|
|
|
 Re: لماطة معجونة بموية مساخة معطونة في غتاتة منقوعة في حلة حسادة بصلصة حماقةورظالة على نارشلاقة (Re: منصوري)
|
لايمكن تتبين لك أخلاق الشعب السوداني إلا بعد أن تختلط مع الشعوب الأخري وتعرف مسلماتهم ومعاملتهم..أي سوداني مولود من سنة 1970 ولي تحت يكون دخل في فترة التربية الحسنة وإنو الوالد كان عماد الأسرة وإنو الأم هي ربة سفينة الأسرة وإنو الجيران رجال أمن ساهرة على مراعاة حق الجوار وعين ساهرة على تصرفات الأبناء في حالة وجود أبوهم في العمل..دي تربية سودانية أصيلة مشربين بيها منذ الصغر..
.........
كل الجاليات العربية والآسيوية في الخليج تبهرهم معاملة السودانيين..
الهنود في الخليج يموتو ويحيوا في الوظيفة ويحاربوا عليها الملق والتلصص على الغيروالانكسار من أجل الوظيفة يكاد يكون طابع الجاليات كلها ما عدا السودانيين، تقريباً
| |
 
|
|
|
|
|
|
|
|
Re: لماطة معجونة بموية مساخة معطونة في غتاتة منقوعة في حلة حسادة بصلصة حماقةورظالة على نارشلاقة (Re: منصوري)
|
جي لشرح المفردات في اللهجة السودانية التي وردت في هذا البوست وهذا هو السبب الأساسي في هذا البوست وقلت من ذي قبل أن اللهجة السودانية عميقة ومرات تدي عمق أكثر من اللغة العربية
أخوانا ناس الآداب يقولون ( اللغة وليدة الواقع) أي أنك لاتقدر تمدد لغة أو لهجة بمفردات ما لم يكن عندك واقع تستخدم له هذه الكلمات وواقعنا نحن السودانيين منشر ومبهول لدرجة كبيرة لذلك جاءت لهجتنا طاعمة وعميقة ومعبرة لخلجات القلوب والأفئدة
.............
نجي لشرح الكلمات التي وردت في البوست
لماطة
لماطة تقارب لها في اللغة العربية كلمة( يماري) أو يتنصل عن الحق.. أو بمعنى تاني.. يكابر.أو قليل أدب..أو ما تعرف تمسكو من وين أو يحاجج أو يتهرب بحجج واهية.أو كذب مقرون بتمويه
| |
|
|
|
|
|
|
|
|
|
Re: لماطة معجونة بموية مساخة معطونة في غتاتة منقوعة في حلة حسادة بصلصة حماقةورظالة على نارشلاقة (Re: منصوري)
|
مساخة: الشئ المسيخ يعني غير حلو.. ممكن تقول الشاي ده مسيخ.. أو الشربات دي مسيخة.. اي سكرها ناقص... أي اقرب للحامض من الحلو... وعندنا بلهجة المناصير المحلية نقول( مقق) اي لاهو حلو ولاهو مر.حاجة مسيخة كدة.. وشاعر المديح حاج الماحي.. قال في قصيدته( من عنا ليك وانسرق.. ياام قلة دووب... الحسارك لي حرق) يقول فيها( بي تفلو كم حل المقق) اي الرسول صلى الله عليه وسلم إذا تفل في ماء ملح أجاج يصير حالي.. ومعروفة في السيرة معجزة الرسول عليه السلام في قصة البئر والجيش لمان عطشوا ولم يجدوا ماءا فوجدوا بئرا مالحة للغاية فتفل فيها عليه السلام فصارت عذبة.. فشرب منها الجيش حتى روي.. فحاج الماحي هنا يرمز لهذا البيت..
يقول ليك روحي يا بت يا مسيخة.. هنا مسيخة موش يقصد بها في اللهجة السودانية حلاة البنت بقدر ما يرمز لها لأخلاقها..
( والله مسيخة جنس مساخة)
( يا بت بطلي مساخة)
( بلاش مساخة وقلة أدب)
يعني باردة.. يعني مختلة الصفات الجيدة... يعني مصهينة.. وبني صهيون نفسهم سموهم صهاينة ليه؟ عشان بيصهينوا من الشئ.. برود
ذكرني مرة أنا جاي من الخرطوم وكنت ساكن الثورة الحارة الأولى الدنيا رمضان والناس صايمة وكان هنالك محل بيع تلج قرب العدني في سوق أم درمان.. واحد جاي صايم عطشان .قال ليهو لوح التلج بي كم؟ قال ليهو جنيهين؟ قال ليهو
ماعندك تلج ابرد من ده؟
قال ليهو 0 لا عندي تلج ابرد منك؟)هنا يقصد برود الأخلاق والصفات
| |
|
|
|
|
|
|
|
|
|
Re: لماطة معجونة بموية مساخة معطونة في غتاتة منقوعة في حلة حسادة بصلصة حماقةورظالة على نارشلاقة (Re: ihsan fagiri)
|
Quote: تفك ليهو الدرب
وانجو بي جلدك |
أها يا إحسان إنت جيتيني في اللحم الحي
وهو اللهجة السودانية التي أستهويها وأحبها عندما تقدمين لى كلمة سودانية بحتة كأنك قد قدمت لي وجبة دسمة من كنتاكي والله بيتزا هوط والله من هامبيرجر.. والله كسرة بي ملاح سلج.. والله قراصة بي دمعة لحم خروف أو قراصة مكبوبة عليها كمونية ساخنة من فوق.. وبصل أخضر وجرجير
............
هسه تفك ليهو الدرب وانجو بي جلدك دي لو قلتيها لأي واحد من الجالية العربية راح يقول الزولة دي ترطن؟
| |
|
|
|
|
|
|
| |
منصوري
Farahat Sayed
Yousif A Abusinina
فيس بوك
تويتر
انستقرام
يوتيوب
بنتيريست