|
|
 ود قاسم عضو الرياض وود قاسم عضو الخرطوم ظاهرة محيرة !!
|
بتكلم عن ود قاسم النك نيم ..ود قاسم إسم المستخدم بعيداً عن الشخصية وفي رأيي (الكالعادة متواضع) ظاهرة ود قاسم إستوقفتني كتيير جداً خالص أوي!!
ظاهرة حمالة أوجه اتعودنا عليها وكلللنا عارفنها و غالباً إتفتح ليها زي جغلومية بوست (لا بأس أن يصبح العدد جغلومية و واحد).
إسم ود قاسم عضو المنبر فرع الرياض كان إسم ليهو شنننة ورنننة بي صورة ملفتة للأنظار يكتب ود قاسم البوست و انا متأكد بيكون لسة بيعمل في (معاينة قبل النشر) وعد الردود والمداخلات بيكون وصل لي 24 مداخلة ليس من بينها رد لي ود قاسم (يعني ده صافي الردود)..
المداخلات ال 24 وقتها كان بيكون فيها 23 مداخلة من بورداب الرياض ..
بعد ساعتين بس بيكون البوست عمل ليهو أكتر من صفحتين .. وفي الغالب البوست بيكون اخد جوانب مختلفة ما بين الضحك والجد السياسة والاجتماع الشكلة والونسة ..
الكلام ده ما كان حصري على بوستات بعينها أو ذات لونية محددة لالالالا كانت في الغالب على كلللللل بوستات ود قاسم ..وإن كان ود قاسم بيكتب بي صورة ممتازة لكن كان في كتير من الاحيان في بوستات بتكون أكتر من عادية ومع كل ده بتلاقي عدد المداخلات وصلت لي 70 مداخلة في وقت وجيز ..
ود قاسم قرر العودة الطوعية للسودان في قرار شجاع ..
وصل ود قاسم السودان وكعادة كل الرجعين سواء للاستقرار أو زيارات بمقابلة اعضاء الخرطوم سواء في إحتفالية أو في تجمعات او قضاء وقدر أو بفعل فاعل..
وفي أول بوست بعد العودة لسة ناس الرياض كانوا محافظين على ود المداخلات من شاكلة ليك وحشة وفقدناك فكان أن وصلت بوستات ود قاسم عضو الخرطوم في الايام الأولى لي نسبة مشابهة لي نسبة ود قاسم عضو الرياض..وحاول بورداب الخرطوم إستلام ود قاسم فاكتسبت ردوده زوار جدد من الخرطوم ..
رويداً رويداً (ده مصطلح شفيتو من مدربنا كان بيقول لي ياااا عمر العب الكورة رويداً رويداً ) انقلبت الاية ..
ود قاسم بورداي الخرطوم وبكل صرااااحة يكتب مواضيع جميييلة جداً جداً هااادفة للحد البعيد (وإن كان مقل منها) إلا إنو كللللللللل مواضيعو دي تمشي الهوينة اختفت ردود بورداب الرياض تمااااااماً ..أصبح بوست ود قاسم عدد المتداخلين فيهو 7 بيكون ود قاسم عندو فيها 9 ردود ..والكلام ده في معظم بوستات ود قاسم عضو الخرطوم ..
ود قاسم هو ود قاسم ..البورد هو البورد ..المواضيع تطور ود قاسم كثيراً فيها وبقت أجمل وأجدى من الكان بيكتبها زمان فكان الطبيعي ان يكتسب ود قاسم عضو الخرطوم ود كلللل بورداب الخرطوم مضاف ليهم بورداب الرياض ليكون من المتوقع عدد الردود في بوست ود قاسم في اقل من ساعة 322 رد وكن بقت ود قاسم أجدع زول وأكتر طراوة ويومو حار الماا بندار!!
للأسف الشغلانية واااضحة وكلامي ده بيزعل بورداب الرياض طبعاً لكن يبدو إنو بورداب الرياض كانوا يتجملون !!!
وبورداب الخرطوم مسكتهم خلعة الأيام الأولى ..
وضاعت كتابة ود قاسم ..
أوووكي بتفق مع كل المواضيع اللي كانت بتتكلم عن إنو المنبر شلليات ودي واااضحة لكن كتابة ود قاسم دي بتمثل بورداب منطقة كاااااااااملة !!
كللللللل بورداب الرياض كانوا بيكتبو ليهو ..
كلللللل بورداب الرياض أسة ما بيكتبو ليهو ...
كللللل بورداب الخرطوم أول ما رجع استلموهو وكتبو ليهو ..
كللللللل بورداب الخرطوم حالياً مشغولين مع بوستات السطوح وهجم القط ..
اخوكم حميدة ده والله طلع زول واعي خلاص ..قال ليهو حكمة قبل يومين كده في البوست (المبلووع يا ولدي مبلووع)ريحتني في كنكوجي قال اي زول شكروهو إتنين من سودانيز معناها الزول ده إسكندر إتودر ..
بصراحة الموضوع غير معني بيهو ود قاسم ذات نفسه بقدر ما المعنيين بورداب الرياض وبورداب الخرطوم
تخريمة :
اها كلامي ده لو أيييييييييييي زول حاول يقلبو فوق تحت عشان يجرح نفسو(وملح إصراراً إنو يتجرح يعني) إلا يكون من بورداب الرياض ولا الخرطوم لكن يا بورداب نواكشوط مااااااااا عندكم أيييييييييي طريقة تتجرحو ..
|
|
  
|
|
|
|
|
|
|
|
Re: ود قاسم عضو الرياض وود قاسم عضو الخرطوم ظاهرة محيرة !! (Re: humida)
|
حميدة الحكيم (نظام أخو توفيق الحكيم)..:
يا عمك انجلو بتاع سفنجتك ؟ ياخ قبل فترة كده كان في إسمين ضاربين في الكفر واحد إسمو جبريال منو كده جارسيا ماركيز والتانية حرمة كده إسمها إيزابيل الليندي . اخوك مشى معرض الكتاب جاب ليهو دستة كتب للجماعة ديل أهو ديييييييييك مرمية ليهافييييييي حتتها في إنتظار ان تنتهي كل دوريات العالم في كورة القدم بعد داك نجي نشوف لعبة ثقافة ثقافة دي..
قال انجلو قال !! إنت شكلك متأثر بي كتاب التاريخ بتاع سنة أولى ثانوي لسة ..
ميادة :
تعرفي مرة إستضافوا فنان من لاشرق في سهرة جلسة بي العود مقدم البرنامج سألو وقال ليهو :
رأيك في السلم السباعي ونحن نقدم تجربة السلم الخماسي مما يؤثر على عالمية الاغنية لاسوداينة في ظل إنتشار وتعدد الثقافات والنوتة الموسيقية التي تستقر في وجادن المتلقي ما بين السمفونية والتطريب العالي في زمن نحتاج فيه للعولمة وانتشار الاغنية السودانية ..ر أيك شنو يا أستاذ؟
قال ليهو :
والله بالغوا ..
وترررن ترررن قاعد يعزف في العود وبدا ليهو اغنية ..
لكن أقول ليك حاجة ؟
إتوفقتي في موضوع الشاي ده ..
لكن اعفينا من حركات الكيك المن البقالة وكروسان سفن دييز وتشبكيني معليش والله يا عمر ما كان عندنا خبر بي جييتك ..
| |
|
|
|
|
|
|
|
|
|
Re: ود قاسم عضو الرياض وود قاسم عضو الخرطوم ظاهرة محيرة !! (Re: عمر الفاروق)
|
ياخ ما قالوا ليك سودانيز اون لاين وطن من لا وطن له ما سمعت (الهرجة) دي انت ولا شنو , ياخ انحنا سودانين في النهاية , وحياتنا العادية قايمة علي النظرية دي , سنوات اغترابك وانت حنفولي بتكون مس كولات البلد نازلة فيك مطرة والوصايا والامكنة زاتو ما تديك الدرب , تمشي الاجازة بتكون محل احتفاء طيلة فترة اجازتك وترجع وما في لسانك غير انه السودان اتصلح والحقيقة انه الاتصلحو معاك الناس وشالوك في كفوف الراحة عشان عارفنك راجع , صحبي ادريس البدري عنده حكمة ما لقيت انسب من المكان دا اقولها فيهو , بتكلم معاهو يوم عن انه الواحد ما عمل ليهو حاجة في السودان وسنوات الاغتراب بدات تتكدس والمستقبل وحالنا كيف بعد نرجع البلد واصحابنا ومعارفنا ومعاملتهم معانا بتكون كيف !, ادريس البدري ما اتلفت قال لي يا زول بتقعد ليك قريب عشرين كم وعشرين في البلد دي وتكون فيها عملت ليك بيت كالعادة اوضتين خلف خلاف وصالون وكم شدرة قدام البيت وكرسي ماااهل تقعد فيهو من تصبح , تنتظر الغاشي والماشي يسلم عليك ولو جا زول ما سلم عليك تقرب تشتمو لانك مهيأ وبقيت عبارة عن الة رد سلام , تسمع اولادك تحت تحت يتهامسون الحاج دا نقته بقت كتيرة وبقي زول نضام وبتاع نظريات وتلقي الناس الزمان بحتفلوا بيك حين اجازة كلهم اعتزلوك بيني وبينك ( المغتربين) لمن يرجعوا بيكونوا عبارة عن مكنات نضم ونقتهم نازلة مطر , اها شوية شوية بتلقي رقبتك بقيت سيدنا اباذر واعتقد انه دا الحاصل علي عمك ود قاسم , يا حليلك يا ود قاسم ود الفاروغ بقي ينظر في مستقبلك التفاعلي .
| |
|
|
|
|
|
|
|
|
|
Re: ود قاسم عضو الرياض وود قاسم عضو الخرطوم ظاهرة محيرة !! (Re: اساسي)
|
عمر
سلام
شايف كلام أساسي الأساسي دة ..
بعد نرجع البلد واصحابنا ومعارفنا ومعاملتهم معانا بتكون كيف !, ادريس البدري ما اتلفت قال لي يا زول بتقعد ليك قريب عشرين كم وعشرين في البلد دي وتكون فيها عملت ليك بيت كالعادة اوضتين خلف خلاف وصالون وكم شدرة قدام البيت وكرسي ماااهل تقعد فيهو من تصبح , تنتظر الغاشي والماشي يسلم عليك ولو جا زول ما سلم عليك تقرب تشتمو لانك مهيأ وبقيت عبارة عن الة رد سلام , تسمع اولادك تحت تحت يتهامسون الحاج دا نقته بقت كتيرة وبقي زول نضام وبتاع نظريات وتلقي الناس الزمان بحتفلوا بيك حين اجازة كلهم اعتزلوك بيني وبينك ( المغتربين) لمن يرجعوا بيكونوا عبارة عن مكنات نضم ونقتهم نازلة مطر , اها شوية شوية بتلقي رقبتك بقيت سيدنا اباذر
دة الحصل لعمك ود قاسم و حيحصل لكل واحد يرجع البلد إختياري ولا قسْري.
أما البوستات .. فقد كانت مواضيع ود قاسم أغلبها تصب في السياسة البحتة .. بعكس بوستاته الآن ..
ود قاسم مسجل غياب كبير وسط بورداب الخرطوم.
لم نره في زواج تمبس أو رحلة الكدرو أو حفل رشا ببيت الفنون.
رغم مشغولياته الحزبية و العملية ، كنا نتوقع أن نراه أو نسمع صوته
تحياتنا له و لأفراد أسرته الكريمة و نتمنى له التوفيق.
| Quote: , يا حليلك يا ود قاسم ود الفاروغ بقي ينظر في مستقبلك التفاعلي . |
الله يجازي محنك يا السماني
| |
|
|
|
|
|
|
|
|
|
Re: ود قاسم عضو الرياض وود قاسم عضو الخرطوم ظاهرة محيرة !! (Re: عمر الفاروق)
|
عمر الفاروق
إن شاء الله تبقى طيب
وإن شاء الله بورداب الرياض يبقوا طيبين
لا يمكنني إخفاء سعادتي بما كتبت ، وقد نبهني لهذا البوست صديقي وأخي الأصغر أسامة السباعي ، وهو من أولادي الذين تركتهم خلفي في الرياض ، ومن الذين لا يزالون على برهم بالخال ودقاسم .
تعرف يا عمر أنا مشغول بعض الشئ عن المتابعة لسودانيزأونلاين ، لكني تقريبا - في الفترة الأخيرة - أمرّ يوميا على المنبر إما قارئا أو كاتبا .. ولدي رغبة شديدة في العودة إلى سيرتي الأولى للمنبر ، لكن عدم تداخل الآخرين فعلا يحبطني ، وأنا أعلم تماما أن هناك الكثيرين ممن انضموا إلى المنبر حديثا لا يعرفونني ولا يعرفون مساهماتي في هذا المنبر ، وذلك لغيابي لفترة طويلة حيث كنت أمارس العمل الحر ، وحينها لم أكن أدخل المنبر مطلقا . لكني لم أتوقف عن الكتابة فكنت أمر على صحيفة الأحداث ,اناولهم موضوعا ، ثم أذهب ، وحتى في هذا تعاملت مع إحدى عضوات البورد ، لكنها الآن لا تكتب في البورد ، وهي الأستاذة مزدلفة عثمان .
وكما تحيرك أنت يا عمر ظاهرة ودقاسم ، أيضا تحيرني ظاهرة بورداب الرياض . ولكن ليس في ضعف تداخلهم في ما أكتب ، ولكن في قلة إسهاماتهم بالمنبر ، وهذه ظاهرة اعترت بعضهم منذ فترة وجودي هناك بينهم ، وقد حاولت كثيرا مع بعضهم لدفعهم للكتابة وأنا أثق في أن مساهمات الكثير منهم تجعل المنبر منبرا جاذبا ومفيدا وممتعا ، لكنهم ظلوا يتباعدون ، وهذا ما يحيرني . ولا أعلم سببا لهذا ولست مقتنعا بمسببات الممتنعين . وقد تواصل معي بعض بورداب الرياض على المستوى الشخصي والمستوى الاجتماعي ، وقلبي وداري يظلان مفتوحان لبورداب الرياض وإن طال الزمن ، وإن طال التباعد ..
والمحير أكثر بورداب أوروبا وأمريكا ، وربما بورداب العالم ، فهؤلاء يعرفوننا حق المعرفة ، وظلوا يتداخلون معنا ، لكنهم انقطعوا وكأني بهم يقولون ( ياخ سيبك منّو دا بقى بتاع السودان ).
أما بورداب الخرطوم فقد سعيت في البداية إلى صداقتهم ، لكني - وبصراحة - وجدت من بعضهم ما لا يرضيني ، إذ أنني ولأول مرة أسمع من يصف حديثي بالممجوج ، ويثبتني بقوله ، ياخ الرسالة وصلت .. لكن بعضا منهم ظلوا أصدقاء في منتهى الحلاوة والصدق ، ومنهم من أعانني في عملي .. وقد حضرت عددا من اللقاءات إلا أنني كما ذكرت مشغول ربما أكثر من غيري بارتباطات عديدة تجعل مشاركتي ضعيفة وتجعل غيابي أكثر من حضوري .
وقبل أن أختم هذا الجزء لابد من التعقيب على ما قاله الأخ أبوجهينة . أولا يا صديقي أنا لست غائبا عن قصد ، ويمكنك أن تسأل محمد الشيخ وميادة من الشاهد لعقد زواجهم ؟، وذلك ببساطة لأنهم وجهوا لي الدعوة فكنت حضورا وسط أناس لا أعرفهم ، ذهبت إليهم بنفسي وتعرفت عليهم ووجدتهم يبحثون عتي وينتظرون شهادتي .. وكنت أيضا حضورا في عقد قران ( شروم ) وكثير من بورداب الرياض لا يعرفونه ، وقد ذهبت أيضا لأكون وسط جمع لا يعرفني منهم أحد ، فتعرفت عليهم وأجلسوني بجوار والد العروس حتى انتهت المراسم ، ثم وجّه لي شروم دعوة لحضور الزفاف فكنت وأسرتي حضورا كاملا ، وفاعلا .. وقد سافرت للمشاركة في زواج معتصم ، ولم أحضر الزفاف لأسباب تتعلق بتأخر العريس والعروس ، ولم يكن أمامي إلا أن أستأذن ، وقد زارني معتصم وزوجته في داري ، وسأزور أسرة معتصم في غيابه تأكيدا لامتداد العلاقة ومتانتها . لكن البعض اعتاد أن ( يطنّشنا ) ، ولا يكون أمامنا إلا أن نعتبر هذا الطناش هو التقييم الحقيقي للعلاقة بيننا وبينه ، أي أنه يرى أنها علاقة لا تستحق كثير عناء ، فنحن لسنا أقل من أن توجه إلينا دعوة هاتفية لحضور مراسم عرس أو أن نعرف أن فلانا قد عاد في إجازته السنوية .
عمر الفاروق
سأتردد على البوست ، وسأعيد القراءة ، وسأتداخل حتى وإن لم يتداخل الأخرون .
ولك الشكر أنك تفقدت أحوالنا ، وجعلتنا محل اهتمام .
| |
|
|
|
|
|
|
|
|
|
Re: ود قاسم عضو الرياض وود قاسم عضو الخرطوم ظاهرة محيرة !! (Re: humida)
|
اساسي يا قريبك:
تعرف اجمل سيناريو مع الكرسي العراقي القصيير ومشروط في اليد فووق داك ..
وبي الصباح تشيل كيس جيلاني وتمشي الجزارة تشتري ربع كيلو لحمة وسلطة مشكلة ..
والعجب لو جاك صاحب ولدك وقال ليك نحن يا عمر قاعدين في السعودية ..اووووو تستلمو بي الطريقة الصااح ويا ولدي السعودية دي نحن العملنا التعليم فيها واها ويين انتو لي جسر الملك فهد و و و ..
المنبر ده يا قريبك فيهو حضارات سادت ثم بادت واجيال ورا اجيال مع انو ده ما بيمنع انو في ناس تغيب وتجي ولسة محتفظة بي قوتها المنبرية ..
ياخ اسة ما شوفت سجيمان طار ليهو كيف..هيييييييييه يا حليل سي جي وكللل الجكس يجي يتظارف ليهو ويضحك معاهو اسة بالله لامين ليك فيهو يا عنصري ويا عدو المرأة يا ويا مع انو نفففففففففس السجيمان ..
غايتو يا اساسي امسك في بوست بري ده قوي حتى لو رجعت السودان بيعمل ليك شغل كويس..
| |
|
|
|
|
|
|
|
|
|
Re: ود قاسم عضو الرياض وود قاسم عضو الخرطوم ظاهرة محيرة !! (Re: humida)
|
يا ريس ابو جهينة :
جيتني لي نقطة مهمة وتساؤل انا عايز ليهو إجابة ..
كون إنو ود قاسم اختفى من بورداب الخرطوم هل ده حاجة تأثر في ردود الناس ليهو ؟
يعني اسة لو ود قاسم كان داخل في بورداب الخرطوم لكانت بوستاته تعدت بوستات ناس فلانة وعلانة وفرتكان ..
يبقا دي الحركة الكان بيعملوها بورداب الرياض بيكتبو لي ود قاسم لانو كان معاهم وهم معاهو كل يوم او يومين بيتكلموا مع بعض..
يبقا نحن بنرد ونتداخل بناء على ونسة سابقة وقعدة بنكون نحن عارفين اوول ريدي الحا نكتبو لي بعض فياخ طالما قولناهو في قعدتنا يبقا ماف داعي نجي نعيدو في البورد ..لكن طبعا الناس عشان تقنع روحا بتقوم تقول ليك لالالا عشان الباقين يستفيدو..
يديك العافية يا ريس..
| |
|
|
|
|
|
|
|
|
|
Re: ود قاسم عضو الرياض وود قاسم عضو الخرطوم ظاهرة محيرة !! (Re: عمر الفاروق)
|
ود قاسم :
تحياتي ليك ..
مداخلاتك عايزة فلفلة والوقوف على بعض النقاط فيها ..
وكمان ما بطال تتاح لينا فرصة نعرج على بعض الحاجات اللي انا شايف انها أثرت وبي صورة كبيرة في بوستاتك ..
عن نفسي ما عايز اقول اللي كان بينك وبين بورداب الرياض قشرة نووووووو او بالعكس فانت كانت علاقاتك معاهم متينة وقوية وزي ما تفضلت وصلت للبيوت ..
بس انا في رأيي إنو الناس خلطت ما بين المنبر وبوستاته وبين العلاقات اللي ممكن تكون بقت منفصلة وفي اطار العلاقات ..
عشان كده كانت كل الردود اللي بتجي من الشباب مبنية على اسا ود قاسم اللي نحن معاهو وهو معانا وبالتالي الرد بيكون عبارة عن مجاملة اكتر من انو موافقة او مخالفة لي فكرة مطروحة ..
بعدك من الناس ديل فقدهم حساسية الحاجة دي ..ممكن منهم ناس حاليا بيهاتفوم وبيكالموك لكن ممكن عااادي جدا يقرا ليك بوست ويجليهو عاااااد مع انو زمان كان بيحس انو ده فرض عين وولاء وطاعة لازم يعملا امكن بغرض الصحوبية او بي غرض المشاكسة او او ..
خليني اديها صنة واجيك كان ربنا هوون..
| |
|
|
|
|
|
|
| |
عمر الفاروق
humida
Mayada
اساسي
ابو جهينة
ودقاسم
عمران حسن صالح
فيس بوك
تويتر
انستقرام
يوتيوب
بنتيريست