|
|
 نادى اليسنما يقدم فيلم (عقل جميل) .
|
نادي السينما
بمركز الخاتم عدلان للإستنارة والتنمية البشرية
يقدم فيلم
A BEAUTIFUL MIND
عقـــل جميـــل
الفيلم الأمريكي عقل جميل، أُنتج في العام 2001 وهو عن قصة حياة جون فوربس ناش الحائز على جائزة نوبل في الإقتصاد، القصة تبدأ في السنوات الأولى من حياة ناش في جامعة برينستون حيث يُطور (فكرته الأصلية) والتي من شأنها أن تحدث ثورة في عالم الرياضيات. في بداية الفيلم، تبدأ حالة جنون العظمة وانفصام الشخصية عند ناش في الإزدياد ويتحمل سلسلة من الأوهام بينما يراقب بألم الخسارة والعبء التي تجلبه حالته لزوجته وأصدقائه.
الفيلم من إخراج رون هوارد، وقد حاز على أربعة جوائز أوسكار .
مدة الفيلم:135دقيقة.
الزمان: الخميس 20/5/2010م الساعة السابعة والنصف مساءً .
المكان: مقر المركز بالعمارات ش 57 من جهة شارع محمد نجيب جوار السفارة التشادية .
يعقب الفيلم نقاش .
مرحباً بكم .
|
|
 
|
|
|
|
|
|
|
|
Re: نادى اليسنما يقدم فيلم (عقل جميل) . (Re: حافظ كنجال)
|
فيلم أكثر من رائع ويستحق النقاش.
كنت قد كتبت عن هذا الفيلم فى بوست عن الفيلم والشخصية الحقيقية بروف.جون ناش:
فى الطب النفسى فى حاجة اسمها:
Paranoid Personality Disorder
وهؤلاء مرضى متشكيكين لدرجة عالية جدا فى الأناس الذين من حولهم..
الشك قد يكون تصرف طبيعى لكن ديل بيكونوا highly suspicious
مثلا موظف أو موظفة فى شركة مرموقة بتجيهوا أفكار بأنوا زملاء الموظفين ما بيحبوهوا وبتكلموا عنوا بسوء بعد ذهابه..
فيقوم يغير مكان العمل وفى نفس المكان الجديد يبدأ المسلسل..فيغير ويغير ويمكن أن يشتغل فى عشرة شركات فى سنة واحدة
بلا سبب مقنع سوى الشكوك التى تدور فى مخيلته...
وايضا:
Paranoid Schizophrenia
دة نوع من أنواع الشيزوفرينيا والمرضى بالنوع دة بيكون عندهم معتقدات وبيؤمنوا بحاجات
ما ليها صلة بأرض الواقع Delusions وبيسمعوا أصوات (هلوسة سماعية) ما موجودة أصلا Hallucinations
من المشاهير الذين اصيبوا بهذا المرض:
عالم الرياضيات الامريكى جون ناش...
جون نوش ظهرت عليه علامات المرض أثناء دراسته الجامعية...وبالرغم من توقفه عن تناول العلاج فلقد واصل دراسته..
إلى أن حصل على جائزة نوبل فى العام 1994...
قامت زوجته بتصوير فيلمa Beautiful Mind فى العام 2001
.....
...
----------
الكثير عن قصة الفيلم تجدونه فى هذا البوست:
John Nash
| |
|
|
|
|
|
|
|
|
|
Re: نادى اليسنما يقدم فيلم (عقل جميل) . (Re: humida)
|
اثناء بحثي عن حقوق الملكية الفكرية .. و حقوق الافلام و الاغاني ..
اتضح لي ان حتي النسخ التي تشتريها .. فقط للاستخدام الشخصي و لا يمكنك قانونيا نشرها مرة اخرى و لا عرضها في نشاط ..
..
..
اذا قام المركز بشراء نسخة و هو ما استبعده .. هل لديه الحق القانوني لعرضها ..
طبعا اذا كان المركز يهتم بحقوق الاخرين ..
| |
|
|
|
|
|
|
|
|
Re: نادى اليسنما يقدم فيلم (عقل جميل) . (Re: humida)
|
يا حميده ..
السودان ده كان عجنوهو كلو ما بلقو فيهو زول بفهم في الدراما عموما والافلام خصوصا ..
كمان دايرين ينظروا في راسل كرو ؟؟
انتو خلاص كملتوهو كلو دايرين تعملو فيها خبرا ؟؟
ممكن تتكلموا عن التمباك والفته والدافوري ...
| |
|
|
|
|
|
|
|
|
|
Re: نادى اليسنما يقدم فيلم (عقل جميل) . (Re: Faisal Elrasheed)
|
| Quote: اذا قام المركز بشراء نسخة و هو ما استبعده .. هل لديه الحق القانوني لعرضها .. |
يشترو شنو يا حميده ؟؟
انت قايلو شريط بتاع عقد الجلاد كمان ؟؟
الناس ديل بالطريقه دي حيودو المركز ده في داهيه ..
نفسي اعرف الزول المصنقر وعامل فيها محلل بتاع افلام ده منو ؟؟
| |
|
|
|
|
|
|
|
|
|
Re: نادى اليسنما يقدم فيلم (عقل جميل) . (Re: قصي مجدي سليم)
|
Quote: السـادة مركز الخاتم عدلان ..
كيف تحصلتم علي هذا الفيلم .. السؤال يأتي بعد واقعة فيلم آفاتار .. و الخطأ الذي وقعتم فيه ..
هل تأكدتم من مصدر الفيلم هذه المرة ..؟ |
طبعا لمن ناس المركز بتاع الخاتم إعتذروا ليكم المرة الفاتت انا كنت عارف انو الموضوع بجيب ليهو حكحكة زي دي.. وطبعا مافي زول اشتغل بي كلامي الفات القلتو وأصروا على عدم عرض الفلم.. وعلى العموم ده كلو الزول ممكن اتفهموا واتفهم ظروفوا رغم اني ثابت على ما كتبتو المرة الفاتت.
الاخ حميدة اراد ان يفتح الموضوع مرة أخرى.. وفي الحقيقة انا انبسطت خالص لي الفتح الجديد ده لأنو بتيح لي فرصة الت وأعجن تاني وانا بحب المماحكة خالص خالص :)
يا حميدة يا عزيزي المركز اشترى النسخة دي..
طيب نجي لي موضوعك التاني:
Quote: اثناء بحثي عن حقوق الملكية الفكرية .. و حقوق الافلام و الاغاني ..
اتضح لي ان حتي النسخ التي تشتريها .. فقط للاستخدام الشخصي و لا يمكنك قانونيا نشرها مرة اخرى و لا عرضها في نشاط .. |
لا يمكنك قانونيا:!!!!!
عليك الله خت لي تحتها خط كبير وجاوبني يا عزيزي الفاضل بتقصد شنو بي (قانونيا)..
وياتو قانون تحديدا.. القانون العام، القانون الخاص القانون السوداني القانون الأمريكي ولا القانون الدولي ولا العرف القانوني ولا ياتو قانون..
بعدين ياتو قانون بقول انو ماممكن أعرض شريط اشتريتو في نشاط؟!! يعني سواق الحافلة لمن اشغل وردي ده ما قانوني، ولا ناس المسرح لمن اشغلو محمد الأمين قبل الفاصل المسرحي ده ما قانوني؟!!
يا اخوانا اتقوا الله بالله
القانون بيمنع المتاااااجرة ما بيمنع التثقيف المجاني.. يعني زي التقول المركز بشيل قروش من الناس ولا بقطعهم تذاكر...
وبرضو عاوزين نعرف ياتو قانون ده؟!!!
مافي يا حميدة قانون في السودان بيمنع اني اعرض الفلم.. لأنو بي بساطة مافي شاكي.. مافي متضرر.. يعني راسل كرو وطاقم الفلم لو عرفو انو في مركز في السودان بعرض أعمالهم ممكن يجوا يشتكوا هنا وبعد كده تبدأ اجراءات الوقف.. لكن طال ما انهم ما جوا وما اشتكوا ببقى مافي جهة صاحبة ضرر (قانونيا) حسب قانون جمهورية السودان.. حسب القانون الجنائي لعام 1991 والقانون المدني السودانيين.
نجي للأخلاق..
انا شخصيا وزي ما قلت المرة الفاتت لو لقيت فلم بقروش معقولة في متناول يدي بشتريهو لكن اذا بقى أغلى من المعقول ما عندي أي مانع اني اعمل ليهو داون لوود من النت.. وأخلاق شنو البتخلي زول عندو مليارات وأغنى من كل أفراد شعبنا مجتمعين يمنعني اني أشاهد فلم!!!!!!!!!!
أخلاق شنو دي البتخلي زول يبيت جعان للمعرفة وجيرانوا شبعانييين معرفيا وبعد ده اقولوا ليهو ما تعاين.. زي ما قلت وتاني بقول مع الحيدر ابي الحسنين كرم الله وجهه عجبت لمن بات جائعا ولا يخرج شاهرا سيفه..
وعجبت لمن يريده أن يغمد سيفه.
| |
|
|
|
|
|
|
|
|
|
Re: نادى اليسنما يقدم فيلم (عقل جميل) . (Re: قصي مجدي سليم)
|
نجي لي الأستاذين كنجال وفيصل..
ويا اساتذة اولا التعميم من أكبر الأخطاء البتقع فيها البشرية.. يعني لا يعقل إطلاقا أن يصح هذا القول:
Quote: يا حميده ..
السودان ده كان عجنوهو كلو ما بلقو فيهو زول بفهم في الدراما عموما والافلام خصوصا .. |
ده نوع الكلام القالوا فيهو (ولا تلقوا بأايديكم الى التهلكة) لأنو بالطريقة دي أكيد ح(تصيبوا قوما بجهاالة) وببقى خير وزين اذا اصبحتم (على ما فعلتم نادمين).
يا فيصل اول حاجة انت ما بتعرف السودان كلو.. يعني انت ما بتعرفني انا ده، وما بتعرف مدى معرفتي بالدراما ولا مدى فهمي ليها.. انت ما بتعرف زول اسمو عبد الحفيظ على الله ولا زول اسمو خالد ميرغني مضوي ابو أطراف ولا بتعرف مدى عرفتنا للدراما.
الأخطر انت جملتك دي مفخخة وأول زول بتصيبوا انت ده.. هل كلامك ده بيعني انك بتفهم في الدراما شديييييد أكتر من الناس كلهم عشان كده بتقدر (وعلى افتراض انك بتعرف الاربعين مليون سوداني) تصنف منو البفهم ومنو الما بفهو وخلصت للخلصت ليهو.. ولا انت مع زمرة الناس اللو عجنوهم ما بطلعو شريط سنما نافع؟!!
لو كنت الأول فبختنا.. أو زي ما قال سيدي العبيد ود ريا (كان مهدي جيد لينا، وكان ما مهدي شن علينا)
اما لو كنت التاني فانت ما عندك حق تتكلم عن الناس كلهم منو البفهم ومنو الما بفهم عشان انت معاهم في الهوا سوا.
نجي لي الاستاذ كنجال الذي جمع بوثاق سحري بين الأستاذين الكبيرين الشيخ (توم) والشيخ (راسل) فصارا بقدرة قادر
| Quote: منو البناقش تجربة راسل كروز.... |
اها انا قلت ليك قبيل (انا).. المانع شنو؟!! ولا انت متفق مع اخونا الأستاذ فيصل المعجون معانا بطينة الجهالة وعدم العرفة فصنف (اربعين مليون) بالضغط السريع على جهاز كمبيوتر لا يتعدى الحفنة من الدولارات.
جنس كلامكم البتقولو فيهو ده
لكم محبتي
| |
|
|
|
|
|
|
|
|
|
Re: نادى اليسنما يقدم فيلم (عقل جميل) . (Re: محمد عبد الماجد الصايم)
|
انا ما بعرف الناس بيتشاكلوا في شنو لانو اصلا مافي معترك.. فيلم حيعرض مجاناً ولو علم بس سوداني واحد فكرة انو:
"تستطيع المجموعة ان تنجح اذا عمل كل فرد في المجموعة على نجاحه الخاص بما لا يتعارض مع نجاح المجموعه" إن صحت ترجمتها عن الفيلم موضوع العرض ده يكون شي عظيم
الأخوه المتداخلين يكفي انو الناس الشغالين ديل بحاولوا يقدموا حاجه للناس اياً كانت نواياهم ونحن قاعدين هنا وبنتكلم وبنظر في الواقع السوداني فمفروض نشكرهم بالجد وفي مداخلات بالجد بتشعرني انو اصحابه ما جربوا يعملوا أي عمل عام ويعرفوا صعوبتو في بلد أي زول عندو معاناتو اليوميه من أجل لقمة العيش.
الشعب السوداني ده ياخي ما شعب بجزموا فيه انو في حاجه بيعرفه زول واحد بس ودي بالجد فكره مضحكه. يمكن النقاش يكون في التطبيقات العلميه والعمليه لنظرية ناش .. باختصار انا ممكن اجي واتكلم عنها بطريقه علميه أفضل من عدد كبير من المتحدثين العالميين فهسي في زول عارفني أنا متخصص شنو ولا بقدر يقول إنوا أنا ما مؤهل لأني أتكلم عنها؟؟
التحيه ليكم ياخي ولي اي زول عندو نيه يقدم للشعب السوداني وبيستقطع من وقت أسرتو ولقمتها عشان يعمل شي.
| |
|
|
|
|
|
|
|
|
|
Re: نادى اليسنما يقدم فيلم (عقل جميل) . (Re: مدثر محمد عمر)
|
Quote: كتب الأخ:حافظ كنجال
قصي مجدي سليم
انت ماعندك كلية متخصص في النقد السينمائي في السودان كلو
الوحيد القادر انو يحلل فلم سينمائي في السودان هو وجدي كامل
على حسب معرفتي انا بيهو
واظن انت ما وجدي...
اذا انت قريت سينما من ورانا ادينا خبر منك نستفيد
ده مجمل القول...
اتفرج واتونس ودردش
وناقش في اطارك الشخصي
احنا ماوصفناك بالجهل حاشا ومن حق اي زول يتونس ويناقش
بس النقاش الغير علمي مابيضيف
راسل كرو انت كاتب اسمو فوق اضيف حرف الزاء سهوا ليس الا..
لكن ماتنقل لي معرفة انت اصلا ما مؤهل ليها...دي المعضلة
لك الود.. |
Quote: الوحيد القادر انو يحلل فلم سينمائي في السودان هو وجدي كامل
على حسب معرفتي انا بيهو |
| Quote: انت ماعندك كلية متخصص في النقد السينمائي في السودان كلو |
كدي نبدأ من الآخيرة دي ونجيك للفوق واحدة واحدة...
أولا يا عزيزي النقد السنمائي ما حكر على القرأ كلية متخصصة في النقد السنمائي فقط.. وكتير من نقاد السنما حول العالم هم ما خريجين كليات نقد تحديدا.. أكثر من هذا فهناك ممثلون سينمائيون لم يدرسوا في كليات السنما بل درسوا وعملوا بالمسرح فقط ولكنهم تفوقوا بأفلاهم بل وبكتابة القصص والسيناريو والحوار أمثال (سلفستر ستالون) الذي برع في كتابة فلمه العظيم (روكي).
الدراما عموما يمكن الحديث عنها كدراما، كما يمكن الحديث عن الفن كفن.. هذا دون اهمال خصوصية كل حقل فني عن الآخر، ودون إهمال للتفاصيل الدقيقة التي قد يلم بها السيد "وجدي كامل" كما يلم كل صاحب مهنة بدقائق مهنته... ولكن روح النقد في أمرين إثنين.. في الفكرة الدرامية وجودتها، وإلى أي مدى نجح الطاقم الدرامي في إبرازها ومعالجتها.. هذا هو جوهر النقد الدرامي بل والفني أيضا..
مرة ثانية تقع في نفس الخطأ وبذات الصورة السابقة.. لقد أجملت السودان كله في السيد "وجدي كامل" ومع احترامي للسيد وجدي، الا أن تصنيفك له (كشخص وحيد في بلقع أجدب) لم يقم على معرفتك بالبلقع الأجدب بل لمعرفتك به هو
Quote: الوحيد القادر انو يحلل فلم سينمائي في السودان هو وجدي كامل
على حسب معرفتي انا بيهو |
ولكن ليس على حسب معرفتك ب(أربعين مليون نسمة) اليس كذلك؟!!
نعم
ظنك صحيح.. أنا ما وجدي... انا واحد من أرعين مليون انت ما بتعرفهم ولحظهم السيئ كانت عدم عرفتك ليهم دعوة مفتوحة لتجهيلهم..والسؤال لا زال قائم أيضا يا أستاذ حافظ:
هل أنت من العالمين بالنقد ؟!!!هل أنت من الذين وصلوا درجة أن يصنفوا من هو أفضل ناقد ومن هو اسوأ؟!
أم أنت معنا مثلك مثل باقي التسعة وتلاتين مليون وتسعمائة تسعة وتسعين ألف نسمة؟!!!!!
لعن الله التعميم.. خصوصا المخل، والذي أول ما يضرب يبدأ بسيدو..
انا ما قريت سنما... لكن القريتو بخليني أعرف السنما كويس جدا جدا، وقدرت أعمل بيهو ورقات نقدية نشرت في منابر كتيرة فيها ناس عندهم كليات بتقري سنما وما قالوا لي والله رايك ده ما بنفع معانا عشان انت ما قريت في كلية بتقري نقد سنمائي..
وعملت ندوات وحضروها ناس عندهم كليات بتقري سنما برضو وبرضو ما قالو لي كلامك ده غلط تب وانت احسن تجي تقرأ عندنا أول حاجة..
فكرتك بي رمتها غلط.. وأول غلط فيها الظن بي إنو التعليم الأكاديمي بدي ميزة على الآخرين!!! ده غلط في كل الحقول العلمية.. وأكتر غلط في الفن تحديدا
التعليم الأكاديمي قد يساعد الإنسان، لكن في ناس أصلا ما بحتاجو ليهو عشان يفهموا ويعبروا عن رأيهم.
Quote: احنا ماوصفناك بالجهل حاشا ومن حق اي زول يتونس ويناقش
بس النقاش الغير علمي مابيضيف |
يا الله بس انا عاوز أعرف ليه انت مفترض سلفا انو نحن ما علميين.. ولا انت فاكر لسه انو العلمي هو الأكاديمي وبس؟!!! لكن منو القال ليك برضو إنو نحن ما أكاديميين؟!! ومنو القال ليك انو نحن ما بنعرف نتناقش نقاش علمي؟!!!
النقاش (غير العلمي) ما حقنا.. ويا ريت نتلاقى يوم نتناقش نقاش (علمي) ونتونس ونسة (الغير) علمية.
مع ودتي وإحترامي
| |
|
|
|
|
|
|
|
|
|
Re: نادى اليسنما يقدم فيلم (عقل جميل) . (Re: حافظ كنجال)
|
الاخوة المتداخلين
عاطر التحايا
على ما اعتقد والله اعلم ليس هنالك مشكلة قانونية فى عرض الفلم
بصورة تعليمية او للمناقشة ,القانون يقاضى فى حالة طبعة بصورة
غير قانونية او بيعة مطبوع وهذا التحذير موجود فى مقدمة اى فلم
فى الولايات المتحدة تعرض افلام فى الجامعات بقاعات الدراسة ,احيانا
للنقاش او استخلاص فكرة ما , سياسية او نفسية او اقتصادية او اجتماعية (حسب التخصص)
من خلال الفلم ,اذكر انة قمنا بتاجير فلم من محل لتاجير الافلام واحيانا
نشاهد مقاطع للفلم من اليوتيوب داخل الفصل الدراسى
اما بخصوص النقاش والتخصص وما ذكرة العزيز الغالى كنجال اقول ( مالك يا كنجال واقف الفا
الداير انقاش اناقش لو ما حاسى فى اضافة ليك ما تجى خلى الناس تثاقف)
النقاش ما شرط سنمائى دراما وتصوير واخراج وغيرة ممكن يأخد
منحنيات اخرى مثلا ممكن اكون عن البعد النفسى لشخصية ناش او ممكن اكون اى شئ اخر ماعندو
علاقة بصناعة السينما
تحياتى للجميع
| |
|
|
|
|
|
|
| |
مركز الخاتم عدلان
Giwey
humida
حافظ كنجال
ombadda
مريم بنت الحسين
Faisal Elrasheed
قصي مجدي سليم
محمد عبد الماجد الصايم
مدثر محمد عمر
متوكل بحر
فيس بوك
تويتر
انستقرام
يوتيوب
بنتيريست