انطلقت اليوم عملية الاقتراع فى السودان وفى البال صوت جمال حسن سعيد وهو يردد الانتخابات يوم 11 او 12 او 13 ابريل والاعلان عادة هو وسيلة تطوير او تذكير بمنتج او خدمة اوتسويق منتج بغرض زيادة المستهلكين لزيادة الربح او محاولة تثبيت المستهلكين الحاليين على منتج ما لتفادى الخسارة فى حال توجههم لمنافس اخر. خلال الايام الفاتت ثبت بما لايدع مجالاً للشك اننا شعب ( اوصطه ) كما قال لى زميل يتندر على قصيدة الاستاذ محجوب شريف المفوضية القومية للانتخابات عذبتنا عذاب (خلف الله) بالانتخابات يوم 11 و صوتك حق عليك ولازم تصوتوا وابراهيم كوميك متدين من ست الشاى زى التقول ممتحن وقررنا ان نمشى معاهم من اجل انتخابات حره ونزيهه وفى البال صوت المزيكا تن تن تن تنتن ومحاولة ربط زمن القرافيك لشعار واسم المفوضيه معها. واهتمام مبالغ فيه بترشح ياسر عرمان وكامل ادريس والبقيه باعتبار ان اخر انتخابات اذكرها كنت ما ازال صغيراً جداً لانتخاب مرشح. المهم اتوكلنا على الحى الدايم وقوول كدى مشينا على التسجيل واى زول بلقاهو بشجعوا على التسجيل بعض الكسالى بيقولوا لى ياخ الكيزان ديل فايزين فايزين اسجل لى شنو والبعض الاخر يقول الناس ديل شبعوا احسن يقعدوا هم بدل يجوا ناس جعانين اول ماتبادر الى ذهنى الاعلان العبيط الذى يردد فيه فرفور جربنااك شامبيون وفزت براك شامبيون ومجموعة تجرى نحوه لاستلام الكاس بنفس عباطة الاعلان نصحت من يقبل النصح المفوضيه قالت الناس لازم تسجل عشان تكون الانتخابات حرة وامنه ونزيهه تِن تن تن تن تن و تِن تن تن تن تن انتابنى احساس انى مارتن لوثر كنق باعتبار انو عندى حلم بالديمقراطيه والمساواة بينى وبين الناس التانين وعندى حلم انو احاسب المسئوليين عن اهدار اموال الشعب ودمائه وعندى حلم بمشروع ثقافى سودانى خالص بدون تدخل الحاكم وكان عندى حلم بسودان موحد ديمقراطى وعندى حلم ان لا احكم بواسطة شخص يستخدم الدين كوسيلة لجلدى واكل قروشى وعندى حلم انو نبنى نبنى نبنى مسرحاً ونادى مصنعاً وبوستة عندى حلم انو الديمقراطية تكون حقيقية وليست كلمة للاستهلاك اليومى من قبل الاحزاب المعارضة والحاكمة تِن تن تن تن تن و تِن تن تن تن تن قال صديقى: الحركة الشعبية سحبت ياسر عرمان قلت ليهو ليه ؟ قال: قالوا البشير قال ليهم تنسحبوا استفتاء ما فى ! كيف يعنى استفتاء ما فى, البشير ده ما فالح ولا شنو الاستفتاء والانتخابات ما عندهم علاقه ببعض قال لى الناس ديل اتفقوا وسرحت جد وللأسف ظلت كراعى كما هى فالفرح تأجل الى حين وكبرت الافكار منو الاتفق مع منو؟ الحركة الشعبية مع الكيزان طيب ديل اصلاً متفقين الحركة الشعبية مع احزاب جوبا طيب ديل اصلاً متفقين الكيزان مع ناس جوبا طيب المؤتمر الشعبى اسياد الانقلاب مع ناس الامة فى التراضى الوطنى مع الاتحادى ياهو السيد رجعوا ليهو املاكوا ويشحدوا فيهو شحده عشان يرجع السودان ورجع طيب يكون مع الاصلاح والتجديد مبارك الفاضل ده ما كان معاهم فى حكومة السجم دى طيب ديل كلهم اصلاً متفقين تأجل الحلم الخاص بى واكتشفت ان جميع الاحزاب تتأمر علينا نحنا المواطنين المساكين ديل. واتذكرت رجل مشرد حكيم فى السوق العربى بعد خروج مظاهره من الجامعة قال وهو ينصحنا والله الا ترجوا عمكم كلنتون. قررت ان انعل ابو اليوم الذى تحمست فيه لتلك النخب التى افترضت فيها معرفتها التامه بأن الديمقراطية قد تأخذ وقت كثير لتتنزل كواقع فعلى بين الناس وافترضت انهم يدركون ان الاهم الحصول على مقاعد الجمعية التأسيسيه والمجالس التشريعية مما يجعلهم مراقبين لاى حاكم ويدوهوا بالصرمه القديمه فى نص راسو اذا ما احترم الناس. لكن كان عندى حلم التبرير الذى ساقه بعض المنسحبين انو الانتخابات مزورة والمقاطعه ستجعل الانتخابات غير شرعية كلام يؤسس للعن الظلام بدلاً من ايقاد الشمعة يعنى هذه المعارضة التى اعتدمنا عليها طوال السنين التى مضت من عمر هذا النظام لاتدرك ان التغيير من شمولية الى ديمقراطية يتم بتمرحل ويحتاج الى نفس طويل والله يومنا ابيض كما تقول امى العزيزه الحملات الانتخابيه وبابكر حنين كأعلانات ذكرت الناس بسوء النظام وحق الشعب المسكين ده , المعارضه اذا واصلت بنفس النهج (اذا سلمنا بفوز البشير) الم يكن من الممكن اسقاط المؤتمر الوطنى فى الانتخابات القادمه واحد خواجة قال لى بلدكم دى مالها قلت ليهو يازول احترم نفسك مالها بلدنا قال لى ياخ الناس دى عارفه الانتخابات من سنة 2005 وعارفين انو الناس ديل هم اسه الحكومه وبدوا يعملوا حملاتهم وهم عارفين يمكن يلقوا مضايقات من الحكومه والعالم دفع فيها دم قلبوا عشان تقوم ! مالهم خلوها؟ قلت ليهو That’s what we called الحردان حردوها للمؤتمر الوطنى قال لى اها والناس ؟ قلت ليهو الناس بتصيح فى الفارغه وساجورهم ما انفكا ضربنى وقال لى انت وقت عارف الكلام ده كلو المقعدك مع العواليق ديل شنو قلت لى صاحبى سيبك من الناس دى ارح نصوت ونحنا فى السكه فتحت البى بى سى لقيت حليمه متحزمه ومتلزمه وقالت العملية متوقفة فى مركز من مراكز الديوم الشرقيه لانو الـBallot paper الجات بتاعت منطقة تانية وهناك بعض المواطنين صوتوا لذلك سيتم التحفظ عليهم ومعالجة المشكلة وهى الان تبحث اى مسئول فى المفوضية To clarify وفى واحد فى عطبره مرشح نزلوا ليهو الرمز بتاعوا بالغلط قبل ما اصل مركزنا قالوا فى مشكله انو مرشح الحزب الاتحادى اسموا سقط ومرشح المؤتمر الوطنى اسمو مكرر يعنى ذلك ان المفوضية قد ارسلت التصميم بهذة العلات للطباعة فاكتشفت ان المفوضية ايضاً متأمرة على الشعب المسكين ده
Quote: تأجل الحلم الخاص بى واكتشفت ان جميع الاحزاب تتأمر علينا نحنا المواطنين المساكين ديل. واتذكرت رجل مشرد حكيم فى السوق العربى بعد خروج مظاهره من الجامعة قال وهو ينصحنا والله الا ترجوا عمكم كلنتون. قررت ان انعل ابو اليوم الذى تحمست فيه لتلك النخب التى افترضت فيها معرفتها التامه بأن الديمقراطية قد تأخذ وقت كثير لتتنزل كواقع فعلى بين الناس وافترضت انهم يدركون ان الاهم الحصول على مقاعد الجمعية التأسيسيه والمجالس التشريعية مما يجعلهم مراقبين لاى حاكم ويدوهوا بالصرمه القديمه فى نص راسو اذا ما احترم الناس. لكن كان عندى حلم التبرير الذى ساقه بعض المنسحبين انو الانتخابات مزورة والمقاطعه ستجعل الانتخابات غير شرعية كلام يؤسس للعن الظلام بدلاً من ايقاد الشمعة
يبدو أن الحلم تأجل لكل الشعب السودانى ؟
كما أن تبرير المنسحبين لا يؤسس للعن الظلام من إيقاد شمعة ولكن لكى لا يضفى شرعية لحكومة مطالبة دولية مما يعوق
كل أسباب التقدم والتنمية لذلك طالما أن الإنتخابات مزورة قبل أن تبدأ فخيراَ أن نلعن الظلام من أن نوقد شمعة تسوقنا إلى
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد كابيلا
فيس بوك
تويتر
انستقرام
يوتيوب
بنتيريست