|
|
 الزول بغطي قدحو حتى لو بقي قدح مونه
|
من الحاجات البغيضة في موروثاتنا حكاية القدح وتغطية القدح لأنها في كثير من الأحيان بتكون زيها وزي تغطية أسامه التعاون لي ليونيل ميسي أو بدر الدين الدود لي فرانك لامبارد وربما تغطية الفضائية السودانية للأخبار ، طبعاً شابكننا الزول بغطي قدحو وكده مرات القدح زاتو بيكون تعيس جداً ومرات بيكون آية في الجمال والعلم والثقافة وحرام يدوهو لي زول وهم كل مؤهلاته أنه الغطا بتاع القدح ، وفي نوع أغطية كده أخير منها القدح يكون بايركس ويقعد كاشف إن شاء الله تقع فيهو ضبانه . وبالمناسبة الحكاية دي فيها مآسي وجابت بلاوي ورياح جنوبية شرقية غربية شمالية ودي طبعاً بي كلام الحبوبات "وأستثني أيضاً حبوبة صلاح غريبة منهن للونها السياسي" عبارة عن عصار إبليس الهوا البجي في نص النهار ويلف كده زي الفاكنو بي دريل وأكيد الكثير منكم سمع أو شاف بي قصة قدح وغطاء قدح والمآسي التي ترتبت على تلك التغطية الغير متكافئة للطرفين القدح وغطا القدح ومرات عم القدح وأبو القدح زاااتو.
أها الواحد بفرفر في جرايد كانت ماشه الكوشه وأنا جني وجن الكوش أيام أن كانت طبعاً كوش خواجات بتلقي فيها كنوز محبه وأشياء مفيدة أما الآن الكوشة زاااتا بقت ما في وإنقرضت بعد أن تطورنا وبقينا نفسح الوساخه التي تلفظها بيوتنا بأجرة شهرية أها أحسن شوال وسخ قابلني الأسبوع الفات ونال جائزة أحسن قمامة فيهو كرتونة شاي ليبتون عبوة 100 حبه وكيس شعيرية وعلبة صلصة البرينس بي ورقتها بالإضافة إلى قزازة كولا الحجم العائلي عبوة تستخدم لمرة واحدة ونحنا طبعاً بنحكها لمن تكرهنا وتكره البرير وتسب لي الفرنسي جون بمبرتون (ودا طبعاً تحت تحت قالو هو مبتكر الكوكا كولا) يعني القزازة الفاضية نخت فيها موية وبعد فترة تبقي بتاعت زيت وبعديها نقطعها نص يكون صبابة والنص التاني يكون كوز بلاعه أو كوز لصابون بشرى (وهو صابون غسيل زي فيري بتاع ناس الخليج بس بدون إضافات يعني لا ريحه ولا نعومه على اليدين) أها خلاص لمن ينتهي ويقرب يرجع بولي إيثلين أو بروبلين أو أى حبيبات كانت سبباً في تعاسته لحظة التكوين يلقاهو بتاع ورنيش يكب فيهو شوية حصاص ويقعد يكشكش بيهو جمب الشبابيك لإعلام أصحاب النعلات البالية والمتسخه أن الفرج قريب وأن البولش قاب قوسين أو أدني من الجزمة.
الخبر السعيد في الجريدة بتاعت الكوشة الجابت لينا وليكم النقة الكتيرة دي هو أن أن القانون الفرنسي لا يسمح لأبناء العمومة بالزواج الاّ بأذن خاص من رئيس الجمهورية , وينشر الزواج في الجريدة الرسمية يا جمال الشانزليزيه ويا حلاة برج إيفيل والعمل اللوفر زاتو فأي واحد عمو يقول ليهو الزول بغطي قدحو أو البت يقولو ليها البت لي ود عمها تقوم تقول ليهم بشرط أن يكون العقد في باريس ويا ماشي لي باريس جيب لي معاك عريس.
|
|
  
|
|
|
|
|
|
|
|
Re: الزول بغطي قدحو حتى لو بقي قدح مونه (Re: tahani abusin)
|
| Quote: حتى لو كان ابو القدح؟ |
تحدث هنا عن القدح وأشرت إشارة بينة بينونة كبرى لأبو القدح عندما وجب على أن أفعل فالمستهدف هنا بالزواج أو التغطية المباشرة هو القدح وليس أبو القدح لأن أبو القدح قد نال شخصيا شرف تغطية أثمرت عن ذلكم القدح الماثل أمامكم ومحاولة إعادة تغطية أبو القدح زااااتو هذا أمر يحتاج لى فتوى تجيز التغطية ميدانيا أو ببطانية فالمجتمع ما زال قابض على تقاليد وعادات واحدة من حسناتها أنه لا يجوز في أى حال من أحوال تغطية أبو القدح وهو أمر أجد أننا لو مشينا وراهو سوف يدخلنا في حيص بيص وحتى ذا تخارجنا ربما أولجنا في أغوار غير مسبورة وهنا يتم تحويل الموضوع للرائع جلال بن داؤود مخترع العبارة هذه والذي ما أنفك يسبر هنا وهناك
| |
|
|
|
|
|
|
|
|
 Re: الزول بغطي قدحو حتى لو بقي قدح مونه (Re: almulaomar)
|
| Quote: حتى لو كان ابو القدح؟ |
حتى لو كان القدح أبوالقنفد؟؟؟؟؟
سلام الملا عمر,,
فى السودان فى قبائل وأسر عرس فى بعض لحد ما يتخيل ليك إنو الواحد فيهم بقى جينيا متزوج من أخته التى لم تلدها أمه,,,
يعنى بت عمك وبت خالتك وأمك وأبوها أولاد عم وأبوك وامها أولاد خالات وباقى الغلوتية الطويلة ديك بتكون فيها بت خالتك
ولا عمك أقرب من أختك نفسها,,,
ما بصحو من النوم دا ولا بتذكروا الآية الكريمة (إنا جعلناكم شعوبا وقبائل) إلا الفاس تقع فى الرأس والضحية معروفة طبعا,,
أهل الخليج يعانون كثيرا من قصص التغطيات القدحية دى لكن فى المجتمعات المغلقة دى تكون المصيبة أكبر,,,,
تحياتى,,
| |
|
|
|
|
|
|
|
|
|
Re: الزول بغطي قدحو حتى لو بقي قدح مونه (Re: أيمن الطيب)
|
ياايمن والملا وتهاني ..سلام
الامر يعود الي معضلة "اعادة التدويير الاجتماعية" والتي تركتنا اجيالا ورا اجيال في الروللر كوستر دة ....تغطية القدح احد مخرجات اعادة التدويير وفي ذاتها اعادة تدويير بالاضافة الي تهميش (ليس سياسيا فقط) بسطوة ممعنة في الذكورية لشرييك كامل الاهلية وقادر علي التغيير بامكانات الذي صبر كثيرا وعاني كثيرا (المراة) ...
مودتي
| |
|
|
|
|
|
|
|
|
|
Re: الزول بغطي قدحو حتى لو بقي قدح مونه (Re: abubakr)
|
أبوبكر
تشكراتي بالهندي على إسهامك وتشمير سواعدك وإضاءة البوست ، يا أخي نحن بدلاً من إعادة التدوير هذه في أمس الحاجة إلى تنوير ولو ما فهمنا من قولة تيت يعيدوهو لينا تاني لغاية ما نتنور مش النيل عملوهو كله سدود (بالمناسبة قول لي قريبك المبدع محمد عثمان وردي حكاية زي سيف مجوهر بالنجوم من غير نظام دي شوف ليها حته تاني نيلنا خلاص بح بقي يا دوب خنجر وفي خصارتنا نحن مع شديد الأسف) المهم حتى خور عمر لم يسلم من تلك السدود أها وين الكهربه أوعه تكون بتمشي مصر مع حصتنا الما مستفيدين منها من مياه النيل أو بتتبخر في السدود خاصة وأننا كشعب روقنا المنقه بعد أن قعّدونا في علبنا وأصبحنا متفرجخين في الواااااااطه بفضل الجمرة الخبيثة أو الدفع المقدم للكهرباء غير قادرين على سرقة الكهرباء كما كنا نفعل في السابق وغباءنا كلصوص غير ظرفاء أن البيت كان لا يتعدي في أحسن الأحوال 3 لمبات وزيد عليهم كمان 3 لمبات إضافية نظام طوارئ وكده وكمان ثلاجة وربما مسجل وتلفزيون ، بالله دا صرف يخلي الواحد يكفر بوطنيته ويسرق بلدو .... هاهاهاهاهاهاهاها .... ودي يعني هاهاهاهاهاهاهاها برضو.
في الجاهلية عانت المرأة من العَضْل، وهو منعها من الزواج من رجل لا ترغب فيه، وقد حرّمه الإسلام، وإن كان يبدو أن البعض لم يسمع بهذا التحريم وها نحن نعيش الجاهلية الثانية في عصر العولمة وما أنفك القدح يتم حجر كل شئ فيه حتى عواطفه ومشاعره فلانه أصلها لي فلان يا جماعه الميل القلبي دا الرسول صلي الله عليه وسلم ما قدر عليهو بمعني أنه لا يستطيع أن يتحكم فيه "اللهم لا تلمني في ما تملك ولا أملك".
| |
|
|
|
|
|
|
|
|
|
Re: الزول بغطي قدحو حتى لو بقي قدح مونه (Re: أيمن الطيب)
|
أيمن شكراً على المداخلة
طبعاً إذا كان القدح هنا أبو القنفذ فلا بأس لأن الموضوع هنا مختلف وشتان ما بين أبو القدح وأبو القنفذ وإن إشتركو في الرضاعة "أبو".
وقد صح في الأحاديث "تغريب النكاح" أى الإبتعاد عن زواج الأقارب ، وكما تفضلت في ناس الواحد حركة دوران الزواج إن صح التعبير زي الغسالة تمشي في إتجاه مسافه وتقيف وتاني ترجع يعني يخيل لي نحن السودانيين أكثر ناس قريبين لي بعض وأظن قابيل وهابيل زاتهم صلة الرحم البينهم أبعد من البيني وبين ود عمي لأنه على سبيل المثال أبوي متزوج أخت زوج أختو وأبوي في الأصل هو ود عم مرتو شفت المقصات دي كيف وهكذا شكنلة إلى ما لا نهاية متوالية عرسيه في النهاية ما تعرف إيهما أقرب إليك ود عمك ولا ود خالتك ولا أخوك وتلقي نفس المشاكل الوراثية تنتقل بين الأجيال وتلقي الناس بالله كوبي وبيست كان شينين كان سمحين.
واحد بلدياتنا عندو زي ما تقول كده يعني vision شويه واسع قام عرس واحده كانت دفعتو في الجامعة – ودا وجه من أوجه التعليم المضيئة وإن كان القلم ما بزيل بلم في كل الأحوال – أها ما شاء الله القدح الجابو من بره الأسرة دا أريتو قدح السرور الخاتي قول ، وبالضرورة خلف ليهو بنيه أموره – الله يحفظها ليهو –أخوهو الكبير من الذين تزوجو القدح الـ in-house يعني ما مشي فتش بره (وغنو ليهو من ضمن الأغاني في حفلة زواجو المحلي داحل عطبرة يا بلالي الليل ليلي أنا) وبرضو ربنا رزقو بي ولد بالله أبوهو الخالق الناطق يعني تقدر تقول التاريخ يعيد نفسه وهو طبعاً منفوخ وفاكيها فينا ويقول ليك "من شابه أباه فما ظلم" قلت ليهو مرة إن شاء الله يظلم بس طلعونا من الدائرة المغلقة دي ، دا حتى الأسماء بتتكرر أحمد إبراهيم أحمد وممكن يتواصل الإسم يعني إبراهيم تاني وأحمد ثالث أنا ما عارف ليه ما ريحو نفسهم وأضافو رقم زي جورج الخامس وبنديكت السادس عشر ما هو ما في أسهل من الأرقام ، المهم زولنا أبو الولد الجايبو من القدح المحلي بتكلم مع أخوه بتاع القدح المعلى أو الخارجي قال ليهو شوف بتك دي من هسي أنا حاجزا لي ولدي ، قام صاحبنا دون أن يلف ويدور قال ليهو يا أخوي هوي ولدك بتاع فنيلتك أنا بحاول أصلح ليكم في النسل تقوم تاني ترجعنا مربع واحد.
| |
|
|
|
|
|
|
|
|
|
Re: الزول بغطي قدحو حتى لو بقي قدح مونه (Re: almulaomar)
|
الملا ...الموضوع مهم جدا وحيوي وامل ان يتوافد اليه من يساهم باعداد وافرة (لا اطمع الا في اعدادتصل لتلك التي تشارك خلال 10 دقائق في موضوع كروي او دافوري او صراع ديكة )...في اخر زيارة لي قبل 16 سنة الي السودان وبنتي طفلتيين تعجبتا ايما اعجاب من اباهم هذا والذي له اكثر من فصولهم الدراسية من اولاد العم والعمة والخال ..الخ .. ودارت الايام وكبرن وتعلمن واها مرة مرة يجي واحد او واحدة وانا اها اقول " my cousin or son of my cousin or cousin of my cousin ,daughter of my cousin ..etc " طبعا دة غير البيجو في ونسة صدفة فصارن يعاينن لي شذرا وعلي طول (اها عرق برابرة تقول شنو) وقبل ما افتح خشمي (فمي لانو الاعراب هنا عندهم خشمي يعني نخرتي ) "ابن عمك او بنت عمك مش كدة " ...واحد قريبي الله يرحمو كدة باصر وعمل كتاب عن انساب اسرة ممتدة فيها كدة التقول تلتيين االنوبيين في السودان ومصر واها قلت اوري البنيات انو ابوهم ما بقول ساااي فتعجبن ايما اعجاب وقالن مخرج افاتر ذاتو انتو تحيروه وتعيقو خيالو ....
الموضوع كما ذكرت مهم لانو تواجد اثنيات متعددة في حيز جغرافي واحد لم يساعد في انصهار ولا خلق هوية فكل اثنية داخل ققاعة Bubble تتزاوج وتتكاثر وهكذا تبقي الجينات ذات صفة وراثية واحدة ويصعب امر "التغيير" كما صعب امر "خلق هوية"....
ولقد اشرت الي بعض من ذلك في موضوع (غير مثير للمارة والعداد فيهو بايظ) :
هوفستيد دايمنشن ونحن اهل السودان( ملحوظة : ليس من المو...ت الاقبال الجماهيري)
| |
|
|
|
|
|
|
|
|
|
Re: الزول بغطي قدحو حتى لو بقي قدح مونه (Re: abubakr)
|
الوقور الملاعمر
سلام كبير
وصف المرأة بالقدح وصف فيه نوع من الإنصاف للمرأة المغبونة في بلادنا ، لأن القدح لنا فيه مآرب عديدة أقلها إحتواء الطعام.
، طبعاً شابكننا الزول بغطي قدحو وكده مرات القدح زاتو بيكون تعيس جداً ومرات بيكون آية في الجمال والعلم والثقافة وحرام يدوهو لي زول وهم كل مؤهلاته أنه الغطا بتاع القدح ، وفي نوع أغطية كده أخير منها القدح يكون بايركس ويقعد كاشف إن شاء الله تقع فيهو ضبانه . وبالمناسبة الحكاية دي فيها مآسي وجابت بلاوي ورياح جنوبية شرقية غربية شمالية ودي طبعاً بي كلام الحبوبات
تعرف يا صديقي
أنا شاهدت ذات مرة أغرب تغطية للقدح.
أحد الموسورين قالوا له لا بد من تغطية قدحك. لم يقصر ، فقام بتغطية القدح و ما قصر مع بقية الأواني فوصلهم رذاذ خيره . ثم إختلف مع القدح لأسباب غير معروفة فطلقها بالثلاث. و حاول أن يجد قدحا من خارج ( صينية الأهل ) ، فحاصروه حصارا أسريا و قبلياً ، و لم يكن أمامه و أمامهم إلا شقيقة القدح السابق ، فقام بتغطيته و أنجب منها البنين و البنات ، و القدح القديم راضي و الأسرة و العشيرة في كامل الرضا لأن غطا القدح تغطي أمطار خيره الكل.
و الله شاهدت الأحداث دي لايف ...
هذا و هناك أقداح تتم تغطيتها بالحجج التي ذكرتها أنت أعلاه ، و نجد الأطفال يتوارثون أمراضا معروفة في الأسرة ، و لكن لا تزال الأقداح تغطى بنفس الأغطية و لا حياة لمن تنادي
دمتم
| |
|
|
|
|
|
|
|
|
|
Re: الزول بغطي قدحو حتى لو بقي قدح مونه (Re: هند محمد)
|
هند أجمل ما في اللول أنها تقرأ في الإتجاهين بكلام العرب ولغة الفرنجة أيضاً LoL ومصادفة كانت هي بعضاً من كلمات أغنية رقيص العروس أيام أن كانت العروس بترقص "اللول لالك يا العروس" وبي كده تكون لول عروسنا هي تأكيد لموضوع القدح حيث أن المطربة أم حلقاً ماكن وعضلات وهي تضرب بقوة 6 درجات على مقايس ريختر الدلوكة المسكينة لتضيف مفسرة "العريس ود خالك يا العروس" وهنا مربط الركشة.
| |
|
|
|
|
|
|
|
|
|
Re: الزول بغطي قدحو حتى لو بقي قدح مونه (Re: ابو جهينة)
|
جلال بن داؤود يا زول يا جميل
تغطية القدح لم ينهي الإسلام صراحة عنها وبالضرورة لم يحث عليها يعني لا قال غطو قدحكم والما بغطي قدحو يكون قد إرتكب إثماً عظيماً وكمان ما قال ما تغطوه يعني ترك للناس الخيار في شأنهم ، طيب لمن الأمر كده ليه نجبر البنات على أن يكن قدح يغطيه إبن العم وإبن الخال البنات ديل ما ناس والخيار دا في الدين قالوا للراجل فقط ماهو طالما الإختيار والخيار للناس أكيد الناس هم الرجال وبرضو هم النساء ولا في ناس عندها رأي نسونة الناس وأنهن يجب أن يكن ناسا وليس ناس.
نحنا ما عندنا مانع أن يكون هناك قدح تتم تغطيته إن شاء الله من فريق الـ CNN طالما كان هناك توافق وتراضي بين الطرفين موضوع التغطية لكين كمان لمن يكون طرف داير يغطي والطرف التاني عنده بطانيه _ دائما ما يكون القدح - يبقى خلاص الداير يغطي دا يشوف ليهو حته تانيه لأن القدح ما عايزن غطاء. يبقى الزواج من الأقارب مباح في الأصل على أن تراعى الظروف الإجتماعية والصحية وقبل كل هذا موافقة البنت صاحبة القضية.
في شأن القدح المرأة هي الضحية وهي الحلقة الأضعف بكل ما يترتب عليها من آثار سواء كانت متزوجة وانفصلت أو فتاة عانساً فعضلت جميعها قضايا مؤلمة تجبر المجتمع أن يتساءل عن الأسباب كما يجب عليه أن يبحث عن حلول..
الإسلام كفل للمرأة حقوقها الشرعية في الزواج وحفظ كرامتها إذا لزم الطلاق وفرض موافقتها في عقد القران لكين إرث القدح وتقليد التغطية ما زالت هي الصوت الأعلى ، يا جماعه إذا كان في فوارق كبيرة جداً بين القدح وغطا القدح المفترض وأن كل العلاقة التي تربط بين القدح وغطاؤه هو علاقة القرابة أها دي أكيد لا ذنب للقدح أو الغطاء فيه.
| |
|
|
|
|
|
|
| |
almulaomar
أيمن الطيب
abubakr
ابو جهينة
هند محمد
فيس بوك
تويتر
انستقرام
يوتيوب
بنتيريست