|
|
|
 Re: إن شــاء الله القيامة تقـــوم (يوجد احباط)!!! (Re: الشفيع وراق عبد الرحمن)
|
الإحباط مجموعة من مشاعر مؤلمة (ضيق ، توتر ، كدر ،غضب ، قلق ، شعور بالذنب ، شعور بالعجز ، شعور بالدونية ، صرف انتباه ) تنتج عن وجود عائق يحول دون إشباع حاجة من الحاجات أو معالجة مشكلة من المشكلات لديك.
الإحباط قد يلعب دورا مهما في تحقيق الصحة النفسية أو التحول بها إلى حالات المرض النفسي ؛ فهو يعتبر من أهم العوامل المؤثرة على توافقك الشخصي.
وكلما كانت قواك وايمانك بالله أعظم وتماسك شخصيتك أمتن وأصلب استطعت تحمل الإحباط وثابرت في تجاوز عوائقه ومشاعره وانطلقت في الحياة محققا هدفك أو معدله أو مغيره ناعما بحياتك وسعيدا بساعاتك ولحظاتك .
___________
من الموسوعة
| |
  
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
اختلاط المشاعر والاحاسيس
بين الحب والكراهية
الشعور بالاقدام والاحجام
اناس أدمنوا الشـــــر فعملوا على زرعه وضعه في طريق الآخرين
أناس أدمنوا أذية البشر فاحالوا حياتهم الى جحيم
عدم رؤية الضوء في نهاية نفق الحياة
ماذا احكي لك لأحكي
آآآآآي إن شاء الله القيامة تقوم ... لتضع حداً لهذه الرحلة الطويلة والمملة جداً
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
يقول الشاعرالراحل المقيم حسن الزبير كنت يوم في المكتب فجأة جاني زميل من زملانا وقال لي أنا عايز أوسطك تخطب لي زميلتنا دي قلت ليه انتو متفاهمين؟؟ قال لي متفاهمين قلت ليهو خلاص ان شاء الله في اليوم التاني قالت لي انا برد ليك بكرة ولمن جات في الصباح قالت لي أنا ما بقدر أتزوج زميلنا ده وذكرت لي بعض الاسباب قلت ليها انا حا أقول ليهو مخطوبة واتفقنا على كده بعد داك جاني هو في المكتب جا وقف قدام التربيزة قال لي اها قلت ليهو اقعد قال لي ما قاعد نجيب ليك شاي؟ قال لي ما دايرشاي قلت ليه طبعا زميلتنا دي امبارح اخدو الفرصة للتفكير ومشو كلمو ود عمها الكان خاطبا ورفض وقال ما بخلي بت عمو دي
مهما كانت الظروف وبنات حواء كتار وربنا يديك الابرك منها قال لي يعني ما حا تتزوجني؟؟؟
قلت ليه طبعاً لانها مخطوبة وانت جيت متأخر يعني ما حا تعرسني؟؟
قلت ليه طبعاً ما حا تعرسك
ضرب التربيزة وشتت لي الورق وقال لي
ان شاء الله القيامة تقوم
عشان الناس كلهم يتلخبطو في بعض
المهم قالا بطريقة فيها نوع من الالم والحسرة
_______
وانا اشاطره هذه الحســـرة وأتمنى قيام القيامة
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
بعد كلام صاحبنا الفوق دا قام شاعرنا المرحـــوم حسن الزبير داعبهم بهذه القصيدة
ان شاء الله القيامة تقوم
عشان ريدك معاي ما بدوم
ناس سهرانة طوالي
وناس طول الليالي تنوم
أشوف انا كيف حسابك يطول
على الوعدالدوام ممطول
وانا الشايف كتير أحباب
بعيشو الريدة عرض وطول
أنا الشايل دوام همك
وأريدك ريدة زي أمك
وأغير من غيرتي زاتا عليك
أخاف أنا يا الخفيف دمك
ان شاءالله القيامة تقوم
وكل زول يمشي في حالو
عشان ما قلبي يرجع يقول
حبيب الدنيا في بالو
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
ان شاء الله الحسادة تطير
وتمتد السعادة تدوم
والضاق العذاب في الريد
بكرة يعيش ويشبع نوم
وتقول القيامة تقوم؟؟
عشان حظك شقي ومشئوم
وفتحن ليك بنات حواء
وجافاك ليلة واحدة النوم
بتقول القيامة تقوم؟؟
أنحنا لا عرفنا الريد
ولا زيّك عشقنا الغيد
وحبينا القريب وبعيد
وراجعنا القديم وجديد
ولا ضمانا حضن الليل
مع الوجه البهي وغريد
ولا لليل شكينا حبيب
اذا حتى العشقنا عنيد
ولا نظمنا في الحلوات غنا وموال
درر وقصيد
ولالينا بن عوف غنا
لا الصابر ولا الباكي
خيالِك عندي يوماتي
صباح خيري ومساء أفراحي
أعد ميعادو باللحظات
وسهري معاه صباحي
عيونِك فوق عيوني تنوم
وفوق آلامي ترتاحي
وريدِك من عواتي الريح
المو وأضم عليو جناحي
وتقول القيامة تقوم؟؟
أنحنا مع السعادة نسير
مواكب فرحة هادرة هدير
نحيا نحب نعيش ونغير
ونعلن ثورة التغيير
ناكل حب
ونشرب حب
ونلبس حب
ونفرح بالمحبة نطير
نعيش الريدةعرض وطول
كبيرنا ملك صغيرنا أمير
وتسمع صوت هتافنا يجيك
ان شاء الله الحسادة تطير
وتكبر وتنسى يا زغبير
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
وصفة لمعالجة الاحباط...
1- take a deep breath for the count of seven
2- hold it inside for the same count
3-exhale it slowly for the same count
4- , it always better to do the exercise while your eye are closed .
repeat the process until you feel the muscles relaxed one after the other specificallly the neck and shoulders
this will take the attention away from your thinking mind and bring your focus back to the present moment where everything happening now and not happend, already ,become an observor for what you are thinking about
you will find that you can control your thinking instead of your mind controlling you, try it it work very well
be carefull do not allow your thoughts and your mind dictate to you the past,the future is yours based on a choice and a promise from your creator that what ever you ask for must come through.
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
سنكمل بقية قصة القيامة بكرة لو القيامة ما قامت لغاية بكره
....
...
ولغاية الوقت داك هاكم النكتة اتصبروا بيها لغاية بكرة
طبعاً بتتذكروا الزلزال الذي ضرب العاصمة القومية الخرطوم في العــام 94-95
قالوا مهمد صاله (محمد صالح) كان في زيارة سريعة للخرطوم وحصل الزلزال، اها قام رجع البلد
والجماعة يسألوا فيهو، يا مهمد صاله: مافيش اخبار انقلابات ولا اي هاجه؟
قال ليهم(هههه ههههه)، انقلابات ايه!!
هو كان في مهاوله لقيام قيامه ادييل كدا بس الجماعه فشلوهو
_________
التحية لأخونا مهمد صاله..... وكامل الاحترام والتضامن
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
وتستمر المساجلة بين المرحوم حسن الزبير وأحمد فرح شادول
وهنا يقـــوم المرحوم حســــن الزبير على احمد فرح شـــادول
ان شاءالله القيامة تقوم
وعشمي في الله ما شويّة
أدخل جنة المأوى
وهناك يدوني حورية
أتكي في الارائك أنووووووم
بكل حبور وحرية
وأرتاح من ده مافي وقوم
وأمش جيبلي وجيب ليّا
أفارق دنية المعدوم
والقى مطالبي بالنية
ولوحنيت للحم الطير
تجيني الطيرة مشويّة
عشانك كيّة يا دكتور
تكون حوريتي خمرية
تجرجر ديسا ده المردوم
ولهجتا خالصة عربية
أخلي ليك بنات حواء
تحاحي صباح وعصرية
وتبقى عواطلي يا دكتور
هناك لا مرض ولا شكيّة
هناك لا أذن سمعت
ولابعيونا مرئية
هناك حتى الرحيق مختوم
وولدان طائفة دوريّة
لا عشوائي في الخرطوم
ولا صفقات تجارية
صفي النية يا مهجوم
بلاش هجمات هبوبية
وان شاء الله القيامة تقوم
وتنجح مية في المية
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
وهنا يرد أحمد فرح شادول على المرحــــوم حسن الزبير
*********
ما مقبولة اعذارك
وما معروف مصيرك وين
وماهي صالح اعمالك
عشان يدوك حوراً عين
لو انت على الصراط ماشي
وشركوا ليك ببنية
حا تختل كل حساباتك
وحا تحتل حتلة ابدية
أما لو ضرب حظك
وجابوا ليك بنات الحور
تموت واقف على طولك
ويشيلك حيلك المشلول
وتتلفت يمين وشمال
مشدوه بالجمال مبهور
وتحتار باقي عقلك طار
فيمن يهوي او يختار
ديك قواما سمهر وطول
وديك دعج العيون مكحول
وديك جمالا يسبي عقول
وديك من فيها حلو القول
ودييييييييييييييييك خليها لي شادول
وديك شعراً كمان خلي
قدر ما يزيد نعومة وطول
عذابنا وليلنا فيه يطول
وديك خشيما بنقط كلام معسول
تقيف مشدوه وتفوت القيامة عليك
واقف انت تتلفت طرب وذهول
حسن دنياك للزي ديل
وديل يا صاحبي هم دنياك
يودّنك ويجيبّنك
ويختنّك ويشيلنك
يجلبّنك ويبيعّنك
يغسلّنك ويشرّنك
ويدفنّنك ويكتلنك
يقيدو النار يشدّنك
ويبرن عودك المسلوب يحرقنّك
تفوح انت ويزيد دنّك
وتغني الدنيا بي فنك
ده حال الدنيا
ما بتدوم
مرة تلام ومرة تلوم
ويوم تتعب
مرة تحب وتشبع حب
ومرة تحب وما تنحب
حسن خليهم السمعوك وارجع لحلوكلامك
معقولة القيامة تقوم
قبل ماتلقى احلامك
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
ومن نكات يوم القيامة ايضا هذه:
قالوا واحد زهجان من مرتو زهج شديد خلاص، ومضيقا عليهو عيشتو ودنيتو، قام يوم سالتو ليك، انتو لمن القيامه تقوم موش بعرسو ليكم الحور العين؟
قال ليها : آآآي.
وطيب احنا بعرسوا لينا منو؟
قال ليها، انتو بعرسوكم الكفار عشان تعذبوهم
____________
اللهم اجعل كلامنا خفيف عليهن
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
قيل ان سودانيا سافر الى السويد لقضاء ايام مع ابنه الذي يعمل طبيبا هناك. وطبعا وجد البلاد نظيفة وكل شيء فيها منسق ومرتب، وكل شيء متوفر ومرتب، البلاد تكسوها الخضرة، والناس بألوانهم البيضاء وشعورهم الناعمة المسدلة. فتعجب في نفسه، وجال في ذهنه سؤال لم يستطع كتمانه مدة طويلة، فسال ابنه :
- هل يعيش هؤلاء الناس في نفس الدنيا التي نعيش فيها؟
فاجابه ابنه باستغراب :
ـ نعم إنهم يعيشون في نفس الدنيا التي نعيش فيها.
وتردد قليلا قبل أن يسأل أباه : لكن يا ابي لماذا تسأل هذا السؤال؟
فرد الاب والحيرة تعصف به :
ـ والله يا ولدي انا قلت يمكن الناس هنا قامت قيامتهم ودخلوهم الجنة، ونحن (هناك ما جايبين خبر)؟
والنكتة المعاكسة تماما يرويها واحد سليط اللسان، فيقول ان طبيبا عمل في الخليج سنين عددا، وكان (مريح) ابوه واهله تمام الراحة. في يوم كتب الابن خطابا لابيه يخبره انه تعب من الاغتراب ويريد ان يعود للبلد، ويستقر. فسارع الوالد (الشفقان) بالرد على ابنه يحاول ان يثنيه عن العودة، وقال له :
ـ والله يا ولدي الحالة صعبة، وفي ظني أن القيامة قامت ونحن (هسي) في يوم الحساب ونحن ما جايبين خبر .. دحين أخر جيتك شوية!!)
طبعا يقصد ان المعايش وصلت حدا من الضيق بالناس اصبح فوق طاقة احتمالهم.
وبمناسبة القيامة قيل ان احد سكان البادية هاجر للخليج وصدف أن اصيب في حادث مروري فاغمي عليه، فحملوه الى المستشفى. وعندما افاق وجد نفسه في مكان نظيف (طبعا هو المستشفى)، ونساء الجميلات (الممرضات) يقمن بخدمته في رشاقة وحركة خفيفة. فانبهر إذ ظن انه مات وادخل الجنة، فقال متأوها :
- صدق وعده .. الحور العين؟
هذه النكتة سمعتها في السعودية، ولما عدت الى السودان سمعتها في طبعتها السودانية. فقيل إنه لما راى الممرضات يتحركن في رشاقة يخدمن المرضى، والمكان نظيف، ونسائم المكيفات تهب عليه من كل جانب، ظن انه مات وجاء يوم القيامة وحوسب ودخل الجنة. فلما جاء أحد رجال الشرطة وسأله عن تفاصل الحادث وعن اسمه، قال :
ـ والله يا ولدي في (الفانية) ديك كان اسمي عبد الرحمن، ودحين (اسع) ماني عارف اسمي منو ..
وبعـــد ..
واضح أن خيال الناس خصيب، ولذلك تروى النكتة أو الحكاية بروايات مختلفة كل رواية تتناسب مع مجتمعها .. والله أعلم.
_______
الرأي العام 18/5/2009
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
وصلتني النكتة دي من أحـــــد الاصدقاء وقام بقراءة الموضوع وارسلها لي وسوف أدعه يحكيها بلســــــانه هو:
أخي أمين بشاري بمناسبة الزلزال أهديك هذه النكتة وقد حدثت معي بالفعل
يوم الزلزال الأول داك بتاع الليل القوي داك 94-95
عندي ود خالتي قلت امشي ابيت عنده واتونس شوية وفعلا مشيت.
في الليل كنا نايمين في الحوش وفجأة بدون مقدمات الزلزال حصل والزنك عمل ليك جنس اصوات بس خليها ساي والناس كلها طلعت الشارع
كنا انا وود خالتي واقفين في الشارع وبعد شوية جات ليك مرتو تبكي بكاء شديد لامن بدموعها.
اها يا زول قعدنا نسألها ليك: مالك يا زولة بتبكي؟
قالت: انا والله كنت قايلة القيامة قامت 
ويا زول نحنا نسينا الزلزال وقعدنا نضحك فيها
جنس ضحك والى هذا اليوم.
_________
النــاس في زحمة الحياة ومشـــاغلها ناسية إنو القيامة دي ممكن تقوم في لحظة
أحســـن أي يعمل حسابه الداير يعرس يلحق يعرس بســـرعة
وبرضـــو كل زول يصلح اخـــلاقه
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: د.يوسف محمد طاهر)
|
اخــــونا شول أشـــوانق دينق
ســــــلام...
| Quote: إنتظرناها أبت تجى يال الأمين نعمل ليها شنو؟ |
قيامة ربنا لســـه ما قامت ... ولكن قيــامة الســـــودان ح تقوم 2011
زي ما قالوا ليك الجماعة والله بالجــــد ح توحشــــونا شديد خالس
وعشــــان كده تمنينا أن تقـــــوم القيامة قبل فصل الوطن... شطرين
الله يجـــازي اللي كان الســـــبب
________
تحاياي..
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: أحمد عبدالوهاب الأحمدى)
|
Quote: قيل ان سودانيا سافر الى السويد لقضاء ايام مع ابنه الذي يعمل طبيبا هناك. وطبعا وجد البلاد نظيفة وكل شيء فيها منسق ومرتب، وكل شيء متوفر ومرتب، البلاد تكسوها الخضرة، والناس بألوانهم البيضاء وشعورهم الناعمة المسدلة. فتعجب في نفسه، وجال في ذهنه سؤال لم يستطع كتمانه مدة طويلة، فسال ابنه :
- هل يعيش هؤلاء الناس في نفس الدنيا التي نعيش فيها؟
فاجابه ابنه باستغراب :
ـ نعم إنهم يعيشون في نفس الدنيا التي نعيش فيها.
وتردد قليلا قبل أن يسأل أباه : لكن يا ابي لماذا تسأل هذا السؤال؟
فرد الاب والحيرة تعصف به :
ـ والله يا ولدي انا قلت يمكن الناس هنا قامت قيامتهم ودخلوهم الجنة، ونحن (هناك ما جايبين خبر)؟
والنكتة المعاكسة تماما يرويها واحد سليط اللسان، فيقول ان طبيبا عمل في الخليج سنين عددا، وكان (مريح) ابوه واهله تمام الراحة. في يوم كتب الابن خطابا لابيه يخبره انه تعب من الاغتراب ويريد ان يعود للبلد، ويستقر. فسارع الوالد (الشفقان) بالرد على ابنه يحاول ان يثنيه عن العودة، وقال له :
ـ والله يا ولدي الحالة صعبة، وفي ظني أن القيامة قامت ونحن (هسي) في يوم الحساب ونحن ما جايبين خبر .. دحين أخر جيتك شوية!!) |
إحباطكـ عسل
شرقتني ياخي 
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: خالد المحرب)
|
حبيبنا البشاري ..
الأشواق أشواك ياصديقي ،
ليس هنالك ما يمنع قيام قيامة الإنسان السوداني .. فكل مانراه ونسمعه .. ينبأنا بأن المسيح الدجال .. يسعى بين أحلامنا .. وأشواقنا..
أيه ياصديقي .. إن شاء الله القيام تقوم ..
على الأقل نرتاح من الأحزاب .. والإنتخابات .. والغربة .. ومن سودانيزأون لاين زاطووووووووو
دم بخير،
أخوك/ الأرباب
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: Khalid Saeed)
|
الإحباط مجموعة من مشاعر مؤلمة (ضيق ، توتر ، كدر ،غضب ، قلق ، شعور بالذنب ، شعور بالعجز ، شعور بالدونية ، صرف انتباه ) تنتج عن وجود عائق يحول دون إشباع حاجة من الحاجات أو معالجة مشكلة من المشكلات لديك.
الإحباط قد يلعب دورا مهما في تحقيق الصحة النفسية أو التحول بها إلى حالات المرض النفسي ؛ فهو يعتبر من أهم العوامل المؤثرة على توافقك الشخصي.
وكلما كانت قواك وايمانك بالله أعظم وتماسك شخصيتك أمتن وأصلب استطعت تحمل الإحباط وثابرت في تجاوز عوائقه ومشاعره وانطلقت في الحياة محققا هدفك أو معدله أو مغيره ناعما بحياتك وسعيدا بساعاتك ولحظاتك .
______________________________________________________________________________________________________________________________
يا أمين إزيك ....
يا أخي كلامك الفوق دا حلو خلاص .... المشكلة إذا أصابك الإحباط كيف تفك منو؟ طبعاً القيامة ممكن تخارجك نهائي .... لكن في بدائل سريعة إنت عارفه طبعاً .... العرس واحد منها ... يلا جيب لينا الباقي ... عارفك ما بتغلب حيلة.
عشان تطلع من حالة الإحباط لازم تعمل (خرمجة) ... لكن على مسئوليتك طبعاً.
تحياتي
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
الأرباب خالد سعيد
تحايا وكويس جابتك قيام القيامة ..
| Quote: فكل مانراه ونسمعه .. ينبأنا بأن المسيح الدجال .. يسعى بين أحلامنا |
ليس هذا وحســـب بل أن بعضهم تقمص دور ابليس في زرع اشواك الشـــر في طريقنا
عندما تفقد الحيـــــاة معناها فقيــــام القيامة أحســـن لتضع حدا لجراحاتنا التي عيت "رفضت" أن تطيب
فعلها تقــــوم لتضع لنا نهاية نواجه بعدها مصيرنا فاما الى الجنة او الى النار
بقدر الاحبـــاط اسعدني مرورك أخي
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
الفاضل محمد هارون
تحايا من أرض الحرمين ..منتظرينك حسب الوعد
| Quote: عشان تطلع من حالة الإحباط لازم تعمل (خرمجة) ... لكن على مسئوليتك طبعاً. |
الخرمجة جاية في السكة خليك قريب بس
اهلك قالوا من حيزت له هذه فقد ملك الدنيا
الــدار الوسيعة..
والدابة الســـــريعة..
والمـــرأة المطيعة ...
شــــــــوف انت نفسك من ديل أيهم ملكت
تحياتي لك وللاســرة الكريمة
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
الفاضل الأمين البشاري ..
شكرآ على إيرادك النصوص المتبادلة ما بين الراحل المقيم الشاعر حسن الزبير و الدكتور أحمد شادول أطال الله في عمره .. ولقد كنت أبحث عن هذه المساجلة التي تندرج تحت ما يسمى بأدب الإستظراف وهو أدب غادر مساحات الوجدان السوداني منذ أمد بعيد سجلته مواقف أجيال مضت عاشت بهدوء غرست قيمها ثم طواها الردى .. ولقد شاهدت تلك الحلقة قبل سنوات في القناة السودانية والتي كانت عن الراحل حسن الزبير وكان الدكتور أحمد شادول أحد ضيوفها حيث ذكر بالنصوص وقائع مساجلة (إنشاء الله القيامة تقوم) ومن يومها و أنا أحاول أن أجد هذه النصوص ,, حيث وجدت النص الخاص بالراحل حسن الزبير ولكن لم أجد نصوص الدكتور أحمد شادول .. وحسبي أنك الآن تنشرها كاملة فلك أجمل التحايا و من خلالك أبعث التحايا للدكتور الإنسان الأديب أحمد شادول ..
ميسا ـ أريزونا ـ الولايات المتحدة
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: عادل نجيلة)
|
| Quote: لقد كنت أبحث عن هذه المساجلة التي تندرج تحت ما يسمى بأدب الإستظراف |
الحبيب عادل نجيلة
ســـــــلام،،،
وقوفك هنا عند هذه المساجلة يعني انك انسان ذواق لكل ما هو جميل
لقد سمعت هذه المساجلة لأول مرة في الاذاعة السودانية بصوت الراحل المقيم حسن الزبير
ومن لحظتها وانا معجب بها وهي واحدة المساجلات الظريفة التي كانت تتم بين د شادول والراحل حسن الزبير
تحاياي
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: الامين موسى البشاري)
|
اخونا اللمين علك طيب
يا زول القصة شنو ؟ لسة البوست بتاع سوزان ما شلنا الصيوان بتاعو تقوم تطلب القيامة ؟
علا انا عندى الحل وامسك عندك من نمرة واحد
1 . عليك بالزواج فبة تتجدد الدماء
2 . عليك بالتانية ان كنت جارى واحدة بحبلك
3 . عليك بالتالتة وكان ما نفعت شوف ليك حفرة غريقة وتلب فيها
بالجنبة وكدة
اسع الغتاتة العليك شنو انت وكت زهجان نحنا لسة شنبنا ما ختة
قال القيامة قال ( انشاء اللة ربنا ما يسمع منك ) امين
| |
|
|
|
|
|
|
|
|
|
Re: إن شــاء الله القيامة تقـــوم (يوجد احباط)!!! (Re: امير عبدالدائم)
|
| Quote: يا زول القصة شنو ؟ لسة البوست بتاع سوزان ما شلنا الصيوان بتاعو تقوم تطلب القيامة ؟ |
نســــــوي يا امير يا أخوي ما فضلت لينا ضلعة واحدة سليمة وزول عبرنا ما في
ولا دا الهــوى العذري البقولو عليهو الفنانين
Quote: علا انا عندى الحل وامسك عندك من نمرة واحد
1 . عليك بالزواج فبة تتجدد الدماء
2 . عليك بالتانية ان كنت جارى واحدة بحبلك
3 . عليك بالتالتة وكان ما نفعت شوف ليك حفرة غريقة وتلب فيها
|
والله حلك سمح تب آآآآآآزول علا شوف لنا الرابعة
اصلى اخوك قلبو لوكندة بس وفيهو أربع غرف فاضية
التليب دا نخليهو في الأخير بعد يكملو الاربعة
شرفت بوجودك الدائم يا ود عبد الدائم
| |
|
|
|
|
|
|
| |
الامين موسى البشاري
الشفيع وراق عبد الرحمن
أبو عبيدة البصاص
salah ismail
شول اشوانق دينق
د.يوسف محمد طاهر
أحمد عبدالوهاب الأحمدى
عمران حسن صالح
خالد المحرب
Khalid Saeed
Mohammed Haroun
Mohamed Abdelgaleel
عبدالله ود البوش
فيس بوك
تويتر
انستقرام
يوتيوب
بنتيريست