|
دعواتكم لزميلنا المفكر د.الباقر العفيف بالشفاء العاجل
|
|
 Re: محمد جبارة نغم الحزن الذى يغسل الوجدان (Re: محمد عثمان)
|
محمد عثمان
دائما موجود حيثما كان الجمال
تمنحه من فيضك الالق
لك ودى وشكرا على غناء محمد جبارة
دافى يطلع من القلب
يغطى الزول وكتين يهجد
ويدفى الزول البكون بردان
بردان للناس
ومشتاق للقرير
والطمبور الذى يدفعك دفعا للنواح والحزن
لكنه يبقيك حيا
هو ذا محمد جبارة
استمع اليه فيفيض شجنى
واتجمل به حين يعز الوطن
| |
 
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
قايمة الصباح متكفلتي
شايلة الحليلة على المراح
جبتي اللبن بإنشراح
و الساعة ديك يادوبو ديكنا بدا الصياح
.
.
.
كلمات خطها الشاعر السر عثمان الطيب و هو في بلاد الغربة يحكي و يعبر فيها عن شوقه لوالدته و للبلد ..
له و لمحمد جبارة و لكِ أستاذة سلمى ألف تحية ..
.
.
.
بصوت محمد جبارة الرقيق
.
.
يا يمّـة رسلي لي عفوك ... ينجيني من جور الزمان ..
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: kamalabas)
|
كمال الاخ العزيز
لم التق محمد جبارة فى حياتى
لكنى عرفته من خلال كلماته واغنياته
تلك التى تنغرس داخلك كشتل النخيل
سامقة وعالية
حلوة المذاق رطبا جنيا
له عذوبة صوت يندر مثلها
وله رقة وقوة فى الان نفسه تشجيك
لذا كان موحدا للناس حيث اختلفت قبائلهم
وكان قائدا حين عزت تلك الصفة
فله ننحنى اجلالا
وله نرص كراسى القلوب كيما يقعد فيها متفنجرا بغنائه والحانه السامقات
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: حسن الطيب يس)
|
العزيز حسن الطيب
كنت لمن اكلم امى فى التلفون
اخر كلمة بتقولا لى عافية منك
وامكن دى دافع للحياة عندى
لانه عفو الام دا اهم حاجة فى الدنيا
وكذا كان ابوى الله يرحمهم الاتنين
والبقرب المسافة بيناتنا انهم عافيين منى
الحمد لله
وربنا يديك عفو الام واسعى ليهو ود امى
لانه عفو الوالد ما هين
هسى عاين محمد جبارة دا كان ما عفو والديه كان بقى عظيم كدى؟
والناس تحبه؟
الله يخليهو لينا ويديهو طولة العمر والغنا البدخل الروح
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: Al-Shaygi)
|
الشايقى اخوى
ما تورينى الصورى دى اللت منو ؟
وحاتك يا وليدى ما عرفت
كانت جارتنا الشايقية العاجبة بت ستى نور
امراة معجونة من تمر المحبة وقراصة الحب للاخرين
تعلمت منها نبرة الكلام الحنين المجرور تارة
والمنغم اخرى
تعلمت منها سماع غناء الشايقية
وحمكتهم
فى السكة حديد حيث تذوب القبيلة وتندثر لابد الابدين
تعملت منها ومن خالتى مريم الشايقية
معنى ان تكون انسانا لوجه الله
دون فواصل قبلية
دون اتكاء على العنصر او اللون او الجهة
ماتت تلك النعرات فى تلك الامكنة من القضارف الى خشم القربة الى الابيض
لاتحس الا بالانتماء لكل من حولك
وكان محمد جبارة فى تلك الايام هو من يوقد تلك الرتاين من المحبة
ويشعلها رفقة الفاره البديع النعام ادم
وحملتتنا تلك الاغانى الى مواقع احببناها رغم اننا لم نشهدها
لكنها ظلت تتابعنا
معهم كان اسحق كرم الله ، ومحمد كرم يوقظون الضرام فى النفوس محبة
واحد للاخر
لهم جميعا المحبة وازعم ان الصورة للفنان الذى اعشقه تماما محمد كرم الله
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
| Quote: يحرقنى صوته فابدو كالممسوسة يحرك داخلى شجنا فتنفتح له الابواب يدخل القلب مباشرة لانه يغنى اغنية اعدها من عيون الغناء (يمه ) آخ يايمة |
شكرا سلمى وربنا يرد غربتك وغربتنا كلنا..
لي ذكريات وذكريات مع محمد جبارة والسر عثمان... هذا الثنائي الذي أمتعنا حينا من الدهر..عندما ظهرت أغنية (يما) وتناقلها الناس ورددوها... رددها المزارعون في حقولهم والأطفال على ظهور حميرهم ومساعدي اللواري وهم متحكرون فوق تندات اللواري... أذكر بينما كنا نسير في سوق القرير أنا والسر عثمان الطيب ، نادانا العم أحمد محمد صالح (المأذون) رحمه الله وكان رجلا مهابا من حفظة القرآن وكان يجلس أمام دكانه في السوق... لم يدر بخلدنا أبدا أنه سيعلق على أغنية (يما) حيث أن الرجل معروف عنه بأنه من (المتشددين)إن جاز لي التعبير.. وبدأ الرجل يتكلم عن الأم ويورد الآيات والأحاديث والأقوال المأثورة وأشاد بكلمات الأغنية وموضوعها، وذهبنا من عنده ونحن غير مصدقين...
حدثني السر عثمان الطيب أنه رافق طلاب رابطة مروي بالجامعات في إحدى إجازاته في رحلة لهم لولاية كردفان رافقه فيها الفنان محمد جبارة.وعند رجوعهم بالبص النيسان كانت معهم شابة وأختها في طريقهما للخرطوم.. أدار سائق البص المسجل ليصدح بأغنية لفنان معين ولكن الراكبة أخرجت من شنطتها شريطا وطلبت من السائق أن يشغله... كان الشريط للفنان محمد جبارة والأغنية (يما)...سأل أحد الطلبة الفتاة (هل تعرفين هذا الفنان؟ قالت: نعم.. هو الفنان محمد جبارة... سألها ثانية: هل تعرفين شاعر هذه الأغنية؟ قالت: اسمه السر عثمان الطيب. قال لها: هل قابلت أحدهما؟ قالت: لا.. ثم أردفت أنا من كردفان ومن المسيرية.. لم تصدق الفتاة أبدا عندما أشار الطالب الى محمد جبارة وقال لها: هذا هو الفنان محمد جبارة وأشار الى السر عثمان وقال: هذا هو الشاعر السر عثمان... بعد اسبوع من تلك الحكاية زارت البنت منزل السر عثمان بأم درمان لأنها كما قالت، أمنيتها أن ترى (زينوبة) والدة السر التي غنى لها (رسلي لي عفوك ينجيني من جور الزمان)
مامان
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: maman)
|
الأستاذة القديرة سلمى الشيخ سلامة....
سلام وألف تحية يا غالية
الفنان محمد جبارة قد هيّج علينا الأشجان وأحيا الوجدان وذكرنا بالتي تحت أقدامها الجنان....
| Quote: بتذكرك يا يمة يا يمة |
يا الله يا استاذة ....أبكيتينا ...
كم أفتقدها !!!
ود و تقدير لا ينقطع
....
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: salma subhi)
|
سلمى
الصباح الباهى لونك
وضاحة يا شمس المشارق
الشايقية
غناهن حديثهم ومعاشرتهم تكسب الانسان خصائصهم بمرور الزمن
وخصائصهم الفريدة هى (الحنية)
تربينا على حنيتهم مضاف اليه حنية امنا الخالدة عليها كل الرحمة
تعلمنا منهم ان الكلام الحلو معناه الحياة الحلوة
لزمان ليس باالقصير كان الجميع يجمع على انتمائى لتلك الجهة
وما علموا انى مسكونة بكل الجهات
لكن لغناء الشايقية مدخل خاص فى حياتى
تعلمته منذ اليفاعة وحفظته كما التراتيل الندية التى لا تعتريها
مخافات الزمان
ومنهم عرفت قدر الام
ومنهم تادبنا بحب الام
لذا تجئ اغنية (يمة) لتعبر عن مكنوناتنا
وصوت محمد جبارة يجئ ليعضد تلك المقولات
ويبقى معنى للامومة والام تيار نيل يلفحنا بالقه دائما
لك محبتى
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
Quote: كلمات خطها الشاعر السر عثمان الطيب و هو
في بلاد الغربة يحكي و يعبر فيها عن شوقه لوالدته و للبلد .. |
سلام
شكراً للرائعة الأستاذة سلمى
فالذي بغير جمال لا يرى في الوجود شيئاً جميلاً
فبمفهوم المخالفة أعلم انك تدركين ما ارمي إليه
أنت والفنان والشاعر ما أحلاكم!!!
كما تعلمون لا يُفتى في الفن الشايقي والأستاذ مامان بالبورد وبالبوست ، ولكن
حسب علمي المتواضع ، أن الأستاذ السر عثمان الطيب خرجت منه هذه الدرر وهو
يشتكي غربة الخرطوم ولم يكن خارج السودان والدليل على ذلك ركوب اللواري
وريحة التمر التي يتكرفها المستقبل للقادم من البلد وهو أمر لا يتم في
استقبال القادم من السودان لبلد أجنبي ، ورغم انه كتب الكثير خارج
السودان إلا أن هذه الغربة لها طعم خاص وغريب.
للاستماع لأغاني محمد جبارة أدخل على هذا الرابط:
http://www.albrkal.com/agani/mohamedgubara.htm
الأستاذ الشايقي
سلام
وهل يُخفي القمر
دا ما رب الفن التاني
محمد كرم الله امد الله في ايامه
| |
|
|
|
|
|
|
|
|
 Re: محمد جبارة نغم الحزن الذى يغسل الوجدان (Re: yasiko)
|
سلمي احبك انتي بكل أحاسيسي لانك ملئ بإلاحساس والجمال
لو كانت الغربة رجل لقتلته هذا البوست اخرج لنا
كم هائل من العاطفة تجاه الأم ربنا يمد في أيام
العايشات ويرحم المتوفيات .
حقيقة لم استطع حبس دموعي وانا اقراء كلامك الجميل
وذكرياتك الخالدة وكذلك مداخلات الأخوة المتداخلين
وكذلك اختي الغالية سلمي صبحي واقول ليها رحم الله
والدتك .
سلمي والله الكلام كتير لكن برجع ليك تاني إنشاء الله
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: هاشم أحمد خلف الله)
|
الشفيف هاشم
ولك من الحب ما يعادل حبك واكثر
فالام يا صديقى هى معادلنا الموضوعى فى هذا الكون
هى ملكتنا التى نحميها ومملكتنا التى نزود عنها
هى من ذكرها الحديث مرددا اياها لثلاثة مرات
لذا ما خرج الشعر الا ليقول لنا انها الواجب علينا حمايتها ورعايتها
اذكر ان صديقا لوالدى قال
ـ حججت امى سبعة مرات وكنت بشيلا فى ضهرى برضو حاسى انى مقصر معاها
ولمن يجى ود جبارة يقول ليها
يا يمة ادينى عفوك ينجينى من جور الزمان
كان واضحا انه فى حساباته تلك الام التى عناها الحديث الشريف
فلكل الامهات حبنا
ولهن الوفاء ابدا
فهن اسباب وجودنا فى هذا الكون
لك الحب يا صديقى
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: yasiko)
|
yasiko
اول حاجة مشتاقين
وتانى حاجة كلامك صاح حول ان تلك الاغنيات كتبها فى السودان
وبالمناسبة حميد لمن كتب طعم الدروس
كان صبى لسه وحاسى انه الغربة هى البعد عن موطنه
ونفس الفكرة نجدها لدى السر عثمان الطيب
بل لدى كل الشعراء السودانيين
لمن يطلعوا من قراهم للخرطوم او اى مدينة تانية بعتبروها (غربة )
وريحة التمر فوق الهدوم
احلى عطر
كنا لمن يجى زول من دنقلا ويجيب لينا التمر
بنشم الريحة (اللت التمر )
وبناكل قراصة الكابيدة الجاية من كريمة
مع جدى صالح الدنقلاوى المتزوج حياة الشايقية
يا لذلك الزمان حيث لم يكن الناس يفرقون بين من هو شايقى ودنقلاوى ولا غيرو
جينا لزمان يقول ليك دا من وين ودى من وين ؟
يعنى الغنا دا كلو وبرضو نقول من وين ؟
مش سودانى ؟
اجمل حاجة فى محمد جبارة انه استطاع الغاء هذه المادة من قانون الجهوية فى غنائه
كنت تسمعه فى المقاهى فى الابيض
وسمعته فى اسواق نيالا
وفى كل مكان عبرته فى الوطن
الا يشى هذا بانعدام القبلية فى الغناء وتوحيدها للناس ؟
ولعمرى هذا هو هم من هموم الفنون
اذابة كل موجبات التفرقة واحلال السلام والحب بين الناس
شكرا لكل الصور التى جاءت لتعبر عن انسانيتك وجمال هؤلاء الناس الذين تشكل وجداننا من بين اغنياتهم
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
طولنا من ارض الحنان يحليل بلاد ... وادي النخيل العاليه تتحده الزمن
يحليل بنيات الفريق ... والليل يزغرت بي الدليب
الصفقه والطمبور يرن ...الشوق يهود بي اللبيب
الصوت على ضهر البطان .... يجره زي درب الدبيب
يحليل صناديد الرجال ... الحاشه ما ختولنا عيب
يحليل نويرات الفريق ... بتضوي زي نور الامل
يحليل حنين الامهات ... مشتاقه لي ولدا رحل
لمتين يعود يمله الفريق ... بي الفرحه زي ملك نزل
يمسح دموع سالت كتير ...ويعدل العوج الحصل
بالله يا سرب الحمام ... لمن تروح دار ود قمر
سلملي بالشوق الكتير ... حت التراب
حتى القميريات ... يقوقن في التمر
حتى الجداول والنعج الراقده... في ضل العصر
والله يا سرب الحمام طعم ...الفراق في حلقي مر
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: مجاهد عبد الرحمن)
|
العزيز مجاهد
تحياتى
وما اكثر الامهات اللات ينتفض قلبهن لوعة لرؤية غائب
اولهن تجدنى
لم اكن اعرف مدى حلاوة ان تكون عزة معى الا حين سافرت
وهاانى انتظر اوبتها
تملا البيت بصخبها
ولسان حالى يردد مع محمد جبارة
شفتى الزمن يا يمة ساقنى بعيد خلاس
جرعنى كاس
لكنه سيمتلئ حنية حين تعود
فهى امى التى اتوكا عليها
وعينى التى ابصر بها
وقلبى الذى ينبض حبا للحياة والناس
لك وافر تقديرى
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: yasiko)
|
الاستاذة الرقيقة سلمى
انا رهين الفجيعتين ( الغربة ) القسرية التي كتبتها علينا ايام الانقاذ لعقدين الا قليلا و ( حسرتي ) التي ابت ان تفارقني وانا افقد ( امي ) وانا بعيد عنها ، ثم ... هذا المحمد جبارة الرائع ، تشكري يا سلمى
سيف الدولة
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: saif addawla)
|
مولانا سيف الدولة
اولا تعازى الحارة فى فقدك الجليل
واقول لك
بعد عقد ويزيد قررت ان اسافر لامى
لم يكن يعنينى من امر سوىى ان القاها
فقمت مسافرة قاطعة كل البحور
رغم انى لم اكن امتلك حتى ثمن التذكرة
التى جاد على بها اشقائى
وحين وصلت الى الدوحة فى طريقى للخرطوم وجدت عملا يسيل له لعاب كل انسان
لكنى ما بدلت لحظة رؤية امى بكل مال العالم
مشيت اليها
وسيطنا كانت الاغنيات والترانيم
ونستنا ممزوجة بحب احمله الى الابد
من الصباح ونحن نشرب الشاى ممزوجا بحكاياها
واعود فى المساء اقعد الى قدميهاممسدة
تقول
ـ ما وجع كرعينى شى غير رمال الابيض
ونحكى عن الابيض وايامنا فيها بحب العارف لبواطن تلك الايام
حتى ادركها الموت
كنت رغم حزنى لفراقها احس فرحا انى لاقيتها وقعدت الى حضرتها وتنسمت رائحتها
واستمعت الى تلاوتها فى الفجر
تهدل بها
ودموعهافرحا حين يعود احد اولادها من غربة
يا لامى ممزوجة بغناء محمد جبارة معطونة فى حنيته
وهى تردد بصوتها المتهدج
يايمة يا نبع الحنان الما كمل
ولا تكملها فالعبرة تقف فى الحلق
الرحمة واسعة لامهاتنا
ولنا العزاء اننا احببناهن واحببننا
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: yasiko)
|
ربطو الهديمات عدلو
ركبوا اللوارى وقبلو
رصو الهديمات عدلو يا سلمى الفنانة
الهديمات ترص في شنيطة الحديد ولا تربط عشان المكوة
ما تتكرفس شديد، وقد علاها الغبار وعبقت
منها رائحة التمر وأهل التمر.
كلام بسيط لكين ..
بالله شوفي كمية الاسي في
(قبلو) دي لتعقبها
خلوني وحدي بلا أنيس
كيفن فراقي أتحملو؟!!
ربنا يديك العافية عشان
تكتبي الحاجات السمحة
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: yasiko)
|
yasiko
بالله يا سرب الحمام ... لمن تروح دار ود قمر
سلملي بالشوق الكتير ... حت التراب
حتى القميريات ... يقوقن في التمر
حتى الجداول والنعج الراقده... في ضل العصر
والله يا سرب الحمام طعم ...الفراق في حلقي مر
وبرضوالفراق فى حلقى مر
تسلم يا سيكو
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
لمن لا يعرفون الرائع محمد جبارة عن قرب
اقول:
هو انسان بكل ماتحمله الكلمة من معني قبل ان يكون فنانا"
رجلأ" صادقا" كريما" تقيا" عفيفا" وعزيز النفس عظيم الكبرياء
يتعذب لالام الآخرين ويكابد المعاناه بصبرا" يحسد عليه
التحيةلمحمد جبارة وللأخت صاحبة البوست التي اخرجت منا هذه الكلمات البسيطه في حق هذا الرجل....
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: yasiko)
|
يا سيكو عرفت ليك الشايقى جاب صورة البروفايل بتاعو من وين ؟
اجمل لحظة كانت لما امى تعمل لينا الفطير بالملاح الاخدر
خاصة يوم الجمعة
تقوم من الصباح
وعادة فى الابيض بنكون زارعين البامية والخدرة فى احواض حول البيت
لزوم نغطى مصاريف المدرسة
لكن احيانا نقطع من تلك الافرع ما تهبنا امنا اياه فى ملاح الخدرة المفروك
بورتاب البصل الاخدر
ومعاهوالقراصة
اتعلمنا هذه لاطعمة من جاراتنا من الشايقيات حيث الخبرات متبادلة
حيث الانسانية امر جماعى
شكرا لك مرة ثانية لما وهبتنا اياه من جمال
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: ابو يسرا)
|
ابو يسرا الحبيب
كلامك صاح انه ود جبارة ساكن قريب لى دارنا
عنده ابنه كان ممتحن للشهادة
وهو ابن عصامى يشتغل بتصليح الكهرباء هو وشقيقى المغيرة
ولم اكن اعرف انه ابن محمد جبارة الا حين ابلغنى المغيرة
وحينها لم تتوقف طلباتى ان ازوره
وكلما قلت له عن رغبتى اجابنى ان والده مسافر
لغاية ما سافرت
لكن وعد اول ماارجع حيكون اول عمل اقوم به الزيارة
واشم ريحة الطمبور
امد الله فى ايامه وعبقنا باريجه دائما
لك الود يا صديقى
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: هند محمد)
|
ليه كده ياسلمى؟؟؟؟؟؟؟؟؟؟؟
يعني احنا ناقصين مناحات يابت الناس؟
المره الفاتت جبتي لينا ود الباديه،
قعدنا نجقلب وماعرفنا نقول شنو، كمدناها
جوه الحشا وسكتنا.قلنا الحكاية عدت بي سلام،
لكن أظنك ماجايباها للبر.
بالله عليكي الله يابت الشيخ بطلي الحركات دي
البتكسر عضام الناس وكفانا بلاوي الغربه
وبلاش كل مره تفتحي لينا في المواجع.
بس بالله ماعندك (الطيف) لمحمد كرم الله؟
ولا اقولك شوفي لينا
انت ياغرامي
حبك السامي
وحي إلهامي
جددت آمالي
بددت آلامي.
ونحن معك بكل الفرح والحزن .
ولك المودة والتقدير والإعجاب بكل
حرف تخطينه ،فهو صادق وجميل،ينبع من القلب
فلا يصب إلا في القلوب.
محبتي....ود اللحمر
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: صلاح الأحمر)
|
الاخ الحبيب صلاح اللحمر
ياخ خلى الجرسة
ودا حال الدنيا
لكن عليك الله لمن تسمع ود جبارة ولا محمد كرم الله ما بتشم ريحة البلد؟
غايتو من اسمع اى واحد منهم
تلقانى خلاس الدميعات اضاير فيهن
والعيون ببقن حمر
القلب
تلقاهو زى الدلوكة المحمسة
دل دل دل
وبعد داك كله
تلقى اللسان يلهج ويغنى
ومرات الكلام ما بجمع معاك
لكن برضو بتغنى
اقول ليك سر ؟
مش اولاد حاج الماحى ديل مداح؟
لكن الايقاعات بتاعتهم تهزنى زى العاصفة
واحفظ كثير من مدائحهم
افتكر اننا تركيبة رائعة فى هذا البلد المدعو السودان
صلاح الحبيب
مرات الغربة الداخلية احسن منها تسافر غادى غادى
اقعد عافية ود امى
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: هند محمد)
|
سلمى الحنينه السكره لي مع ودجباره ود كرم الله وصديق قصه منتصف السبعينات ونحنا شباب والثلاثه عاملين مهرجانات وتنافس شريف قبلما نحفظ اغنيه لصديق يتلب لينا ودجبارة بعمل اجمل ودكرم الله شتتونا تشتت لمن نسينا حاجه اسمها القراية والمدرسه شن طعم الدروس مدام بكانه مشي قطر وكيف ذاتا ترتاح النفوس تقبل قراية في سفر واللمبة قالت بق وانزلي من غصونك مرة للساسق فتر ياقمريه مافي عداله لي زولن صبر كنا في كورتي العليا وليالينا طمبرة في كل داخليه مغني يردد جديد هؤلاء وعلى طول اوخوك عامل زحمة في جمعية الموسيقى والمسرح ورحلات مسرحية وغنائية في منطقة الشايقية من اوسلي للقرير والاراك وجلاس البار منصوركتي والعفاض ونقول للقرايه عووك مجموعة من المهووسين بتلك الابداعات غايتو كنت من ضمنها ورفدونا لاننا رسبنا في اكثر من ثلاث مواد وتم اعادتنا بشرط ان نعيد سنه كامله البعض وافق ونحن ثلاثه لم نوافق مكثنا بالداخليات مدة شهرين والاجاويد يمشو ويجو الطلبه يدخلو الفصول ونحنا نتجه للنيل نمتع انفسنا بجمال الطبيعه ونستنا البواخر المتجهة لدنقلا من كربكان والجلا والزهرة ونررد غنا ودجبارة وودكرم الله وصديق ونعود للداخليه حلينا المشكلة مع المدير المربي الكبير الراحل عبدالله محمد خير رحمه الله بان لانعيد السنه ونعد بالتفوق في اول امتحانات وكان ذلك وبقية الشلة اخدو مقلب بالاعادة ومنها بدانا نقنن هوسنا بمتابعة ابداعات الثلاث الكبار لهم الاحترام لما قدموه من ابداعات جملت حياتنا وتسلمي ومعليش للاسهاب
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: الفاتح يسن)
|
(ونحنا نتجه للنيل نمتع انفسنا بجمال الطبيعه ونستنا البواخر المتجهة لدنقلا من كربكان والجلا والزهرة ونررد غنا ودجبارة وودكرم الله وصديق ونعود للداخليه حلينا المشكلة مع المدير المربي الكبير الراحل عبدالله محمد خير رحمه الله بان لانعيد السنه ونعد بالتفوق في اول امتحانات وكان ذلك )
الحبيب الغالى الفاتح يسن
اول حاجة استاذكم دا مش مربى فاضل وبس دا اجمل زول فى الدنيا
رحمه الله
عارف معنى وقيمة الفنون لو كان واحد تانى كان انتهت علاقتكم بالفنون تماما
يا الفاتح اخوى ما اجمل ان تصف لنا نحن الذين تربينا فى ضفاف اخرى تلك الاماكن ،
كلها
وما احلى ان نكتب التاريخ الشفاهى لحياتنا
ومؤكد لكل منا تاريخ شفاهى ولكل مدينة ايضا
ولكل قرية ومدرسة وهكذا
وشكرا لمحمد جبارة من جعلك تكتب كل هذه الذكريات الفاتنة
وشكرا لك اخى وزميلى الفاتح
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: هند محمد)
|
الأستاذة الرائعة سلمي بت الشيخ سلامة
الله يسلمك ويسلم كل أم علي أمتداد الوطن الحبيب وفعلا الفنان محمد جبارة يسكن الوجدان بدفء أداء أقرب من الوجدان وفي رائعة السر هذة من منا لا تجري دموعه ولُه علي أمه ولكل من فقد الوالدة تكبرمساحة الحزن عنده والذي بعد عن الأم والوطن يكون الأحساس مزدوج
في الحالتين الحزن يقسم الوجد وأكيد أنت أمة وكثيرات حتي التي لم تصل بعد هذا الأحساس تحسه وتتمني أن يسكنها الشعور الآلهي وهي فعلأ غريزة تكتنف كل أنثي وأن صغرت وأحي عبرك كل أم وكل وليد أن يرسل هذا الأحساس عبر محمد جبارة إلي أمه ومنذ قلائل كنت مع الوالدة عبر الهاتف ولسان حالها لم يكف من الدعاء وهي حالة دائمة من الدعاء في كل أوقاتها حتي إلي القريب الذي تدخله الحضن وعقلها وقلبها مع البعيد القاصي والله أن أمر الغربه لشئ عجيب في تسنية وسنينه الطوال اللهم رد غربتنا لننعم بالدفء في الأحضان ولك مجددا أيتها الأم سلمي عبر محمد جبارة والسرعثمان الطيب كل الوُد والحب وفعلا | Quote: محمد جبارة نغم الحزن الذى يغسل الوجدان |
،،،
،،،،أبوقصى،،،،
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: مجدي عبدالرحيم فضل)
|
ابو قصى الحبيب
محمد جبارة يدخل الينا من زوايا عديدة
ولعلك ابرزت زاوية الام التى كانت محل وصلنا به
ومعظم اغنياته التى دخلت وتحكرت فى الوجدان
لم تتحكر الا بمجاز صوته الدافئ
وكلماته التى ان دلت فانما تدل على من خبر نفوسنا
وعرف كيف يسبر غورها
فلك الود ولك التقدير
لمشاركتنا فرحنا بمحمد جبارة
الانسان الذى وحد وجداننا وجعلنا منصهرين فى بيت نستطيع ان نسميه
بيت الفن المنتظر
| |
|
|
|
|
|
|
|
|
 Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
الله عليك ياخاتيه القول سلوم حبيبه ...
انتى الحاجات الحنينه دى ماعارفه بتسوى فينا شنو ...
الله سلمى على الكلام البيدخل القلب ويفضل فيه مليان حنان مليان شوق وكل حق لاتزيف ولانفاق طالع من جوة الجوة ومع ..
الصوت والنغم الحنين الطالع من الطنبور يتم الصورة حنا فى حنان فى حنان الى نهايه الصفحة ....
شوفى الزمن يا يمه ساقنى بعيد خلاس ...
جرعنى كاس
دردرنى اتغربت يا يمه
ورينى الخلاص
بتذكرك يا يمة يا يمة
وكتين الناس يقولو قايمين البلد
ربطو الهديمات عدلو
ركبوا اللوارى وقبلو
شوفى الكلام ده بسيط كيف وكبير كيف
تسلمى حبيبه يارب انتى جد ده كلام جميل شديد ...
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: ماجدة عوض خوجلى)
|
الاستاذة سلمي...
كل الود و الجمال لاهل الفهم المرهف!
عارفة يا سلمي هذا المحمد جبارة انسان تحتاري في انسانيته و عفته وجمال ذوقه...انا شخصيا اعتبره ولي صالح ...ولك تبريري في صلاحه...
بعد فيضانات 88 طبعا اغلب القري و الحلال طلعو فوق
اذكر في مرة من المرات استضاف والدي رحمه محمد جبارة بعد ان قابله في سوق الدبه وكان الوالد الله يرحمه فعلا من انصار المهدي المتشددين...لا صعوط لا غني لاسكر لاطنمرة...بالرغم من كدة اكرامو لي محمدجبارة كان ينم ن احترام عميق و تقدير ...وكل من يعرفون الوالد علي امتداد الريفي كانو يعرفونه بحبه للصلاح واهل الله منهم المرحوم حمدطه المعروف علي امتداد الريفي الشمالي غربا و شرقا حتي دنقلا...
كصبي ينا كنت مولع بالطنمرة وكدة لاكن الوالد كان دايما بالمرصاد وما طنمبور سويتو ما اتكسر...المهم بحكم الوله بالطنمبرة كنت ستاندباي في خدمة الضيف العزيز وللعجب لاول مرة لا يبدى الوالد تزمر او رغبة في تكسير الطنمبور...علي العكس كان معجب جدا لما يشوفني ادق الطنمبور و ود جبارة يضيف لمساته علي ادائي....انه رجل صالح بكل المقايس...
طبعا العيال كبرت وخشينا الجامعة و كدة وهاك يا روابط وحفلات لكن بكل صراحة لم نسعد كما كنا نتوقع بهذا المبدع كثيرا كما سعد به حتي الثمالة الاجيال الاولي في فرع القاهرة...واعتقد الاخ ود يس هنا... زمن حدايق القدس...وما ادراك ما القدس!
انه فنان...وطن ...من الجمال....بلا حدود!
امده الله بالصحة والعافية
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: ماجدة عوض خوجلى)
|
ماجدة الماجدة
(لايوم الليلى) ونستك داقة فى راسى
عارفة زمان زمن الدنيا بى خيرا
الراديو كان فاكهتنا
لم تتلون الاذن بغيره
والغناء يجئ صادحا من اثير امدرمان
يشيلنا ويختنا على كيفو
فن الرؤية بالاذن كما يقول اهل الاعلام
تعلمنا ان نكون حريصين على الاستماع للاخر
ادبنتا الاذاعة بادب الاستماع
نحفظ عن ظهر قلب كل ما يجود به علينا الاثير
ومن ضمن ما حفظناه اغنيات محمد جبارة
على الرغم من الاخطاء التى نبهنى لها اخى محمد عبد الجليل
لكننا مشدودين الى ذلك الوثاق حين لم يكن الكاسيت رائجا
فهو فنان بحق يشدك صوته الى الاستماع تادبا وامتنانا
لانه عرف كيف (يختنا فى مواعين نقية )
لانه يمثل نقاء الكلمة وصدقها
لذلك نتمثله
ونميل ونعرض عل نغماته
متعه الله بالصحة والعافية
وامد الله فى ايامه ذخرا للفن الجاد المنتمى لاهل البساطة والانسانية
وشكرى وتقديرى اختى العزيزة
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
| Quote: فى السكة حديد حيث تذوب القبيلة وتندثر لابد الابدين |
العزبزة سلمي
نعم احيا السكة حديد عالم آخر
اسرة واحدة بيت واحد
احوك مولود في قطية في حي السكة حديد عطبرة
لفينا م الوالد علية الرحمة كل محطات السكة حديد
ولي مع الأخ محمد لرم الله ذكريات جميل و مع الأصوات
العذبة وخي تصدح بالانغام الحنينة
ليت الزمان يعود الي تلك المرافئ
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: حسن الطيب يس)
|
اخى حسن الطيب
كلنا تربينا فى قطاطى السكة الحديد
وعرفنا معنى وقيمة ان ننتمى لاحدنا الاخر
ان ننتمى للسودان بالصورة التى وجدنا انفسنا عليها
وهذا احد مقومات اننا نرفض كل المقولات التى ترى الى العالم من زاوية ضيقة
بلا تحديد جهة
كنا فى قطاطينا تلك نرى العالم متحدا
وليس متوحدا
نراه وهو يقوم فجرية من ثبات النوم باتجاه العمل
ونراه بخطى واثقة باتجاه احده الاخر دون التفكير من اين ؟
لكنه اتحاد وهم مشترك
ديدنه العمل الجماعى والروح الجماعى الذى ساد
عرفنا كل مناطق السودان من حلفا الى اقصى مناطق كان يعبرها الشريط الحديدى
وكنا نلتف حول معصم الحياة والغناء بروح التسامح
دون ان يكون ثمة تعال من احد على الاخر
فى افراحنا وافراحهم تدور اشرطة المحبة من مسجلات الذاكرة او الغناء الجماعى
لذلك ظلت تلك الوشائج قائمة مدعومة بغناء من كل الانحاء
نتمنى ان تعود تلك الحياة الى مجراها
لك الود من قبل ومن بعد
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
أه شفتي يا سلمى دقة الطمبور بتجيب الشايقية جري كيف
وكمان عتاة الشايقية ناس مامان وياسيكو
وما تغلطي في الإسم مرة تانية لأنه دا مامان الفي الكتير من أغاني الطمبور ومنها:
محمد سعيد دفع الله:
يا مامان عساه قريرنا بي خير وانبساط وسرور
بختك أنت عاد والله يمشيلو في كل دور
ووقتها كان محمد سعيد مغترب في جامعة الخرطوم ومامان مغترب في مروي الثانوية ولكنه أحسن حالاَ من محمد سعيد إذ يأتي القرير كل أسبوع.
وكمان حسن الدابي:
شبيه الند ده مشتول في قريره
ومامان غنى نشوان بي عبيره
في لقاء أذاعي قديم مع الراحل النعام آدم سأله المذيع عن مامان الذي ورد في الأغنية؟؟
فرد قائلاَ ده طير من طيور الجنة!!!
نرجع للصور: الصورة الأولى ود جبارة مع محمد كرم الله.
وصورة ياسيكو المع محمد جباره الشاعر حميد (محمد الحسن سالم حميد).
الشايقي
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: خالد علي محجوب المنسي)
|
كما تعلمون لا يُفتى في الفن الشايقي والأستاذ مامان بالبورد وبالبوست ، ولكن
حسب علمي المتواضع ، أن الأستاذ السر عثمان الطيب خرجت منه هذه الدرر وهو
يشتكي غربة الخرطوم ولم يكن خارج السودان والدليل على ذلك ركوب اللواري
وريحة التمر التي يتكرفها المستقبل للقادم من البلد وهو أمر لا يتم في
استقبال القادم من السودان لبلد أجنبي ، ورغم انه كتب الكثير خارج
السودان إلا أن هذه الغربة لها طعم خاص وغريب.
نعم لا يفتى والأستاذ مامان بين ظهرانا
أهتم كثير لشعر بلادي أين ماكان وأين ماوجد لذا تجدني أحث وألهث وراء أخبار الشعر والشعراء وأشعارهم .. سمعت مرة الأستاذ السر عثمان الطيب الشاعر الجميل المرهف يقول أنه كتب هذه القصيدة عندما كان بغرض الدراسة في الخرتوم ويومها كان طالع من إمتحان رياضيات عضم وهو متكي في الداخلية جال خاطره وسرح بعيد في البلد والأهل والبعاد والفرقة.
تحياتي دكتور ياسين
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: خالد علي محجوب المنسي)
|
خالد المنسى
ازيك ود امى مشتاقين
عارف القصيدة دى (عيوشة )
عيوشا عيوشا
تشرب من الشارع
تأكل من الكوشا
الليل هِديماتا
وشمش الله برطوشا
لو عاينت فى القصة دى واتمعنت فى كلماتها
تلقى القصة دى مش انسانية وبس
دى انسانية عالية
وهى قصة حقيقية تلقاها فى الحياة اليومية
وازعم انها كلمات الفنان محمد جبارة لانها تنضح بانسانيته
ترى فيها الانسانية على سطح الكلام وعمقه
فهو انسان لا يعرف سوى متابعة خيوط الانسانية ينسجها لنا فنلبسها
يعرف مكامن اوجاعنا فيلمسها
كطبيب خبير بالمواجع
لنا شرف الانتماء لهذا الفنان الاصيل
وشكرا لك لايراد هذا النموذج للفنان النموذج ودجبارة حفظه الله
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: Al-Shaygi)
|
الشايقى العزيز
اول مالك قايم فينى يا وليدى ؟
وحات ابوى اعتذرت للاستاذ مامان وتانى ان بقيت غلطت
دابا العوجة
وحات ابوى ما قصدى لكن الفرحة بحضوره
خلتنى اغلط فى الاسم
وحقه على وحقك على ود امى
زى ما اوردت انت بقول معاك
يا مامان عساه قريرنا بي خير وانبساط وسرور
بختك أنت عاد والله يمشيلو في كل دور
ونمشى اليهما حبا واحتراما
ولك من قبل ومن بعد الود والاحترام
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
يا أيتها السلوم الأنيقة معنيً ووصفاً
مالنا ومحمد جبارة في هذا الليل (المسكون لحالو) بكل أنواع الشجن
لاينقصني جبارة لاينقصني الحنين
لا تنقصني ذكريات البلاد ياسلمي
من يومين وأنا بتاوق في هذا البوست (من بعيد لبعيد) تحسباً لما أنا فيه
الآن من شجن ومحن (وكل شئ صالح بالنون) صاحبتي .
فشكراً لهذا النغم إذ يدفيني ويمنحني التماسك
وشكراً لك (ولا تفعليها مرةً أخري)
نهائي يازولة فنحن (ماناقصين بشاتن ولا محن)
ثم :
سلامي وتحياتي وأشواقي
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
| Quote: احوك مولود في قطية في حي السكة حديد عطبرة |
الحسن سلام
الحسن جا الحسن ما جا
الحسن يا حلوة مو عارف الزهور راجا
أتاريك يغلبك لى هسع وانت نايم تنقلب في الأوضة لأنك مولود في قطية
Quote: وكان الوالد الله يرحمه فعلا من انصار المهدي
المتشددين...لا صعوط لا غني لاسكر لاطنمرة... |
الأستاذ محمد خير
سلام
يتمارى لي انك ابن الرجل البار محمد محمد خير رحمة الله عليه وأخ المرحوم مولانا الأستاذ عبد المنعم "رحمه الله"
فإن كنت أنت فلك التحية أضعاف وأنا كنت ولا زلت صديق روح المرحوم وأخوانه وان لم تكن فلك أيضاً التحية أضعاف
يس م يس
محامي سابق
Quote: في لقاء أذاعي قديم مع الراحل النعام آدم سأله المذيع
عن مامان الذي ورد في الأغنية؟؟
فرد قائلاَ ده طير من طيور الجنة!!! |
تسلم يا الشايقي
والله مامان لمن الجنان لكنه في صورة إنسان
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: yasiko)
|
ثم يا سلمى عندما لم أعد أقوّ على حمل الهوى وحدي ..
قلت فهي أمي إذن , وحدها في الكون التي أشترك و إياها في تلمس مواطيء خطو الروح .
قد اعتادت على ذلك إذاعة غريبة هنا يا سلمى .. إف إم مية ..
ما أن يفلل الليل حتى تصرعنا بالإمتحانات .
قبل ليلتين زارنا شتاءٌ ماهل يا سلمى ..
و كنت دافئاً أسمع للراديو , و أغذ في فلوات نفسي سيراً منقبا ..
حتى احتضنني صوت السر عثمان الطيب ..
حميمٌ هو الرجل في سرده , و يشف حين الكلام يلامس السيرة العطرة لمحمد جبارة ..
السر يطعم الكلام بلكنته المغرقة في محنتها و صدقها ..
ثم ..
يجيئك بأثقاله محمد جبارة ..
ما ستطعت له سبيلاً فتكه ذاك بي - و الليل أبرد ما يكون -
قلت فلأستجر بأمي النائمة علي يساري ..
ناديتها : يُمه .. يُمه أسمعي ..
فانتصب منها القلب و أصغت :
( الله الله يا جلابة ..
الله الله يا جلابة ..
يا جلابة جيداً جيتو ..
ما شفتوهو لي يا اخواني ساعة للرحال شديتو ) ..
الله يا سلمى .. الله ..
ثم في نعايم و برحة في النفس و سلام غريب يتلونا : ( ضل الغيمة ) ..
نغّمها صوته و الطنبور , فصرعنا محمد جبارة كلينا .. أنا و امي ..
ترين قلبك أمامك يفطفط مذبوحاُ حين يعقّب ود جبارة كلمة ( يا غيمة ) ..
و يتماسكان : صوته و غرودة الطنبور .. و يلتحمان في سيولة تقطع الحشا .
حتى أشفقت على أمي من جرعة النشوة العالية و الأشجان التي فتح لها محمد جبارة فوهة الذكرى .. فطافتها و أغدقت .
و رضيت أمي .. رضيت عليه و على السعادة التي منحنا صوته .. و نامت على :
يرضى عليك يا وليدي إشا لله .. أمانة ماك غناي و كلامك يكيّف .
الله يا سلمى ..
من أين للرجل هذا الصوت الذي يسحق الروح ثم يعيدها لخلقها الأول ..
ثم يهرس ثم يرفع ثم يخفض كلما أندغم في شرايينك و احتلها و أوقف شعر جزيئاتك عشبة عشبة !!
ثم يا سلمى عندما لم أعد أقوّ على حمل الهوى وحدي ..
رأيتك عندي ..
معي هنا ..
هل تقرأ روحك خلجات الخلايق ؟؟
أم أن محمد جبارة يوحد العالمين في أقداس صوته ؟
على كلٍ ..
أحبك يا سلمى .
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: yasiko)
|
المرهفة سلمي...
استميحك عزرا ان ارسل تحاياي للاخ وديسن
الخلوق د يسن...
نعم لقد اصبت ...فنحن نعرف بعض بالحيل...ربما لا تستحضرك هياة ذلك الصبي وقتا ولكن انا في اخر زيارة لي لقبر ابو همس تواترت الي ذهني زكريات واسماء لم تكن انتغائبا عنها خاصة والمرحوم كما عرفته كان رجلا ذو اجتماعيات لا تحدها حدود...
كم اتمني يا يسن انا اري مجددا اولئك الرجال وبعض النساء الذين تشرفنا بهم اصدقاء وزملاء لعبد المنعم....من فرع القاهرة...المحاماة...القضاء...الي اخر وظيفة للمرحوم...
وزي ما قال المثل....معرفة الرجال كنز...
ودي
حمدخير
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: kamalabas)
|
الاعزاء يا سيكو وكمال عباس
وفيتما العمدة حقه
وهو جدير بالوفاء
فوالله ان حديثه يشجينى
وكتابته تدخلنى الى كهف الروح
واود ان لا اخرج
فهو مثل لوحاته التى تتلون بالوان لو شهدها احدكم
لاصابه ما اصابنى من وله بها وشغف
عماد عبد الله فنان من الطراز الاول
فى كل ما يكتب ويرسم وصفحات فى الصحف يبلوها بلاء حسنا
برهيف وشفيف رسوماته
وما كنت اود خروجا عن نسق الموضوع لكننى اجد نفسى فى هذا الموقع
اورد شهادة فى حق هذا الفتى البديع
فشكرا لكما
وشكرا له لانه جدير بالثناء
ولن يغره بل سيغريه ان يتوسم اكثر الايات جمالا فى الرسم والكتابةالتى تحيل الكائنات الصامتة الى حراك بلا حدود
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
Quote: ثم يا سلمى عندما لم أعد أقوّ على حمل الهوى وحدي ..
قلت فهي أمي إذن , وحدها في الكون التي أشترك و إياها في تلمس مواطيء خطو الروح .
قد اعتادت على ذلك إذاعة غريبة هنا يا سلمى .. إف إم مية ..
ما أن يفلل الليل حتى تصرعنا بالإمتحانات .
قبل ليلتين زارنا شتاءٌ ماهل يا سلمى ..
و كنت دافئاً أسمع للراديو , و أغذ في فلوات نفسي سيراً منقبا ..
حتى احتضنني صوت السر عثمان الطيب ..
حميمٌ هو الرجل في سرده , و يشف حين الكلام يلامس السيرة العطرة لمحمد جبارة ..
السر يطعم الكلام بلكنته المغرقة في محنتها و صدقها ..
ثم ..
يجيئك بأثقاله محمد جبارة ..
ما ستطعت له سبيلاً فتكه ذاك بي - و الليل أبرد ما يكون -
قلت فلأستجر بأمي النائمة علي يساري ..
ناديتها : يُمه .. يُمه أسمعي ..
فانتصب منها القلب و أصغت :
( الله الله يا جلابة ..
الله الله يا جلابة ..
يا جلابة جيداً جيتو ..
ما شفتوهو لي يا اخواني ساعة للرحال شديتو ) ..
الله يا سلمى .. الله ..
ثم في نعايم و برحة في النفس و سلام غريب يتلونا : ( ضل الغيمة ) ..
نغّمها صوته و الطنبور , فصرعنا محمد جبارة كلينا .. أنا و امي ..
ترين قلبك أمامك يفطفط مذبوحاُ حين يعقّب ود جبارة كلمة ( يا غيمة ) ..
و يتماسكان : صوته و غرودة الطنبور .. و يلتحمان في سيولة تقطع الحشا .
حتى أشفقت على أمي من جرعة النشوة العالية و الأشجان التي فتح لها محمد جبارة فوهة الذكرى .. فطافتها و أغدقت .
و رضيت أمي .. رضيت عليه و على السعادة التي منحنا صوته .. و نامت على :
يرضى عليك يا وليدي إشا لله .. أمانة ماك غناي و كلامك يكيّف .
الله يا سلمى ..
من أين للرجل هذا الصوت الذي يسحق الروح ثم يعيدها لخلقها الأول ..
ثم يهرس ثم يرفع ثم يخفض كلما أندغم في شرايينك و احتلها و أوقف شعر جزيئاتك عشبة عشبة !!
ثم يا سلمى عندما لم أعد أقوّ على حمل الهوى وحدي ..
رأيتك عندي ..
معي هنا ..
هل تقرأ روحك خلجات الخلايق ؟؟
أم أن محمد جبارة يوحد العالمين في أقداس صوته ؟ |
أشهد الله أنك سِر آخر (السر عثمان الطيب)
سرٌ ناثرٌ
لله درك
لقد دغدغت مشاعري وجعلتني افكر في هجر قاموس لغتي
لك الشكر يا عماد
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: أبوبكر طه)
|
| Quote: ذكر بينما كنا نسير في سوق القرير أنا والسر عثمان الطيب ، نادانا العم أحمد محمد صالح (المأذون) رحمه الله وكان رجلا مهابا من حفظة القرآن وكان يجلس أمام دكانه في السوق... لم يدر بخلدنا أبدا أنه سيعلق على أغنية (يما) حيث أن الرجل معروف عنه بأنه من (المتشددين)إن جاز لي التعبير.. وبدأ الرجل يتكلم عن الأم ويورد الآيات والأحاديث والأقوال المأثورة وأشاد بكلمات الأغنية وموضوعها، وذهبنا من عنده ونحن غير مصدقين... |
يامامان
التحيات
ياخى إنتو يالشوايقة زى تمركم تكيفوا الفى الجامع والفى الانداية.
حلوين تغذوا ومرين تظبطوا الراس.
البشيل بالهين يشبع ويتكيف حتى البياخد منكم تقطير.
لله دركم!!
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
سلمى الشيخ
مالك علينا قلبتي علينا المواجع ..!!
ود جبارة وكمان أغنية يمه ؟؟
ود جبارة صديق قديم لي بل وكنت قد عملت بفرقته أيام صباي في العام 1984 ككورس !!
وكان أياميها يعلم أنه كلما غنى هذه الأغنية يبكيني من أعماقي وبحرقة ..
وكان يلفت إلي كل بقية الكورس ..
ما زلت أبكي بحرقة وأنا إستحضر أمي التي فارقتنا وفارقت الدنيافجأة قبل عام ونصف تقريباً
ربنا يرحم أمهاتنا جميعاً
شاهدت محمد جبارة قبل يومين ينشد مدحاً نبويا بقناة ساهور
أبكاني ما بدا عليه من أثر المرض وتغول السنين
متعك الله بالصحة والعافية أنت وصنوك الفنان الحقيقي صاحب الصوت الذي لا يضاهى ( يخيل غلى في كل الدنيا ) محمد كرم الله الذي توقف عن الغناء سنين عدداً وتصوف وإنزوي
لكني سمعت مؤخراً جداً ( قبل ايام فقط ) أنه عاد للغناء ..
تشكري يا سلمى يا حنينة ...
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: جعفر عبد المطلب)
|
سلام سلمى
لم تر امى بالقطع وهى تدخل المراح تسقى الغنيمات وتحلبهن وتسقينا لبنا مقننا مصحوبا بغنائك هى كانت دائما منذ اختراعك تلك الاغنية ممسوسة مثلى بها كلما دخلت الى المراح تجدها تردد تلك الاغنية مصحوبة بها فى كل صباح كانما غدت مفتاحا للصباحات لدنها
يا لصوتك حين يطل من المذياع حاملا تلك الاغنية احسها احساسا خاصا كانها متوجهة لى ولا تطل من برنامج عام لكل الناس ، اجدنى فى الاماسى الغريبة تلك فى مهجرى اردد باكية
وكت الخلوق ترقد تنوم
بسهر براى ارعى النجوم
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: ابو جهينة)
|
ابا جهينة حباب السلام
عارف عندنا جارتنا فى الابيض
هى العلمتنا نسمع ود جبارة
وكان عرفتها يا ربى
امراة معجونة محنة ووداعة تحلف نقول مولودة اليوم
هى من امبكول
وزوجها علمنا سحر الانسانية ومعنى ان نستمع لمحمد جبارة وكل غناء الطمبور
والسكة حديد هى القاسم بيننا
وهى المدرسة التى تعلمنا منها ان تكون مبذولا لجارك
ومحبا لما يحب
وهما قد حببانا فى محمد جبارة هذا الرجل السامق
رعاك الله وحفظك
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: جعفر عبد المطلب)
|
استاذى ومحل تقديرى جعفر عبد المطلب
وتجود علينا بهذا النذر اليسير
ما لك تقل فى الحديث يا صديقى
اكتب لنا عن هذه النخلة المدعوة محمد جبارة
فهو مثلها
ثمر كل لحظة بثمرات نتذوقها فى لحنه
فى حركته وسكونه
فى طمبوره الذى يشع ويلهب الفئدة
اكتب لنا عن صباه وميلاده ان شئت الدقة فنحن بصدد التوثيق اللائق بقامة النخل هذا
اكتب واستحلفك ان تفعل
فهو جدير بان يعرف كل الناس الذين يحبونه
كيف كان يومه ؟
وحين مشى الى المدرسة ماذا كان يفضل من (طعم الدروس)
لاننا نود ان نعرف اكثر
كيف كانت بداياته
وحتى اخر لقاء لك به؟
فنحن ثقافة مشافهة
اود لو ادون تاريخ هذه النخلة ذات الرطب الجنية
فهو قامة ننحنى لها ونود غوصا بعمق البحر فى عذوبة حياته
ليس تغولا
بل محبة
ولك عميق الود
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: عثمان دغيس)
|
أبكاني ما بدا عليه من أثر المرض وتغول السنين
اخى عثمان دغيس
حبابك الف
لكن محمد جبارة اقوى من المرض والالم
فهو بفنه يعيش
وهذا حال مبدعينا للاسف
ممن لا يرتضون البقاء فى بلاطات السلاطين
ممن اختاوا الانحياز للانسان
اتمنى له وافر الصحة والعافية
وندعو الله ان يظل قويا ضد كل ريح تميل ساق نخله العفى
| |
|
|
|
|
|
|
|
|
 Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
يا سلمى شكيتك علي الله
انا اصلي من زمان منجض كمان زدتيني نجاض
وحاتك ولاني داسيهو لا شي.... بكيت لامن الله غفرلي...
ذكرتيني امي الله يرحمها وذكرتيني ساقيتنا في البركل شمال (شبا)
وذكرتيني مراح حبوبتي الفردوس بت الريح
وذكرتيني الدحيشي الاداني ليها جدي يوسف ود ابو دية
وذكرتيني حبوبتي نفيسي بت بغداد وحمارتها الرماديي
يمين من المغسي عضعضت يديني كلهن
شفتي النضمي وكتين يكون سمح بيلم الناس كيفن
غايتو ود المنسي وصلاح الاحمر جعليين
تليشة:
سلمى ان بقيتي دخلتي النار بي شببي
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: طارق جبريل)
|
يا طارق اخوى مالك على
(يا سلمى شكيتك علي الله)
عاد يا عشاى مانى قاصدى اغلت عليك وحات سيدى وسيدك
لكن امان الله الوليد غنايا قاطع
وما تقول وحيدك البكيت
امانى ما بكيت متلك واكتر
ومتل مااتذكرت امك فعلت
ومتل ما شفت غنيمات الفريق شفتهن طب
وحات سيدى وسيدك
وكتين كتبت الكلام دا بكايا يعزيلو (جنازى)
واقشقش فى الدميعات واكتب
واحلالى يا عشاى البكا مو عيب
البكا (حرة قلب )
وعافى منك وراضى عنك سو رضايا
اقول ليك سر
احب هذا المحمد جبارة لوجه الكريم
رغم انه يبكينى وكثيرا
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
اليكم أغنية (يا صحاب قمري حليلو) وهي إحدى قصائدالسر عثمان التي صدح بها ود جبارة ، ورأت النور في 26 /1 /1973
يا صحاب قمرى حليلو
من زمان فارق خميلو
**
مالوفى العش ساب خليلو
دون وداع فى يوم رحيلو
فر سايق الشوق دليلو
ما اتعرف شقيش سبيلو
**
الدموع زادو البشيلو
فى الطريق يرون غليلو
يسرى دايح جن ليلو
حنن الكافرحويلو
**
هد بى ترحالو حيلو
زاد كتر فى السفرة ويلو
يا حليلو غنا وهديلو
لي يجى النسام يشيلو
**
منى كل الهم يزيلو
ما اتلقالى محال مثيلو
كنت بلقى وكت مقيلو
حاضنو شايلو جريد نخيلو
**
جم صغارو طرب يميلو
وديمة يرشفو سلسبيلو
الا اه ..اه يا حليلو
جا الغراب حلق بديلو
مامان
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: maman)
|
بلاخبر .. طق الخبر مالي البلد
قالوا العريس قام بالاحد ..
الحلة جاطت والحريم اتهامسن جاي الولد ..
كوم من بنات للبير ورد .. يتحدثن جاي الولد ..
يا بختها ويا شوقنا نحن اللينا جمر الشوق وقد ..
كل الحديث الليلة فوق بت البلد ..
لامن خلاص الليل دخل واخر شعاع من الشمس روح نزل
ضو القميرة جا من بعيد بهر قدل ..دافر ظلام الحلة قدامه وصل ..
ناس البلد النام رقد والماسك السبحة وعبد ..
مشغول هو بي خبر العريس القالوا قام يوم الاحد ..
وهناك بعيد بي غادي في اخر الديار ..
راكوبة ضلها حر من حر النهار ..
كوم من بروش وجريد تمر عيدان صغار ..
ودلوق هدوم موروثة من زمن الكبار ..
وتلات عناقريبا صغار .. كرابا متقطع نزل ..
والنوم من البي فوقا روج تب جفل ..
راقد هناك كوم من ضياع .. مركب مسافرة بلا شراع ..
واحلام مسافرة بلا وداع
ودموع ضياع تتجارة من غير انقطاع ..
احرف انين ماخطتهن ايد بي يراع ..
ليلا نجومه يودعن خلاص مسافرات هن سراع ..
بت البلد عراتا سدت في الحلق ..
تبكي وتنوح تشرب دموعا وتنشرق ..
لمن حسيس نقارة جاها من الشرق..
قامت مع الليل وصنقرت .. وبكت بكت وشالت طريحتا
وللدميعات كفكفت ..
فجاة السنين الفاتو جن .. وايام زمان اتلملمن ..
اتذكرت كانت تقوم فجرا صباح .. لمن يقوم اهل الصلاح ..
وابوها شايل السبحة وصاح .. ياشافعة سوي الشاي سريع وشدي الملاح ..
وشيلي المناجل وامشي قدامي الجرف ..
اتذكرت كانت تسبقه وتمشي تنزل بي تحت ..
تمسك صبيطة التمرة بي ايدا وتحت
تقعد تحش اللوبي وللكاويق تقش ..وتصل البحر والموج يداعبها ..
وفوق هدوما ينط يرش ..وبعدين تشيل القش تفوت ..
واليوم يفوت ..
وتفوت سنين .. وتمر سنين ..ويكبر عمير بت البلد ..
ويكبر معاها كمان حنين ..
في يوم صباح .. صباح هناء
واحة عبير نغمة غناء ..
وريحة لبيني مقننة .. مر الجنا وسلم علي بت البلد ..
زي عادتو سلم وابتعد .. تابعاهو عين بت البلد
.. بت البلد سمعت ضريبات القلب .. يا الله مالو دا ها القلب ..
بعد الثبات كيفن خرب .. بت البلد عرفت تحب ..
واليوم داك بت البلد ماجاها نوم ..
مادام خيال ود البلد يمشي ويحوم ..
بين الخيال شافت وجيهو الهاش وباش ..شافت عيونو الفيها فيض احلامها عاش ..
شافت سحاب الريدة فوق واديها راش ..
بت البلد تاهت مع الشوق الماعاد يتكتم ..والصورة هادي الفي قليبا بتترسم ..
تاهت مشت سايقاها دقات الدليب ..
لي دار حبيبا ومني القليب ..
--
الحبيبة سلمي ..
دائما انت تاتين بالفرح والحنين ..
هو الرائع محمد جبارة .. يصل بنا الي شواطيء الدفء والحنين والطرب الذي
يوصف داخل الانسان احساسا ورقة ..
حاولت ان انزل جزء كبير من اغنيته الخالدة - بت البلد - كرواية مغناة
باحلي صوت .. وهي اغنية في شكل سرد قصة من اجمل ماتكون القصص ..
عفوا اذا لم اوفق في كتابة الاغنية .. او اكتمالها ..ولك الاشواق
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: maman)
|
مامان العزيز
تقدير مربع
الاغنية دى متل رفيقاتا
حزينة ومليانه اسى
وكتير الشالو الزمن
كتير البقى بدل القمرى يصدح فى محله الغراب
جم صغارو طرب يميلو
وديمة يرشفو سلسبيلو
الا اه ..اه يا حليلو
جا الغراب حلق بديلو
وما اكثر الغربان التى تفسد علينا حياتنا
وما ابشع حين يحل محل الهديل صوت الغراب
لكننا موعودين فى غدنا باجمل الالحان طالما السر عثمان الطيب حادينا
وطالما محمد جبارة شادينا
| |
|
|
|
|
|
|
|
|
 Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
أشهد الله أنك سِر آخر (السر عثمان الطيب)
سرٌ ناثرٌ
لله درك
لقد دغدغت مشاعري وجعلتني افكر في هجر قاموس لغتي
لك الشكر يا عماد
العزيز يس الف مليون سلام
انا عارف صوت الطمبور بيلم الغالين
مسؤل من الخير الفردة ابو الحسين واين غاطس
إنشاء لاالله في العسل
قواسيب مودتي
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
Quote: يامامان
التحيات
ياخى إنتو يالشوايقة زى تمركم تكيفوا الفى الجامع والفى الانداية.
حلوين تغذوا ومرين تظبطوا الراس.
البشيل بالهين يشبع ويتكيف حتى البياخد منكم تقطير.
لله دركم!! |
لكن بالغت يا بله موسى
والله نحن شكلنا (من شكلة) زاتو حنين
ربنا يديك العافية لخصت الموضوع بأروع وابسط ما يكون
Quote: مسؤل من الخير الفردة ابو الحسين واين غاطس
إنشاء لاالله في العسل
قواسيب مودتي |
أستاذي حسن الطيب
سلام
أبو الحسين اتلصق في أرنب العسل
لو بتذكر كمين أرنب العسل
مع قواسيب عسلي
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: سلمى الشيخ سلامة)
|
الرَّائعة / سلمى الشيخ سلامة ..
شكراً على روْعةِ التصويرِ
ودقَّةِ الاختيارْ ..
وبالفعلِ هُوَ مُتفَرِّدٌ بصوْتِهِ
العذبِ ، والذي يكتنِزُ بينَ
طبقاتِهِ دِفئاً وحُبَّاً وحَنينا ،
ولقدْ رأيْتُ ذاتَ صباحٍ قديمٍ إحدَى
قريباتي تبكي وهيَ تُجْلِسُ
المِذيَاعَ بجانبِها استماعاً
لهذا الرَّجُلِ القامةِ مُرَدِّدَةً
معهُ " شوف الزَّمَنْ يا يُمَّة
ساقني بعيد خلاس " برغمِ
أنَّها لمْ تغترِبْ في حياتِها لكنَّهُ
الإحساسُ بالمُفْرَدةِ وغُرْبَةُ
القلوبِ وإنْ لَمْ تفارقْ
فُجاجَ أرْضِها أوْ ضَمَّتها
بينَ الضُلوعِ أوْطانٌ وأوْطَانْ ،
فبكيتُ لبكائِها ،
واليومَ أنا أبكي مِرَاراً
كلَّما تذكرتُ ذلكُمُ الحادثَ
وتلكمُ الأُغنيةَ ،
وعلمْتُ أنَّ تلكَ الكلماتِ بعيدةَ
الدَّلالةِ عندما تُصاحِبُها التجربةُ
الواقعيَّةُ ، فوجدتُ عُذْراً
لبكاءِ قريبتي ووجدتُ عبرَها عُذْرَاً
لإهْرَاقِ دُموعي اليوْم ،
فالزَّمنُ قدْ جَرَّعنا من المرارةِ أكؤساً
وكِئاساً وكؤوس .
ولكِ منِّي احترامٌ
عميقٌ وتحيَّة.
أخوك / محمَّد زين ...
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: othman mohmmadien)
|
اخى العزيز عثمان محمدين
(كانت مثل هذه الكلمات بالذات...
تثير فينا لواعج الحزن والأسى ...
وتمنينا حينها أن لا نذق ذلك الطعم المر البتة... ولكننا تلقمناه ...
فتشوهت فينا تلك العاطفة والاحساس الرقيق .... وصرنا نبحث عن الخلاص عن هذا التشوه ... ولكننا بلا شك لن نحس بذلك.... فلقد أخذت منا الغربة الوقت كله وذلك الزمن القاسي والذي إن لم تكد فيه لن تعيش ...ويبقى الحلم فقط فينا ومرارة الغربة كذكرى....تلقمناها في طفولتنا حينما كان وطننا مكمل الجمال والانسجام إنسان وأرض وبيئة...)
وهذا لعمرى ما بتنا جميعا نفتقده
لكننا ما زلنا نتمسك بتلك الحبال
وان بدت عنكبوتية
لكنها بالنهاية توصلنا الى مكامن ضعفنا فنتجنبه
نتعلم كيف نعجن خبزنا بحب تلك الاماكن
بخميرة اسها الحب له
مهما بلغت قسوته علينا فهو اظفارنا التى ننبش بها الحزن
فيسكت لبضعة لحظات
لكنه بالقطع حزن كامن
كلما نبشت فيه اشتعل
نار مخبوءة
اتمنى ان لاتنطفى
ساكتب لك تلفونى هنا ياصديقى لتلك الانسانة العزيزة
وسيظل التواصل بيننا لن تنقطع اوصاله
013193374077
لكما محبتى
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: محمَّد زين الشفيع أحمد)
|
الشاعر المرهف محمد زين
قلت
الإحساسُ بالمُفْرَدةِ وغُرْبَةُ
القلوبِ وإنْ لَمْ تفارقْ
فُجاجَ أرْضِها أوْ ضَمَّتها
بينَ الضُلوعِ أوْطانٌ وأوْطَانْ ،
وهذا ما كان يعترينى لحظة ان استمع لهذه الاغنية
فالغربة ليست هى مفارقة الاوطان
بل حين تكون فيها وتحسها
لكم بدوت غريبة حين عدت للوطن
لكم احسست اننى غريبة
ما اقسى ان تكون غريبا فى وطنك
ما ابشع ان تكون
تمشى فى الشوارع وانت تبحث عن الفة مفقودة
تطالع اوجه الناس فتحس غربتك
تدخل الى اماكن كنت تحس انها ملكك
فيعتريك الاحساس انها غريبة
حتى الاسواق تحسها غريبة
فيتكون لديك احساس الغربة من جديد
فلا تنى تردد
شوفى الزمن يا يمة ساقنى بعيد خلاس
جرعنى كاس
وتشرب كاسك حتى الثمالة ويسكرك بفجيعة الغربة الداخلية
ما اقساها يا صديقى
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: عبدالله الشقليني)
|
Quote: شفتي النضمي وكتين يكون سمح بيلم الناس كيفن
غايتو ود المنسي وصلاح الاحمر جعليين |
باين عليك متلش ياأبا ريم ،صحيح أنها لمتنا،بس
هي وينها؟ طلقت النيران دي وزاغت سابت العالم
الممكونه دي تجرس وتبكي.
وبعدين انا ماجعلي انا( جايقي).
ومطلوب القبض على سلمى بهدف التحقيق معها حول
الأسباب التي دفعتها لتنزيل هذه الأغنية المدمرة
التي اكتسحت كل سدود ثباتنا العاطفي في غربة
لاتبقي ولاتذر ،تناطح بسنواتهاالثلاثين ما تبقى
من أعمارنا المسافرة في زمان التيه والأحزان.
| |
|
|
|
|
|
|
|
|
|
Re: محمد جبارة نغم الحزن الذى يغسل الوجدان (Re: صلاح الأحمر)
|
صلاح الاحمر
ايها الحبيب
ومطلوب القبض على سلمى بهدف التحقيق معها حول
الأسباب التي دفعتها لتنزيل هذه الأغنية المدمرة
التي اكتسحت كل سدود ثباتنا العاطفي في غربة
لاتبقي ولاتذر ،تناطح بسنواتهاالثلاثين ما تبقى
من أعمارنا المسافرة في زمان التيه والأحزان.
جيتك يا صلاح ود امى
وزيك بكيت
واكتر
لانها اغنية بتزرع حب الام اينما كنت
كيفما كنت
تهديك امل ان الام هى الكائن الخالد
الكائن الذى منحنا الحياة
والحياة يا صديقى قصيرة
لكنها طويلة بحب الام
وما ضهبت اقول لقيتك
ما مشيت الا منكم وليكم
هى اغنية كما تفضلت
لكنها تزيد من اليقين كل يوم مهما واينما كانت الام
حتى فى غيابها الجسدى
لكنها باقية فى ارواحنا
مظللة كل مساحات حياتنا
فلمحمد جبارة والسر كل الحب لانهما جعلا حب الام واجب علينا
من خلال
ما بثوه فينا عن تلك الانسانة التى لن نتنازل عن حبها
| |
|
|
|
|
|
|
| |
سلمى الشيخ سلامة
Alsa7afa_30
kamalabas
Elkalakla_sanga3at
أحمد الشايقي
Al-Shaygi
maman
salma subhi
yasiko
هاشم أحمد خلف الله
محمد أبوعاقلة الطريفي
مجاهد عبد الرحمن
saif addawla
Mohamed Abdelgaleel
ابو عثمان
ابو يسرا
هند محمد
صلاح الأحمر
الفاتح يسن
مجدي عبدالرحيم فضل
ماجدة عوض خوجلى
خالد علي محجوب المنسي
خضر حسين خليل
Emad Abdulla
أبوبكر طه
مامون أحمد إبراهيم
ود العجمى
جعفر عبد المطلب
ابو جهينة
طارق جبريل
baha eassa
محمَّد زين الشفيع أحمد
othman mohmmadien
عبدالله الشقليني
فيس بوك
تويتر
انستقرام
يوتيوب
بنتيريست