يعتبر موقع Insure.com أغلى المواقع على الشبكة العنكبوتية التي تم بيعها ، فقد بيع الإسم بمبلغ 16 مليون دولار أمريكي فقط في عام 2009م. أها وأنا بقرأ في الخبر المهبب دا طوالي شياطين بنات جيران أفكاري قعدن ينططن وقالوا لي ماذا لو باع بكري أبوبكر سودانيز أونلاين ، أها سرحت كده وإتخيلت وقلت في نفسي من شر الوسواس الخناس ، فرد لي قال لي وسواس في عينك أصحي يا وهم وشوف العالم حوليك وشوف بقية المنابر في النت وشوف "بمبركم الداير بتاع عناقريب دا" المهم قلت خلاص بايظه بايظه ، وأجدها مناسبة طيبة لمالك موقع سودانيز أونلاين. كوم وصاحب الحق الحصري وسيد الكورة والبدي الباسوورد وبيسحبه وبعلق الموضوعات ويغطس حجرها ويسمح بالأكواد ويلغيها ويخت لينا صور دعايات في الصفحة الأولى لو ما عجبتنا ما بنقدر نتكلم لأنها عضويه ملح ساكت ، المهم بعد أن أصبح الموقع مشهوراً وأحد أهم المواقع التي تعنى بالشأن السياسي وتتعاطي مع أهم الأحداث بالقدر الذي أصبح مصدر معلومة لكثير من الحكومات والصحفيين والمهتمين بالأدب والفن والرياضة وحتى الكرملين والبيت الأبيض و10 ردميه street بلندن عدا عن كون الموقع أيضاً أصبح يمثل قيمة إضافية لكل من ينضم إليه "تحت تحت وجاهة إجتماعية على رأي عاطف عمر" ويمكن عرض الموقع للبيع والسعر المتوقع ربما يصل إلى 5 ملايين دولار أمريكي وبدون الأعضاء المسجلين في الموقع أها يا بكري تبيع وتشتري نص بيوت الحلفايا ولا تفوت الفرصة وتقعد تغني يا ريت يا ريت يا ريت. هناك رسوم دلاله وتسجيل ونقل وبعض الإجراءات الإدارية والقانونية يعني في حدود 350 ألف دولار ، كتيره بتاعت شنو يا راجل دي 5 ملايين يعني ولا في الأحلام وبلا أب حراز بلا د. نجاة بلا إبراهيم بقال بلا بت قضيم بلا هم. أهم شرط خلو العين المباعة من الموانع والجملة الفوق دي ما فمتها قمت مشيت لي أستاذ عماد المحامي ، قال لي أقعد يا كيشه أها قعدت وجاب لي شاي وأنا كنت طمعان في الفطور لكين لأن السوق نايم والبلد كلها بقت تفتي وعارفه القانون رضيت من الغنيمة بالأياب ، المهم قال لي: العين المباعه هي الموقع هنا والموانع هم الأعضاء يعني داير الموقع بدون أى عضو ولا administrator حتى وبي كده كل عضو يشيل باسوورده والـ nickname ويلف في النت لمن يرك ليهو في منتدى أونلاين ولا أوفلاين. وبيني وبينكم في أعضاء كده كان إندسوا وسط البيعه المشتري حا يكون أكل نيم وشال أصبعو وطبظظظظظظظظ طبظ بيهو عينو وفي بعض الأعضاء يكون الأصبع في حتة بتاعت شطة هندية وليمون صومالي. وتاني يوم تطالعنا عناوين المنتديات بالتالي: أبو جهينه يستأجر دفاراً لنقل محتويات مكتبته د. أبكر آدم إسماعيل يقرر بيع مكتبته ويهب ريعها لمنظمة إنسان شيري تقرر شراء أسهم من المشتري الجديد لسودانيز أونلاين ودقاسم يعرض باسوورده للبيع بدواعي السفر منوت يعتزل المنتديات السايبيرية والـ face to face تيسير عووضه توقع لمنتديات النيلين تراجي مصطفى وآخرين يدشنون موقعاً جديداً الكثير من اعضاء يروح ليهم الدرب في الموية لأن المويه حدها الرٌكبه -------- هذه أضغاث أحلام وتخيلات وسناريوهات متوقعة لإنهيار دولة سودانيزأونلاين وطن من لا وطن له ، وهي قطعاً ليست وطن جدود لأن الأجداد كانت عمليات الـ chat عندهم وجهاً لوجه.
Quote: ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ وحاولت اتخارج منه وما قدرت
د. إمام الصديق علي لقد مررت على هذا الرابط ولم يكن مرور كرام بل مرور داقسين وما ناقشين إستغرب في كثير من الموضوعات تجد أن الموضوع كله نقطه (0) أو علامة تعجب أو حتى الموضوع يكون فاضي وربما علامة إستفاهم واحده وبس (؟) وكتر خيرك أن وضعت الكثير من علامات الإستفاهم (63) علامة وما تتعب نفسك تعد فقد قمت بإحصائها عددا لأنني فاضي وما عندي شغله ولك أن تفعل إن شئت. وإحقاقاً للحق فقد أبيت إلا أن تضيف هذه العبارة "وحاولت أتخارج منه وما قدرت" وهي حاشية أو محمدة تحسب لكم وإن تمنيت عليك لو أفصحت وأبنت أكثر حتى لا نؤل الموضوع ونورده موارد تدخلنا في حيص بيص ذلك لأننا أمة مفتونة بالتأويل والتهويل وحتي لا تخلينا في حيرة غير مراعياً للخوه السايبيرية والملح الإنترنتي. إجمالاً على الكاتب في مواقع عامة على شاكلة "سودانيزنا أونلاينا دوتكومنا" هذا أن يراعي التفاوت في الفهم المقسم على أعضاء المنبر ، فإن كان بيننا من يسبق إسمه حرف (د.) أو (م.) أو (أ.) (أو حرف عله) وهلم فإن بيننا أيضاً وفينا سابله ودهماء وغوغاء ورجرجه – وهي فئات يشرفني الإنتماء إليها لكي يبارك في الله لمعرفتي بقدر نفسي – وهي قطعاً في حاجه إلى أن تتم مخاطبتهم بلغة أو عبارات أقرب إلى فهمهم فلا ضير في أن يتمثل المستنيرين هنا بكلام الشاعر "إبراهيم الرشيد" ولو أختزلنا الأغنية التي ترنم بها العملاق محمد عثمان وردي في عبارة واحدة "أبقي أنزل يوم من علاك الفوق" عشان نفهمكم ونفهم كوسشنات ماركاتك دي ، الواحد بدخل البوست وهو خايف والله خايف من أن لا يفهم ما به ، أها يقوم يفاجأ بشفرة دانفشي ، يقوم يخلي الكمبيوتر ويغسل وشو بي موية ويجي صادي تاني برضو الحال ياهو نفس الحال ، يعاين لي نفس الوش في المرايا ويقول بين الجهر والسر كلميني يا مرايا ، يسمع صوت من وين ما عارف يقول ليهو أحسن ليك حا تزعل ، أقوم تاني أجي راجع وأصاقر المنتدى. يوجد في مخ الإنسان (12) مليون خليه – سبحان الله – تسيطر على العضلات والأعصاب وأجهزة الجسم المختلفة. ودي بلاشك موجودة في كل إنسان كامل ودي زي ما قلنا رموت كنترول عضلات وأعصاب وما يرتبط بها من خواص ، لكين حكاية المقدرة على إيجاد عدد كبير من البدائل و/ أو الإستجابة والسرعة والسهولة في عملية إستدعاء المعلومة والقدرة على إضافة تفاصيل جديدة للأصل لا تخل به والكلام النظري الكتير الجميل دا ، أها دي برضو موجودة ومفعّلة ومستخدمة من قبل الناس كافة ولا ناس الدهماء والغوغاء ومجموعة السابلة القابضة لا تستفيد منها بمعني أنها لا تستخدمها بالصورة المثلى. أحد الخبثاء شبه العضوية في المنبر بقعدات السنه تلم دا على دا
03-15-2010, 01:24 PM
Dalal Ezzaldin Dalal Ezzaldin
تاريخ التسجيل: 06-19-2008
مجموع المشاركات: 1406
Dalal Ezzaldin شكراً طبعاً إنتي ونحن كلنا هنا هواة لا بندفع لا بيدفعوا لينا قروش ، ربما يكون البعض قد أضاف قيمة للمكان وأصبح المكان مشهوراً بفضل عضويته فيه والقيمة هنا بتكون من منظور صاحب الكورة اللي هو بكري أبوبكر يعني هو اليقيم ويقرر حا يدفع كم لي منو من عملية البيع وبالضرورة ما في شئ قانوني ملزم له بأن يدفع لكي أو لي أو لأي من الأعضاء. أها الحكاية لمن تجيب ليها بيع المشتري بيكون عاوز البيت خالي من المستأجرين بإعتبارنا موانع يعني ممكن نعكلت ونخترع حكاية مسمار جحا ، يعني يجي يطردنا نقول ليهو كيه كيه عندنا باسوورد وإسم حركي وبروفايل كمان ، والناس الما خمج بيزيدوا أن لديهم مكتبات حتى لو ما كانت ناصية والحمد لله أن كل ما أملكه من حطام سودانيز أونلاين دوت كوم شوية مقالات ومداخلات لا راحت ولا جات أما الباسوورد والإسم الحركي وحتى البروفايل فيمكنني أن أعمل أحسن منها في مكان آخر. يبقي إذا تم البيع عليكي أن تتصوري سناريو لما بعد العملية وفي أحسن الأحوال يمكنك أن تحتفظي بباسوردك وإسمك الحركي وكل مقالاتك ومداخلات أها تختي الحاجات دي كلها في قفه كبيرة وتقعدي تحومي بيها النت دا شارع شارع لمن تلقي ليك منتدى يديك عضويته أها تحطي رحالك هناك وتشوفي الشروط للكتابه والمداخلات وهل هناك مدافرات وملاسنات أم الحال رايق عندهم ومنها وبها وعليها وعلى بركة الله
03-16-2010, 07:12 AM
almulaomar almulaomar
تاريخ التسجيل: 07-08-2002
مجموع المشاركات: 6485
الحكاية طالما ممكنه خلونا نقترح حاجات قبل البيع: يعني على سبيل المثال تكريم الأعضاء المميزين والمتميزين ودي لابد من وضع أسس لها يعني حكاية المميز والمتميز دي ، أها وبعدين يقوم القائمين على أمر المنتدى بإعطاء الجميع شهادات تبين مدة خدمة العضو وعدد بوستاته أياً كانت وإذا سبق أن تم فصله أو تم تحويل موضوع من موضوعاته للخور
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
almulaomar
Dalal Ezzaldin
فيس بوك
تويتر
انستقرام
يوتيوب
بنتيريست