|
|
 نقوش على جدران طاحونة محمود
|
نقوش على جدارن طاحونة محمود
مهداة لناس العباسية بالمنبر العام
هنا يختلط العام بالخاص فالرجاء ان تحجز ليك مكان يا عمنا عصمت العالم يا ود الجزولي ويا سلمى الشيخ سلامة
الطاحونة بتاعت محمود عبدالقادر واحدة من معالم العباسية التي تفتحت عليها مداركنا وهي تقع بالعباسية شرق محطة عابدين( وعابدين سيد المحطة هو الحاج عابدين حمد واحد من وجهاء حي العباسية ) في شارع الاربعين .اول ما تنزل في المحطة وانت جاي من الخرطوم شمالك طلمبة عابدين والتي كانت موبيل ثم الان هي بتروناس يمينك طوالي على الناصية الاولى دكان عابدين تدخل الشارع وانت متجه شرقا اول زقاق شمالك تدخل بيهو واول زقاق يمينك تدخل بيهو اول بيت يمسنك بيت ناس جد صالح واول بيت شمالك دة بيتنا انحنا ال جادين البيت التاني بعدنا شرقا بيت ناس داش وبعد طوالي طاحونة حاج محمود الطاحونة جزء من البيت الزقاق دة يسكنه اضافة لينا انحنا وناس حاج محمود وطبعا بيت ناس جد صالح الله يرحمه يسكن يه االان ال النقر من الهشمباب وبعدهم كان بيت ناس على بابكر وزوجته بشرية مهدى ابو العباس من ناس بور وبعدهم منزل الرحوم الحاج صديق علي او بيت ناس الحلب كما اشتهروا وسطنا .اما بعد بيت حاج محمود فهناك بيت اخوته الاثنين عم النذير وعم ادريس وبعدهم منزل المرحوم خالنا احمد عبدالله المشهور ببله ( والذي درج العم شوقي بدري على ذكره في احاديثه عن امدرمان ويسميه خل الروح ) وبعد داك بيت ناس عم عمر والد الهادي والاستاذ متوكل ويليه منزل المرحوم الصادق حسن احد قيادات الانصار وحزب الامة والد الاستاذة سعاد الصادق حسن القيادية الان بحزب الامة هذا وصف مبسط للزقاق الذي به طاحونة محمود .اسعدني الحظ ان اقتربت من سيد الطاحونة بعد ان تزوجت وسكنت في بيت العائلة في بداية حياتي الزوجية فكنت احضر معه صلاة التروايح في شهر رمضان وكذلك هناك درس يوم الاثنين والخميس بعد التروايح فالحاج خليفة من خلافاء الختمية والحزب الاتحادي طبعا وكذلك هو حجة في المواريث كل المطلوب منك ان تذكر القضية امامه الخاص بالميراث وهو يفصلك احسن من الشيخ الشعراوي نفسه واضافة لذلك فالحاج محمود ذو صوت جميل وقوي خصوصا عندما يتلو من العثماني (مولد السيد محمد عثمان الكبير وهو في الصلاة على الرسول صلى الله عليه وسلم )كذلك يقوم بقراءة البراق عندما نهيل التراب على المتوفي من ناس الحي ولحظة الناس تكون قد اكملت الدفن وقبل الفاتحة والدعاء للمتوفي يبدا حاج محمود في قراءة البراق بصوته الفخم ذلك وتجد نفسك دون ان تحس قد سالت دموعك.
زمان كان هذا الزقاق هو مكان لعبنا للكرة الشرب وبه تعلمنا لعب الكورة والدافواري وكان حاج محمود يكتفي بزجرنا كلمة واحدة بس (يا ولد العب بعيد شوية يعني العب لكن بعيد عن الطاحونة )خصوصا ومعنا اولاده في هذا الدافوري وان كانو اصغر مننا حمودة وعثمان كتة لكن معهم ابناء خالتهم الذين من سننا ياسر موسى . وفي هذا المكان كان اخي الفاتح هو الذي يقطع لنا هذا الدافواري بقوله( مبارك مبارك امي قالت ليك تعال الفطور ) كنا حينها في الصف الاول والثاني بالابتدائي معنا في هذا الدافواري كل اولاد الحي والذين سنكون معهم بعد زمن ليس بالطويل فريق نجوم العباسية مع المرحوم محمد ادريس ورشة والاخ امير علي الامير يعقوب واخرين نذكرهم لمن نجي للموضوع دة بعدينك .في الايام العادية يكون مكان الطاحونة خالي من الحصان بتاع عم محمد ابو ناس سفيان وياسر موسى(اخوهم ود امهم) ولكن في يوم الجمعة يكون اللعب مشكلة عشان الحصان بيكون موجود طبعا البشوت الكورة وتجي تحت الحصان عليه احضارها وقد افلت مرة اخو عوض بوت من موت محقق عندما ركله الحصان ركلة اخطاته بكم سنتميتر لانه كان سريع جدا. . نواصل بعد قليل
|
|
 
|
|
|
|
|
|
|
|
Re: نقوش على جدران طاحونة محمود (Re: مبارك جادين)
|
(2)
من الذين عملوا لفترة طويلة مع خاج محمود في الطاحونة العم صالح وهو المسؤل عن الطاجونة يعرف متى تشتغل ومتى تعمل كما يقوم باصلاح كل اعطالها وهي ليست كثيرة لكن كنت اراه احيانا عندما تكون الكهرباء قاطعة يقوم باصلاح حجر الطاحونة وهو مصنوع من الحجر لكن عندما يعمل زمن طويل يحتاج لاصلاح ممرات الحجر ويتم ذلك باستعمال شاكوش وزمبل حتى تعود الممرات افضل .
| |
|
|
|
|
|
|
|
|
|
Re: نقوش على جدران طاحونة محمود (Re: مبارك جادين)
|
الغالى مبارك جادين
تحية واحتراما
تجدنى مثلك اشتاق لتلك الاماكن وطالما ان الحديث عن العباسية
فهنا بعض من وجدى
في حلتنا ،العباسيه في امدرمان ....اتذكر اقلب دفاتر الذكريات ...ملاعب الصبا
.. لون الغبار (الزي) كان يعلق باجسادنا ووجوهنا وشعرنا (الزي) كان قد تم غسله وتسريحه قبل وصولنا للملعب
...كنانجلس متحلقين حول ميدان الكورة بانتظار اخوتنا لحين الانتهاء من الدافوري (الزي) كان غالبا بين اولاد الحله في العباسية آملين ان يكون النصر حليفهم حتي لأ تطالهم التقريعات والاصوات الساخره...
مهمتنا كانت ان نلملم الجزم والقمصان والجلأليب حتي لأ تتم مصادرتها في حمية الهزيمة ...
نجلس عليها بعد تكويرها حتي يسهل حملها والجري بها ان كانوا مهزومين ,و تبعا لأشارة نتفق عليها متدحرجين من ميدان السرايا
....سرايا عبد الرحمن المهدي ...متابعين جرينا لنمر من بيت سعاد الفاتح هكذا كنا نسميه...
نتابع الجري باتجاه خور ام سيوقو الذي يمر اوله من شارع الأربعين من نقطة لأ اعرفها؟؟؟
لكنه يمر من قبة الشيخ البدوي ..من ناحية كشك عم سعيد الأخضر ذلك الكشك كان محطتنا في الغاشية والماشية من بيتنا في اول شارع الأربعين ..[شارع الفيل]
في منتصف طريقنا الي شارع الموردة ..كشك حزين في الليل ’مبتسم في النهار ..
| |
|
|
|
|
|
|
|
|
Re: نقوش على جدران طاحونة محمود (Re: سلمى الشيخ سلامة)
|
... في الصباحات المدرسية كان قبلتنا نشتري منه ما نقص لدينا من اقلأم وحلاوه ؟؟؟ لا شي يميز ذلك الكشك سوي انه كشك عم سعيد.!!!! ينتهي الدافوري , ان كان بالنصر فالحلأوة من كشك عم سعيد .... وان كانت الهزيمة فالمخبأ هو كشك عم سعيد ...بعد ان [نغبي الأتر] ناخد طريقنا من خلأل زقاق وحوش اسحق حمد النيل ’ اشهر المعالم في ذلك الزقاق حوش يحوي الجامع , وعدد من الأسر التي لأ يستهان بها ....رحل البعض وبقي من بقي ..وهو حوش ازعم انه من اكبر حيشان امدرمان ؟ لأ يجاوره ألأ حوش ناس خالتي العازه بت شيخ السوق ...ثم يقابلك حوش ناس عم النصري ...ثم ناس عم دقيل فريد ....ثم حوشنا [حوش المازون] المقابل بيت صديق مخير ...تنتهي موجة الجري ,نرمي بحمولتنا الي اول سرير او عنقريب يقابلك فهنا الحوش الأمامي نتسارع لدخول الحمام ...
اتحسر كلما دخلته لأنه تسبب في قطع شجرة الألوب المجاورة للباب .. مبرر من قطعوها [انها بتنخر الساس] وكانوا بصدد حفر بير للسيفون !!! ليكون من ثم حمام للرجال !!! تدخل البيت،اذن تقابلك العناقريب المفروشه العصرية ، مشدودة الملأيات ،التي كان اهلنا ينهروننا لحظة دخولنا معفرين مانعينا من اي احتمال للرقاد، فهذا هو حوش الرجال؟؟؟؟؟؟؟؟؟؟؟؟؟ المطل عليه [ الصالون]
الذي حين تمت توسعته تمت علي حساب الجنينه الصغيرة الكانت محفوفة بالشجر ..وشهدت صبانا الباكر ؟؟؟ بدعوي ان الضيوف كتار ...فحولوه الي صالون مفروش بالكراسي والعناقريب الكبيرة المخروطة ..
الي جانب تربيزة السفرة المفروش فيها دايما مفرش بلاستيك ..مع كل تلك الكراسي حول السفرة اعداد اخري لمقابلة احتمال ضيوف [زياده] وهم لا ينقطع سيلهم من كل مكان يهلون ...
كان واجبي ان اقدم لهم الشاى في الصباحات مصحوبا باللقيمات والكعك ان كان متوفرا ...
تتوفر علي صنعه امي نفيسة [حبوبتي] وتلك امراة كنت لا تراها غاضبة إلآ لأمر خارج عن ارادتها ....
| |
|
|
|
|
|
|
|
|
|
Re: نقوش على جدران طاحونة محمود (Re: سلمى الشيخ سلامة)
|
علمتني ان الحياة حلوة ..فهي كانت امراة جميلة تعني بالجمال ...كانت تلبس طقم....!!
فساتينها باكمام طويلة وطرحها ملونة تيابها بيضا زي اللبن ..تحب المراكيب الرقيقة الصنع .... نخرج كنا معا .... نسافر معا , القضارف -الكاملين -القطينة -كسلا ...في القضارف كانت امي وابوي واخواني ...لكني كنت احسب انهم اولأد اختي الكبيرة ..لم اقف علي حقيقة الأمر الا حين وفاة جدتي...حين تقرر سفري الي الأبيض ؟؟؟ فالأمر انني سافارق الحوش حيث ملاعب [البلي.,والكورة الشراب ..ونط الحبل ] وغيرها من الألعاب . هل ؟ بل كيف افارق الحوش؟ ناس خالتي أسيا وبناتا ... حبوبة فاطنة بت محمود، حبوبة عازه .الحوش الورا؟ هناك حيث سور العوير تمر تحته موية الحنفية ..كيف افارق نادي [اسكيز]؟؟؟ تلك الراكوبه الزنكيه الحاره ؟؟ رغم كل الحر كانت المكان الاثير ؟؟النادى كان مكون من كل الناس الساكنة الحوش والبجو من الاجازات من ناس الاقاليم...نخرج معا الي بيت عم الصافي بدعاوي [الفول للعشا] او باتجاه كشك عم قرشي لليمون الماخمج او للموردة [للسمك ] من عم السوكي ...للمسرح كنا نتمشي [نقعد قدام البحر لمن المسرح يفتح].............
السينما كانت العرضه لانها مادايره مواصلات ..او سينما امدرمان ...زمن .. لم تتغير عاداتنا كمجموعة اصدقاء ، خاصة المغربيه ساعة يبدأ الارسال التلفزيوني ...التسالي النبق اللالوب البيت ببقي كوشه والهرجه تبدا .. اكتر حاجة كانت محل زعل الناس الكبار ...الرادي... واول حاجه النهره : هي.. واحد في اللتنين يا التفزيون ولا الرادي؟ نحن اعضاء نادى اسكيز كان الرادي صاحبنا ..ناخدو للحوش الورا وهاك يا برامج ويا رقيص ... لكن حبوبه فاطنه كانت مهمومه باخبار الساعه تمانيه تسمع اخبار الوفيات فان تصادف وكان هناك من تعرفه فعلينا اعلان الحداد ... بعد الفاصل الحزين نعود الي ما كنا فيه ..الأ من [هرجة] اخيرة حول الكهربا البقت غاليه ولازم نطفي النور بعد نشرة تمانية..الطريف لمن ناس البيت دخلوا التلفون حبوبه فاطنه احتجت , لمن قلنا ليها ما بشتغل بالكهربا قالت لينا انضمو لي بكره؟؟؟الان وقد دارت الايام... انظر حولي معظم اصحابي رحلوا!! سميه مكي ،الهام احمد، حمدي العبادي، عبدالاله، سامي مرتضي احمد ابراهيم ،عادل محمود، هدي الشيخ .. رحمة عليهم اجمعين ...لكن الايام التي عشناها..!!!!
لعمري مايزال عبقها باقيا فيني
| |
|
|
|
|
|
|
|
|
|
Re: نقوش على جدران طاحونة محمود (Re: طارق جبريل)
|
عندما وصلنا الصف الخامس او الرابع على ما اذكر تم تكوين فريق نجوم العباسية والذي كانت فكرة اخونا امير على الامير يعقوب او امير بوش كما اشتهر وسط اقرانه بالمدرسة . كان امير قد قدم الينا من سنجة يعني جاءنا كبير وما نشا معانا من البداية . اذكر ان الفريق ضم ايضا المرحوم محمد ادريس ابوبكر واولاد الطاهر صلاح وعمر والفاتح وابن عم محمد ادريس عادل عيسى ابوبكر وكذلك ضم الفريق بعض من فريق العمياء ناس عمار حسن خميس وعصام حريقة واخوه عبد المنعم الان عمار حسن من كبار اساتذة الكميوتر في السودان اما عادل عيسى فهو فنان في اعمال الخشب التي يقتنيها السياح من السوق الافرنجي المحلات الجنب اتيليه صلاح الطاهر تزوج ويقيم بالدامر وهو زراعي الفاتح بالشرطة اما عمر فيعمل بالاعمال الحرة .هذا الفريق اشتركنا سويا واقتطعنا من مصروف الفطور حتى نوفر قروش للفنايل واتفقنا ان نشتري قماش ونفصله فنايل . وقد كان ان قامت شقيقة محمد ادريس وبواسطة مكينة خياطة بالمنزل بتفصيل عدد 12 او 13 فنيلة . ثم ذهبنا للاستاذ برعي عمر سالم وقام مشكورا بطباعة ارقام بالخلف وكتابة اسم الفريق نجوم العباسية من الامام مع وضع نجمة قرب الصدر .كان الاستاذ برعي حينها والذي انتهز هذه الفرصة لتحيته عبر هذه النقوش كان يعمل بالمنزل قبل ان يفتتح مكتب الاعلان الضخم الان في شارع الاربعين قرب خور ابو عنجة والذي يديره الان شريكه عبدالمنعم اشول .وقد قمنا كذلك بكتابة خطابات للتبرع مخاطبين عدد من الاندية الامدرمانية مثل الهلال والمريخ والتاج والعباسية واذكر وللتاريخ اننا تسلمنا تبرع نقدي من القطب المريخي حاج حسن عثمان( والد الصديقة والاخت الشقيقة الاستاذة مثابة حاج حسن عثمان زميلتنا مؤخرا في الزقازيق اثناء الجامعة) ومن جيبه الخاص بعد ان قرا خطابانا واشاد بالفكرة ومباشرة دخل يده بالجلابية واخرج تبرع سخي. ناس الهلال( يا جمال السنوسي) ما ادونا اي حاجة بس وعود اما ناس نادي التاج فقد تبرعوا لنا بكرة قدم استلمناها مباشرة من السكرتير.
كانت اول مباراة لينا مع فريق بالشارع التاني اي الزقاق البعد زقاق طاحونة محمودوكان به ناس محمد كريش الله يرحمه ومحمد الصادق او (محمد نوبة )وعزيز وبكري خالد وكان الكوتش بتاعهم محمد خالد وهزمناهم هزيمة كبيرة بفضل ناس عمار وعبد المنعم وقد كان للفنايل بتاعتنا تاثير كبير في هذا الفوز .في زقاق الطاحونة وبعد وفي بيت خالنا المرحوم احمد عبدالله بلة كان هناك فكي بتاع كتابة وعلاج للنسوان وفي مرة من المرات كان عندنا دورة من تنظيم اسامة ثابت المشهور باسامة كيبر واخوه المرحوم مليجي والذي برع في لعب الكرة ووصل حتى فريق الغباسية الكبير واولاد ثابت هؤلاء احفاد البطل ثابت عبد الرحيم من ثوار ثورة 24 والذين جرى اعدامهم بعد فشل الثورة ومقتل الشهيد عبد الفضيل الماظ ممسكا بمدفعه كما غنى فنان افريقيا محمد وردي .نرجع لموضوع الدورة والتي دخلناها وكانت رباغية بخروج المهزوم وفعلا هزمنا الفريق الاول وتاهلنا للكاس يغني وصلنا الفاينل ضد فريق ناس اسامة كيبر .وقبل المباراة بيوم اصر صديقي امير على الاستعانة بالفكي الذي ذكرت سابقا وتحت الحاحه ذهبت معه ولنا غير موافق غلى الاستعانة به .وبعد ان اخذ مننا البياض طلب مننا ان نقوم ببعض الحركات قبل المباراة وهي ان نرفع ايدينا ونحن نجري من الغرب تجاه الشرق سبعة مرات وانشاءالله سنهزم الفريق الاخر باذن الله تعالى كما اقنعنا عم محمد الفكي . الحصل اننا هزمنا هزيمة كبيرة جدا رغم تاكيدات الفكي والذي لم نرجع له بعدها .وقد حمل انصار الفريق الفائز وحاموا به الحي وهم يهتفون :الكاس الكاس شلنهوا خلاص ليلتها لم ننوم من الغضب بعد هذه الهزيمة الكبيرة ..........
نواصل
| |
|
|
|
|
|
|
|
|
|
Re: نقوش على جدران طاحونة محمود (Re: طارق جبريل)
|
يا ود جبرين
في واحد امبارح طير ليك ايمان قلبنا الاصلو طار بعد الانسحاب
وقال شافك في الخرطوم عليك النبي شوف محن الدنيا
عموما لحد وصلت النهاية حتى عرفت الزول زول هظار ساكت
ارجو الا تنزل الخرطوم هذه الايام فالغباريوميا زاذا مافي غبار سخانة تلحم
شكرا على المرور
مودتي
| |
|
|
|
|
|
|
|
|
|
Re: نقوش على جدران طاحونة محمود (Re: مبارك جادين)
|
يا بركة سلام ومعاك أولاد العباسية وبنات العباسية ... ذالك الحي العريق ... سكنت لجواركم في حي الأمراء عدد من السنوات لذا أعتقد بأني من سكان حي العباسية ... بس الفاتح ده من زمان هادم لذات ومفرتك جماعات ولا شنو .؟
| |
|
|
|
|
|
|
|
|
|
Re: نقوش على جدران طاحونة محمود (Re: زهير الزناتي)
|
الزول الاسمه الفاتح دة عندي ليهو حكايات كتيرة وعديدة
يا زهير الزناتي
وسوف افرد ليهو فرصة كبيرة في هذاالبوست
شكرا للمرور وانت من العباسية
وحتى ميار ولدت علما ما اذكر في هذا البيت
وعملنا ليها السماية الما خمج
| |
|
|
|
|
|
|
|
|
|
Re: نقوش على جدران طاحونة محمود (Re: عبدالكريم الامين احمد)
|
Quote: وجلسنا القرفصاء حتي نحلق في سماء العباسية ومبارك جادين
وبحضور الاسطورية سلمي الشيخ سيطيب القرفصاء وتحلو القراية التي هي حتما ستاتي بمزاج |
تابع يا ود جادين ..المتابين كتاااااااااار حتى وان لم يعترفوا بذلك كتابة ...........
| |
|
|
|
|
|
|
|
|
|
Re: نقوش على جدران طاحونة محمود (Re: البدري عبد الله)
|
التحية ليك يا اخونا عبدالكريم
والله اليوم تذكرتك وانا اتابع فيزا لزول جاي ليكم في الدوحة اذا استلمنا
الفيزا بكرة سوف ابلغك بالشخصية عشان تقوم بالواجب
وانا عارفك صاحب واجب
اشفق على صديقي شبكش واعد الايام بتاعت الشهرين حتى تكتمل
تحياتي ليك
ومودتي
وشكرا على الطلة
| |
|
|
|
|
|
|
|
|
|
Re: نقوش على جدران طاحونة محمود (Re: البدري عبد الله)
|
اخونا البدري عبدالله
وكل المتابعين للبوست لكم التجلة والاحترام والتقدير على المتابعة
وارجو ان اوفق في رسم صورة لزقاق من ازقة العباسية
وانا اخترت الطاحونة لانها ترتبط عندنا بالكسرة القوت الثابت لعدد ضخم ومقدر منابناء شعبنا خصوصا في الاحياء الشعبية مثل
حينا العباسية
(4)
اللحظة تذكرت شخص عزيز على ناس زقاقنا كله هو الاخ عثمان محمد عثمان حبيب المشهور بعثمان ابشامة (هكذا كان لقبه)
هذا الشخص ظهر في حلتنا فجاءة دوزن سابق انذار وحضر من دارفور الجريحة رفع الله عذرتها والهم حكومتنا الراي السديد بضرورة حل هذه الازمة الفضيحة .اعود لب شامة واقول ان هذا الشخص قد ظهر وارتبط عندي مع ظهور موضة الشارلستون الشهيرة وانا كلما اتذكر الشارلستون تخطر بذهني شخصية حتى ظننت انه مبتدع هذه الموضة وهي للذين لك يحضروها من الجيل الحديث ان يكون البنطلون ضيق من فوق ووتحت الركبة يصبح اعرض من اذن الفيل وهي مةضة عرفت فيما بعد انها جاءت الينا من اوروبا وثورة السيتنات الشهيرة .
المهم ان بنطلون ابو شامة كان علامة مميزة له وهو يطلب من الترزي ان يضيف رتوش فوق وعلى حنبات البنطلون زرارير وكباسين وخلافه
وكان من اشهر ترزية ذلك الزمان محمد قرنيت في سوق ام سويقو(وهو اخو المرحوم علاءالدين والذي كان من احرف من التقيت
في خانة الثيرد باك يعني زي بي كي بتاع البارسة الان وايضا من اخوته الصغار واقصد اخونا قرنيت عازف الكمان الان في فرقة الاستاذ محمد وردي الموسيقار شامل وهو صديق لاخوتي الصغار المرحوم بابكر والذي كان يجيد العزف على البيز جيتار واخونا الفاتح)
نعود لبشامة والذي ظهر من وين انا مامتذكر لكن كان يدخل اي بيت في الغباسية وهاك يا كلام مع كل افراد الاسرة
فكل البيوت بيته وكل الاباء اعمامه والامهات خالاته . لم اصادف في حياتي انسان باش وطلق المحيا طول الوقت كما كان ابوشامة
واطلب من مولانا خالد اضافة اسطر عن اب شامة لانة درس معاهم المتوسطة في مدرسو الجمهورية والتي تقع قرب مقابر حمد النيل هو ومعاهم ميرغني جلي والذي يعمل الان في بنك الخرطوم ارجو من مولانا ان يذكر لنا بعض من نوادر اب شامة
فاتني ان اذكر ان اب شامة قد سكن من خالته المرحومة ام الحسين زوجة عمنا صالح عم استاذنا الطاهر اصول استاذ الكيمياء الخطير
وهو نفس البيت الفيهو دكان صلاح جادين الغسال والمكوجي وهو اول دكان مكوجي اراه في حياتي والذي كما اصابنا بقايا جمراته في ارجلنا ونحن نجري خلف الكورة الشراب حيث يقوم وعلى طريقة المكوجية المشهورة بهز المكواة بشكل حتى يتخلص من الرماد ويحصل على مكواة قوية مرة اخرى .
الشاهد ان عثمان اب شامة قد حرك ساكن حلتنا او
اضافة ليها نكهة من روحه الجميلة
كان يلبس كما اسلفت الشارلستون ويرفع البنطلون عاليا مع حشو القميص داخل البنطلون حيث لايتبقى منه اي القميص شي كثيرخارج البنطلون .
اقفل الفقرة برواية حكاها واحد من حلتنا وهي انه قد صادف اخونا عثمان في حافلة متجهة الي استاد الخرطوم ووجد فيها اخونا عثمان اب شامة وهو بنفس طريقتو المعتادة يحكي كيف انه حكم درحة اولى ذاهب لادارة وتحكيم بين فريق شنو كدة وفريق اخر كل ذلك وهو يرتدي ملابس التحكيم كاملة كانه داخل المباراة وكيف ان وزع اهتمامه لكل الركاب متحدثا عن صعوبة التحكيمالزول البحكي قال لي انه قد عاين الناحية التانيى وعاين في الاتجاه البعيد حتى لايتعرف عليه ويخش معاه في كلام يخجل حيث يعلم كل ناس الحافلة انه يعرف هذا الحكم الذي يركب المواصلات مع الجماهير بملابس التحكيم.
بقى ان اضيف ان اب شامة من اشد المعجبين بثنائى العاصمة السني الضوي والمرحوم ابراهيم ابو دية خال اخونا طارق جبريل .كان اب شامة بعد صلاة العيد يزور السني ثم بعده ابراهيم قبل ان يزور بقية اهله.....................نواصل
| |
|
|
|
|
|
|
| |
ibrahim alnimma
سلمى الشيخ سلامة
طارق جبريل
زهير الزناتي
عبدالكريم الامين احمد
البدري عبد الله
فيس بوك
تويتر
انستقرام
يوتيوب
بنتيريست