|
|
 يا اهل السواقي الديش... مآدين كُروشكم ليش؟... سآقية حسن شِقيش؟... تدي المُلآح والعيش...
|
يا اهل السواقي الديش
مآدين كروشكم ليش؟
ساقية حسن شِقيش
تدى المُلآح والعيش
يا والدة وينو حسن؟
الكان زمان صِنديد
شافوهو في البندر
بيعاني من الضيق
ضِيّق الحياة الخلّت
المِتلو يمشي بعيد
يا حِليلو يا ما كان
زولاً سخي وضكران
ما مخلِى زول عدمان
الحِلة والجيران
ما شافو يوم زعلآن
كان بيرفع الآذان
يا حليلو يا خِلآن
شافوهو في البندر
بيصارع الحِرمان
ساقيتو يا حليلها
شالوها ناس جونا
زنديّة حكمونا
حسن اللكان ضو بيت
وسط الظلط حيران
راح مِنو راس الخيط
يسأل في أهل الخير
يا أخوانا وينو شبير؟
قالولوا روّح فآت
قام بجماعتو بعيد
غنولو الف نشيّد
يعرض تملى سعيد
أيامو كُلها عيّد
إتحيّر المسكين
سألوهو ناس عآبرين
يا عمو ما عندك سرير؟
رآكوبة من حرّ الهجير
مكتوف على عيدانها زير
لآزم الرُقاد قطعة حصير
توب من فحيح الزمهرير؟
فوق خدو سآلت دمعتين
قشاها بوجع السنين
الصبر بس عاد لآمتين؟
شاف طيفها يترنح حزين
وصوتها القِبيل مُنساب حنين
في سمعو كان زفرآت أنين
تنادي في الأطياف بشيش
يا اهل السواقي الديش
وين فات حسن شِقيش؟
من تفتحت مطآميرو
لجارو وعشيرو
المابي تقديرو
ما دقّه لسديرو
الهيبة في شالو
كان القدر شالو
الجنّة فاتحالو
والراجي فيها عمآر
خشمو التُرآب كآلو
يا اهل السواقي الديش
ساكتين تطنطنو ليش
دلوني وروني
كان السمِح فآرق
ما اظنى بعدو أعيش...
ود المدير...
|
|
 
|
|
|
|
|
| |
معاوية المدير
سيف الدولة كامل
Ahmed musa
فيس بوك
تويتر
انستقرام
يوتيوب
بنتيريست