|
|
 فيصل عباس مرحباً بك في خرطوم العزيمة والهزيمة
|
صاحب المشاهد اليومية القصيرة وصاحب الهم الكبير بيننا
يكتوي بسخانة الخرطوم هذه الأيام ,, يلملم تفاصيلها المبعثرة
بحب يجيده ,, ينظر في الخلق .. يصول ويجول مابين أمدرمان
وأتني . والديم ... والكلاكلة ... ياصديق المسافات مرحباً بك
وشرفت وآنست ... هكذا يقول المصارنة عيال الأيه .
مرحباً بك فيصل في هذا الشظف .
.............
خضر
|
|
 
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: أبو ساندرا)
|
أبو ساندرا
مرحب بيك هنا وترحيبك بي فيصل في غيابه العظيم عن الدوحة
بالامس لفينا لفة السنين ربما سيغادر الي كوستي خلال هذا
اليوم به لهفة غريبة لـ ولـ ولـ أشياء ربما غابت عن خواطر
هذه البلاد جاء فيصل ينبشها ليخرجها هكذا حتة واحدة . تصادف
حضوره بميلاد تفاصيل جميلة لدي بعض الاصدقاء ( ولا توضيح أكثر )
بالامس جلسنا سوياً في أتني في مسطبة بسيطة مددنا أرجلنا
ثم بدأ الضل يتناقص كلما أمتدت بنا الوسنة نحو النهايات العجيبة
لوهلة احسست بوجوه العابرين وهم لايجدون سبباً لتلك القعدة
النهارية البريئة . أظن فيصل لم يكن يهمه من أمر العيون حينها
شئ وهو كذلك ذهبنا بعد ذلك لمشاوير جميلة .
قبل أن يهزم الهلال أمانينا كان يوما عادياً من أجمل أيام الله
كان ذلك وفيصل يشاغل كل من يمرون من عندنا أوووه كدت ان أنسي
عزمته قهوة سوداء بلا سكر أعدت له توازن روحه المشتهية للاصدقاء
ودلال الحبيبات العجيب
عن الديم ياابو ساندرا كان برفقه ميرغني الماحي ولك ان تتخيل
باقي السيناريو .
..........
خضر
| |
|
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: ضحيه ابراهيم)
|
ياخضر ...
ازيك ياخينا ...
طيب ياخى الزول دا عندو فى ذمتى شريط كاسيت ..اها النظام
كيف السفر يجب ماقبله ولاحايجى يطالبنى بيهو ..لانى بينى وبينك
كدا نويت اعمل بيهو (حميل) ..على فكرة الشريط دا ماعندو اى
ارتباط ببرنامجك الكاتبو فوق ...ودا عالم تانى فيصل ماحايدخلك
فيهو لانك ماعندك استعداد روحى للحاجات دى ...
بمناسبة الشرائط دى ياخى.. انت زمان مش المغتربين برسلو ليهم شرايط
لزوم الذكرى وكدا ..بالله ماتعمل فينا خير وترسل لينا شريط شريطين
من النوع القاعد يجيبو (كرفس ) فى بوستاتو داك ..
ينوبك ثواب والله ..
سلام
| |
|
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: أبو ساندرا)
|
آمنت بالله ..
هذا بلدٌ بلاؤه مقيم يا خضر ..
أيّ الأثافي هو صاحبنا ؟؟
قلنا قد رحم الرحمن الدوحة إلى حين ..
قام سلّطه ربك على الديم ..
و هو ديارنا , و نواحي لنا فيها أعزاء أعزاء ..
أكلني قلبي .. فصاحبكم لا يأمن له جانب ..
فهو ود المويه .. و أبوها و أمها .
يقول العبادي عليه الرضوان : يا عقرب هواك ساعة قرصتي لبدتي ..
و شلاقةٌ منه - لله و الرسول - لن يلبد صاحبكم ..
فاجأني اتصاله ليعلنني - منبهلاً - أنه في الخرطوم أضحى زرقاء يمامتها ..
يبصر فيرى ( الجمال التي مشيها وئيدا ) ..
و الشبريات و الهوادج أرتال أرتال .. و ألوان الحياة سُكسُكاً و خرزاً ..
فيضرب الأرض بمركوبه من فاحش الطرب ..
يحمحم و يزبد ..
لا عاصم يا إبن الذين .. لا عاصم اليوم لك ..
ح تعرف الله واحد ..
وأهل المدينة على غفلاتهم ساهون , و يراؤن و يعمهون في الطناش ..
بحكم العادة و ( عِش رجباً ترى عجبا ) ..
فيقع له ذلك في جرح ..
و هو الخارج من وجار الإستئناس و أقنان الدجاج ( بلا موضع فيه إلا لحزة لحظٍ أو رشقة مقلة أو رميةٍ لبسيمٍ مفرور ) .
فيمسكه مرض الدوباي - قبلو وحّدو - .. فيدوبي .. و يقوقي .
آمنت بالله ..
نصيحة لله و الرسول يا خضر ياخوي ..
أخرج بجلدك من رفقة فيها هذا الصابيء ..
( البيباري القيف .. بينزلق ) .
ألا قد بلغت ..
و آخر دعوانا أن : إن شا الله يا فيصل يا ود عباس ..
الشوق الفينا ليك يليس عويناتك الأربعة ديل و ما تشوف بيهن إلا عمال البناء و المقاولون ..
و موظفو الحكومة و أصحاب المغالق , و قوائم أسعار أسمنتي عطبرة و ربك .. و في ذلك فليتنافس المتنافسون .
و أن يباري أخانا خضر تلك ( الجمال التي مشيها وئيدا ) .
و الكمدة بالرمدة ..
قول آمين .
| |
|
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: Emad Abdulla)
|
Quote: نصيحة لله و الرسول يا خضر ياخوي ..
أخرج بجلدك من رفقة فيها هذا الصابيء ..
( البيباري القيف .. بينزلق ) .
ألا قد بلغت .. |
وهل لي ان اقول غير ما قال شيخي (عماد)
وان عماد قد قال وعندما يقول عماد شيئا قلتو..!!
..........
سلام ياخضر ونحن برضو بنقول مرحب بفصيل عباس في الخرطوم التي اثق تماما بانها تستغيث وتتباكي
من هذا الصوفي المتمرد..
وكل المني لابو (موج) باجازة وريفة بين الاهل والاحباب..
| |
|
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: Raja)
|
سلامات
وعوافي
خدر ازيك ياحبيب
فيصل دا زي ماقال "عرابنا الاعظم" عماد عبدالله ..احسن ليك ما تباريهو الزول فايتة فيهو سبحة وسكران بالجمال والمحبة واقل ما يمكن ان تجده منه هو ان تصاب بهذه العدوة ..ويالها من عدوة ..
الرجل قد تشظى شبابه وفنا بحثا عن الرحيق في مواسم الجفاف .. اذكر انني رايته في "رؤية منامية" وهو ناشف "الشلاليف" يجلس بقرب النهر .. فلا نزل النهر ليرتوي ولا سال النهر عنه بلسان "الماء"..
الزول دا سماحتو بتودرك يا خدر ماتقل منو "يعني لاقيهو في اجازتو دي مرتين بس مرة اول مرة والمرة التانية اخر مرة" اظن الجرعتين كفاية جدا جدا في ظل شح الادوية والمطببات الروحية ..
فيصل عباس ..
ياهذا الرجل الكعب "انا لا مشتاق ولا مستني شوفتك"..
وتاني لو سمحتا ماتجي راجع الدوحة .. احسن ليك تقعد في البلد هناك ..
عشان نرتاح من سماحتك وحلاوتك المبشتنا حالنا دي ..
عالم سمحة مابتختشي ..
والريد خريف وحدائق ..
خدر سلملنا علي سفيان نابري ..
معزتي
| |
|
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: خضر حسين خليل)
|
Quote: فيصل الزبير
اسمع
فيصل عباس الزبير |
طيب يا نعومة
فيصل الزبير = فيصل خالد الزبير حضرة الشمباتي
و
فيصل عباس = فيصل عباس يا تمانية و آس الشمبانزي
فهل عرفت الفرق ؟
يا الخضر
الزول ده قنعو من الديم
وقول ليهو ماتدخلو إلا وأنت متوضيء
وكامل الطهارة
ومايظن إن مباراتو لميرغني الماحي حا تنجيهو واللا حاتشفع ليهو
كلمو باللاي
| |
|
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: أبو ساندرا)
|
يا كبير ...
سمعنا بي علي يوسف الطهّار ..
و بخيتة بت أم سوط الطهّارة ..
يطرشنا بي : كامل الطهارة ..
خدر زمااااان قال ليك ساعدونا بالتشكيل و كده .
أخانا المحاسب المالي .. بشلاقتو ديك يقوم يفتكر الموضوع مرازة 
و تسول له الأمارة بالسؤ نفسه أن الديم ما بيدخلوه إلا ( ناس عمك كامل الطهّارة ) 
و الذين من شاكلة هذا القبيل , حمانا الله و إياكم .
فيصل .. يا صاحبنا الذي يرازي عند المداخل ..
و إنت تنقلج حافي حالق إلى ذلك القدس الذي وحده لا شبيه له ..
ستعبرك ذكرى :
علي زيرق كتال الكلاب ( تعمل حسابك )  .
و عبدالله بنفسجي ( تعمل حسابك برضو .. لكن براااحه ) .
و علي كربشين ( في دي , إنت و ضميرك ) .
و سعاد بيكاديللي ( دور في الإستان ) ..
و ياغوب القطّي ( ما تحنّك معاهو كتير , أطبق و اتجارخ ) ..
و وشّو ( ده يده جريدتين , حاول تكبّر اللفة ) ..
و قطامة ( إتصرف سريع ) ..
و عوض كيته ( تجكك .. تتجارخ .. إنت الخسران ) .
و قوس الميد ( تكب القمرية تقوقي .. و تتلحس ) .
اللصيق اللصقتو ليك إنعام ببراءة ده كلو رندوك ..
فيصل = ............
عباس = ...........
الزبير = ..........
و جاي في السلك مع قلب الدفاع بركات الكبير ..
فتبصّر يا مان ..
تنهدات : 
جدادي يلقط الحب و .. يجري .
| |
|
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: فيصل عباس)
|
الخدر كيفنك...
اخترقت شريعتنا، وقتلت الغلام، وبنيت جدار المحبة، الزول ده ياخدر، مسطول بجمالياته، فما تخلوه يشوف حديقة (اوزون)، حيث الزراف الثري، وجنون الملامح، وغنج الخصور، ولا يشوف (قندهار)، ابو ساندرا، ومريستها، ولحمها المشوي...(اوعه يقابل احمد مكنات)، ده متخصص في التضليل، والكيد..
والله يا فيصل ليك وحشة، الخرطوم بقت مدينة ما بتتعرف، لم يعد لهاحواف، ولا قاع ولا سقف، مشروره، ومجنونة، ومترهله، ومساهرة، تضوع بالبخور والبارود والغبار والتهليل، يارب الواحد يشوفك حايم بحمد النيل، متلفع شارة الخمر التانية، آخر مرة مريت بهناك قابلني واحد (قال لي ياخي ما تشيلني معاك، وكنت ماشي كداري، قال لي (ختني في كيسك ده)، للخرطوم تهور خاص، السنوات العجاب هزت الجهاز العصبي للجميع، وتمضخ عنه (جنون عام)، طبعا اخوك ذهب في التأويل (شيلني معاك)، والكيس كان بتاع موز، قالت يارب: بقصد صفرة الموز، وهي تعني (الغيرة)، من الالتفات لغير المحبوب..
قالوا في السودان الزواج بقى (باللوحات التشكيلية)، ولكن بيني وبينكم (أغلى ما في الوجود هي اللوحة التشكيلية، من حيث المضمون، ومن حيث القيمة المادية (الصرخة، وفتيات هاييتي ب 4 مليون دولار)، فلم العتب، على مي واسماعيل، اللوحة غالية، وأعظم لوحة هي (المحبة)، وهي مرسومه داخل الاحشاء وبمداد الدم الهاوي..
عليك الله يافيصل لو في طريقة جيب معاك كتاب (حياتي)، أصلو غازني ليك كلام في ندوة (الأدب والمنفى)، عن السيرة الذاتية، وقالوا السير الذاتية ما جرئية في الوطن العربي، إلا نتف قليلة، زي (رحلة صعبة لفدوى طوقان، وطبعا المغربي، شكري، وخبزه الحافي و(وجوه)، وقالوا المسيحيين اكثر اعتراف وجرءة من المسلمين (روؤف مسعد، مثالا)، ...
والله حظك، غايتو الوحد من توطه رجلو مطار الخرطوم يحس بحاجة، تقطع نفس خيل القصائد، وخليك سوداني..
طبعا السلام موصول لنادي القصة، للزول الجميل ابوحازم، ومنصور اخوان، ومحمد خيار، وللبت الكتابة سارة الجاك، الحامد، وناس (ابوجنزير)، فرد فرد، وقلب قلب..
الخضر، والفيصل، سلامي العميق، وشوقي الاعمق..
| |
|
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: خضر حسين خليل)
|
فعلا الشاشة غشاشة
قابلت فيصل عباس برفقة الاخ  المناضل خضر حسين
اول انطياع هو اخر انطباع او كما يقولون
يا ريت ما قابلتوا ذاااتو ياااخ
اكان احسن بالنت يجي يقول كلامو اللي ما بفهموا ليهوالا عماد عبدالله ويتخارج
ورطة يا خضر
ورطة
عموما مرحبا لاكين خلي تلقي زول يقابلك تاني
غايتو انا رابط الحزام !!!!!!
| |
|
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: خضر حسين خليل)
|
يا.... شباب
يا.... شابة ( إنعام)
كيفنكم كلكم .
هسي ياانعام علي قول الانصاري الكجم دة يعني لو ما طلع فيصل
الزبير ولا فيصل نوبي ما حترحبي بي صاحبنا دة ولا شنو ؟
قوم إتخارج يافيصل فليست لصبايا البلاد أدني فرقة تعارف .
سيندمن ,,, سيندمن ,,, سيندمن
............................
قمر بوبا:
شلت السودان معاك ومشيت ؟
كيف يبدو طعم أيام الشجن ؟
تسلم ياحلو
.............................
ابو ساندرا
Quote: يا الخضر
الزول ده قنعو من الديم
وقول ليهو ماتدخلو إلا وأنت متوضيء
وكامل الطهارة
|
هسي إنت جادي عليك ديمك دة
لاحولالالا ومن دخل الديم غير متوضئ فهو هالك
.............................
عماد :
أنا كمان أقول الزول ده لميت فيهو في ياتو
ذقاق لقيت معلم في الراندوك
تلسم يادرفة
.............................
شفقان شريط :
بالخمر والحزن فؤادي .... عليك الله مظفر دة ماببالغ ياخي
ثم إنت وين ,, الخلوق نامت إنت وين ,,, متزكر المدحة دي
مرحباً بك ياشوق
................................
الزول الكتاب ود كرم الله :
أمس إحتفت بك الخرطوم من شرقها الي غربها
ومن جنوبها حتي شمالها كان ذلك عبر رزنامة
الاسبوع التي ننتظرها بكامل المودة فاجأنا هذا
الاسبوع محيسي عبر رزنامة كمال الجزولي ,
تناولك جملة وتفصيلاً . ياسلام ياعبد الغني الامنيات
بتلاقي كان في الاوزون ولا قندهار ولاتورا بورا العافاها
(ابوساندرا) . ثم ياخي الخرطوم دي
قلليلة أدب وحيلة بقت لابتجدع ولا بتجيب الحجار مبلغ ظني
إنها تستعيد لياقتها بعيداً عن الهرج والمرج .
Quote: آخر مرة مريت بهناك قابلني واحد
(قال لي ياخي ما تشيلني معاك، وكنت ماشي كداري، |
ليك حق ياعبد الغني تسافر وتمشي بينات الشعوب علي قول حميد
ليك حق ياود كرم الله .
عالم عجيب
....................................
منعم سليمان :
فتي الخرطوم المدلل
ياه لايقة عليك أوي أوي , خصوصاً وإنت بقميصك الاصفر
المخطط وإنت بتعيد للذاكرة السودانية الزمن السمح
زمن التكاسي الصفراء .
فك حزامك ولاتفوتك فرصة المجذوب الحل في وادي الضياع
ده كلها زي رمضان ايام معدودات ويعود من حيث أتي
فشد حيلك معاي شوية .
....................................
ملحوظة :
المحتفي به بعد قليل سيتوجه لكوستي حيث الرديف
والحاجات النضيفة والليا والمرابيع وواحد تلاتين
وكادوقلي واربعة وتلاتين والسوق الكبير فعلي أصدقاؤنا
بكوستي مرعاة فروق الشوق .
...................................
ياخ إنتو ناس عجيبين
خضر
| |
|
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: صلاح الدين عبدالله محمد)
|
خضر حسين سلامات وعوافي
قبل يومين جاءني صوته كما كان مشبعا بشيئ ما افتقدته
طويلا رغم انه كان يهاتفني فينة بعد اخري من الدوحه الا انني وبالامس رايت صوته جالسا القرفصاء يقرأ لي قصة او نصآ لا يرعوي لضجيج الماره والباعه المتجولين في مفروش او متكئآ علي حائط الجامع الكبير الخارجي طبعا ...
حكي لي في كلمات بان كل شيئ قد تغير لكنه الوطن يجذبنا من عمق الحنين اليه ... وعدته بايام ساقضيها معه في الدوحه في طريق عودتي الي الوطن ... متين ... بس
| |
|
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: خضر حسين خليل)
|
ياصلاح الدين :
مرحباً بك في هذا الشوق نورت البوست
......................
محمد ياعبد الله شريف ( إسمك الطويل دة)
ويمين الود ياصاحب كنت حاضراً معنا في تلك الجلسة البرئية
الا من الحب , علقنا كثيراً في الحركة ( النسوية) جداً التي
إجتاحت العاصمة لتفرغها بقدرة النساء الرائعات من الشباب
المدمنين من التسكع فرادي فرادي .... كل الناس إتنين إتنين
هكذا كانت الشوارع في تلك الظهيرة القائظة ... تونسنا وشربنا
ما كفانا حد الجمال من القهوة السوداء .... وفيصل يشاغل ساي
يافلان ... لاحولالالالا ياعلانة ,,,,, ياخي أنا الزول ده ياخضر بعرفو
فيصل أتاريهو متمدد في هذا الوطن بقدر رماله ,,, لاحولا لاحولا
ثم تحركنا الي الصحافة مررنا بالقرب من منزل الاستاذة أو أمنا
سعاد يالهذه الفاضلة .... هناك كنت معنا داخل العربة التي
كان فيصل يستعيرها مثله مثل أي مغترب فقط مايميزه كان الشباك الفاتح
في هذا البلد الفاتح ( ولاتغلقو الابواب خلو الهوا يدخل) .
ياخ مشتاقين وهذا الخميس لافرقة أكثر لنا في هذا السودان فدعنا نتخارج
بالبلدي كدة وماتغيب خلينا نحكي ياشريف .
سلامي لمعروف المقاتل قول ليهو السودان ده علي الايمان لسة دربو طويل
...........................
خضر
| |
|
|
|
|
|
|
|
|
 Re: فيصل عباس مرحباً بك في خرطوم العزيمة والهزيمة (Re: خضر حسين خليل)
|
فيصل عباس مرحباً بك في خرطوم العزيمة والهزيمة
خضر...ربنا اخضر ضرعاك.....
الهزيمة كلمة لا نعرفها...يا صديقى
كما لا نعرف الحزن الا الذى بدواخلنــا....
لم يحادثنى......ذلك....الهارب الى الامام....
لنصحته........
بأن لا يذهب.....
الى ذلك المسكون...و المجنون... والمترف به
تمنياتى لك.. ولى و له .. بطيب اللقاء......
لعله يحكى..... و ليته لا يفعل.....
صديق - الدوحة
| |
|
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: خضر حسين خليل)
|
Quote: صاحب المشاهد اليومية القصيرة وصاحب الهم الكبير بيننا
يكتوي بسخانة الخرطوم هذه الأيام ,, يلملم تفاصيلها المبعثرة
بحب يجيده ,, ينظر في الخلق .. يصول ويجول مابين أمدرمان
وأتني . والديم ... والكلاكلة ... ياصديق المسافات مرحباً بك
وشرفت وآنست ... هكذا يقول المصارنة عيال الأيه .
مرحباً بك فيصل في هذا الشظف .
|
مبروك عليها وعليكم
ياهو شبها
وياهو شبهكم
أمسكوه عليكم ذلك العجوز المتصابي الأشيب ..
(سحقاً له)
| |
|
|
|
|
|
|
|
|
|
Re: فيصل عباس مرحباً بك في خرطوم العزيمة والهزيمة (Re: خضر حسين خليل)
|
أحسن بحرنا
ولا بترول العرب
( حميد)
فيصل ياعباس : السلام والامنيات لك
من هذه البلاد الحائرة
بالامس تزكرت هذا البيت والليل يفعل
بي الافاعيل جاء وجهك ضمن آخرين
أناجيهم دوماً عندما يحصارني الليل
والهم بأسئلة لاتجاوب .. هربت بكلي
اليك وماوجدتك هاهنا
عليك اللعنة وعلي الارض الجحيم
وينك وينك وينك وينك
.ثم أناولك ماتبقي من جراب صديقي
حيدر علي الحسن يقول فيما يقول
( تحندكنا وتفوت .. ورينا شن فايدة
مجيك .. ورق الشجر ماكلو توت .. ونوم
الحبل ما جم ديك )
أنا أبحث عنك ياصديق والحال من بعضو
......................
خضر
| |
|
|
|
|
|
|
| |
خضر حسين خليل
أبو ساندرا
ضحيه ابراهيم
محمد عبدالرحمن
Emad Abdulla
عبدالكريم الامين احمد
Raja
ودرملية
انعام حيمورة
GamarBoBa
سفيان بشير نابرى
فيصل عباس
عبدالغني كرم الله بشير
عبد المنعم سليمان
صلاح الدين عبدالله محمد
Siddig A. Omer
كمال علي الزين
فيس بوك
تويتر
انستقرام
يوتيوب
بنتيريست