|
|
|
 Re: ود بادي يهجو المؤتمر الوطني (Re: Afraa Sanad)
|
Quote: رسالة إلى ادروب...
قول ليّ يا ادروب
عليك وجع السنين...
خجيتو ليه؟؟؟
خليهو يا ادروب
عشان ناساً غلآبة وكادحين...
خليهو يا ادروب
عشان ناساً بتحلم من سنين
بوطن صحيح من غير جراح
من غير ألم، من غير انين
خاجيهو ليه؟؟؟
خليهو يا ادروب
عشان شجر الأراك
يفرح يعانق ديم عرب
وترب هدل
ووطن السمآح ينسى الجرآح
ينسى الحصل...
قول ليّ بس...
خاجيهو ليّه؟؟؟
وادوّك كم؟؟؟
مبلغ بِسد رمق الصغار؟
والآ الفتات،
من بعد ما نهبوا الديار؟؟؟
خلوها خاوية على عُروشا
كما الصريم وضح النهآر
لا راعو لطفلاً
بيصرخ في الظلآم...
لا احترمو شيخنا بعد وقآر...
بمدخل الدين...
جونا داخلين التتآر...
خجوها خج...
خج السوآد...
خج الرمآد...
ما خلو شِي
ناس لابتحس، لاتختشي...
ما بين مُرآبي ومُرتشي...
وسفآك دماء نام مُنتشي
من بعد ما لعق الدماء
من بعد ما انتهك الحِمى...
جوغة ضِبآع،
وقطيع سباع متوحشة...
اسرآب نسور
تغتات على جُثث الصغآر...
خجوها خج وضح النهار...
قول ليَّ بس...
خجيتو ليه؟؟؟
وشِن دار تجيب
لي ها الوطن!!!
غير المِحن
غير التخلف والفتن...
غير الشتات
غير العذآب...
غير الكلآب
تنبح تهوهِو ليل نهار
شيخها العجوز دقولو طآر
ينقُز يهِز...
ما راعى في نفسو الوقار
ينفخ نفخ!!!
زي الورر
عامل جعيص...
عامل خطر!!!
قول ليَّ بس...
شِن دار تجيب لى ها الوطن؟؟؟
غير الضياع
غير الفِتن؟؟؟
غير ناس بتعترف النفآق...
عشرين سنة!!!
من الضياع، من العناء
من الألم والعكننة
من الوجع ومُر الضنى...
وبرضك تخُج!!!
يا زول اقيّف...
خلي الوطن
ينجمَّ من رهق السنين...
خلي الغلآبة الكادحين
يرتاحو من طول الأنين
يتنسمو الحُريّة
في الزمن الضنين...
إنصرفو، لا صفى، لا انتِبآه...
يا عُصبة الحُكم اللعيّن...
يا ظآلمين...
يا غادرين...
إلى الجحيّم...
إلى الجحيّم...
إلى الجحيّم...
إلى الجحيّمــــــــ...
معاوية المدير... |
| |
  
|
|
|
|
|
|
|
|
Re: ود بادي يهجو المؤتمر الوطني (Re: جلال جبريل)
|
Quote: أخت سناء سلام
الصوت دا ما أظين صوت الدكتور: محمد بادي العكودابي
والحاجة العرفا أنا الدكتور محمد ساب تلقي الحجج دي من زماااان
مطلوب حضور عثمان رغيم لتأكيد الموضوع إذا مامتأكدة |
الأخ جلال جبريل تحياتى
انه صوت الأخ محمد بادى.
اخر مؤتمر للحزب فى القناطر الخيرية
حضره محمد بادى والقى فيه قصيدة عصماء أدمت الأكف.
ولك الشكر
| |
|
|
|
|
|
|
|
|
|
Re: ود بادي يهجو المؤتمر الوطني (Re: Kostawi)
|
| Quote: ياخالد التسجيل mp3 شوف امكن ما منزل ال software |
شكراً كتير وعفواً جزيل
أخوك يادوب بفتش حروف الكي بورد ويخطأ ويصيب
يا حليل فيسل هليل كا بعلمني
عمواً شكرا كتير
ولك التحية عطرة
أنت لمتي في وين؟؟ عشان نقدر نحصل علي
| |
|
|
|
|
|
|
|
|
 Re: ود بادي يهجو المؤتمر الوطني (Re: Afraa Sanad)
|
دكتور ...
محمد بادى ..
دائما هو ..
أصيل ...
قوى ..
و متحدى ..
و مصادم ..
كما عهدته ...
نفس ...
الصوت ..
الجهورى ..
و الكاريزما ..
و موقفه من الكيزان ..
منذ ايام الجامعة ..
و داخليات حسيب و الرازى ..
تحياتى ل الرواسى ( أمحمد ود بادى ) ..
و لفردته فى ذلك الزمن الجميل ( أمحد أحمد ود التوم ) ...
فالبرغم من ( جعوليتنا ! ) المفرطة حماقة !!!
كنا نحب السنجك ود بادى الذى كان اكثرنا قومية و إتحادية و جعلية و مريخية ...
...
شكرا و سلامات عفراء سند على هذا البوست الجميل ...
عبدالماجد
| |
|
|
|
|
|
|
|
|
|
Re: ود بادي يهجو المؤتمر الوطني (Re: أحمد الشايقي)
|
هذا الشعب متحمّل
وناسو يأنّو
وإنتو خلفتّو فوق راسو
وبقيتو تغنّو
يا الإنقاذي أحذر منو
بكرة بيكسر أغلالو
ويوريك جنّو
شكراً الأخت جريت حفيان وفتشتا
تم إرسال القصيدة في أميلي الخاص من
أخ عزيز ولك الفضل
أن نسمع هذا الأبداع من شاعرنا المناكف الوفي الوطني
دكتور محمد ودبادي
معهدنا له ني
والني عندو لي النار
وهو قابض النار
ديل أُماتن كحلوهم وهم صغار بالشطة
وأبواتم وصوهم
الرجال ماتشوف راحة كراعك ( مابجري ويفز )
وزي السندالة قلوبهم
وسايمين الروح وقولهم الروح
فوق يد الخالق
| |
|
|
|
|
|
|
|
|
|
Re: ود بادي يهجو المؤتمر الوطني (Re: الامين محمد علي)
|
شكرا يا عفراء
رابط الحفظ:
http://www.sudanvoice.net/v2/3-3.mp3
نص القصيدة:
هذا الشعب متحمل وناسو يئنوا
وإنتو خلفتو فوق راسو وبقيتوا تغنوا
يا الإنقاذي هذا الشعب احذر منو
بكرة بيكسر أغلالو ويوريك جنو
بلدنا الرَّبتك بالإنقلاب جازيتا
قلبتها لاورا ومن الوريد حزيتا
كفاك يا المؤتمر جازيتا والله أزيتا
يا الحاميها وحراميها ومطلع زيتا
شدرة المؤتمر رمز الخراب والشوم
ثمارا المرة ما بتنزل من الحلقوم
يوم تسقط رؤوس في الحلبة تقع وتقوم
شعب العزة يقطع شجرة الزقوم
يا ناس القصر الليلة كيف أصبحتو
نزع الروح أليم والكرسي كان ودعتو
رفعنالكم علم وجيتوا اشَّبحتو
حكمناكم نُضاف وحكمتو واتربحتو
يا ناس القصر الليلة كيف قيلتو
شاطي النيل حداكم وفيهو اتنيلتو
شفتو الإتحادي وبالفزع ميلتو
بعد أب رسوة جال ما أظنكم كيَّلتو
يا ناس القصر الليلة كيف أمسيتو
راجيكم رحيل إن شاء الله اتعشيتو
صدقتو الجرايد وفيها اتغشيتو
حزب الإتحادي الليلة راجع بيتو
راحوا أهل الفضل أهل العقول والقدرة
وبقوا أسيادا أصحاب الوجوه البدرة
حليل أهل المكارم واليمين الخدرا
متل أبواتنا ديل في زمنا فيهم ندرة
الدين مو دقون فوق زول سمين وبدين
الدين البعاف الدنيا لي بعدين
الدين مو دعاية ودندنة وتدوين
الدين المعاملة للبعرفو الدين
قال مؤتمر وطني وكذب من قال
دا متآمر ولاوطني وكمان دجال
حكم الشعب يصدر فيه بالإجمال
بالإبعاد والتأبيد مع الإشغال
دا حال المؤتمرجية الجيوبا ملانة
قالوا بسيطة نرشي فلان وندي فلانة
قايلين بشتروهم بالفلوس والهانة
ما بياكلوا الحرام لو يسكنوا الجبانة
رصيدكم في البنوك سنداتو مال مسروق
ونحنا رصيدنا حباً في القلوب مدفوق
هي لله هي لله هتافكم حالية المنطوق
دخلنابو المساجد وإنتو الدخلتو السوق
يا أهل المناكر والعقول الماكرة
شعبنا ما نساكم ولا فقد للذاكرة
بيوت أشباحكم المنصوبة لسع فاكرة
وأعواد المشانق في السنين الباكرة
يا الإنقاذ بيوتِك عنكبوت وقزاز
وكيف بتجدعي الناس النفوسا عزاز
يا بلد الكرام والعُلَما والأفذاذ
كيف تتجرَّع الحنضل من الأكواز
فكر المؤتمر متأيدزا ومُسرطن
وثيقة الإنضمام تفقد عفافك شرطا
الإنقاذ دي بيت من طين وبدا يتفرتن
وكان طلع النهار سجم الدقون الوِرطن
السرعة وردَّك يا المؤتمر واتغتى
الإستحيوا ماتوا أريتك زيهم لو مُتَّ
رؤوس الفتنة ديل والخانوا للكسكتة
جونا مرشحين والريحة مالية الحتة
فوق كم يا المؤتمرجي بلا فهم متنبِّر
لا طين في الخلا ولا في البحر بتشبر
قولك في مديح حالنا الصِّبِح متغبر
زي القام بعد حرجم ضبيحتو يكبِّر
بعد جرَّبنا ما بنصدق الكضاب
والنطَّالنا بالشباك ما بنفتحلو خشم الباب
شوف المؤتمرجي الماكر المِلْعاب
غيَّر اسمو تاني وجانا بالقرقاب
أصلو الشعب ما بجيب تاني كوز مطفوق
الجلب الوبا وجلد النساء في السوق
السوداني ما بيهدأ ومزاجو يروق
إلا يساوي قبرو يجرُّو بالواسوق
يبكي المؤتمرجي وصاح وين عصفوري
كان في إيدي فكِّيتو وقلعت ضفوري
دي معركة للكبار مو لعب دافوري
فريق رفع العلم وفريق بني كافوري
من يوم جيتنا بالشباك وحكمك جبري
ليك عشرين سنة ويادوب بنيتلك كوبري
أهلنا اترصوا من توريت ولا حد عبري
ما بيجيبوك حتى ان كان كسيتهم تبري
كل ما جانا قال السد وبدا يتفشر
السد يا جماعة الخير غسيلو منشَّر
نص راسمالو راح والباقي دين إتعسر
وأهلنا في الصحاري عطيش وضاقوا الشر
مرشح مؤتمر شان صوتي شال وأداني
حلال أم حرام لي مواطنا سوداني
فلوسكن يا الحبيب سيد العقل أفتاني
شالوهن تحايل ورجعوهن تاني
شيل عند الضرورة القصوى حاجة خفيفة
وأدي النايب البتشوف صحيفتو نضيفة
قالوا الإنتخاب عملية حرة شفيفة
ما أظن يا الحبيب أصلو الكراسي وريفة
شن الحملة دي الواقف قطارا مفشق
وترجع صاده كل ما المؤتمرجي يعشِّق
مهما ترشي بالأموال ومهما تبشِّق
شعب العزة حالف ينقرك بالدبشق
كتِّر مكرفوناتك ولعلع فيها
أصلو الفيكم اتعرفت وبان خافيها
نار الفتنة شبيتا وجدعتنا فيها
وغير الاتحاديين منو البطفيها
| |
|
|
|
|
|
|
|
|
 Re: ود بادي يهجو المؤتمر الوطني (Re: Omer Abdalla)
|
Quote: فوق كم يا المؤتمرجي بلا فهم متنبِّر
لا طين في الخلا ولا في البحر بتشبر
قولك في مديح حالنا الصِّبِح متغبر
زي القام بعد حرجم ضبيحتو يكبِّر |
والله دي بالغت فيها يا دكتور...
وصفت حالهم ونفسياتهم بدقة عجيبة خلاااااااااس...
نسأل الله السلامة...
وشكراً بتنا عفراء على هذه القصيدة...
| |
|
|
|
|
|
|
|
|
 Re: ود بادي يهجو المؤتمر الوطني (Re: elhilayla)
|
الاعزاء
عفراء
جلال
خالد
سيف اليزل
كوستاوي
ازهري
عبد المجيد
احمد الشايقي
ود محجوب
الامين
عمر
الهلالية
لكم التحية والمودة .. هذه القصيدة احدث انتاج لشاعر الوطن الكبير الدكتور محمد بادى .. ورغم ان نسمات الديمقراطية القادمة من الوطن كانت محملة بغبار كثيف .. الا ان ما وصل منها من دعاشات كانت كافية لتداعب مارد الشعر الكامن داخل صديقنا الفريد.. فكتب هذه الكلمات في شكل رباعيات يوميه جمعناها فبلغت اكثر من خمسين .. ثم سجلها بصوته ..وكانت الدهشة بحد الروعة..
الجزء الذي تسمعونه هو الجزء الثاني .. ارجو ارسال بريدكم الالكتروني حتى ازودكم بالقصيدة كاملة بصوته mp3.. على بريدى
[email protected]
تحياتي
ياسر - ابوظبي
| |
|
|
|
|
|
|
| |
Afraa Sanad
جلال جبريل
خالد علي محجوب المنسي
سيف اليزل برعي البدوي
Kostawi
ود محجوب
azhary taha
الامين محمد علي
Omer Abdalla
أبو الحسين
elhilayla
فيس بوك
تويتر
انستقرام
يوتيوب
بنتيريست