|
|
 المعايير الدولية للأكل والشراب ليست مطابقة .تريدون ان تطبقوا علينا المعايير الدولية للإنتخابات؟
|
الشعب السوداني ياكل ملاح ام شعيفة والتقلية والكسرة البايتة ؛ والشيط المحرق ؛ ومرات كسرة بمووية وملحة عليها شمار والبامية المفروكة ؛ والشعب السوداني أغلبيته يشرب الشاي في حلة محمد النصري المبنية من طبق السكن ويشرب الشاي بالكباية ام اطان ومواعين الطعام سكن جوة وبره ويسوطو الملاح بي مفراكة ومرات يسوطو الشاي بقلم البك؛ والطاجن البعوسو فيهو الكسرة وسخ شديد و الجرجريبة من سعف النخل والدخان والحاجة تقعد تعوس في الكسرة وموية القرقريبة وسخانة ؛ والمعراكة بتاعت الصاج حدث ولا حرج مثل فوطة فني غيار زيوت العربات ومعايير طليقة القنقر خليها ساي دي كمان القنقر نمرقو من الهبود وننفخو زين وناكلو ونشرب اللبن بالقصبة ( ام قريطيع ) ونصرر البهايم ببعر الغنم ونخلط البعر وننصرر بيهو البهائم وبعد داك نجي نحلب الغنم ديل ونشرب لبنن حامدين شاكرين
لكن تعال شوف المعايير الدولية للأكل في العالم
أول حاجة كرت صحة ؛ المواعيين كلها استيل وغاز البوتوجازات يمر بمرحلتين بتاعت تنقية حتى يصير ازرق كامل ؛ وتهوية المطابخ ضرورية للتصديق والمريلات بتاعت الشيف تغسل يوميا ؛ ولابد من وجود مكتبة داخل الفندق بها احدث نشرات الطبيخ ؛ وكل كبابي الشاي والموية لابد ان تكون من زجاج خالص ؛ والشيف على الاقل لابد من بكلاريوس من جامعة معترف بها وغسيل الاواني بأحدث المنظفات من افخم مصانع التنظيف العالمية ؛ والحلل عندها مقياس يوضح مراحل النضج و...................و..............................و.....................
.......................و..................
..........,.........,و.
ماممكن بلد زي السودان معاييرو في الاكل والشراب دي وتجي تطبق عليهو المعايير الدولية للانتخابات
كدا أول حاجة طبقو لينا معايير الاكل والشراب العالمية دي على السودان وشوفوهو هل هو فعلا المعايير العالمية للكل والشراب مطابقة لما في السودان أم لا؟؟؟ أكي لا .. طيب ما دام معايير الأكل والشراب في السودان غير مطابقة للمعايير الدولية بالتأكيد معايير الإنتخابات الدولية لن تتوفر في السودان
صدق من قال لكل مقام مقال مقام السودان يحتاج الى معايير تتوافق مع طبيعة الشعب السوداني وثقافاته المختلفة فالسودان بلد متعدد الثقافات والسحنات وبه اكثر من منهج حياة في شرقه وغربه وجنوبه فهو يحتاج الى معايير خاصة يجب أن تستوفي أما المعايير الدولية فقطعا لن تستوفي في السودان ولا الحد الادنى حتى
|
|
 
|
|
|
|
المكاشفي الخضر الطاهر
حمور زيادة
Nasr
فيس بوك
تويتر
انستقرام
يوتيوب
بنتيريست