Sudan Tribune التصويت الأكثر مصداقية حتى الان

Quote: غايتو دي يا امنجية الانترنت لو عايزين تغيروها الا تشترو 5000 لابتوب لي ناسكم ديل[ فرصة وجات للتماسيح اي تمساح من البلاعين يدق صدرو ويورد ليكم 5000 جهاز كمبيوتر عشان تصوتوا بيها

Quote: الكونت الله اكبر ولله الحمد الشي الطبيعي ان يكون الامام في مقدمة كل شي كما هو في مقدمة كل ركب ماعدا ذلك هو الشي الغير طبيعي معا يا احباب من اجل رفع قيم الحرية والديموقراطية وعاش الامام الصادق امل الامة والله اكبر ولله الحمد

Quote: Thank you for voting. Omer Hassan Al-Bashir (NCP) 7.4% Al-Sadiq Al-Mahdi (Umma) 43.9% Hatim Al-Sir (DUP) 0.9% Yasir Arman (SPLM) 42.2% Mohamed Ibrahim Nugud (SCP) 1.3% Abdullah Deng Nhial (PCP) 0.9% Mubarak Al-Fadil (URRP) 1.0% Abdel-Aziz Khalid (Sudan Alliance Forces) 0.4% Ahmed Goha (Independent) 0.3% Kamil Al-Tayib Idriss (Independent) 1.7% 15860 votes

Quote: لكونت السلام عليكم عارف من الصباح وأنا أدور على البوست بتاع يوم الأربعاء المفتوح لهذا التصويت لم أجده وفعلا التصويت له مصداقية عالية نتمنى أن يرتفع عدد المصوتين أكثر وأكثر ليرى الجميع من يستحق حكم السودان فعلا لا قولا

Quote: الاخ عبد المجيد السلام عليكم لا اعتراض على هذه النتيجة بس بحق لا تصلح كمعيار مقياس او مؤشر لدولة كالسودان لسبب بسيط جدا ان نسبة مستخدمى الانترنيت فى السودان ضعيفة جدا مقارنة بعدد السكان وبرضو مبروك للصادق المهدى ان كان هو خيار الشعب

Quote: الله اكبر ولله الحمد بالتوفيق للسيد الامام الصادق المهدي

Quote: الكونت اخوي كيف حالك . اقعد لي انتوا في ترشيحات المواقع والتي يجلس خلفها اشباح لحدت ما الرماد يكيل حماد (دا لو ماكان كالوا لحدت الان) دي توقعات الامام الصادق نفسه ما حيقدر يصدقها ، خليك من ناس لن نصادق غير الصادق . غايتو ان في راي المتواضع ، وعدم معرفتي بالسياسة ومجاهيلها ومفاجأتها ، لكن ناس المؤتمر الوطني ديل ما بفكوها بالساهل كدا . وقلت ليك من قبل ، الاحزاب الواعية حقوا تستفيد من التجربة دي في تثبيت مبدأ الترشيح والإنتخاب النزيه ، وتعمل للاربعة سنوات الجايات ديلك كان تقدر تحصلها مرادها . وكل عام والسودان بخير .

Quote: أكثر من يهتم بمطالعة هذا الموقع -حسب ظني-هم من أنصار الحركة الشعبية ولو كان لهذا التصويت أي قيمة في التأشير إلى شيء فهي بالتأكيد لصالح السيد رئيس الوزراء

Quote: غايتو دي يا امنجية الانترنت لو عايزين تغيروها الا تشترو 5000 لابتوب لي ناسكم ديل

Quote: ما صاح تنضف الكوكيكز ممكن تصوت تاني من نفس الجهاز يعني اقل واحد فيهم عبدالعزيز خالد هسة افضي ليه باقي اليوم اخليه ليكم الأول الاكثر مصداقية وأمان بتعتمد علي نوعيات اخري من البرمجيات

Quote: ا كونت معليش يعني عشان ما كل الناس بتعرف معناه الـ Poll القدامنا ده اكتر مصداقية؟ ومنو القال انو الناس البعرفوا بسيطين ما بسيطين والله. استغرب في اي زول قاعد في الاسفير 5 ساعات في اليوم ومستواه التقني في التعامل مع الانترنت بالطريقة دي. وعدين البخترقوا المنابر ديل منو والممكن يغير في المحتوي ديل ذاته هم منو والمتمكنين من الناحية التقنية وبخترقوا ايملات الناس وبقفلوها منو؟ يعني افتراضك حقيقي حيرني قدر ما الزول بيحاول يلقي لنفسه مخرج من حكومة الانقاذ قدر ما يلقي المتعاطين من الإشو السياسي ناس قاعدة ساي. الله في غايتو

Quote: تنضف الكوكيكز ممكن تصوت تاني من نفس الجهاز

Quote: كان كدة حتلقى عمر البشير الليلة قطع شك الاول الجماعة حيشغلوهم اوفرتايم ولا عزاء للقمر بوبا صاحب الفكرة او ناس سودان تربيون يقفلوا التصويت على كدة يجب ان نعى ان الانتخابات ليست في الفضاء السايبري هذا معظم مناصري الصادق وعرمان ليست لديهم امكانية الوصول الى النت او لا يعلمون ان هناك حاجة اخترعها الخواجة اسمها انترنت قطاع كبير من المتعلمين وانصافهم ممن يدعمون عمر البشير لديهم المقدرة او توفر لهم المقدرة للسياحة في هذه المواقع وتنفيذ مهمات معينة من ضمنها التصويت في هكذا استطلاعات او للرد على (اعداء الوطن!!!!!!!!!!) ركز يا كونت على ارض الواقع

استاذي محمد ابراهيم تحياتي لك



يقطع قمر بوبا ويقطع محنو ياخي


في تقديري لو جرت انتخابات حرة ونزيه في السودان وهذا ما نتمناه ياباشمهندس فالجبهة الاسلامية وامتدادها (المؤتمر الوطني ) لن يحصلو حتى على 15% التي حصلو عليها سابقا فبالرغم من طول المدة التي لم تقام فيها انتخابات الا ان الاحزاب التي كانت في الساحة لازالت تحتفظ بجماهيرها وقواعدها بل تمددت داخل قطاعات كانت حكرا على الجبهة الاسلامية والشيوعيين كما يجب ان ننتبه ان هناك قوى حديثة ذات مصداقية وأكثر التصاقا بقضايا الجماهير سوف تظهر كلاعب جديد في الانتخابات القادمة منها المؤتمر السوداني تمنياتي لبشرى الطيب بالفوز فى الدائرة التشريعية بمروي

عموما سوف تضح الخارطة السياسية بعد الانتخابات التي نتمنى ان تكون حرة ونزيهة فقد سئمنا المزايدات التي يقدمها الانقلابيون في كل مرة عن نهاية وتدمير أحزاب تمثل نبض ووجدان هذا الشعب فمن يحلم بتحطيم هذه الاحزاب التي في قامة حزب الامة عليه أولا ان يحطم هذا الشعب بأكمله حتى يحقق حلمه

Quote: +

Quote: يا كونت سلامات واللهِ الذي لا إله إلا هو عُمري ما دخلت موقشِ تربيون المغمور هذا و قلت ليكم رأيي دة في واحد من البوستات إنو الإنترنت عموماً شُغُل بتاع نُخب و ما متاح للجميع و فوووووووووووووق النُخب تربيون حقّت نُخب أها أنا الشُغلي كُلُّو في النت و لا أبارح النت إلا ساعات معدودات في اليوم ما حصل خشيتو ولا خاشي قلتو سودانايل تصويت تمام و جبتوهو فرحانين لمن عصروكم فيهو جيتو قلتو لالا حق كيرزان و موجّه و ملعوب و ممكن تصوِّت أكتر من مرة و بتاع هسي لو قبّلنا ليكم على تربيون دة واللهِ إلا تقولوا الروب لكن ما شغالين بيهو كتير لأنو زي ما قلت ليك مغمووووووووووووووور و أسمعها مني يا كونت

علاء الدين كيفنك
يازول سودانايل ده الجابو بلاك منو يا اخوي انت الجبتو ومعاه كم تهليلة وتكبيرة كده لمن قلنا الناس دي خشوا البيت الابيض

انتو بالمناسبة دي ناسك ديل مش زمان كانو بقولو امريكا روسيا قد دنا عذابها بعدين يا اخوي القال ليك منو نحن معتمدين علي تصويت الانترنت ابدا والله لكن بس عشان الناس البتزمزغ دي قلنا نشوف اخرته

بعدين يا علاء الدين انت القال ليك الموقع بتاع تربيون مغمور وبتاع سودان نايل ما مغمور منو امشي ارجع شوف عدد المصوتين هنا ومصوتين هنا حتعرف انو المغمور هو سودانايل بالتأكيد
على العموم انا اقترح عليك اقتراحين
اول شي تلم كل امنجية النت عندكم وتحلق ليهم صلع للتقصير الكبير في اداء واجبهم الرسالي
تاني شي تشوف واحد من التماسيح بتاعين النفايات ديلك وتقول ليه بدل تجيب كمبيوترات مضروبة خليه يجيب ليكم 5000 كمبيوتر كويسة تصوتوا بيها وما مشكلة ادوه ترخيص بتاع كوتة سكر وهي لله هي لله
علاء الدين اخوي احترم جدا دفاعك عن منظومتك وحزبك لكن الا ترى امامك ما يحيط بالبلد من أزمة وانت تمارس دفاعك المستميت هنا عن اشخاص مثل البشير
يمين بالله يا علاء الدين يا اخوي انا خايف بعد سنة سنتين تجي لا تلقى البشير ولا تلقى البلد زاته ويكون سودان وراح في شربة مية حينها أنا متأكد انك حتقول والله كلام الكونت في محلوا صدقني انا شخصيا عمري لم احمل على اي شخص عداء خاصة في العمل السياسي لكن هؤلاء الذين تدافع عنهم الان لم يتركوا لاي احد مساحة ان يحيا ولو حياة كريمة على حد الكفاف دون ان يتمسح بهم او يطلب منهم الرحمة هؤلاء استحلوا البلد وحرمات المؤمنين ونصبوا انفسهم حراس للفضيلة حرموا البسطاء من كل شي واستولوا على كل شي وهم الان يقودون الدولة الى الانهيار والتفكك والضياع
اخ علاء الدين انها مسئولية امام انفسنا وامام الله قبل الاخرين ]

Quote: ركز يا كونت على ارض الواقع

Quote: الانترنت آلة اعلامية ضخمة لكن الاحزاب والمعارضة لا يمتلكون مخارج او مداخل لها