أندريس فيليب أرياس زول عادي ربما وما مشهور كمان لكين قد يصبح في يوم من الأيام مشهوراً لأنه أحد مرشحي الرئاسة في كولومبيا. الزول دا كان عامل ليهو خطبة ونقه وشابك الناس نضم في مدينة بارانكيلا على ساحل الكاريبي في إحدي مناسبات تلك المدينة ، أها أثناء كلامه الناس شبكوهو ليكم "أخرج من هنا" "إنت فاسد" وجنس نبز وشتيمة أها في واحده من النسوان القاعدات قدام تقوم تشيل جزمتها الشمال وبي إيها اليمين فوووووو تفكها في وش صاحبنا لكين برضو الجزمة ما أصابت الهدف ويبدو أننا نعيش في عصر الجزم. المهم الراجل بكل بساطه ردت فعلو فقعت ليك مرارة المرأة وكل الحضور فقد نزل من المنصه وشال جزمة الوليه دي وأداها ليها (يعني كان باقي ليهو يبلسها ليها) وهو يبتسم ولمن طلع المنصه مرة تانية رسل ليها بوسه في الهوا أها زول عكليت زي دا لو فاز حا يعمل فيهم شنو.
03-08-2010, 07:29 AM
بت قضيم
بت قضيم
تاريخ التسجيل: 07-05-2002
مجموع المشاركات: 2048
الاسم العاجب بت قضيم طلع عكليت اها شوف قال شنو (تحته خط):
Quote: بوجوتا (رويترز) - تعرض سياسي يطمح في الترشح للرئاسة في كولومبيا للرشق بحذاء يوم الجمعة في حادث اعاد الى الاذهان احتجاجا ضد الرئيس الامريكي السابق جورج بوش. واستقبل الراغب في الترشيح عن الحزب المحافظ اندريس فيليب ارياس بصيحات استهجان "اخرج من هنا" و "انت فاسد" عندما بدأ في الحديث في مناسبة بمدينة بارانكيلا الواقعة على الساحل الكاريبي لكولومبيا. وقال التلفزيون المحلي ان امرأة من الصف الامامي القت بحذائها باتجاهه. ولم تصبه ونزل أرياس من المنصة بابتسامة ليناولها الحذاء قبل ان يرسل لها قبلة في الهواء. وقالت لييدا ديلجادو "سأفعل ذلك مرة اخرى في ظل نفس الظروف". "هذه هي الطريقة الوحيدة للفقراء لكي يلفتوا الانتباه لان كل وسائل الاعلام تدعمهم". ويعد ارياس واحدا من مجموعة مرشحين يتنافسون على خلافة الرئيس الفارو اوريبي بعد ان قضت المحكمة الدستورية بأنه لا يمكنه التنافس لاعادة انتخابه في السباق الرئاسي المزمع في مايو ايار. وقال ارياس عن الحذاء الملقى باتجاهه لاذاعة محلية "ليس لديه (الحذاء) قوة. لدينا قوة الافكار والديمقراطية". وكان صحفي عراقي قد القى في عام 2008 بفردتي حذائه باتجاه الرئيس الامريكي السابق جورج دبليو بوش ووصفه بأنه "كلب" خلال مؤتمر صحفي في بغداد. وفي الثقافة العربية يعتبر القاء الحذاء اهانة واعتقل الصحفي.
03-08-2010, 07:52 AM
abubakr
abubakr
تاريخ التسجيل: 04-22-2002
مجموع المشاركات: 16044
لا يا بت قضيم خربتيها خاااالص وبقيتي حنكوشة ونسيتي جزمة الباتا وكرة الشراب والنبلة ، ويبدو أن أبوبكر داهية فقد دقسك تدقيسة الكمساري لود عمتي الجانا من البلد نزلو غلط ولحس باقي قروشو كمان ولي هسي المغسه جايه تشقو ، ما علينا حتى لو شقتو عشان البجي البندر لازم يكون تفتيحه ، المهم أبوبكر بالكب يقصد القبض وهي لغة حركية أما الكركرب (وكان في الحتة دي على أبوبكر أن يستخدم التشكيل في الحروف أو يباعد بين الكر والكرب) المهم طالما هي كركرب يبقي دي حاجة بتتقفل وعندنا طبعاً أسوأ الأشياء البتتقفل هي الأبواب وأسوأ تلك الأبواب مش الباب البجيب الريح أبواب السجون والحراسات. مش قلت ليك أبوبكر دقّسك.
03-08-2010, 03:09 PM
almulaomar
almulaomar
تاريخ التسجيل: 07-08-2002
مجموع المشاركات: 6485
أبوبكر يعني أنا الطلعت داقس والشرح والهيلمانه دي كلها طلعت فشنك شكراً أبوبكر على تدقيستي والتحية لي بت قضيم في عليائها. "إنتو عليائها دي من رحلات الملكية الأردنية ولا شنو بسمعها كتير في المنتيدات الأدبية"
03-09-2010, 05:23 AM
بت قضيم
بت قضيم
تاريخ التسجيل: 07-05-2002
مجموع المشاركات: 2048
صباحاتكم يبدو لي ان انتو الاتنين مدقسين فابوبكر ما بعرف (عزيزة) وهذا في حد ذاته منتهى الحنكشة، والمصيبة أنه فاكر عزيزة دي (واحدة ست) وكده مش بس يكون حنكوش فقط أو عامل فيها حنكوش أو راسم دور الحنكوش، ولكنه حنكوش مأصل، تجري الحنكشة في عروقه مجرى الدم طبعاً لا اعتقد أن الملا ما بعرف عزيزة وإلا أغير قناعاتي كلها حيث تكون أصيبت في مقتل الملا شرحك ده أخير منه بيع العدة ما فهمت يا الملا ممكن توضيح أكتر بالله كر شنو وكرب شنو في الصباح ده
03-09-2010, 05:42 AM
abubakr
abubakr
تاريخ التسجيل: 04-22-2002
مجموع المشاركات: 16044
عولمة شنو يا ابوبكر صلي على النبي الموضوع فيه شوية خرف بعيد عنك، وبقيناعاملين ذي حوار الطرشان انت تقول كركب فيما يشبه السفنجة بكعب وفي رواية أخرى قبقاب ، والملا يضمها لتصبح (كُركُرب) بتاعت المفتاح ديك توهتونا رسمي وبخصوص (عزيزة) فنعم طلعت حنكش، فالعزيزة يا سيدي نوع من الأحذية البلاستيكية السودانية يندر أن تجد سيدة فيما فوق الخمسين عاماً لا تمتلكها لونها أسود(لازم اسود ما عارفة ليه في الحر دي) وتجدها في أسواق معينة مثل سوق النسوان ببحري أو سوق امدرمان أو سوق ليبيا، no way تلقاها مثلاً في عفراء أو ما شابه يقولون أنها (تنعم الكعب) وأنها مريحة، ولا اخفيك حاولت مرة ألبسها لهب الحر اقدامي وولعت عديل كده من السخانة كان نفسي انزل ليك صوره ليها أكيد تكون شفتها قبل كده فنساء الجهات الشمالية(عندياتكم) تقريباً يعني، كلهم عندهم، المشلكة ما عندي ليها صورة ده أولاً، وثانياً اساساً ما بعرف انزل صور
وعن (النوبية) فأنااعتز بالحضارة النوبية، احب لغتها جداً، والصراحة يعني ما مكرهني فيها إلا انتو أهلها، حيث لو اتلميتوا في مكان، تخلوا الواحد ذي كيس الجوافة، انت تعال، ليه يعني الرطانة ما بقدروا يحترموا زول معاهم ما فاهمهم ويقعدوا يرطنوا ويتونسوا ويفتحوا للزول القاعد معاهم بمنتهى عدم الذوق يعني؟؟!! ما تسويها حرب قبلية،، مجرد سؤال بس بجي صادة
03-09-2010, 08:14 AM
abubakr
abubakr
تاريخ التسجيل: 04-22-2002
مجموع المشاركات: 16044
يابت قضيم انت الخرف دة بس خليهو لي انا .... الكركب الsole من الخشب عدييل بس بسماكة يعني احيانا الكعب زائد شويةعن باقي الصول والباقي قطعة الجلد ...اها تجي الواحدة ماشة وكركب كركب ضربة الخشب للواطة ولو كانت الواطة بلاط وهي متينة كدة زي كويين لطيفة مثلامثلا ياها الكراكيب لاحقة السما...
وبعدين عزيزة بتاعتك دي طلعت عندها عجلات كوتش زي العربية وسودا يعني كل الصهد البرا تمتصاهو ...انا غايتو الاسواق البتتكلمي عنها دي ما بعرفا الا كتابة لاني منذ ثلاثين سنة طالع اووت وشويتين المرات زماااان الشفتا فيها البلد ما عرفت السوق وين ....
وينم النوبيين المتلميين مع بعض دييل ؟؟...انا غايتو بسمع جنس كلانك دة واشوف اهلي واخواتي واخواتي وكلهم كوزموبوليتنان زي انا كدة...انا هس خشمي ملح ملح لانو ما رطنت لي سنيين وتقولي ببتلمو .. وين ؟؟؟ اكان بنتلم ما كنت ضيعت كام وترتين سنة احاول اجمعم في جمعية عشان نقدر نوقف المصايب الواقعا فوق روسيين اهلنا من سدود وعدم رعاية حكومية وووووووقصص ما ليها حد .... بالمناسبة اي اثنية في العالم عندما تتلاقي كمجموعات تبدء التحدث بهار مزر تنق وطبعا كوننا بنعرف انكليزي ما بنلاحظ الحكاية دي مثلا في الامم المزر تنق بتاعها انجليزي..هسع الحواليني من اجناس كدة عشرة ووقت ما يتلمو جنس جنس اها الرطانة ما تدييك الدرب وانا اتحسر انو ما علمتهم نوبين بتاعنا .... قولي ياساتر
03-09-2010, 08:50 AM
almulaomar
almulaomar
تاريخ التسجيل: 07-08-2002
مجموع المشاركات: 6485
اولاً خلونا من النوبه والتهميش وكفايه سياسه ، حتى لو الواحد يبالغ في زنقة أخوه ويركنو في زاوية ويجرو خمسين في الكوتشينه يقول ليهو بهلجة المنتصر ما قلتو نوبه ، حتى لو كان الجارنو خمسين دا من أم مرّحي (قرية يا حناكيش قرية) ما علينا كركب: قد يعني القباب أو الحذاء الخشبي وهو أحد أحذية حصان طرواده ربما كركب: هو صوت والأقرب إلى صوت المفتاح في قفل الباب أيام أن كان للمفاتيح صوت مش هسي الأبواب بقت زيها وزي أى موقع إلكتروني يطلب منك أن تدخل رقم السري وسجمك لو ما دخلت الرقم كان قعدت تدق فيهو للصباح ما في فايده زول بيقول ليك الله يأجرك ما في دا لو ما دق جرس وفرج فيك خلق الله كلهم ولمّ فيك بوليس الدنيا وعساكر المطافي وناس الـ FBI. كركب: قد تكون أيضاً كلمة مركبه من إثنين (كر) وهي العبارة التي نطلقها في أمصارنا للجداد "الدجاج في بنادركم يا حناكيش" عندما يدخل الراكوبه فيقوم يسمع وتكون ردة فعله أن يشتت ويغادر الراكوبة والشق الثاني من الكلمة "كب" وهي عبارة برضو في أمصارنا نستخدم تحفيزاً وتشجيعاً لمن قعد وإتوهط فتقوم تقول ليهو قوم آزول ها أها كب وهي أصلاً تم إختراعها لتشجيع الأطفال بس في ناس كسلانين بقوا ما بقومو إلا بي دفره زيهم وزي عربية صاحب أبوبكر ، وهناك على سبيل المثال "كف" للخطف ، و "كش" للكسر" و "كُر" للمواساة و "كو" لدق الباب أو طرقه once وقد تعني في بعض الأمصار never وأيضاً "كُج" وهي للتطير أو التشاؤم وعادة ما تقترن بي شخص يا أخي شوف الكُج داك جاي خلينا نفرتق. يا جماعه كود منتادكم الخاص بالحروف حلف بي بيل جيتس ما يشتغل تكون يا ربي الخطوط مشغولة الآن وأحاول مرة أخرى
03-09-2010, 10:32 AM
abubakr
abubakr
تاريخ التسجيل: 04-22-2002
مجموع المشاركات: 16044
الملا... في ذمتك النضمي الفوق دة كلو عشان "الكركب" ... ؟؟؟ ياااخ انا حافكر جادا في فتح دكان "كركب" وبت قضيم حتكون ال sole distribution agent in all africa عشان العالم يسمع صوت افريقيا ونخلص باااه ..
03-09-2010, 02:58 PM
almulaomar
almulaomar
تاريخ التسجيل: 07-08-2002
مجموع المشاركات: 6485
يا أبوبكر يا أخوي الكركب ساهل عليك الله في الزمن البائس ده ، وهو في أقل الأمور حذاء يعني فردة كركب تساوي فردة جزمه وفردة جزمة أداة من أدوات التعبير ، لكين عاد هو تعبير لو صادف في أى جمله بجيب سما وخبرا حتى لو كانت مبنيه للمجهول.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة