كتب الكاتب الفاتح جبرا المتوفرة بمعرض الدوحة
|
|
 الذكرى (135) لتأسيس أمدرمان
|
الذكرى (135) لتأسيس أمدرمان
--------------------------------------------------------------------------------
أجتمع لفيف من وجهاء امدرمان وفعاليات المجتمع الامدرمانى بمختلف اتجاهاتهم والوان طيفهم بنادى بيت المال للتحضير لإحتفال بالذكرى (135) لتأسيس أمدرمان والتى تصادف يوم 13 فبراير القادم، وتفاكروا حول برنامج الاحتفال واخراجه بالصورة التى تشرف امدرمان وتاريخها العريق، وستكون هناك مساهمات رياضية وثقافية متنوعة بهذه الذكرى العزيزة على العاصمة الوطنية وقلب السودان النابض الذى يعبق منه التاريح العريق ، نتطلع لآحتفال يليق بدور امدرمان فى تاريخنا العظيم، وأوجه النداء لجميع أهل امدرمان فى المنبر للمساهمة فى التأصيل لهذه المناسبة عبر مشاركاتكم القيمة ودمتم.
|
|
 
|
|
|
|
|
|
|
|
Re: الذكرى (135) لتأسيس أمدرمان (Re: هاشم محمد الحسن عبدالله)
|
ناس امدرمان أدخولوا بالله اين وفاؤكم لامدر ارجو المساعدة والتوثيق لأمدرمان تاريخيا ، أثريا ، فنيا ورياضيا وكل المناحى وياليت لو فى صور ، أهل امدرمان دكتورماضى ابو العزائم ، جمور زيادة وكل المبدعين أنتظر مساهماتكم القيمة. مودتى .
| |
|
|
|
|
|
|
|
|
|
Re: الذكرى (135) لتأسيس أمدرمان (Re: هاشم محمد الحسن عبدالله)
|
ونبدأ بظرفاء امدرمان واهمهم العم الهادى الضلالي
وبداية مع الهادي الضلالي (الدلالي)
الهادي الضلالي ( الدلالي )
الهادي نصر الدين الحاج القرشي الشهير بالهادي الدلالي.. معلم من معالم ام درمان.. كل الناس تعرفه وهو يعرف كل الناس، عارف بالانساب والقبائل والعوائل- ما شاء الله ذاكرة حديدية - متخصص في هذا المجال قد لا تعرفه انت، لكنه قطعاً يعرفك ويعرف نسبك ويعرف بيتكم في ياتو حي وبابه مقبل على وين.. ويعرف اسمك واسم حبوبتك كمان، اجتماعي ومتواصل درجة أولى.. أي خبر بتاع بكى أو مناسبة أو حفلة خصوصاً اذا كان فيه الفنان ابراهيم عوض، تلقاهو عارفها يا مشى ليها أو داير يمشي ليها ويحثك للذهاب اليها، في مناسبات الزواج يدعوه أهل ام درمان لكتابة الدعوات وتوزيعها «يوم كتابة البصل» محبوب لوضوحه ولبساطته - انعكس ذلك الحب في مناسبتين، الأولى عند وفاة والدته يرحمها الله في أحمد شرفي رفعوه في لاندروفر ليشكر الناس ويودعهم لشدة التدافع وكثرة الناس.. والمناسبة الثانية عند زواجه وقد كان الحضور استفتاءً اثبت صحة مقولة (القدم بالقدم والمجامل ما بندم) يرتاح وينشرح للجمال والناس الأنيقين.. ويكره القبح و«الشنا» والشينين ويجاهر بذلك. انا غيرت وتلاعبت في اسم الشهرة للأخ الهادي استبدلت «الضاد» بالدال لعدة أسباب هى:
1- التسمية قبيحة.
2- المعنى لا ينطبق على الأخ الهادي.
3- الدلالة سايرة مع شخصية الأخ الهادي باعتباره اعلام متحرك مثل الدلالي.
نحكي عنه هذه الحكاوي:
1- مثلما يحب الجمال في الأشخاص يحب أيضاً الاحياء الجميلة وساكنيها، فالملازمين وساكنيها مثلاً غرامه الأول وعنده حساسية مع العباسية- ويقول ليك بكاء في الملازمين ولا عرس في العباسية. ويقول ايضاً أن بنات العباسية يقدمن أولاد الملازمين بعد انتهاء حفلات الاعراس أو «البارتيهات الخاصة» أي يوصلوهم لمنازلهم- ويدعي كذلك أن غنم الملازمين تصرفاتها متحضرة وغير غنم الاحياء الاخرى.
2- في الملازمين وفي حفلة بهيجة كان بيغني فيها ابراهيم عوض. وكان ذلك بعد احداث المولد الشهيرة الناس لسه خايفة سمعوا صوت رصاص والحفلة فرتقت - سألوه الحصل شنو قال ليهم (ابداً ده ما صوت رصاص دي منقة طرشقت في التلاجة)
3- طبعاً لأنه مجامل درجة أولى يحب الناس أن تجامله بنفس القدر- ولأنه لا يقصر فهو (لوام) درجة أولى ايضاً وشيال حال- عندما أجريت له عملية العين الاخيرة كان منزله قبلة للزوار، كل طبقات المجتمع زارته وباركت له نجاح العملية - أنا شخصياً زرته لوحدي مرة ومرة أخرى مع فريق الدافوري بود نوباوي «اصدقاء الجمعة» بعد أسبوعين من العملية مسكني على جنبه وقال لي يا أخوى طه علي البشير أظنه ما سمع لأنه ما جاني بالله كلمه. كلمت طه ولكنه انشغل ولم يقم بزيارته.. ومر أكثر من شهر وطه لم يظهر في ود نوباوي وهنا قال لي «يا أحمد قول لي طه نحن حافظين اسمك من زمن طه القرشي في المستشفى، فاوصلت الرسالة بحذافيرها للأخ/ طه- هذا الكلام أزعج طه فدرس الظروف وكبر المظروف وقام بزيارة خاطفة- وتعمدت زيارة الأخ الهادي في اليوم التالي وسألته ماذا حدث فقال لي: يا اخي طه زارني وسلم علي سلام تمام التمام مش زي سلامكم كسر رقبة.
4- التقى مع السيد صلاح ادريس لأول مرة فحياه الأخ/ صلاح بصورة جيدة وقال ليه: قالوا انك راجل ظريف وبتاع نكتة.. وقالوا انك مجامل وانك بتحب الفن والرياضة وقالوا.... وهنا قال الهادي (ما قالوا ليك مفلس؟)
5- لاقاه واحد اقليمي شين جداً في المحطة الوسطى «ولي التعتره» سأله «يا أخينا المحطة الوسطى وين» قال ليه «انت من ويا أخينا» قال ليه أنا من «صقع الجمل» قال ليه نحن قاعدين نجيكم في صقع الجمل انتو بتجونا ليه.
6- في مأتم المرحوم أحمد بشير العبادي جلس في ركن يتناقش مع المرحوم مختار عباس الشهير «بمخ» وكان الموضوع هل المال اهم ام العلم؟ الهادي كان من انصار العلم والسيد مختار عباس يعتبر أن المال أهم من العلم، فقال الهادي للسيد مختار: افرض عندك فلوس واولادك ساقطين تعمل شنو؟ مختار قال ليهو اعمل جامعة واقريهم فيها وبعد أولادي ما يتخرجوا اقفلها أو اسفرهم للخارج يقروا بالقروش- في هذا الأثناء جاء وفد للفاتحة وما شاء الله قام اولاد عبادي كلهم باجسامهم الفارعة - حفظهم الله ورعاهم وكفاهم شر العين- وهنا قال الهادي للسيد مختار- هسع كان ما العلم اولاد عم أحمد عبادي ديل ما كان بقوا رباطين، الترماج ما يخلوه يصل محطة مكي ولا السوق وكان قلعوا بكارة الترماج.
7- مرة شتم ليه شخص لي واحد صديقه، قام صديقه قال ليه الزول الشتمتو ده خالي يا الهادي، وبدون ان ترمش له عين قال لصديقه: شنو المشكلة يعني ابو لهب ما كان عم النبي صلى الله عليه وسلم.
8- ايام حل الحزب الشيوعي الطلاب عملوا مظاهرات شديدة.. وشارك الاخ الهادي في هذه المظاهرات والهتافات كانت سخنة (قرار الحل قرار فاشستي) و (داون داون يو اس ايه) وكان قائد قوات الأمن وقتها الضابط بدر الدين ابو رفاس، قبضو الطلبة والهادي زعل لمن العسكري ما قبضوا.. فجاء يهتف أمام ابو رفاس فرفض اعتقاله وقال ليه ( والله لو بقيت لينين ما حنقبضك).
9- لقى شاب أنيق في بيت عرس واقف وسط اثنين شينين جداً قال ليه (يا صديقي مالك واقف بين يافطتين).
| |
|
|
|
|
|
|
|
|
|
Re: الذكرى (135) لتأسيس أمدرمان (Re: هاشم محمد الحسن عبدالله)
|
والشخصية الظريفة الثانية ( ودنفاش)
موسى ودنفاش
الكثيرين فى انحاء السودان يعتقدون ان موسى ود نفاش شخصيه خرافية لاوجود لها فى السودان وتنسب لها الكثير من النكات والتعليقات الساخره ولهذه الاسباب نؤد ان نتعرف على هذه الشخصية الامدرمانيه المرحه... هو موسى ناصر عبدالكريم الشهير بموسى ود نفاش نشا وترعرع بشارع الدومه بحى ودنوباوى الشهير( هذا الحى سمى على اسم الامير المهداوى المقدام محمد ود ودنوباوى أحد أمراء الثوره المهديه وهو من قتل غردون باشا ) وقد ارتبط ود نفاش بخفة الدم واطلاق النكات والتعليقات الساخره وسرعة البديهه وتلطيف الاجواء الاجتماعيه فى المناسبات الامدرمانيه وكان محل احترام وتقدير من جميع سكان امدرمان، كان نحيل الجسم اسود اللون مقربا من السيد/ عبدالرحمن المهدى .. ومن طرائفه كان قديما من يتبول فى الطريق العام فى امدرمان يغرم ولايخرج من السجن الابعد ان يدفع الغرامه !!
فى احدى المرات كان ودنفاش يتبول فى الشارع العام ولم يشعر والا العسكرى راكب حصانه ويقف خلفه فلم يلتفت اليه ودنفاش وتقدم عدة خطوات وواصل تبوله فامسك به العسكرى لياخزه الى المخفر فتجمع الناس متفرجين وهنا صاح ودنفاش مخاطبا الناس انه لم يفعلها هنا الا بعد مشاهدته للعسكرى ده ايضا يتبول هنا فانكر العسكرى انه فعل ذلك فقال ودنفاش ياناس فى زول بيتبول فى مكانين مختلفين فى وقت واحد ( اشار ودنفاش للمكان الذى كان يتبول هو نفسه فيه من شويه ) !! فتركه العسكرى وانصرف .
يقال ان ود نفاش كان مره بيدخن فى سيجاره خضراء لزوم الكيف ولم يحس بحوافر حصان العسكرى خلفه وقبضه متلبسا فقال للعسكرى ياها دي السيجاره بس قولى انت حصانك ده ملبسه فى رجلينه ربل !!
هريدى صاحب محلات هريدى الشهيره للاقمشه بسوق امدرمان كان يمتلك حمار ضخم يضرب به المثل كان يقال ده حمار هريدى مابشيله ، طلب هريدى من ودنفاش ان يسوق الحمار لبحر ابوروف ليغسله .. ود نفاش ماصدق ساق الحمارللبحر وغسله واشترى كرتله ( نوع من اليانصيب ) وطلع الحمار فى الكرتله وقال للناس هريدى اشترى عربيه وادانى الحمار هديه وتسابق ناس امدرمان فى كسب اليانصيب الكل متمنيا الفوز بالحمار‘ وبعد فتره الناس سالو ودنفاش منو الكسب الحمار قاليهم كسبه هريدى فذهب الناس لهريدى مهنئين له فوزه بالحمار ففهم هريدى المقلب وضحك وعرف ان ود ناس ركب الناس ماسوره. سمع ود نفاش ان السيد عبدالحمن المهدى قد تبرع للصليب الاحمر ب500 ج فوقف ودنفاش عارى الصدر باسطا يديه امام قبة المهدى فى شكل صليب فخرج المهدى فناداه ودنفاش ياسيدى الصليب الاسود ده عاوز ليه 5 ج فقط ( كان موسى ود نفاش اسود اللون نحيل الجسم ) . توفى ود نفاش فى نهاية الثمانيات ففقدت امدرمان برحيله احد ظرفائها الذين تمتعو بروح الدعابه والمرح ..
اللهم ارحمه وتقبله مع الشهداء والصديقيين
| |
|
|
|
|
|
|
|
|
|
Re: الذكرى (135) لتأسيس أمدرمان (Re: هاشم محمد الحسن عبدالله)
|
كتب يوسف بدري
و نحن صغار في الاوليه كنا نحكي القصص و النكت علي ودنفاش و كنا نظن انها شخصيه خرافيه . الي ان شاهدته بلحمه و دمه و هو يعمل في المحطه الوسطي في امدرمان و في بار ليمينيوس اليوناني الملاصق لقهوة شديد من الجهه الشماليه و اسمه الاصلي موسي ناصر و يسكن فريق الدومه في ود نوباوي و هو جار لاشهر ظرفاء امدرمان كمال سينه الذي تأثر في صباه بود نفاش .
و بما ان موسي هو خال اصدقائنا و جيراننا محمد و عبدالرحمن احفاد الشيخ دفع الله صاحب القبه المشهوره في وسط امدرمان . و السيد عبدالرحمن كان يستدعي موسي و يساله عن حال امدرمان و البلد و ماذا يقول الناس . و لقد قال للسيد عبدالرحمن مره ( الناس يا سيدي قالوا انته خليت درب ابوك ، ابوك كان بياكل القرض و متكرب بالبرش انته يا سيدي بقيت ساكن في صرايه و تشرب المويه البارده و راكب رولزرويز ) . و السيد عبدالرحمن لم يكن يغضب و يقول له ( قول للناس يا موسي الزمن اتغير، انا كان اتكربت بي البرش حسه ما في زول بسمع كلامي )
كل امدرمان كانت تحب و ترحب بود نفاش . عمنا هريدي كان صاحب الدكان في الركن الشمالي الغربي لجامع امدرمان العتيق و هو من اشهر تجار امدرمان و كان قديما يجالسه الاستاذ احمد محمد صالح الشاعر . و عندما صار عضو في مجلس السياده و هذا بمثابة رئيس الدوله منعته مراسيم القصر من الجلوس امام دكان هريدي . و كان يطلب من السائق ان ياخذ تخريمه كبيره و هو في طريقه الي القصر مارا امام دكان هريدي و يطلب من السائق ان يهدئ السرعه او يتوقف قليلا . و ينظر متحسرا الي المجلس و يقول ( نعمل شنو ، ما منعونا ) .
هنالك مثل سوداني ، فعندما تريد ان تتكلم عن ضخامة شئ فيقال ( ده و الله حمار هريدي ما يشيلو ). و كان للعم هريدي حمار ضخم بشكل غير اعتيادي . و اقنع ود نفاش عندما كان صغيرا العم هريدي بان ياخذ الحمار الي ابروف للاستحمام . و الحمير وقتها تزود بسرج جميله و لجام و فروه مرعد و تؤخذ الي الحلاقين مثل اعمامنا اولاد ايوب و العم عبدالعزيز والد سيد عبدالعزيز شاعر الحقيبه . و اشتري ود نفاش كرتله (نوع من اليانصيب ) و طلع الحمار في الكرتله و بعد مده اتي البعض لتهنئة العم هريدي فعندما سؤل ود نفاش عن نتيجة الكرتله قال لهم ( عم هريدي كسب الكرتله ) .العم هريدي كان كذلك متذوقا للنكته و يحب القفشات . و قبل العيد و في يوم الوقفه كان الناس يعرضون البضاعه في الترابيز الضخمه امام المتاجر . فنصب احد معارف العم هريدي تربيزه امام متجره و كان يبيع شباطة طهران و هي شباطه مخلوفه من المطاط ، كانت في رجل اغلب الناس في بداية الخمسينات حتي النساء . فاتي رجل عجوز و بدأ في تقليب الشباطه و صاحب الشباطه بعيد و كرر عملية التقليب لمده طويله . فساله عم هريدي عن طلبه . و عرف انه يريد شبط لحفيده و عندما سؤل عن مقاس حفيده لم يعرف و لم يعرف سنه بالظبط . بل قال (في المدرسه هو بقرا جزء عم ) فقال العم هريدي ( اها الشباطه دي كلها من قد سمع و لي فوق ! ) .
في احدي المرات عندما خرج السيد عبدالرحمن من القبه بالسياره كان موسي ود نفاش يقف عاري الصدر باسطا يديه . فنزل له العم باب الله الملازم للسيد عبدالرحمن و بالاستفسار قال ود نفاش ( قالوا سيدي اتبرع للصليب الاحمر بي 500 جنيه ، الصليب الاسود ده عاوز ليه 5 جنيه بس !! ) .
ود نفاش اشترك مع صديق و اشتروا كومر من النقل الميكانيكي ملجن بي 170 جنيه و قاموا باصلاحه و الحقوه بدائرة المهدي و بعد دفع البنزين و اجرة السواق يتبقي لهم مبلغ يقارب الجنيه يكفي لمصاريفهم . و لكن عندما استلم السيد الصديق مسئولية الدائره تخلص من كل السيارات المستأجره . فذهب ود نفاش و صديقه للباخره الطاهره التي كانت ترسو جنوب الصهريج و شاهد السيد عبدالرحمن نازلا السلم حافيا و في صحبته خواجه الماني . و قال السيد عبدالرحمن لود نفاش ( يا موسي يا ولدي ده يوم جميل جدا ، الخواجه ده اسلم علي ايدي ) ، فقال ود نفاش ( مافي فايده يا سيدي ، انته الليله دخلته واحد الاسلام و السيد الصديق مرق اثنين !! ) .]
شقيقي يوسف بدري كان متشددا في تدينه منذ صغره و قبل ان يبلغ الثامنه عشر كانت له لحيه كثه و قال له ود نفاش مره في بيتنا ( يا يوسف يا ولدي الدقن دي شنو ؟ ) فرد يوسف بحده ( رجاله ) فضحك ود نفاش و قال ( يا يوسف يا ولدي الصوف ده كان فيهو رجاله كان بقوم في ...؟) . و صار هذا مثلا امدرمانيا مرادفا للمثل الاخر ( الشعر كان عزيز ما بقوم في ...) .و هذا ما يردده اهل الصلع .
سمعت من عمي محمد بدري و الذي هو صديق لود نفاش ان والدة موسي جرته للسيد عبدالرحمن عندما كان صغيرا لكي يعطيه الفاتحه لكي يوقف جنه و شيطنته . و عندما ذكرت الوالده انه يدخن السيجاره الخضراء صفعه السيد عبدالرحمن و اطار سنه فطلب من العم باب الله ان يعطيه خمس جنيهات . و عندما قبض موسي الخمس جنيهات ادار وجهه قائلا ( واحده تانيه بي جاي يا سيدي ) . فضحك السيد عبدالرحمن بشده و قال ( الله ينعلك يا مطموس )
قديما في امدرمان كان من يتبول او يتبرز في الطريق يؤخذ الي التمنه او الظبطيه و يغرم ريال و تلك كانت سياسة برمبل الذي استمرت حتي بعد خروج الانجليز و هنالك قصة القروي الذي حضر لامدرمان و اكل ربيت بقرش و عندما قضي حاجته اعتقله البوليس وبعد رجوعه لاهله سالوه امدرمان كيف فرد ( و الله كويسه بس تاكل بي قرش و ....بريال !! )
و بينما ود نفاش يتبول احس بشرطي يقف خلفه فانتقل بضعة امتار و واصل و عندما طلب منه الشرطي ان يتبعه الي المركز قا ل ود نفاش امام الناس الذين تجمعوا ( انا بلته لاني شفته البوليس قاعد يبول ، اهو ده بولو اهو ) ، و عندما انكر البوليس قال ود نفاش ( اها يا جماعه في زول ببول في محلتين ؟ ) فاسقط في يد البوليس و ترك ود نفاش في حاله
في سنة 1960 حضرت محاكمه لود نفاش في مجلس القضاة الاوسط جنوب المجلس البلدي و مجلس القضاة يتكون من قضاة في الدرجه الثالثه من اعيان امدرمان منهم عمنا عبدالرحيم محمد خير صاحب مصنع الريحه و عمنا الصايغ و اخرين . ود نفاش كان قد قبض عليه و هو يدخن سيجاره . و اذكر القاضي و هو يقول له ( ما حتخلي شراب الدخانه ؟ ) ، فرد موسي ( اي حاخليها ، هي ذاتها بقت تعمل لي ضربة قلب ، الا يكون عندي قلبين واحد للدخانه بس ) . و ضحك الجميع و حكم علي ود موسي ب150 قرش غرامه ، تدافع البعض لدفعها .
موسي كان يدخن بطريقه مميزه و هو عادة يضع السيجاره خلف ظهره و يتمشي ثم يشفط نفس . السواري الذي قبض علي موسي من المؤكد لم يكن من ابناء امدرمان . و موسي لم يسمع حوافر الحصان و عندما قال السواري ( جيب السيجاره دي يا زول ) ، قال موسي ( اتفضل بس قول لي انته حصانك ده ملبسه ربر ؟ ) .
في حوادث ودنوباوي 1970 و القتل و الرصاص كان شقيقي بابكر بدري مع عبدالرحمن ود الشيخ في ودنوباوي بدافع الفضول و عندما لعلع الرصاص هربوا و احتموا بمنزل خاله ود نفاش في ودنوباوي و عندما تاخر ود نفاش بدات النساء في العويل والبكاء و صار المنزل في حالة مأتم و في المساء حضر ود نفاش و لم يكن داريا بالحاصل فلقد كان في حالة مقيل مع بعض الاصحاب في ابروف . فزجر النسوه و طلب منهم ان يكفوا عن البكاء فقالوا ( هي ما كنا قايلين قتلوك في الحرابه ) فقال ( يكتلوني في حرابه ليه انا ود النجومي !! )
(منقول)
| |
|
|
|
|
|
|
|
|
|
Re: الذكرى (135) لتأسيس أمدرمان (Re: هاشم محمد الحسن عبدالله)
|
حواء الطقطاقة ::ـــــ،،،،،،
تعد رمزاً من رموز بلادنا الفنية والغنائية بل والنضالية، فقد جاهدت ضد المستعمرالإنجليزي البغيض ولا تزال وصمة الشرف التي وصمها لها المستعمر تجسِّد وتحكي عن ذلك، كما تجسّد ملحمتها الوطنية وولاءها القومي وعزة وطنها.. العلم السوداني بألوانه القديمة يرفرف عالياً خفاقاً على مدخل منزلها بأم درمان بحي الضباط .. وتعتبرالأم الروحية للفن السوداني، فهي حلقة وصل ما بين زمن ماضي وزمن حاضر وزمن مستقبل، كما تعتبر إرثاً أصيلاً لتاريخ الفن السوداني الأصيل وما زالت تواصل مسيرتها العطائية الفنية بنفس الحماس والنشاط في كل المحافل والأنشطة الفنانة المناضلة حواء الطقطاقة.
اسمها حواء جاه الرسول محمد حمد من مواليد الرهد ابو دكنة ولاية شمال كردفان، والدها جاه الرسول من العركيين ووالدتها آمنة حسين من الجوامعة. سميت بحواء الطقطاقة نسبة لكثرت وجود شجرة النخيل (البلح) التي تصدر صوت الطقطقة ولكثرة مشاركاتها في المظاهرات قال لها المفتش الإنجليزي ( إنت محل ما نمشي نلقاك في الخرطوم وبحري وام درمان انت عاملة زي الشجرة الطقطاقة ومن هنا صار الاسم ) بدأت الغناء وهي طفلة صغيرة جاءت من الرهد لام درمان مع الدكتور بابكر بشير من أولاد بيت المال وسكنت مع زوجته فاطمة حسين من بنات ود نوباوي وبقيت تغني في الحفلات وعمرها كان «14» سنة بدأت بأغاني مع بنات الحلة في الحفلات وأغاني رقيص العروس ذي: (اللول لولك يا العروس)، و(من فريع البان)، و(العديل والزين)، و(الشيخ سيرو)، و(المقدرة)، و(يا عيني يا عيني سمحة المقدرة يا عروسنا عروس الهنا)، و(يا عيني حلاة البنية مهرة دنقلا المسافة ثابت، دسا لي أكتافا يحيى لي عريسنا الشافا)، و(الكابي ديسا العروس العجبت عريسا)، و(يا عروسنا الغزلية عينك ساحرة وفنية سنك فضة طليانية شلخك جدول المالية)، و(المهندس رسم البنا والدكتور نسيب ستنا سد مالها مية مدبسة).. والمية المدبَّسة دي أغلى مهر في الزمن داك لأن السيد عبد الرحمن كان يعقد لي بنات الأنصار بي (12) قرش ونص. الفنان ابراهيم الكاشف ساعدها ووجههافي بداية مسيرتها الفنية وكان الأب المربي لها ولأي فنانة من جيلها.
سافرت إلى مدينة عطبرة مع الدكتور أبو بكر واشتغلت في شركة سويرس تخيّط زراير البدل بأجر ثتمانية قروش وكان معاها الفنان حسن خليفة العطبراوي، وهناك حصل إضراب العمال وقامت مظاهرة طلعت تهتف فيها وتقول: «يسقط الاستعمار» وكانت أول مظاهرة تشارك فيها البطلة حواء الطقطاقة واعتقلوها ونفوها الي بربر والفنان العطبراوي نفوه للدامر وسجنوها ستة شهور بعدها رجعت ام درمان. أيضاً شاركت في مظاهرات في الخرطوم مع العازة زوجة البطل علي عبد اللطيف وخالدة زاهر أول طبيبة سودانية والأزهري ومبارك زروق وإبراهيم المفتي.. خرجت للمظاهرة وهي تهتف :«يسقط الاستعمار يسقط الحاكم العام لا حاكم عام على السودان».. فأصابها القائد العام للجيش الإنجليزي اسمه مستر دروين وهو يقول لها: «الحاكم العام دا سيدك».. ردت عليه: «لا سيدك إنت ويسد عقابك<< مسك البندقية كسر ليها أسنانها وأصيبت برصاصة واحدة في الرقبة وأخرى برجلها.
شاركت في معركة الانجليز والسوادان في كسلا سافرت من أم درمان مع الفنانة عائشة الفلاتية ومن الضباط طلعت فريد ومحمد البحاري وحسن الزين وإبراهيم سميحة وعوض عبد الرحمن صغيرون وحسن بشير نصر والفنان حسن عطية وغنت حواء الطقطاقة (غني ليهم يا حوة ديل الاظهرو القوة ساعة السلاح دوى عدوهم خاف واتحوى). وغنينا ليهم «السوداني الغيور ما يقبل الذلة والراجل بموت بي حمى أو علة سمح الزول يموت بين قنبلة وجلة».. وأغنية «الراديو يا الضربو جاب خبرهم قال ما جروا وحات روحي العدو استلموا».. وقلت: «في بيوتنا ونوادينا في قرانا وبوادينا أثبت لي يا جندينا أمّن لي وادينا».
قبل يوم الاستقلال سألت عن ألوان العلم قالوا ليها: اللون الأخضر يرمز للزراعة والأصفر للصحراء والكحلي للنيل مشت اشترت القماش وفصلتو توب ومشيت شارع ولبست التوب وهي تهتف (حررت الناس يا اسماعيل.. الكل بقى سيد يا اسماعيل.. ولا تعريفة ولا مليم عاش الشعب مع اسماعيل.. وابوكم مين اسماعيل).
غنت للزعيم الراحل إسماعيل الأزهري:-
يا زعيم الوطن حارقة القلوب نارك..
عظماء الرجال حين يسمعوا أخبارك..
بدموع الحزن بكوك لأفكارك..
لأنك غيور للضعفاء تتدارك..
والوطن إتحرم من درة أفكارك.
كرمها الرئيس المشير عمر حسن أحمد البشير بـوسام الجمهورية
| |
|
|
|
|
|
|
| |
هاشم محمد الحسن عبدالله
فيس بوك
تويتر
انستقرام
يوتيوب
بنتيريست