كتب الكاتب الفاتح جبرا المتوفرة بمعرض الدوحة
|
الإنتخابات ودافوري ميدان الربيع
|
عندما فتحت الباب بعد الرابعة عصرا وأنا أتساءل عن من ياتري الزائر في هذا النهار الساخن أستقبلتني وجوه باسمة ومرهقة وخطوط من العرق تجري علي الوجوه والأيادي. لم يبتدروا حيرتي بأي حرف من كلمات التحايا و الأعتذار و بصوت واحد ( لا ياحاج نحن ماقعدين نحن جايين بخصوص الأنتخابات). لم أستطع أن أرد عليهم بنفس السرعة والحماس هذه الوجوه المتحمسة المبللة بالعرق في هذا النهار الساخن جعلتني أعيش هذه اللحظة في زمن آخر أري فيهم أولاد عيساوي في زمن مضي وهم يدفرون الباب بلا سلام (لا يا حاجة نحن ما قاعدين نحن ماشيين الدافوري). وأي دافوري............? إنه دافوري ميدان الربيع. كنا نؤمن بانه ليس أحسن دافوري في أمدرمان بل هو الأقضل في السودان كنا نشعر بالفخر باللعب فيه وإننا جزء من تاريخ الكورة في البلد.كنا نسمع الحكاوي ونضيف إليها من خيالاتنا الطفولية الساذجة.نقسم بأغلظ الأيمان إن برعي وصديق منزول وعمر عثمان وجكسا وأولاد العاتي والدحيش ، إتعلموا الكورة هنا وكيف إنه الطاهر حسيب وأولاد سانتو بيجوا يقضوا إجازاتهم في العباسية عشان يلعبوا في دافوري مبدان الربيع. حقيقة لم يكن الدافوري في ميدان الربيع نفسه بل في مستطيلة شرق الميدان تحدها البوستة جنوبا ودكان حمدان الجزار شمالا. حقيقة كان الدافوري ليس كورة و بس بل ملتقي لأهل العباسية حيث تجد ركن ناس الكورة عمك الوسيلة وحاج بهوية يتاابعون المواهب ويتنافسون في تسجيلها وفي غربها ركن الفنانيين من عمك عبدالدافع وشلة دارفلاح يحكون عن جمل الأغاني.في ركن آخر تقف شلة الضحك شلاضيموا وكاك يرمون تعليقاتهم لتصبح نكاتا تنتشر في أمسيات أمدرمان. وبنهاية الدافوري يتفرتق الجميع تملؤهم الفرحة كنا الصغار نتجه للبوش عند عم سعيد وبعدين الباسطة عند علي الحلواني ما الكبار فعادة يتحركوا لقهوة يوسف الفكي وبعدها مجاملين أهل أمدرمان في أفراحهم أو متعشين في حديقة الموردة.
|
|
|
|
|
|
|
|
Re: الإنتخابات ودافوري ميدان الربيع (Re: Magdi Is'hag)
|
في ذات مساء قام أولاد الموية بتحويش الميدان.فوجئنا في الصباح بالميدان المسوّر وطلع علبنا أولاد الموية التلاتة وقالوا لينا من الليلة الميدان حقنا والدافوري حقنا والماعاجبو يقع في البحر. اليوم داك كان يوم شوّم فلا الدافوري بقي دافوري و لالاالعباسية بقت عباسية. (الميدان شلناهو رجالة والما عاجبوا يورينا رجالته) كلنا قايلنها نكتة لاننا كنا مستهوينين بي أولاد الموية وأي واحد فينا كان ممكن يفرمهم براهوا.لكن عرفنا إنها ما نكته لمن لقينا التوم الشفت وشلته واقفين معاهم. التوم كان معروف ما بيمشي إلا وشايل معاهوا جنزير و مطوة وأي كلمة ما بتعجبوا معروف يده أسرع من لسانو.معظم حياتو يا في شكلة أو بيخطط لي شكلة.شلة التوم فايدة الوحيدة كانوا بيعزموهم في الأعراس وتربيزتهم ما بيقرب ليها وعشاهم أهم من عشا الفنانين وعليهم حفظ النظام ولكن مرات كايرة يكونوا هم السبب في فرتيق الحفلة. طوالي عرفنا إنوا أولاد الموية كسبوا شلة التوم بعد عملوا ليهم دفتر جرورة مفتوح مع عائشة ووكر والحساب علي أولاد الموية. وما في زول بيقدر علي التوم و شلتو وعلي مضض قبلنا إنوا بقي بتاع أولاد الموية. أولاد الموية كنا قايلين إسمهم جاء من بتهم كان فيهو بير قبل زمن المواسير وجدهم كان بيبيع الموية لكن حاجة التومة قالت بينا يوم (يا أولادي نحن بيع الموية كنا شايفنوا عيب لكن التسمية جات عشان إتعرفوا بالزوغان والأستهبال وما في زول بيصدقهم والغريبة كلهم طلعوا علي الطبع ده ومافيهم واحد عََدِل). الكبائر في العباسية كانت تلاتة شرب البنقو وسب الدين ومشاغلة بنات الحلة .أولاد الموية ما كان معروف عنهم إنهم بيعملوا أي واحدة من الكبائر بل كانوا مواظبين علي صلاة الجمعة في جامع مرفعين الفقرا ولكن لمن تلاقيهم في الدافوري الواحد يحلف بالكضب زي الما حصل حاجة(والله ما قون)( والله ما فاول). حسان مرة لمن وصل بيهو القرف حدوا قال لي أولاد الموية والله شراب البنقو أحسن من عمايلكم دي. من اليوم داك أولاد الموية بقوا الكل في الكل. ليهم حق العزلة وهم البيحددوا من البيلعب ومنوا الممنوع من الدافوري. في أيام الصورة بقت واضحة فريق اولاد الموية وأصحابهم وباقي اولاد العباسية في الفريق التاني.كنا معروفين بفريق العمايا لانوا أولاد حوش العمايا هم الأكثر لكن كان معانا أولاد فنقر ,حي ريد,حي الزريبة,حي الأمراء وأولاد الخور. رغم إننا كنا الأكثر و الأحرف لكن كنا مغلوبين طوالي والمشكلة كنا عارفين بنتغلب ليه ولكن مصرين علي الملطشة والفضايح.
| |
|
|
|
|
|
|
Re: الإنتخابات ودافوري ميدان الربيع (Re: Dr Abdelazim Abdelrahman)
|
حكاية الدافوري هي حكاية بلدنا الذي تعرض للنهب والسرقة..تمامآ مثلما حدث لميدان الدافوري بالعباسية ...
بيان رقم واحد :
Quote: ذات مساء قام أولاد الموية بتحويش الميدان.فوجئنا في الصباح بالميدان المسوّر وطلع علبنا أولاد الموية التلاتة وقالوا لينا من الليلة الميدان حقنا والدافوري حقنا والماعاجبو يقع في البحر. اليوم داك كان يوم شوّم فلا الدافوري بقي دافوري و لالاالعباسية بقت عباسية. |
هل هولاء الرجال جبهة ولا ما جبهة..ضيعنا لحظات ثمينة في بداية الكارثة حتي تمكن الغول :
Quote: كلنا قايلنها نكتة لاننا كنا مستهوينين بي أولاد الموية وأي واحد فينا كان ممكن يفرمهم براهوا.لكن عرفنا إنها ما نكته لمن لقينا التوم الشفت وشلته واقفين معاهم. التوم كان معروف ما بيمشي إلا وشايل معاهوا جنزير و مطوة وأي كلمة ما بتعجبوا معروف يده أسرع من لسانو.معظم حياتو يا في شكلة أو بيخطط لي شكلة.شلة التوم فايدة الوحيدة كانوا بيعزموهم في الأعراس وتربيزتهم ما بيقرب ليها وعشاهم أهم من عشا الفنانين وعليهم حفظ النظام ولكن مرات كايرة يكونوا هم السبب في فرتيق الحفلة. |
وبدينا في تجارة الدين وغيرها من أنواع التجارة :
Quote: الكبائر في العباسية كانت تلاتة شرب البنقو وسب الدين ومشاغلة بنات الحلة .أولاد الموية ما كان معروف عنهم إنهم بيعملوا أي واحدة من الكبائر بل كانوا مواظبين علي صلاة الجمعة في جامع مرفعين الفقرا ولكن لمن تلاقيهم في الدافوري الواحد يحلف بالكضب زي الما حصل حاجة(والله ما قون)( والله ما فاول). |
فعلآ الدافوري حيكون بعد دا خشن جدآ ببوت الجيش والأمن والمليشيات الاخري :
Quote: الناس كانت متفقة إنوا الدافوري الناس تلبس باتا أو حفيانين ولكن اليوم داك جاء الكارضقل لابس بوت بتاع جيش وحسن الشين لابس كدارة وعادة ما كانت عاوزة نقاش عشان ما يعوقوا ليهم زول كان لازم يقلعوا مصايبهم عشان يسمحوا ليهم باللعب.ولانهم لاعبين مع اولاد الموية الحكم أول مرة في تاريخ الدافوري يسمح ليهم قال شنو ?قال عشان عندهم حساسية في كرعينهم و الغريبة الحساسية والظرف الخاص عمره ما إتغير وبقي جزء من مصائبنا إنو باكات أولاد الموية دايما لابسين كدارتهم وبوت الجيش. |
مجدي الرجاء أن تواصل في هذا الحكي الممتع.. عشان نشوف آخرتها وين
| |
|
|
|
|
|
|
Re: الإنتخابات ودافوري ميدان الربيع (Re: Magdi Is'hag)
|
د. مجدي..
حيّاك الله:
سرد مدهش. حكي ممتع. رؤية للعالم ثاقبة. كقاريء، وحتى من غير وضع الاعتبار للعنوان هنا، أخذت أثناء القراءة تتكون لدي حكايات أخرى متوارية خلف هذا الحضور الكثيف لأولاد الموية وفرقة الدافوري، إنها لعبة المجاز وغواية الإيحاء. ولو جاز لي أن أطلق العنان لخيال الأمنيات هنا، لرجوتُ أن يفقد الطب أديبا ويكسب الأدب طبيبا. كن بألف خير.
| |
|
|
|
|
|
|
Re: الإنتخابات ودافوري ميدان الربيع (Re: عبد الحميد البرنس)
|
لعزيز البرنس في بدايات الزمن الملامحو معكرة كنا في شالا وكنت أظنه شيطان الشعر قد زارني فحملت كلماتي علي إستحياء للعزيز عدنان زاهر ولم أستوعب المقلب عندما قال لي إنها قصيدة فيها شئ مختلف وظننت الإختلاف يعني إبداعا فحملتها الي خالد الكدـفلم يزد إن قال (ما تخلي زول تاني يشوفها...... يامجدي حرام عليك ما كفاية علينا السجن والسخانة كمان داير تبقي فيها شاعر...... أرحمنا عليك الله). لم أتعظ من الدرس وبعد زمن قريتها للصديق بكري جابر ورده كان نهاية محاولاتي الشعرية (والله يامجدي الكيزان ديل وسجلهم في التعذيب ما شوية ما هين ما تزيدـ عليها بأنهم كمان خلقوا منك شاعر) زي ماشايف راسي خفيف وبصدق بسرعة وبكرة أزيد من سجل الإنقاذ الأسود في تعذيب الشعب السوداني وأقوم أنشر ليكم رواية البرنس شكرا علي حروفك الرقيقة فهي إنعكاس لمعدنك لكن مقلب عدنان مابقع فيهو تاني ولك الود
| |
|
|
|
|
|
|
|