الترافيس هو حركة وبركة مساحية تربط بين نقاط مساحية محددة وقد يكون مفتوحا (اي مبتدي عند نقطة ومنتهي عند نقطة اخري) اومغلق وهذا النوع يبداء مسيرته المساحية القاصدة من نقطة معينة وينتهي عند ذات النقطة...!!! سفرنا سيكون (ترافيس) من النوع المفتوح كوننا انطلاقنا من قرية المخيرف جنوب بربر تلك المدينة التي يتنسم المتجول في طرقاتها رائحة عبق التاريخ و تحف ذهنك سيرة مسارات التجارة القديمة وقوافلها وتمتع نفسك بالمترات المجدعة في اراضي يمكن ان نطلق عليها شبه صحراوية....!!!
03-08-2010, 12:19 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
ذلك الشريط الملي بقري في المسافة ما بين (بربر وعطبرة) تكسو شوارعه الفقيرة حركة بكاسي يبدو انها تاتي من الجروف التي يحتضنها النيل وفي ذلك الزمان كانت مطاحن الشيخ الكيزاني العتيق (الشيخ عبدالباسط) هي من تملي الافق... وايضا يتردد كثيرا سيرة الدكتور عبدالسميع الذي عرفت لاحقا بانه طبيبا صيدليا ولكنه يسمك باوراق كل مشاريع الامن الغذائي مديرا لها... ايضا هنالك دكتور الهندسة الزراعية( الحاج عطا )ولا ادري حينها هل كان وزيرا للزراعة ام والي ولكنه بالتاكيد يقبع في مكاتب حكومية ضخمة في احدي نواحي وضواحي عطبرة...!!!
03-08-2010, 12:21 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
في ذلك الشريط كنت مهتما جدا بزيارة قرية (كنور) كونها موطنا لبعض اهلنا الذين وجدو فيها مسكنا ومعيشة.. ومنيت نفسي بالمسير شرقا للنيل وقطع البحر صوب (الباوقة) التي قيل بان تفاحها لذيذ في تلك الاغنية التي سمعناها من الف عام وعام بجانب سيرة صديقي المخضرم (عباس ماس) وبعض الدفع من ابناء تلك التخوم...ولكن الدرش وعصر المساحة الذي يجعلك لاتستطيع حتي (حك راسك) خطف مني تلك الزيارات وجعلنا اسيرين لقومة الصباح الدغشي ومباراة (الكروس هير) (والاشراف علي دق الوتد) ومممارسة البكونبج وانت متدربا رعديدا عليك ان تسجل وبسرعة فائقة وبدقة ما يمليه عليك المهندس في اثناء قرايته من (جهاز الميزانية)...!!! لم تطول تلك الفترة ومرت ايامها الشاقة كسحابة صيفية هطلت ملامح البدايات التي كانت موشحة باشراف المساحين العاليين الانضباط والدقة (والملي متر ده) لو راح الناس ديل كانو بفتشو فيهو ممكن يوم كامل لحدي ما يلقو وين ويعرفو ليييييه الحصل ده بصبر والحاح وحماس عجيب خلااص...
03-08-2010, 12:27 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
وكبرالمة لم نكن نعلم اسباب رجوع كل التيم ذات (يوم) الي الخرطوم ودون سابق انذار ولكن كل ما اذكره بانه كان يوم حزين لاهالي تلك القرية الذين لم تنقطع هداياهم وبرتقالهم الرهيب وخيرات جروفهم...وفجاة وجدنا انفسنا مرة اخري في سماء الخراطيم لكن خرطوم هذه المرة لم يكن هوخرطوم (الحفتنة) وسندويش السوق العربي ابو طعيمة الذي كان عليه الصمود لساعات طويلة ومنذ الصباح الباكر وحتي موعد عالم الرياضة حيث (غدوات الكلاكلة الشهيرة)...!!! فايام العمل في ذلك المشروع الذي يبدو عليه (الشحم) في تمويله وفرت بعض الغطاء المالي لقعدة يعتقد وحسب (ندرة العمل) وسطوة اهل التمكين وانتشار جيوش العطالة المتخرجة في رحلتهم الصباحية التي كانت رحلتي تتنطلق من لفة الكلاكلة تلك المحطة السفينة النشطة بالحياة والحركة... ثم دهاليز الخرطوم وكراكيرها لكي تختلط مع بواقي الشعب السوداني الفضل الهائمة وهي عرقانة تكابس في الرزق الحلال.... وكانت اجمل اللحظات هي التي كنت اجد نفسي في زحمة السوق العربي الرهيبة تلك وندر ان يمر يوم دون تلتقي بشخص او شخصة من الازمنة البعيدة....!!! وااني من جوبا الملكية لادو منذ ايامات (كايا) وفريق كرجو كااااك (ذلك الابو كرنك التاريخي) الذي كان يجيد الرقص وركل الكورة بقدمه السليمة بكل حرفنة...!!!
03-08-2010, 12:30 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
مواصلات والتحرفن في المدافرة للحصول علي مقعد وثير.. وبيديك جريدة و وكيس التمباك يتهادي بورافة هي الانشطة التي توشح نهايات ذلك اليوم التفتيشي النشيط...الذي قد يحتوي علي تفريجة علي تمرين من تمارين (ابو الهل) او ماتش ليهو ضل ما بين البرنس وديم سلمان... او مباراة في ميدان عقرب..او انت ذااتك تخش ليك في كدارة وتمشي تضقل الكفر في ميادين القطيعة وتحاول ان تعيد الزمن الجميل وبعض طلعات (الدبل كيك) والتخصص في تهديفات خارج خط 18. ولو قفلت معاك فعليك ساعتها بمباراة في ساحة الكلاكلة بالقرب من المقابر والمركز الصحي ففي ذلك الزمان كان (ابراهيم حسين ابراهومة) هو من يمتع الجماهير في ذلك المكان حتي وبعد ذهابه الي المريخ...!!!!!!
كانت الجرائد والصحف هي النفاج الوحيد الذي كنا نخترق به تقفيل اللعب الكيزاني وعبره تطل بعض الاخبار عن المشاريع التي يتوقع ان توظف مساحين وبالاضافة الي التمتع بكتابات كمال الجزولي (هل ايعلت البيلة) وشمشمة وببوز ممدود اربع امتار بعض الاخبار عن ترتيبات الكيزان في استعدادهم للطاغية الامريكان (الطاغية الامريكان ليكم تدربنا) واهم من كل ذلك هي اخبار الهلال الذي كان عشقنا الخرافي.. ومابين جريدة وجريدة في احدي الصباحات الكلاكلية (ام غبارا يقول يا ليل) نشرت احدي الصحف اعلانا لمهندسي مساحة في مشروع سكر كنانة ومواصفاته تتطابق بالكربون مع حالنا المايل كمهندس (فرش) وكرت كرتونة...وتوووشك وبرفقة الشهادة التي كانت مسكتها صدر (مثل ورق الكونان) ركوب مستعجل وطيران الي مباني شركة سكر كنانة الوثيرة وقدمك قدمك قدمنا...!!
03-08-2010, 02:06 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
ولنعود مرة اخري الي دوامة (حوامة بن لواصة) وان هفت ليك تطلع طلعة طلعتين الي مدني او سنار (ودهاشم)... ولكن هذه المرة القصة اتت ببعض مريسة من (مرايس تام زينو)... فقد قرر الموظف الكناني وعبر اتصاله الذي افاد فيه بانك يا زول (شووورت لسسست) ولكن المعاينة في السايد فعلي جميع المساحين الدايشين الحضور يوم كيت كيت لركوب باص كنانة من العمارات شارع كم كده ماعارف والتحرك فورا ...!!!!
03-08-2010, 02:15 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
كنانة ذلك المشروع الضخم والعملاق والعالي التنظيم والضاج بحياة المصنع والموظفين المرتبين والحقول المترامية من (ايريا اربعة وحتي ايريا واحد) بالاضافة الي سكنية الكوزلي و (عبدالله خضر) والعالمية والكنابو العظام في كمبو خمسة الاسطوري وكمبو اربعة وبالاضافة الي كمبو المزرعة التجربية في مدخل كنانة وانت داخلها من منطقة ربك... لم تكن عوالمها ونواحيها غريبة فقد زرتها لمرات عديدة كون عمي الزراعي الصارم (احمد الحاج ابراهيم) كان هو المدير الاداري لذلك المشروع ومن قدامي الزراعيين واوائل النقابين تمت احالته لاحقا للصالح العام (بواعز من السلطات الامنية) التي اعتقلته كثيرا وهو علي راس عمله.....ّ!!!!! ورغم علمه بواقعي العطلنجي الرهيب الا ان تعليماته الصارمة والجادة كانت واااضحة خليك قاعد مع المهندسين الجيت معاهم من الخرطوم..وطالما الامر معاينة وتدقيق اذن فلتكن كماهي ولاتحلم بانني سوف اتدخل في هذا الامر سلبا او ايجابا.. واذهب انت ومقدراتك وقاتلا... ولو شالوك مبروك ولو ما شالوك هي فرصة لكي تتعلم كيفية التعامل مع المعاينات والاعتماد علي نفسك )...!!!!
03-08-2010, 02:28 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
لم تكن مقولة احمد الحاج الذهبية تلك اجابات علي اسئلة مني بل ابتدرها بصرامة وانضباط ولعله ظنه هو تقفيل كل الاحتمالات المتوقعة مني في عشم ملحسي او رغبة واسطية.. ...!!!! كنانة وفي احدي تلالها الواقعة في الاجزاء الجنوبية الغربية من (حي الكوزلي) وهو فريق كبار الموظفين توجد استراحة بل فندق علي طراز مدهش من الدقة والنظافة يديرها في ذلك الزمان احد الفندقيين العظام (عمك محجوب) رجلا علي التنظيم والاريحية وفي جلسات الافطار كانت الونسة معه سياحة في بحور واحداث وبلادا بعيدة كنا بنسسمع بيها (سمع) وكان من كبار موظفي فندق السودان وبل اعتقد بانه مديره في زمن من الازمنة...
03-08-2010, 02:30 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
وفي غرف عديدة توزعنا نحن المساحين (التعبانين جنينة ملوة) بتجدع في دهاليز تلكم الاستراحة الوريفة ونتمتع بوجباتهم الدسمة ذات السمك البلطي التاريخي 0(اتخيل لي السمك داك بكون وارد كوستي)....كنا خمسة وقيل بان هنالك اخرون سياتون يوم المعاينة ليصبح اجمالي الممتحنين ثمانية من بينهم صديقي ودفعتي وابن ديم المشايخة الراحل عبدالقادر فضل المولي قدروة الذي رحل عن دنيانا وهو يمارس عشقه المساحي في وااحدة من ربوع هذه السودان وفيافيه البعيدة...
03-08-2010, 02:32 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
وعندما كانت موسيقي الموسيقار الاسطوري بشير عباس تعطر سماوات كل المليون ميل مربع برائعته (القمر في كنانة) كنا هنالك نحن جموع المساحين السبعة بعد انسحاب (قدروة) عليه الرحمة لاسباب مفاجئة قبل المعاينة كانت قلوبنا وعقولنا (تتراجف في كنانة)... بشير عباس يصدح بالقمر في كنانة وجموع من المساحين الجداد والما شداد( تتراجف في كنانة) في انتظار المجهول وبودرة عفاريت موظفي كنانة الذين تبدو عليهم الجدية والصرامة في (هيك امور) او كما بداء لي ساعتها...!!!
03-08-2010, 02:40 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
والمعاينة الاولي في سلم البداية للحياة العملية ليس كمثل المعاينات اللاحقة والعديدة التي يمكن للفتي ان يدخلها طيلة حياته العملية في رحلة بحثه عن الرزق الحلال البلال... توجس وياربي البشرية دي ح تسال عن ششششنو .؟؟؟ وهم منوو ذااتو..؟؟؟. وهل حيكونو( فير )ام الحكاية فيها (انة) وواسطات كما هو سائد في سماء الوطن السوداني... وانا صاحب الحظ الكعب وواسطتي القوية وسني الملوية طلع المدير قريبي الكبير (دين حجر) وهرشني في حكاية الواسطة دي قبل ما اقول بغم....!!! وليل كنانة يرخي سدوله علي بانواع الهلوسسسة والوسوسة ليبتلي..؟؟؟ فجاة وجدت نفسي في تربيزة انيقة ووثيرة امام ثلاثة من الموظفين العتاة (ياكافي البلا سلام الله ردو بالتلتلة)..!!!! وهاك يا تفتيش... شي مساحة وشي ادارة عمال وشي كلامات خارج المقرر الكبير وعريض الذي جلسنا حوله سنين عديدة في الجامعة ام كرش...!!! جاوبك ..جاوبك... جاوبنا..!!! لتنهي رحلة النعنشة والجديع في رهات تلك الاستراحة او الفندق (الابن لذينة) وليصدر القرار بما يفيد يا مساحين هووي اخر اليوم تعالو لزوم النتيجة وبعدها بكرة فرتقوا وسنعلن المهندس الذي وقع عليه الاختيار..!!!!
03-08-2010, 02:40 PM
Egbal Elmardi Egbal Elmardi
تاريخ التسجيل: 04-08-2007
مجموع المشاركات: 1148
كنانه.... يا الله .... كم هى ذكريات عزيزه على النفس
Quote: ورغم علمه بواقعي العطلنجي الرهيب الا ان تعليماته الصارمة والجادة كانت واااضحة خليك قاعد مع المهندسين الجيت معاهم من الخرطوم..وطالما الامر معاينة وتدقيق اذن فلتكن كماهي ولاتحلم بانني سوف اتدخل في هذا الامر سلبا او ايجابا.. واذهب انت ومقدراتك وقاتلا... ولو شالوك مبروك ولو ما شالوك هي فرصة لكي تتعلم كيفية التعامل مع المعاينات والاعتماد علي نفسك )...!!!!
ديل الناس القام المشروع على أكتافهم وحقق نجاحاتو.... أبوى- الله يرحمو-لما واحد من أخوانى جاهو وقال ليهو عايز يقدم فى عطاء السزوكى .... قال ليهو ما ممكن تقدم....!!!!؟؟؟ قال ليهو أنا ما عايزك تتوسط لىّ.... قال ليهو حتى لو ما إتوسطه ليك.... مجرد ظهور إسمى خلف إسمك ممكن يخلى الناس تعاين ليك بشكل خاص حتى ولو كان بشكل ما مقصود........
03-08-2010, 02:52 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: مجرد ظهور إسمى خلف إسمك ممكن يخلى الناس تعاين ليك بشكل خاص حتى ولو كان بشكل ما مقصود........
يا سسسلام يا اقبال وتحياتي.. وانهم جيل فريد... صرامة وجدية وصدق عالي.. ونموذج للرجل الذي يدير الشان العام وهو ناكرا لذاته الرواد الاوائل الذين قامت كنانة علي اكتافهم توشحهم جدية ومعرفة عميقة باسس العمل المنهجي والمدروس والمتفاني.. وهم جيل يجب ان يكرمهم الوطن فردا فردا ذات يوم.. التحية والتقدير والتجلة لروح الوالد وكل الرجال الذين زرعو في هذا الوطن قيم نبيلة واصلية واهدو شعبه احلي ايامهم ما بين الغيط والمصنع وكل اجزاء ذلك المكان المهيب
وكل التقدير يا اقبال
03-08-2010, 02:53 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
وغايتو ربك رب الخير والبركة لطف وقدر.. وتم اختيار اخوكم الحفتان لهذه الوظيفة ويبدو انني في وسط تلك الخلعة والرجفة والكبكبة من زرزرة موظفي كنانة استطعت ان اجاوب والعب ماتش كبير واقنع التيم العامل بتلك المعاينة وقالو خلاااص ... يا مهندسين يا مساحين لقد قررنا نحن لجنة المعاينة اختيار المهندس المبعبص ده...وكانهم باختيارهم هذا لقد قرروا اهدائي ايامات وذكريات وليالي في كنانة ذات السكر الطاعم.. ولكن لم تدوم الفرحة بهذا التعيين طويلا حتي تم اعلامي بان هذه الوظيفة قد الغيت ....... يا الله ياخي هكذا يعود عطية والكنجسة مرة اخري لكي تسود الايام وتعود بي الي ايامات الكلاكلة اللفة وسيرة (جرة سفة التمباك) والفطور الهواء ومساككة الدفارات في ازقة ابوحمامة واللفة والسوق العربي.. والغداء نيم.... يا الله ياخي..... لغيتوها لييييييييييييه..؟؟؟
03-08-2010, 02:57 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
عمي ده يا اقبال في كنانة وطيلة ايامي فيها نجضني نجاض قبورة...وما فضل لي الا اشرد منها.. سواااقة بدون رخصة ممنوع..!! خطة توزيع الراتب تجيبها قبل اخر الشهر بكم يوم كده ويجيزها ليييك او يقطعها لييك وكان ذلك في الثلاثة شهور الاولي.. ولاحقا تكتشف بانه يحاول جاهدا ان يعلمك اشياء بعد ديشليون سنة بتلقي روحك فعلا محتاج ليها لووووول
03-08-2010, 03:03 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
لتاتي الاجابة غامضة ولكني لاحقا علمت بانها مربوطة بمعرفتهم بانني ذوو صلة بعمي المدير الذي كان مغضوب عليه في تلك الايام وعلي خلاف فكري وسياسي حاد مع المدير المباشر للادارة التابعة اليها تلك الوظيفة التي استطاع الاوباش ان يقطعو عشمي فيها ويتم الغاء هذه الوظيفة قبل ما اجر فيها اي كدنكة بتاعة مداومة .. وقطعو عشمي الابليسي في (سوزوكي كنانة) الذي كان حلما واهم الاعشام التي قطعت هو نص الشوال بتاع السكر الذي تعطيه كنانة لموظفيها في ذلك الزمان بسعر بخسسسسسس... كان لو ربك رب الخير لفحنا بيهو لساهم في الدعم اللوجستي للمرتب النتشة وكان يمكن مجاوزته ببعض البن والشاي والهبهان من سوق ربك لنهديه للوالدة والعمات والخالات حتي يشرب القهوة علي انغام (الله يفتح عليك يا كرومة)....!!!
03-08-2010, 03:09 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
المهم وعلي قولة الشهير (تبارك شيخ الدين بموقع السودانيين علي الخط)... تلك الوظيفة التي الغيت وذلك العشمي الابليسي الذي دمر ولجن مع سبق الاصرار والترصد حملني الي مدارات جديدة في شركة استشارية كانت تشرف علي الامتداد الجديد لكنانة في مشروع لحفريات قنوات وترع وطرمبات ووبيارات بواسطة شركة صينينة بها صينين عيونهم صغار بطريقة عجيبةو اصليين وارد مقاطعة شهيرة اسمها (جيا ن سوووو) تجدعو في بورت كبينات علي مرمي حجر من جبال ام جديان الشهيرة وقضو علي كل دبيب وثعبان وعقرب حايم بتلك الجهات وكانت شوربة وشية الثعابين هي الوجبة الدسمة التي كان بني صين علي استعداد للمكاتلة فيها... واولي ملاحاظاتي هي تربيتهم (للكدروك) ولكن كدروكهم ذلك كان كدروك من نوع عجيب ليس كالذي شاهدته في جوبا منذ زمانات خلت.. المهم ضربنا شية الدبايب زي العجب والدبيب في اكله يعتبر وااحد من اشهي اللحوم وقيل في الاثر بانه مزززززززة بت لذينة وقادرة علثي تربيط الكحوليات مع بعضها البعض وولها مقدرة فائقة علي الحفاظ علي الطشمة علي نار نعنشة هادئة لفترات طويلة من الازمنة........
03-08-2010, 04:55 PM
khaleel khaleel
تاريخ التسجيل: 02-16-2002
مجموع المشاركات: 30134
هلا يا خلي وحبابك ياخي.. وخالك مشكلتو ما بتوب يااااخي.. الهكر ده اعدم لي في السابق بوستات لو قعدت مية سنة ونص تاني ما بلم فيها بالهين 1-احسن زول في العالم (1) 2-وبوست الديربي بتاع الموتمر الخامس للحزب الشيوعي.. ولكن ماعليك ..سجن سجن ...غرامة غرامة وماهمانا بكري معانا
03-08-2010, 05:05 PM
Egbal Elmardi Egbal Elmardi
تاريخ التسجيل: 04-08-2007
مجموع المشاركات: 1148
ما أنا لما كنت بساسق ما بين كنانه والخرطوم (كنت بقرأ فى الخرطوم...وبجى كنانه فى الإجازات....) كنانه ما كان فيها صينين...أو هكذا توهمت... كان فيها أنجليز وفرنسيين...وبرتقاليين وكوبيين... واحد من المدراء الكوبيين أفتكر إسمو قارسييا... وكان الوقيع هو المدير العام... الأرض كانت بكره...عشان كده كانت رفعت ليك حجر بتلقى تحتو دبيب... بتذكر يوم كان فيهو عيد ميلاد ما بذكر حق منو..... كانو عايزيين يوصلو ماسوره.... تحت الحجر الكبير قريب من بيت ناس عم مبارك فوراوى الله يرحمو (كان مهندس مدنى )... لقو مدينه كامله بتاعت دبايب.... وبيوت الكوزلى بتشبه سفينه جُرّت إلى مرج....فى حلم ما...(فى خيال زول جاى من بورتسودان)
الحياه كانت حلوه ...قبل ما نكبر وتكبر أحزاننا...
03-08-2010, 05:32 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: وبيوت الكوزلى بتشبه سفينه جُرّت إلى مرج....فى حلم ما...(فى خيال زول جاى من بورتسودان)
يا سسلام يا اقبال ياخي..علي بيوت الكوزلي دي.. مخططة بصورة بديعة ومساحاتها الخارجية تعج باشجار ذات رائحة مميزة وعطرها لسع باقي في الذاكرة العطرية للزول..والزهور تلعب دور اساسي في فضاء الحوش ..والخواجة في تصميمه اليها جعل من المنزل وحدة متماسكة في غرفه ذات الاناقة المدهشة.. اخر بيت في الاطراف الجنوبية الشرقية من الكوزلي نواحي التقابة وزريبة الابقار ديييييييك..كان هو اول بيت رسمي وشعبي نسكن فيه كمجموعة صغيرة من موظفي شركة تعمل كمقاول للامتداد الجديد لكنانة ... رفاهية في منتهي الاناقة والبساطة ... ........... الصينين يا اقبال الحمد الله الما حضرتيهم ديل عدموا كنانة نفاخ (الكلب)..ولو القصة وقفت علي الجريوات بس معليش... ديل فتحو ليهم خط تجاري سري مع اهل ناس كمبو خمسة بيجيبو ليهم (ابو قدح) والصنينين بشترو منهم..(ابو قدحات الكثيرة دي كان بلقوها وين ناس كمبو خمسة ديل انا ماعارف)..!! ولكن كل البعرفو ان الصيني مستعد يدفع دم قلبو عشان يشتري ليهو (ابقدح) لانو وجبة مدنكلة عندهم والواحد فيهم يتبسط بسطة لمن يجي من كنانة وفي معيته ابو قدحات
03-08-2010, 06:35 PM
احمد التجانى احمد احمد التجانى احمد
تاريخ التسجيل: 11-11-2006
مجموع المشاركات: 3155
Quote: وتم اختيار اخوكم الحفتان لهذه الوظيفة ويبدو انني في وسط تلك الخلعة والرجفة والكبكبة من زرزرة موظفي كنانة استطعت ان اجاوب والعب ماتش كبير واقنع التيم العامل بتلك المعاينة وقالو خلاااص
بسبب شغل الرتينزات وشفوت مايرنو اختاروك للوظيفة دى وكمان قال فيها معاينة فيس تو فيس !!! ياخ دى من غير ماتفتح خشمك بيكونوا شختوا اسمك من قولة تيت
Quote: ولكن لم تدوم الفرحة بهذا التعيين طويلا حتي تم اعلامي بان هذه الوظيفة قد الغيت
بتكون مكرت على سيد الرتينزة وقال ننوم ليك الشغلانة كلها
03-08-2010, 06:47 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: بتكون مكرت على سيد الرتينزة وقال ننوم ليك الشغلانة كلها
هلا يا صلعة.. ياخي ديل لو جبت معاي (الامين مالم كاغو) عراب العمل الرتينزي في خجانين مايرنو زاااتو كان رفدوه معاي.. المدير سيد الوظيفة كان هو الزول البكشكش الناس يمشو دفاع شعبي وعمي ده كمدير اداري عامل ليهم مقصات وقال ده كلام فااارغ وخلو الناس تشتغل.. وفي النهاية جات في راس اخوووك المسكين ده قطعو لي العشم في سوزوكي كنانة العجيب داك في راسي سوزوكي كنانة بقيت الا اركبو صحبة راكب مع ميرغني كرار (كجنكي) ونحن في خميسات صوب كوستي حيث عثمان النعيم واخريين __________________
Quote: الصينين يا اقبال الحمد الله الما حضرتيهم ديل عدموا كنانة نفاخ (الكلب)..ولو القصة وقفت علي الجريوات بس معليش... ديل فتحو ليهم خط تجاري سري مع اهل ناس كمبو خمسة بيجيبو ليهم (ابو قدح)
ياخى أنا حضرت الفلبينيين فى الخرطوم...... كنت ساكنه فى الزهور .... وفى التمانينات....فجأه كده الحله إتملت فلبينيين... (لحدى ما عملو يافطه مكتوب عليها يوجد فلبينيين )...قرب مستشفى إبن سيناء.... والناس لما بقت تضارف على جريواتها.... ياخى الساعه خمسه الناس بقت تكره بيوتها من ريحة شيه الكلاب....ودمعه الكلاب.... والحله ما فضل فيها كلب ضال أو على قولك نفاخ الكلب... (أريتهم كان قبضو الكلب الفى بالى... إن شاء الله ينفخوهو.....)
بينى وبينك سوزوكى كنانه بستحق البكا والحسره.... كان فى الوقت داك حصدته الجكس حصد...(بإفتراض إنو الآن الأجنده تغيرت)
03-08-2010, 07:33 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: (أريتهم كان قبضو الكلب الفى بالى... إن شاء الله ينفخوهو.....)
هلا يا اقبال.. والناس ديل غايتو الجريوات دي بموتو فيها موووت.. ومن النكات الكانت في كنانة في الايامات ديك... قالو الكلب لمن يشوف الصيني ياهو داااك جاااي بقوم الكلب جاري طوالي لووووووول.. .. والسوزوكي بيني وبينك فعلا البكاء فيهو مستحق.. فلمن قالو لي في البداية خلااااااص شلناك خططت بيهو جنس خطط ومشاوير.. شي عيد ضحية وخروفك رافعو بورا ومدفوس مع شوال الفحم وشي مشاوير لكوستي هناك حيث الجكسوس كان ثانوي عالي وكده لوووول وشي خميسات الي سنار القريبة من الحتة دييك.. وتخلي الحاجة تركب قدام وتطلع يدها ببره لووووووول وغايتو كلو ذهب مع رياح المدير بتاع الدفاع الشعبي دااك (طبعا ما عافي ليهو ولو رجعت السودان مع نيفاشا دي اكيد بلقي لي مادة اشتكيه بيها واخد حقوقي كلها كاش)..
طبعا الشي الاساسي والمهم والمحير في الامر انو الوظيفة دي جابو فيها زول بعد اسبوع من ذهابي النهائي من كنانة جابو كييييييف الناس ديل الله اعلم..
03-08-2010, 07:16 PM
احمد التجانى احمد احمد التجانى احمد
تاريخ التسجيل: 11-11-2006
مجموع المشاركات: 3155
Quote: ياسلام يا كيكى ياخ هيجتنا الذكرى وبوستك جاب سيرة ناس عزيزين بالحيل بالله قدورة توفى رحمة الله عليه؟ الدوام لله وكل من عليها فان عوضه الكريم الجنة عن شبابه وميرغنى كرار ياسلاااام ياخ ياحليله وحليل النقر معاه وين الزول دة ناس روعة ياخ
هلا يا احمد ودي فرصة ياخي نترحم اولا علي روح صديقي وصديقك ود دفعتنا عبدالقادر فضل المولي الذي كان شهير بقدورة وقدورة مات يا ود التجاني فقد كان يعمل في منظمة الشهيد ومات في مناطق التماس اثناء عمله في تشييد بعض الطرق.. وله الرحمة فقد كان الكلام ده تقريبا في نهاية التسعينات..وله الرحمة والمغفرة.. فلقد قضينا في كنانة مع بعض اجمل يومين في العالم قبل انسحابه من المعاينة ورجوعه الاضطراري الي الخرطوم...
ميرغني كجنكي متواجد بشدة في امريكا وعرفت بانه في واشنطون وميرغني كرار الله يبارك فيهو فهو الرجل الذي فشاني في سوزوكيات كنانة دي كلو خميس كنت عامل ليهو وجع وش لكي نذهب الي كوستي في رحلة يا احمد تجاني انا متاكد بانك مستعد تدفع مليون يورو عشان تكون في مقعد من مقاعد عربية ميرغني ود الابيض الحكاي المرح الجميل...
طبعا صحبك الصادق فيصل كان هناك ولكن بكل اسف انا جيت بهنا وهو ذهب بهناك بكون شررد وخلي لي البلد لمن عرفني جيت ----------------------------
03-08-2010, 07:31 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
يا عبدالكريم . يا أخى ده حظ شنو ده ؟؟ الأيامات ديك . لو كان . كان عندك كاشف دهب ! كان كنت تفوت الشيخ عبدالباسط زاتو . يا عبدالكريم المشايخ قالوا الفجات ديك سرها عجيب . .. شوف الزمن . الواحد يجلى المناجم . ويجى يفتش لى ال Green Card فى فجات لا فيها سكر لا سوزوكي . وانشاءالله ما ينقطع العشم .
( رحم الله العم د / عباس عبدالماجد ابوعلى الذى كان يحلم ببرازيل جديدة فى كنانة )
03-08-2010, 08:05 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: يا عبدالكريم . يا أخى ده حظ شنو ده ؟؟ الأيامات ديك . لو كان . كان عندك كاشف دهب ! كان كنت تفوت الشيخ عبدالباسط زاتو . يا عبدالكريم المشايخ قالوا الفجات ديك سرها عجيب . .. شوف الزمن . الواحد يجلى المناجم . ويجى يفتش لى ال Green Card فى فجات لا فيها سكر لا سوزوكي . وانشاءالله ما ينقطع العشم .
( رحم الله العم د / عباس عبدالماجد ابوعلى الذى كان يحلم ببرازيل جديدة فى كنانة )
هلا يا عثمان ومرقناها يا عثمان في بربر..وقبل ما نتجدع في القريشات بتاع الشغل بعد اسبوع اسبوعين قالو لينا لملمو عفشكم وخلاااص ارجعو الشغل انتهي. لملمك لملمك قمنا لملمنا ورجعنا تاني للخراطيم ام دق دي.. كان فعلا لو حكاية الدهب دي ظهرت كنا من محلنا داااك حندقش ليك البراري دي وانا وصحبي مصطفي انصار السنة ما نطلع منها الا بقروش زي حقة صلاح ادريس دي وفعلا طفشونا من سكر كنانة والسوزوكي ابو زيق وبقينا نكابس في ارواق الخواجات ومصايب القرين كارد والفلانة انشورنس ديك
ونترجم معاك علي روح الدكتور عباس عبد الماجد فكنانة فعلا يمكنها وحتي الان ان تتحول الي برازيل بكل سهولة ويسر وتفوقها ده لو الجبهجية ديل ما لحقوها غنم زهرة بورانا
Quote: ولو قفلت معاك فعليك ساعتها بمباراة في ساحة الكلاكلة بالقرب من المقابر والمركز الصحي ففي ذلك الزمان كان (ابراهيم حسين ابراهومة) هو من يمتع الجماهير في ذلك المكان حتي وبعد ذهابه الي المريخ...!!!!!!
رابطة الكلاكلة القبة كانت من امتع الروابط .... و كيف ما يكون لاعيبتها ممتعين و الكلاكلة القبة أوربا.
* خلاص يا زول بحدث ليك صديقك ( ودالحبيب ) يرسل ليك سوزوكي اصلي من هنا ... اه رايك شنو ؟
مع خالص الود
03-08-2010, 08:18 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: رابطة الكلاكلة القبة كانت من امتع الروابط .... و كيف ما يكون لاعيبتها ممتعين و الكلاكلة القبة أوربا.
* خلاص يا زول بحدث ليك صديقك ( ودالحبيب ) يرسل ليك سوزوكي اصلي من هنا ... اه رايك شنو ؟
هلا وتحياتي يا سيف اليزل.. وياخي رابطة القبة فعلا كانت اروبا والكورة فيها ليها طعم خاص من نواحي اللعيبة الفنانين والتشجيع العجيب..واخوك بكون اتفرج في زي ديشليون مباراة وتمرين في ميدان القبة ده و سعيت لي حجر عديل كده كل مرة بجي بقعد فيهو ..اولاد كورتهم زي الورد..
وتحياتي ياخي لعبد الفتاح صحبي وود اهلي وبالله ارسلو لينا سوزوكي بس يكون من نفس الحتة البتجي منها سوزوكيات كنانة ديك... علي الاقل نبل شوقنا رغم السنين وتغيير الاجندة السوزوكية
وتحياتي يا سيف
03-09-2010, 02:07 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالكريم الامين احمد
Egbal Elmardi
khaleel
احمد التجانى احمد
Osman Musa
سيف اليزل جعفر عبد الرحمن
فيس بوك
تويتر
انستقرام
يوتيوب
بنتيريست