|
Re: ما بلقى جنبكم وطن فاضي ؟ .. بس يكون إيجارو معقول . (Re: Emad Abdulla)
|
إنا هنا باقون فليشربوا البحرا نحرس ظل التين والزيتون ونزرع الأفكار , كالخمير في العجين برودة الجليد في أعصابنا وفي قلوبنا جهنم حمرا إذا عطشنا نعصر الصخرا ونأكل التراب إن جعنا .. ولا نرحل وبالدم الزكي لا نبخل .. لا نبخل .. لا نبخل هنا .. لنا ماض .. وحاضر .. ومستقبل
و لن نرحـــــل
لن نرحـــــل
لن نرحـــــل
| |
|
|
|
|
|
|
Re: ما بلقى جنبكم وطن فاضي ؟ .. بس يكون إيجارو معقول . (Re: احلام وهبي)
|
يا عماد عندنا صاحب لبنانى ال Green Caed فى أمريكا ما ظبط معاو . عندو عم فى فنزويلا طلب منو يترك أمريكا ويجى ضرورى عشان يشتغل فى تدريس اللغة العربية . بتكلم مع عمو فى التلفون . شو ياعمى ؟ انا اللغة العربية على عاتقى ؟؟؟ انا ما بدى شغلات تذكرنى هيك انى لبنانى . يقطع حريش ال .... ..
والله يا عماد أخوى بلدنا دى كان اتصلحت احسن منها فى الدنيا كلها مافى . الا بس تقول شنو .
تحياتى
| |
|
|
|
|
|
|
Re: ما بلقى جنبكم وطن فاضي ؟ .. بس يكون إيجارو معقول . (Re: Osman Musa)
|
Quote: ملحوظة : السايفون مهم .. مهم شديد . |
شرط عينا يعرفوك كيف ديامي
--------
في موسم الهجرة الكبير و البحث عن منافي و لقمة حلال . . في بدايات الزمن الغيهب دا ، كنت متلمي لي على شلة من اولاد الديم في الرياض بحكم المساكنة و لاحقاً المصاهرة ، المهم فردتي " نزار عثمان " * الله يرحمو و يبشبش الطوبة التحت راسو كل ما يجيب لي خبر ديامي رجع البلد بسألو : اها خلاس حفر السايفون ؟ يضحك لما يقع . . آي السايفون اهم زول . . دي قضية ديامية مركزية ذاتو ياخ !!
وطن ما ليك فيهو وطن مجرد واطا لمة ناس
عيييييك يا حليلو
* ياخ معقولة الزول السمح دا مات ؟ . . يعني اسي كان مشيت الساحة الشعبية ما بلقاه مع الشباب هناك ؟
| |
|
|
|
|
|
|
Re: ما بلقى جنبكم وطن فاضي ؟ .. بس يكون إيجارو معقول . (Re: قيقراوي)
|
ياشاب فى الشعر الثورى الزمان كان الوطن والحبيبة وااااحد...يعنى مطلبك دا يشكل رده على كل تاريخ النضال والعمل الثورى..يعنى ممكن تقول وطن فاضى وحبيبة ناصية حتى يستقيم الأمر أو بيت ناصية وحبيبة فاضية...
على العموم أتصل بى أنا بعرف سمسار نجيض بلقى ليك وطن لكن أتفق معاهو أول باول مايقول ليك اومبامنا وعشمانا وسارتانا وبعدين زييييطك يمحنك ويمحن كل طلائع البحث العلمى عن وطن..
ياعمدة أنا بفتش عن معارضة بمرتب مجزي..تجيد طباعة البيانات وترتيب الأولويات والمظهر مهم جداً لولقيتها اتصل على الرقم 1964 والمفتاح أنقليزى ...يامرسى
| |
|
|
|
|
|
|
Re: ما بلقى جنبكم وطن فاضي ؟ .. بس يكون إيجارو معقول . (Re: سفيان بشير نابرى)
|
. يا عماد عبدالله سلامات وعندي ليك إقتراح أصلو الدنيا دي بكترة الإستريس والتوتر الشديد الفيها (والذي يثبط جهاز المناعة في الجسم) ما حا يكون فضل لينا فيها كتير عشان نعيشها! عشان كدا أبني لينا خارطة طريق سريعة سريعة كدا لوطن داخل وطن نجي نعيشو زي ما دايرين، مثلآ جزيرة داخل الخرطوم أو حلة فاضية! وأخوي معماري بساعدنا في تصميم وبناء منازل متجاورة لعائلة سودانيزأونلاين بمواد بسيطة وبأقل تكلفة!
رايك شنو؟
_________ كل زول يحق ليهو إختيار جيرانو لوووول!
| |
|
|
|
|
|
|
Re: ما بلقى جنبكم وطن فاضي ؟ .. بس يكون إيجارو معقول . (Re: خدر)
|
Quote: لو قاصدة المتصفح حيدر يا هدير , خليني اطمنك , سيد حيدر لو اديناهو راس خيتنا حايولع فينا بي جاز تافه صلاحيتو منتهية خافي الله فينا و شوفي لينا مهندس تاني |
جيد لأمي ديك يا خدر العرفتني الليلة هدير .. هههه طوااالي شابكني حيدر!
لا لا ما تخاف وتشيل هم من هسه! بقصد أخوي على أرض الواقع، معماري شاطر ومجتهد وحا نعيش في المدينة المفترضة دي بي our rules وطبعآ جيران عماد بالحيطة حا تكونو إنت وود جبرالله!
بس أسرعو في الشغلة وعجلو لينا بالخارطة الحلم دي بالله!
| |
|
|
|
|
|
|
Re: ما بلقى جنبكم وطن فاضي ؟ .. بس يكون إيجارو معقول . (Re: Adil Osman)
|
قـطـعـة أرض...
وطناً متمسح في فِجاج الدنيا مليون ميل مُربع طول عرض.. وهموم أهلنا الفيهو يكدحوا ليل نهار قطعة أرض! يا أهلنا يا إبل الرحيل.. شايلة السُقى وعطشانة ما بتقدر تعاند وتعترض.. مدخور عشمكن إنو في حال السفر.. تتيمموا ترابو الطهور وتصلوا تدوهو الفرض.. وما بتعدموا الشبر البيستركن أكان حكم القدر وواحد قِرِض.. وإن شاء الله ما يبيعوهوا يوم.. شان ما صقور الجو تنقرنا وتفوت.. وتصبح بطونها قبورنا وكتين يكملن أيامنا والأرواح تموت.. يا أهلنا، يا القاعدين تحت ضل العمارات والبيوت.. مبنية بطينة الحرام.. وأساسها أوهن من بيوت العنكبوت.. إنجمعوا قوموا نشد زواملنا ونفوت.. نرحل نفوت، ناساً بياكلوا لحوم بنى الإنسان، وحاديهم ظلوم.. نرحل نهار والفأل سحابة تظلنا تبارينا فوقنا دوام تحوم.. باليل يداعبنا النسيم تسهر تأنسنا النجوم يا أهلنا يلاكم نقوم.. نمشي الشمال.. نسكن في رملات الجروف.. الناس هناك عُدال حُنان وهم السكن ما منو خوف.. نسكن في أعشاش الطيور.. تفرح تغنيلنا الصباح ما الطير هناك ولوف عطوف.. والناس نفوسها الطاهرة تخدع إستحالات الظروف.. يا أهلنا يلاكم نقوم.. نمشي الجنوب.. في غابة الأبنوس بنسكن دون إيجار.. وسُبُل المودّة البينا بين ملوال وجون مفتوحة ما بتقبل حِصار.. المنقة والباباي، وحبات المطر، وزاهى الخدار.. نفرح معاها، معانا تفرح تذدهر.. ويعم ربوعنا الإذدهار.. يا أهلنا يلاكم نقوم.. نمشي الغرب.. نرقص مع عروس الرمال نفرح نعانق كردفان.. الناس هناك زي التبلدي.. جواهم الخير والأمان.. نسكن تحت ضل الدليب ما بالضرورة شقق وبيت.. وحتى السُحُب لو أمطرت ما تخافوا، بتمطر حنان.. يا أهلنا يلاكم نقوم.. نمشي الشرق.. نسكن مع أدروب خيم منصوبة في وسط الأراك.. (دبايوا).. كسلا الحلوة.. يا القاش جينا واقعين في حواك.. ننضم أغاني الشوق اليك بين الخدار ننساب معاك.. ننجمة من حر الهجير توتيل نقيل في ضراك.. يا أهلنا يلاكم نقوم.. نسكن بوادينا الحُنان.. في القرية ننعم بالأمان.. الناس هناك عُدال حُنان.. ونفوسهن، إن ضاقت أرض، تسع اللضاق بيهو المكان.. يا أهلنا يلاكم نقوم الناس هناك عُدال حُنان...
معاوية المدير... ســـــــــــــــــــلام أخي عماد ليك وللجميع...
| |
|
|
|
|
|
|
Re: ما بلقى جنبكم وطن فاضي ؟ .. بس يكون إيجارو معقول . (Re: الملك)
|
يعنى كمان ولاتمليك؟
إيجار!! إيجار, وصاحب الوطن عاادى ممكن يجيب ليك البوليس (ويخت ليك عفشك فى السهلة)
ويكون السبب إساءة إستخدام
غايتو اللايف بلان بتاعنا توتلى اتغير ,
نقعد هنا, لما يشيلونا فى صندوق على جناح بعوضة إسما سودانير.
كمان العوجة لو قاموا جماعتنا ديل , صفقوا لإيران, إنا لله بس.
| |
|
|
|
|
|
|
Re: ما بلقى جنبكم وطن فاضي ؟ .. بس يكون إيجارو معقول . (Re: Emad Abdulla)
|
يا هدير .. احكي ليك قصة لذيذه لمن إتحول حيدر بَلّيل الي متصفح لقيتك بتكتبي تاني يوم عادي و انا طبعا ملخبط بينكم و كنت بضحك في الناس البقروا اسمك هدير و ما كنت عارف اصلا انو حيدر اختو بتكتب هنا قلت بكري ده جن ولا شنو , يرفدو بالعربي و يرجعو بالانجليزي و في نفس اليوم ؟ لحدي ما دخلت بوست الشباب بتهكموا علي فصل حيدر و فهمت الفرق .
وطن عماد ده شرط انو انت و حيدر تكتبوا اسماءكم في لافتات ابواب بيوتكم بالعربي عشان ما اكون ماشي لي حيدر ادخل بيتكم
| |
|
|
|
|
|
|
Re: ما بلقى جنبكم وطن فاضي ؟ .. بس يكون إيجارو معقول . (Re: الفاتح ميرغني)
|
لقيتو ليك يا عماد فى قلبى الكبير يضمك وكل الشعب السودانى الذى قرف من حكم الاخوان المسلمين واساليبهم .. الحالة مقلوبة فى وطننا منذ عام 1989 وللان رغم حيل الانتخابات وكرورها .. ولن تنعدل الحالة ما دام انت وانا وهم بعيدين عنه فى المنافى المختلفة .. والتى فرضت علينا....
اذا اتحدت ارادتنا ورؤانا وهى اساسا متسقة لتغير الحال ولعاد الينا الوطن ولن نحتاج الى وطن الايجار لان المؤجر دائما لا يريح المستاجر وينكد عليه بالحديث الممل وبيت الجدرى ولا بيت النقرى ..
لكن داير احكى ليك حكاية لى مع الفرعون وردى عندما جاءنا فى ابوظبى واثناء لقائه بنا بالنادى السودانى قال لى رايتك فى مكان ما ولكن نسيت فقلت له تتذكر ان اخر لقاء صحفى لك تم اجراؤه قبل انقلاب الانقاذ اجرته معك صحيفة الايام وبعدها بيومين تم الانقلاب قال نعم قلت انا كنت مع الزميل عثمان عابدين الذى تم فى ذلك اليوم ..
ضحك وردى وقال لى طيب ياخى ما تجى تعمل واحد تانى يمكن تتصلح . .وضحك الجميع للنكتة وسرعة بديهة الفنان الكبير وبعده حكيت له قصة الشحات الذى يجوب السوق العربى ويردد.. يحلها الشبكها ... فمد له احد اصدقائى من المفصولين من الجهاز القضائى له النصيب من بعض المال وقال له.... والله الشبكها ما يحلها... بالله ابعد من هنى ..
| |
|
|
|
|
|
|
Re: ما بلقى جنبكم وطن فاضي ؟ .. بس يكون إيجارو معقول . (Re: عبدالمجيد المقابل)
|
ساعدنا بالمواصفات يا عمدة...
عايزو ناصية والله عادي...؟؟ زنكي والله تلقيمة...؟؟ سقف ليبي والله جريد؟؟ اوضتين وبرندتين معكوسات والله افرنجي؟؟؟ برطن والله فصيح؟؟؟ حار جاف صيفا؟؟ والله دافي ممطرا شتاءا.. بي رواكيب ام قطاطي؟؟ طوب احمر والله اخضر؟؟؟ اسمنت والله ثري دي بانيل زي بكري واسماء...؟؟ ارضي والله بي سطوح؟؟؟ بابو بفتح شرق والله غرب شمال ام جنوب؟؟؟
فيه تلج مبالغة والله مافيه؟؟؟ بي دكاكينو والله بدون؟؟؟ جنبو ست عرقي والله خلوة؟؟؟
هو الوطن دا بأجروه ساكت؟؟؟
| |
|
|
|
|
|
|
|