|
كيف حال الحلة هنا ؟
|
غبنا
أو بالأحرى غُيبنا
طوعاورضاءا أو قسرا وإجبارا
والبون أوالفرقة ما أظنها كبيرة بين المعنيين
على الأقل هنا فى هذه "الحلة" الوافر أهلها
المهم فى الأمر
عوافى وكيف الحال والأحوال
وعسى الخلق كلهم طيبين
أهو
منها سلام ومطايبة ومنها محاولة جديدة "الصحيح مغامرة جديدة" للتشعلق والمتاوقة من فوق الحيطة
|
|
|
|
|
|
|
|
Re: كيف حال الحلة هنا ؟ (Re: محمد المرتضى حامد)
|
أباذر أيها الصاحب النبيل
سلام يغشاك
قصّرْنا تماما بعدم السؤال عن غيابك تقصيرا غير ذي قصد ، و لكنها الغربة التي تلتهم جزيئات التفكير و لا تُبْقي غير الجري وراء كيفية التعامل مع منحنيات هذا الإبتعاد عن البلد.
عسى أن تكون بخير و الأسرة
دمتم
| |
|
|
|
|
|
|
Re: كيف حال الحلة هنا ؟ (Re: ابو جهينة)
|
عزيزى الجميل يا ابا جهينة الجلال
تحايا وسلام ليك رفقة معزتنا الكتيرة
كلنا ياخى فى الهم والوجع أغراب
عساك والمعاك زى ما داير وزى ما بتتمنى
وأنا بتمنى ليك برضو، ذات أمنياتك مرفوعة لأقوى قوة
شكرا ياخى على جيتك وشوفتك السمحة دائما
| |
|
|
|
|
|
|
Re: كيف حال الحلة هنا ؟ (Re: محمد المرتضى حامد)
|
أُمحومد
سلام كتير ليك وعليك يا مرتضى
يا مرضى ويا مُرضى
طالما إنتو قاعدين فلا خوف علينا/عليهم ولا حزن حيحكم ولا يدوم
ياخ إنتو الأشجار
وطالما فى شجر، معناتو فى ضل وإخضرار وثمار وعمار
وأكيد فى عصافير وغنا وحاجات سمحة كتيرة
شكرا يا زول يا سمح
| |
|
|
|
|
|
|
Re: كيف حال الحلة هنا ؟ (Re: rani)
|
مراحب بالمطر.
إفتقدتك كثيرا وكانت لي فكرة أن أسأل وأطمئن عليك.
لكني كما تعلم لم أكن لأستطيع ذلك .
حمدا لله بالسلامة,وأتمنى أن تكون أنت والأسرة بألف خير.
محبتي وإحترامي.
| |
|
|
|
|
|
|
Re: كيف حال الحلة هنا ؟ (Re: rani)
|
بسم الله الرحمن الرحيم
" بل أحياء عند ربهم يرزقون"
صدق الله العظيم.
الهم أرحم موتانا الأحياء منهم عندك والأحياء في الدنيا وأنت التي وسعت رحمتك كل شئ وأنت أرحم الراحمين.
آمين يا رب.
* متابعة الكشف الدوري مهم ويهيئ للمعالجة المبكرة ,والمواظبة في الكشف المتوالي للأمراض الخبيثة والكرونك من الأهمية بمكان ,مع طبيب ذو ثقة ويعي معنى شرف المهنة.
محبتي وإحترامي.
| |
|
|
|
|
|
|
Re: كيف حال الحلة هنا ؟ (Re: Safa Fagiri)
|
Quote: منها سلام ومطايبة ومنها محاولة جديدة "الصحيح مغامرة جديدة" للتشعلق والمتاوقة من فوق الحيطة |
يا مطر الشوق مطر يعلم الله يابا والمعزة حنينه وموكرة حد الغرق شاحدة ربى تكون انت طيب وكل العقاب المعاك طيبين بركة الجيت يا السمح وزين نورت من جديد مكانك فاضى محتاجنك يا الحنين
| |
|
|
|
|
|
|
Re: كيف حال الحلة هنا ؟ (Re: abuguta)
|
.. .
Quote: كيف حال الحلة هنا ؟ |
خالية من المطر .. الجفاف عّم كل الاصقاع .. الأحزان ورائحة الموت وطائر البوم يعشعش فى الاشجار هنا .. تسود الصفحات اياما وتلاشت الضحكات عن هذه الديار دموع مالحة تهطل فى كل بقاع السودان ..
_____
انها حله جافة فاقدة للفرح .. والاخضرار .. ولكن .. نقول حمدالله على السلامة لعل بغيثك تخضر روبى وتلال .. ويعم الفرح جنبات هذه القرية المهجورة
| |
|
|
|
|
|
|
Re: كيف حال الحلة هنا ؟ (Re: Tabaldina)
|
ازيك يا صالح وكيف حالك
وأحسن الله عزاكم وجبر كسركم فى الوالد ربنا يتقبله ياخى مع الأخيار والأبرار
والبركة فيك وفى اخوانك
المنبر ياها عادته الإنت بتعرفا
يوم يباب ويوم اخضرار يوم سموم ويوم دعاش
لكين فى كل مرة برجع ويقوم تانى زى طائر الفينيق
أخبارك شنو ؟
| |
|
|
|
|
|
|
Re: كيف حال الحلة هنا ؟ (Re: soma)
|
اسماء الشعر والجمال الحسنى
سلام كتير وتقدير وفير وغزير ليك ولحضورك الأخضر الجميل
عساك والأسرة وأهلك كلهم طيبين وتامين وسالمين
وأبشرط وأطمئنك كل الأهل هناك والبلد فى أمان الله وكل شى على خير
تسلمى يا كريمة وتسعدى وتطيب ايامك وعمرك إن شاء الله
| |
|
|
|
|
|
|
Re: كيف حال الحلة هنا ؟ (Re: rani)
|
أهلا يا رانى
كيف أحوالك
بسيطة يا حاج مرات كتيرة ووسط الزحمة والدوشة بيتلخبط موطئ أصابع النقر، عشان كده الحروف القريبة من بعض بجو مارقين سوا
| |
|
|
|
|
|
|
Re: كيف حال الحلة هنا ؟ (Re: walid taha)
|
كيفك يا وليد وأريت حالك زين
بين أرجوحة الحال وزلقانية المآل ما فى إيدينا غير السعى بين صفاء الأمل ومروة المحاولة عسى ربنا يصلح كل شى ويبقى زى ما عايزين
مشكور ياخ على الترحيب
ودمت طيب وسعيد طوالى
| |
|
|
|
|
|
|
Re: كيف حال الحلة هنا ؟ (Re: فادية اليمني)
|
كيف الحال يا فادية وكيف الأهل والبلد والناس
قبل تلاتة أسابيع كنت فى زواج ود مأمون طه ولاقيت الناس كلهم
وكان فى البال والله الاقيك واسلم عليك
لكين إنتى عارفة طبعا زحمة المناسبات والمرقة والدخلة
وليك التحايا والسلام كله
| |
|
|
|
|
|
|
Re: كيف حال الحلة هنا ؟ (Re: Emad Abdulla)
|
الروح يا عماد هى العلى وشك الطلوع
والقمره فى كل يوم تلفح توب جاراتها الخفيف داك وتتاوق أول شى بى رقراق المغارب، وتطلع
كيف الحال يا حاج والشوق نيل متأبط زرقته ودافر عليك
الحِلة؟
قصدك المحل البكون ساكن فيك داك ؟
الناس دائما بسكنو فى الفجج والبيوت والمدن والحلال
لكين الحِلة هى البتسكن فيك
وشوف الما ببكى ساعة يمرقوها منك، ولا يمرقوك منها، ما ياهو واحد، صاح ؟
وهنا، هنا يا عماد فى حلة سودانيزنا دى، برضه فى سكن ورحمة ومودة شاسعة جدا وكلما مرقوها منك أو العكس، يبدأ الحنين يتاور فيك ويوجعك زى نغزات الضرس الحار داك بالليل
مرات تجر عليك "فردة" قصيدتك الدمور وتتكرفس، وتبدأ تراود فى النوم وساعات النوم والهجسة تحلف بالتقطعك، مش التقطعا، وتابى تجيك وإنت تبدا تتطقطق فى مفاصل وجعك، وهاك يا سهر وأرق وفى الآخر تنوم وروحك مفلوقة ومظلطة
القمرة بكلمها ليك
عندك وصية تانى ؟
| |
|
|
|
|
|
|
Re: كيف حال الحلة هنا ؟ (Re: الجندرية)
|
أمانى
كيف حالك واريتك طيبة ياالطيبة
الحمد لى سيد الحمد الحال ماشى ومافى عوجة تب
إلا الشوق ليكم والوحشة من غيركم
وتحايا أمانة عليك الله لى عثمان والعقاب
| |
|
|
|
|
|
|
Re: كيف حال الحلة هنا ؟ (Re: Mohamed E. Seliaman)
|
عليكم السلام والوئام يا محمد والرحمة والإكرام
كيف الحال
إن شاء الله ياخى نشوفك دائما محل ما بتطيب روحك وتسعد وما نشوفك فى شينة، لا هم لا غم لا كدر
شكراعلى حسك الطيب
وشكرا ليك على الدعوة، اعتبرها وصلت ولبيناها عشانك
| |
|
|
|
|
|
|
Re: كيف حال الحلة هنا ؟ (Re: عاطف مكاوى)
|
عاطف
الحبيب والصديق رفيق الأيام الخضراء
إنت والعقاب إن شاء الله طيبين طالت السنين ياخ وتكدست الأيام والشوق هدير مافى أكتر منه والله يا عاطف إلا المحبة ال ليك
| |
|
|
|
|
|
|
Re: كيف حال الحلة هنا ؟ (Re: أبوذر بابكر)
|
المطر..
صديق الحروف الوالهة
لك المعزة دوما..
نفتح لك الدواخل ترحبا قبل كل الأبواب المشرعات جذلآ لعودتك..
نفتقدك كثيرا...والحال مايل بس ربنا يعدلها.
المحبة.
آدم العشا
| |
|
|
|
|
|
|
Re: كيف حال الحلة هنا ؟ (Re: أبوذر بابكر)
|
أباذر يا مطر عافيتنا:
أصدقك القول كنت أحادث صديق لي متابع للمنبر (بالطاقه) سألني كيف المنبر الأيام دي ؟
قلت: في حالو ، ولكن بعض ناسي بهم غياب يسكنهم.. وقد كنت أنت وبعض أشرعة النشيد وبعض بعض مياسم الغنا كنتم في خاطري بعيناتكم الماطره .. وغيابكم المؤلم.
فتحت المنبر لأجدك في زقاقات حلتنا يا طيب..ببهائك النقي.
والجابك يجيب الغايبين
ما تعملا .. كويس
لو ما عشانا عشان بُطان حِلتنا البتاوقوك في كل خريف.
مرحباً يا شوق.
كل الود
| |
|
|
|
|
|
|
Re: كيف حال الحلة هنا ؟ (Re: فاروق أبوحوه)
|
فاروق يا زول يا خريف
اللحظة بيك بتنتشى والفجة فى حضرة لقاك تدى الأمان طيب الزمان وما بتخلى شى
قاعدين نحن يا ابا حوة
بس مرات القعاد بكون على طرف الروح ومرات "بتتفرجخ" وإنت مبسوط وتتخيل على يمينك أحدعشر بستان وشمس الكلام وقمر الوئام حاضرين
والضوء يسيل جداول
وإنت والأشجار الزيك
تكونو كورس ملون ومليان عطر
كتر خيرك يا سمح
| |
|
|
|
|
|
|
|