|
الي الدستة الملشرين بكرسي الرئاسة
|
اول شي مبروك.. وبركة الاخدوكم كلكلم تتصابقو علي حُكُمنا....والناس الما أخدوهم نقول لهم ... ضُمة ما تزعلو وما تتحرقو.. المرة الجاية ومن حسي نحدسكم تشوفو فصول اعادة... ونحن ترانا قاعدين... وراجينكم ومن بكانا دا ما متحركين شبر...اها النجي لي ناسنا الدايرين ينتخبوهم... اولك بالتبادي... انا ما عندي ايك يا مانع يحكمني اي واحد فيكم... اصلي ما خسران حاجة في النهاية محكوم محكوم .... علا عندي ليكم فهم بدل العيّطة والزيّطة والزمبريطة.... والهيصة والدوشة... وتشيلو في حال بعض... ونحن خاتين ايدينا فوق جضومنا متمحنين نعاين لكم... فهمي ليكم تتفقو علينا... يعني تحكمونا الأتناشر... قولو لي كيف؟.... قُلتو لي كيف؟... اها عاينو جاي... تسوها كل سنة فيكم زول يحكم.... يعني شنو.. يعني زي الختة.. او الصندوق... لكن أوعى واحد فيكم تبقى نفسو صغيرة وتقع لو الصرفة اللولا.. ويزوغ.. زي اللمين ود عرفة وقعت لو الصرفة اللولا وزاغ... الله يطراهو بالخير.. كان معاهو خمسة تنفار مسوين لهم ختة .. عشان يشترو نِعلات... كل شهر كل واحد فيهم يشتري جوز نِعلات... اللمين قال لهم انا ادوني حقي نجيضة .. عشان مافيكم زول بيعرف مقاسي...مع انو مقاسو هين.. علا داير يتلولو... قومو أدوهو قريشات الصرفة اللولا.. قوم يا اللمين ود عرفة شيل القريشات وأغتس وزوغ ولي يومكم دا ما لامين فيهو...لا خلو قضارف لا خلو قلع نحل لا خلو بربر لا خلو ام مراحيك لي عند ام ضبان وصلو كاسو سما واطا..تب ما لقوهو...غايتو استخلفو الله ودوروها تاني...وانا من حسي بحدس ناس مفوضية الانتخابات ان جاهم زول اسمو اللمين ود عرفة و داير يترشح اصلو ما يقبلو اوراقو لانو زول مزاوغي واونطجي ومستهبل.. وعلي اليمين يزوغ بكرسي الرئاسة ليوم القيامة ما نلم فيهو... ورئيسنا الجايي يحكمنا علا يحكمنا وهو واقف علي حيلو...والزول الواقف ما متل الزول القاعد ومتوهط ومتفجفج..... واللا يحكمنا وهو متفرجخ في الواطا.. ونحن والله ما بنرضى رئيسنا يتفرجخ.... الشي التاني الوصا بالمهلة.... الزول البجي يحكم .. نحن حقنا في السلطة ما ساعلين منو.. لكن غايتو مرة مرة ان لقيت لي موتر ابوصفارة جرى قدامي ما باباهو وخاصة في الحلة ... علا حقنا في الثروة بندورو.... بعدين اوعكم تسوهو لينا قسيّم التبيقة والكبش...نشليو بي جاي ونديهو ناس الضرائب والجبايات واللا ناس المرور.. والوليدات الشايلين ايصالات ما معروفة حقت شنو ويدفعّو فينا.والبينقنق ساكت ينهروهو وينهزروهو..... دا كلو نديهو ليكم بالليد التانية ويبقى علينا الله يجزيكم خير في حق المناولة... ونبقى نحن قواديس ساقية جحا..... البتشيل من البحر وتدي البحر...وانتو البحر... ونحن قواديس......بكرة يجينا واحد ويقول داير يسوي حزب يسميهو "القواديس"... انا حاجز الاسم دا... حزب قواديس شمال السودان اختصارا" قش"!
|
|
|
|
|
|
|
|
Re: الي الدستة الملشرين بكرسي الرئاسة (Re: سجيمان)
|
Quote: فهمي ليكم تتفقو علينا... يعني تحكمونا الأتناشر... قولو لي كيف؟.... قُلتو لي كيف؟... اها عاينو جاي... تسوها كل سنة فيكم زول يحكم |
وبكدا تكون يا سجيمان حليت لينا مشكلة من يحكم السودان
أها ونحمدالله تاني لا تكون عندنا حروب لا تمرد لا حركات مسلحة لا نساء وأطفال غلابا يفترشون الأرض ويدفعون ثمن جشع الساسة
أبصم معاك بالعشرة
| |
|
|
|
|
|
|
Re: الي الدستة الملشرين بكرسي الرئاسة (Re: Hadeer Alzain)
|
Quote: ...وانا من حسي بحدس ناس مفوضية الانتخابات ان جاهم زول اسمو اللمين ود عرفة و داير يترشح اصلو ما يقبلو اوراقو لانو زول مزاوغي واونطجي ومستهبل |
زولك دا يادكتور قبلوهو ورشحهو ودشن حملتو الإعلامية في كل القنوات الفضائية .. في ناس عايزة زول زي اللمين دا لانو مزواغي واونطجي ومستهبل .. ودي شروط الحداثة والتجديد ..
| |
|
|
|
|
|
|
Re: الي الدستة الملشرين بكرسي الرئاسة (Re: سجيمان)
|
قال البشير قال
والله كلامكم ده مضحك أكتر من خستكة سجيمان
الواحد بيحاول يضحك في زمن إحباطات الإنقاذ ونتانة رجالا لكن أظنكم جادين يا عيال البشير
هييييي أرعوا بعيد
أذن الآذان وبنصليك يا صبح الخلاص حاضر بنفتح دفتر الأحزان من الأول وللآخر ونتساءل منو الربحان منو الخاسر منو الكاتل منو المكتول منو العسكر مع الطغيان منو السلم صغارو الغول منو اللمع نعال كاتلنا يوم كاتلنا كان مخبول ومنو الغنالنا ساعة الحارة يا أكتوبر المحمول على الأكتاف ويا إبريلنا يا مكتول
| |
|
|
|
|
|
|
Re: الي الدستة الملشرين بكرسي الرئاسة (Re: سجيمان)
|
حقك تحرسو ولا بيجيك حقك تلاوي وتقلعو أمسك شباطينك ضراع الما بلتحقو جدعو
....
أيها الشرفاء ... صوتنا هو أداة التغيير السلمي تماماً مثل أكتوبر وأبريل سنخرج للدنيا ... من جديد شاهرين هتافنا
صوتك أمانة لإسقاط نظام القتلة
| |
|
|
|
|
|
|
Re: الي الدستة الملشرين بكرسي الرئاسة (Re: سجيمان)
|
مشتاقين يا سى جىQuote: بعدين اوعكم تسوهو لينا قسيّم التبيقة والكبش...نشليو بي جاي ونديهو ناس الضرائب والجبايات واللا ناس المرور.. والوليدات الشايلين ايصالات ما معروفة حقت شنو ويدفعّو فينا.والبينقنق ساكت ينهروهو وينهزروهو..... |
عشان كده خلى اللمين ودعرفه يشيل الكرسى و البيحكمنا ما يتوهط و يسوى فينا جنس العمايل دى ....
شايفك متجّدع و متألق فى التلفزيون قبل يومين .
| |
|
|
|
|
|
|
Re: الي الدستة الملشرين بكرسي الرئاسة (Re: سجيمان)
|
دخل الـ " قش " ما قال كش !
ما تجواب . . دي ما غلوتية
دا عضو جديد في حزبكم
لكن انقر قال شنو ؟
قال " غاغ " . . كش = كلو شمال بس ؟!
ياخ انا عندي فكرة تعديل لاقتراحك و بالمرة بتحل معضلة وحدة شعب السودان دا ، ممكن اطرحا هنا . . الو مش دا تابع لمجهر سونا برضو ؟ يا سيد الامانتي ليك الفكرة ببساطة ، يتوسع كرسي الرئاسة من بشيل دستة يشيل 39999999 نفر - مش ياهو الحساب ؟ - و لا الشغلة ما ياها 40 مليون كششششششش ؟ اها العملية دي بتدور حساب دغيغ خالس ، بالملي عديل يلا انا هنا بشرح ليك الاطار النظري و انت ما بتقصر المهم نقول هم اربعين طق طرق ، يبقى اقتراحك يتعدل بحيث انو الـ 39999999 نفر ديل يتبادلو الصرفة - صرف الكرسي و اكيد الزمن لازم يقل عشان كل واحد يلقى فرصتو كمان ، الاعمار بيد الله ، لكن كمان التخطيط السليم اساس الحكم الرشيد . . و لا شنو ؟ اها بي كدا و بحسبة بسيييييييييطة يكون " الشعب " كم ؟ واحد ياخ !!
اسي دي دايرة ليها درس عصر ؟
----------
الحقوق الفكرية محفوظة ، اوع تسول ليك نفسك كدا و لا كدا . . سجلنا براءة الاختراع لدى المسجل العام للافكار . لكن كان اقنعت الشعب السوداني بفكرة الوحدة بنقسم فيفتي فيفتي . . اها شن قولك ؟
| |
|
|
|
|
|
|
|