإسبليت هبوبك والهمر ركوبك
الليله وينك إنتا يا البنيت المقصورة وركبت النافورة
الليله وينك إنتا يا أب جيوب منفخة وأب عربية مصفحة
يا ود امي.. هيء يء يء يء ..
الكورس: وووب ... وووب ...ووووووووب
يا حليلك الليله يا البتفك الصعيبة ويا البتسجل اللعيبة
يا حليلك الليله يا جوكى البنوك يا التهريبك بالسنبوك
يا ود امي.. هيء يء يء يء ..
الكورس: وووب ... وووب ...ووووووووب
ثم تعدل (حنان سكليب) توبا الشفون (الترانسبيرنت) الكان واقع وتنظر للكورس خلفها نظرة الفنان الذى يود أن (يختم) الأغنية فيبدأن فى (تحرير) البكاء ويرفعن أصواتهن ويضربن بأياديهن ليبدين زينتهن (دهب دبى وكده) ... ووووووووووووب وب وب وب ووووووووب ثم يتوقفن فى لحظة واحدة بإشارة من (حنان سكليب)! التى تجلس على أقرب كرسى وتتناول علبة مناديل الورق وتخرج منديلين تمسح بهما حبات العرق التى تساقطت بفعل المجهود رغم برودة التكييف ثم تلتفت إلى النسوة اللواتى كن فى الصالون يتابعون (فاصل السكليب) قائلة:
- قبلكن وحدكن.. جنس بخلن عليكن .. أول مرة أمشى ليا (بيت بكا) ما ينقطوا ليا فيهو
|
|
 
|
|
|
|
|
|
|
|
Re: حنان سكليب!! (Re: جعفر محي الدين)
|
Quote: | Quote: والحق الأدبي بتاع سيد المقال دا يا عمكـ؟ |
يا ودالصايم الراجل مشغول لو كان أم العروس كنا نقول.. موعدنا الخميس في السفارة ..
| |
|
|
|
|
|
|
|
|
Re: حنان سكليب!! (Re: محي الدين الريس)
|
ود الباوقة ابو العروس سلامات
والله غايتو العريس وقع ما سمى
نسيب من النوع الصاح ، لساااااان لسان .
ما بقدروا عليك الا ناس سيخة ديل !
بالمناسبة المقال دا قدييم واتكتب تريقة فى
مناسبة لزول من الجماعة شكلو ،، انت بس تلفح سااااى .
وكاتب المقال على ما اعتقد الكاتب الساخر عضو البورد
يوسف جبرا .. والله اعلم
| |
|
|
|
|
|
|
|
|
 Re: حنان سكليب!! (Re: دينا خالد)
|
سلام دينا طبعا و د الباوقة معروف شكارة وهو مشهور بشكر
التيوس و دائما يختار التيس أبو ريحة عفنة
لكن المرة دى عايز يورى انو اديب بفهم فى الادبيات و كل الحاجات المذكورة التى تعبر عن الحالة
المتازة لهذه الاسرة الكتاب يقصد بها الاسر الجبهجية التى اصبحت غنية بين عشية و ضحاها
| |
|
|
|
|
|
|
|
|
|
Re: حنان سكليب!! (Re: دينا خالد)
|
Quote: انت بس تلفح سااااى .
وكاتب المقال على ما اعتقد الكاتب الساخر عضو البورد
يوسف جبرا .. والله اعلم |
| Quote: نسيب من النوع الصاح ، لساااااان لسان . |
قصدك لسان وسيخ ....
والله يادينا اللفح كعب يالحيل
لكن نسوي شنو اليومين ديل العيار عاير ...
مودتي .....
| |
|
|
|
|
|
|
|
|
|
Re: حنان سكليب!! (Re: ابو جهينة)
|
| Quote: الحالة إياها تحتاج حنان سكليب و بقية أفراد نقابتها المتغيبات في مدنى و دبي |
الله في .....
تسلم يا ريس ........
| |
|
|
|
|
|
|
|
|
 Re: حنان سكليب!! (Re: ABUHUSSEIN)
|
ود الباوقة الف مبروك
وربنا يسعد البنية .
ــــــــــــــــ
اها قبال ما أنسى انت فى البوست ((المخورن ))
قلت البلفح زى لفحيك دا بتسموهو منو ...........؟؟؟
| |
|
|
|
|
|
|
|
|
|
Re: حنان سكليب!! (Re: ود محجوب)
|
| Quote: بالطريقة دى يا ود الباوقة أنا ح أشتكى اى (أوكامبو) ... وإلا شنو يا دينا وود الصائم؟ |
استاذنا الفاتح لك العتبى حتى ترضى
ومقامك محفوظ .
مودتي
| |
|
|
|
|
|
|
|
|
 Re: حنان سكليب!! (Re: ود الباوقة)
|
يا ود الباوقة
انتو حتى الأعمال الأدبية
بقيتوا ((تخجوها))
ـــــــــــــــــــــــ
رأيك شنو نغير العنوان ل
((الباوقة لفحيب ))
| |
|
|
|
|
|
|
|
|
|
Re: حنان سكليب!! (Re: ود الباوقة)
|
Quote: رأيك شنو نغير العنوان ل
((الباوقة لفحيب )) |
اخي ود محجوب
تصدق انا جني وجن اللفحي ..
خلينا في المهم
العقد يوم الخميس معانا ...
اها قلت شنو............
| |
|
|
|
|
|
|
|
|
|
Re: حنان سكليب!! (Re: ود الباوقة)
|
Quote: العقد يوم الخميس معانا ...
اها قلت شنو............ |
شكرا لدعوتكم الكريمة
ياخى الخميس شغال
وان مش فى الرياض ((الأداك المعلومة ضللك ))
انا على بعد 450 كيلو من الرياض.
ـــــــــــــــــــــــــ
نصيحة اكتب لبكرى يسحب هذا البوست .
| |
|
|
|
|
|
|
|
|
|
Re: حنان سكليب!! (Re: Deng)
|
| Quote: أنا هسع أفتكرت ده أسم عسلية جديدة. |
اتاريك عسلنجي قديم يا دينق
وين غاتس
الايام دي عندكم ضرب نار .....
| |
|
|
|
|
|
|
|
|
|
Re: حنان سكليب!! (Re: ود الباوقة)
|
Quote:
Re: حنان سكليب!! (Re: Deng)
(عدل بواسطة ود الباوقة on 25-05-2010, 10:19
|
الظاهر بكرى تعب من الشليخ بقى بشوت طوااالى 
| |
|
|
|
|
|
|
|
|
|
Re: حنان سكليب!! (Re: الوليد الرشيد وراق)
|
ابو العروس
الحقوق الأدبية اصبحت مسألة هامة
اعمل حسابك
الاخ جبرا
| Quote: ياخى انا (العبد الفقير إلى الله ده) ... ياخى ما (تهملنى) ياااااخ !!! .. معقولة بس( بتاع النفايات) يهملنا .. والزول البجى (يشفط السايفون يهملنا) .. و(الزول البجى يرش الباعوض يهملنا).. والزول (البشيل الفسحه( فى المعمل) يهملنا .. بالطريقة دى يا ود الباوقة أنا ح أشتكى اى (أوكامبو) ... وإلا شنو يا دينا وود الصائم؟ |
بصراحة اختلف معك في هذه العبارات لبعدها عن الذوق
وتحياتي
| |
|
|
|
|
|
|
|
|
|
Re: حنان سكليب!! (Re: محمد عبد الماجد الصايم)
|
Quote: اخي ود محجوب
تصدق انا جني وجن اللفحي .. |
بلا حليفة انا مصدقك
<img border="0" src="http://www.sudaneseonline.com/cgi-bin/sdb/2bb.cgi?seq=post&board=290&msg=1274784526&rn=25">
| |
|
|
|
|
|
|
|
| |
محمد عبد الماجد الصايم
جعفر محي الدين
محي الدين الريس
دينا خالد
صديق مهدى على
ابو جهينة
الفاتح يوسف جبرا
ABUHUSSEIN
ود محجوب
Deng
الوليد الرشيد وراق
علي الكرار هاشم
فيس بوك
تويتر
انستقرام
يوتيوب
بنتيريست