|
|
 حكاية من حلتنا ... النفير
|
بينما أنا مستمخ في منتصف نهار شتوي رائع
في تلك الكشاشة ذات الهنبريب من ثلاثة جهات
بعد فطرة ملاح روب مكرررربة
وبعدها جبنة
بِِكر وِتِني وَبركة
جاني سامي بعجلته الدبل(الفونيكس الما خمج)
وبي فوق للحيطة المقابلة للراكوبة
- سلام هوووووي
- مرحب مرحب ... يا زول اتفضل
- لا مستعجل عندي لفة طويلة
- أها داير اقول لك في نفير عند بدر الليلة العصر
عنده سُريقة بتاعة الحوش
خير يا زول عديلة تب
وواصلت النومة في ذلك الجو
وبعد صلاة الضهر والغداء
ملاح السلج البي مزااااااااااااج
وسلطة يا زول طماطم وعجور وبصل برطوش
وكباية الشاي
شاي الكبايتين الكيني
اتذكرتوه؟؟
قلت كدة خشيت ليك في لبس خمسة
(ترنج وفانيلة)
وبيت ناس بدر عديييييل
لقيت الشباب لسة قاعدين يتجمعوا
والحوض غليييييد
وبرميل الحديد الواقف مفتوح من فوق ومليان تب موية
والكارو برضو مليانة
مسنودة بي مرق بتاع عنقريب سجانة
واكتمل العدد
جات الشلة كلها
يلا اتوكلنا على الله
شغلنا الرادي
وفتحنا الحوض
المعلمين اتنين
وكل معلم معاه تلاتة
اتنين بيجرو الطين بالشوال
وواحد بيدردم ويجدع ليه
وواحد دا اسمه سيد الحوض
وهااااااك يا شغل
وبرنامج ابراهيم البزعي شغال
واغنية خلف الله حمد
أنا ليهم بقول كلام
الزعيم سعيد:
- يا يوسف وسامي ما تتهازروا
صوت آخر:
-يا خالد صلح لي سفة
ويا زول قرب الرادي دا جاي
نحن أبعدنا منه
ألفونا بالطين يا اخواننا
لخوا باقي الحوض سريع
ويجيك حاج الطيب مار بحماره الأبيض
- الله يعين يا عيال
- الله يخدر ضراعكم
آمين يا حاج اتفضل ..
وفي آخر كفوة في السريقة
تغسل يديك وكرعيك في البرميل الواقف
الناس البيجرّوا الطين وزول الحوض بيغسلوا أول
والقعدة في باقي ضل العصرية
والشاي باللبن
والزلابية
والدة بدر:
- كتر خيركم كتير يا اولادي
إن شاء الله في أفراحكم
دا الواجب يمة
(لاحظوا كلمة يمة دي)
وهكذا ... حتى نفير آخر
وعقبال ما نجيكم نفير كدة
تحياتي
|
|
  
|
|
|
|
|
|
|
 Re: حكاية من حلتنا ... النفير (Re: نادر النور آدم)
|
الاخ نادر
تحياتي
حقيقة لوحة رائعة
وياريت لو كانت النفرة دي صباحية عشان على الاقل تكونوا سمعتوا نفحات الصباح
وشربتو عكارة تقيلة بي حتلوبا ... والضحوة اطول من عصريتكن القعتوا في باقي ضلها
دي محقة منكن ولا السريقة كملت ...
.
.
عبيد الله زول بناي خلاس وسريع وزول ممحوق اصلو ما بشغلوا معاه
اهم شرط عندو السرعة
ود عراك وبلولة قالوا دايرين اشتغلوا معاهو
عبيد الله قال ليهن اهم حاجة عندي خفة اليد
ودعراك وبلولة بصوت واحد : جرب وشوف
عبيد الله : يلا جهزوا الحوض باخد لي خفسة واجيكن
ود عراك وبلولة ناس غتتا بالحيل كف كف جهزوا كل حاجة والطين مدردم جاهز للجدع
وزولك طلع الحيطة والسريقة كانت فوق بعد العتب
ولموا ليك فيهو كف .. كف ... وود عراك اضحك بتحت تحت .... سكوا آ بلولة سريع سريع
وعبيد الله داخل معاهن في تحدي ولا يدري ان الدرقة تمت وبردلااااااااااب في الوطا
ود عراك مخاطبا بلولة ود علوبة : آ بتشوف عبيداللتك
| |
|
|
|
|
|
|
|
|
|
Re: حكاية من حلتنا ... النفير (Re: نادر النور آدم)
|
نادر النور آدم
النفير إرث جميل يميزنا عن الكثير من دول العالم وهو بلغة الزمن الحالي يعتبر منظمة عمل طوعي مدني أو أهلى لا فرق ، لكن هذا العمل الجميل كانت تقتضيه ضرورات ربما تم إختزالها أو تقليصها وبالتالي لم يعد مطلاً أو مرئياً في الحياة اليومية ، وحتى في المدن الكبيرة في بلادنا نجد أن النفير والفزعة مازالت موجودة ففي المأتم مثلاً مازال الكثير من الناس يعتمدون على النفرة في حفر المقبرة وتجهيز الميت ودفنه وتجهيز سرادق العزاء ومن ثم المساعدة في إستقبال الذين يحضرون لأداء واجب العزاء وإكرامهم ، صحيح أن النفير كعادة كما أسلفت إنحسرت إلا أنها ما زالت هناك باقية.
شكراً على الطرح الجميل واللغة التي لم تنقل الواقعة إلينا كحكاية بل نقلتنا كقراء إلى مسرح الحدث حيث السريقة والبرميل وحوض الطين وبقية شخوص الحكاية.
| |
|
|
|
|
|
|
|
|
|
Re: حكاية من حلتنا ... النفير (Re: almulaomar)
|
أبو النسب ود البوش
كتر خيرك على المرور
ومداعبة الذاكرة
الملا عمر
تشكرات كتيرات على المرور والإطراء
| Quote: لكن هذا العمل الجميل كانت تقتضيه ضرورات ربما تم إختزالها أو تقليصها وبالتالي لم يعد مطلاً أو مرئياً في الحياة اليومية |
أما نحن فنحمد لله أنه ما زال لدينا قليل من ذلك
يعني لما أنزل السودان في الحلة ما في حاجة اسمها مغترب أو إجازة
حصل نفير تقوم تشيل طوريتك طوالي وتنداح
والمشكلة إني لي الليلة .. ُطلبة
يعني لسة ما بقيت معلم
شوف ليك ورطة ..
تحياتي
| |
|
|
|
|
|
|
|
|
|
Re: حكاية من حلتنا ... النفير (Re: نادر النور آدم)
|
الأخ نادر النور
فى البداية أهلا ومرحب بيك فى حوش بكرى الواسع وأتمنى لك إقامة مفيدة
النفير لمة الناس فى مكان واحد يقدمو يد العون ومساعدة الناس
فى موده ووئام وأعتقد أنه مازال موجوداً عندنا فى الجزيرة
رغم الثورة التكنولوجية التى دخلت من اوسع الأبواب
ولكن عندما تأتى ساعة النفرة يهب الجميع .
آخر نفرة رأيتها فى زواج صديقنا
وكانت هناك بعض التشطيبات فى منزله الجديد
فهب الجميع ناس شغالين بياض وناس شغالين توصيلات كهرباء
وناس شغالين بوهية والكل فى وئام وسعادة بالغة ولكن هذه المرة
لم يكن هناك راديو أخى نادر فيوجد لابتوب موصل بسماعات كبيرة والمزيكا شغالة 
تقبل مرورى أخى نادر وتحيات لكل أهلنا فى السواجير
| |
|
|
|
|
|
|
| |
نادر النور آدم
Tragie Mustafa
عبدالله ود البوش
almulaomar
الطيب العامرى
فيس بوك
تويتر
انستقرام
يوتيوب
بنتيريست